৫. অনুতপ্পিযসুত্তং

১৫. তত্র খো আযস্মা সারিপুত্তো ভিক্খূ আমন্তেসি – ‘‘তথা তথাৰুসো, ভিক্খু ৰিহারং কপ্পেতি যথা যথাস্স ৰিহারং কপ্পযতো কালকিরিযা অনুতপ্পা হোতি. কথঞ্চাৰুসো, ভিক্খু তথা তথা ৰিহারং কপ্পেতি যথা যথাস্স ৰিহারং কপ্পযতো কালকিরিযা অনুতপ্পা হোতি?

‘‘ইধাৰুসো, ভিক্খু কম্মারামো হোতি কম্মরতো কম্মারামতং অনুযুত্তো, ভস্সারামো হোতি…পে… নিদ্দারামো হোতি… সঙ্গণিকারামো হোতি… সংসগ্গারামো হোতি… পপঞ্চারামো হোতি পপঞ্চরতো পপঞ্চারামতং অনুযুত্তো. এৰং খো, আৰুসো, ভিক্খু তথা তথা ৰিহারং কপ্পেতি যথা যথাস্স ৰিহারং কপ্পযতো কালকিরিযা অনুতপ্পা হোতি. অযং ৰুচ্চতাৰুসো – ‘ভিক্খু সক্কাযাভিরতো নপ্পজহাসি সক্কাযং সম্মা দুক্খস্স অন্তকিরিযায’’’.

‘‘তথা তথাৰুসো, ভিক্খু ৰিহারং কপ্পেতি যথা যথাস্স ৰিহারং কপ্পযতো কালকিরিযা অননুতপ্পা হোতি. কথঞ্চাৰুসো, ভিক্খু তথা তথা ৰিহারং কপ্পেতি যথা যথাস্স ৰিহারং কপ্পযতো কালকিরিযা অননুতপ্পা হোতি?

‘‘ইধাৰুসো, ভিক্খু ন কম্মারামো হোতি ন কম্মরতো ন কম্মারামতং অনুযুত্তো, ন ভস্সারামো হোতি…পে… ন নিদ্দারামো হোতি… ন সঙ্গণিকারামো হোতি… ন সংসগ্গারামো হোতি… ন পপঞ্চারামো হোতি ন পপঞ্চরতো ন পপঞ্চারামতং অনুযুত্তো. এৰং খো, আৰুসো, ভিক্খু তথা তথা ৰিহারং কপ্পেতি যথা যথাস্স ৰিহারং কপ্পযতো কালকিরিযা অননুতপ্পা হোতি. অযং ৰুচ্চতাৰুসো – ‘ভিক্খু নিব্বানাভিরতো পজহাসি সক্কাযং সম্মা দুক্খস্স অন্তকিরিযাযা’’’তি.

‘‘যো পপঞ্চমনুযুত্তো, পপঞ্চাভিরতো মগো;

ৰিরাধযী সো নিব্বানং, যোগক্খেমং অনুত্তরং.

‘‘যো চ পপঞ্চং হিত্ৰান, নিপ্পপঞ্চপদে রতো;

আরাধযী সো নিব্বানং, যোগক্খেমং অনুত্তর’’ন্তি. পঞ্চমং;