(২৫) ৫. দুচ্চরিতৰগ্গো

১. পঠমদুচ্চরিতসুত্তং

২৪১. ‘‘পঞ্চিমে, ভিক্খৰে, আদীনৰা দুচ্চরিতে. কতমে পঞ্চ? অত্তাপি অত্তানং উপৰদতি; অনুৰিচ্চ ৰিঞ্ঞূ গরহন্তি; পাপকো কিত্তিসদ্দো অব্ভুগ্গচ্ছতি; সম্মূল়্হো কালং করোতি; কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. ইমে খো, ভিক্খৰে, পঞ্চ আদীনৰা দুচ্চরিতে.

‘‘পঞ্চিমে, ভিক্খৰে, আনিসংসা সুচরিতে. কতমে পঞ্চ? অত্তাপি অত্তানং ন উপৰদতি; অনুৰিচ্চ ৰিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসম্মূল়্হো কালং করোতি; কাযস্স ভেদা পরং মরণা সুগতিং সগ্গং লোকং উপপজ্জতি. ইমে খো, ভিক্খৰে, পঞ্চ আনিসংসা সুচরিতে’’তি. পঠমং.

২. পঠমকাযদুচ্চরিতসুত্তং

২৪২. ‘‘পঞ্চিমে, ভিক্খৰে, আদীনৰা কাযদুচ্চরিতে…পে… আনিসংসা কাযসুচরিতে…পে…. দুতিযং.

৩. পঠমৰচীদুচ্চরিতসুত্তং

২৪৩. ‘‘পঞ্চিমে, ভিক্খৰে, আদীনৰা ৰচীদুচ্চরিতে…পে… আনিসংসা ৰচীসুচরিতে…পে…. ততিযং.

৪. পঠমমনোদুচ্চরিতসুত্তং

২৪৪. ‘‘পঞ্চিমে, ভিক্খৰে, আদীনৰা মনোদুচ্চরিতে…পে… আনিসংসা মনোসুচরিতে. কতমে পঞ্চ? অত্তাপি অত্তানং ন উপৰদতি; অনুৰিচ্চ ৰিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসম্মূল়্হো কালং করোতি; কাযস্স ভেদা পরং মরণা সুগতিং সগ্গং লোকং উপপজ্জতি. ইমে খো, ভিক্খৰে, পঞ্চ আনিসংসা মনোসুচরিতে’’তি. চতুত্থং.

৫. দুতিযদুচ্চরিতসুত্তং

২৪৫. ‘‘পঞ্চিমে, ভিক্খৰে, আদীনৰা দুচ্চরিতে. কতমে পঞ্চ? অত্তাপি অত্তানং উপৰদতি; অনুৰিচ্চ ৰিঞ্ঞূ গরহন্তি; পাপকো কিত্তিসদ্দো অব্ভুগ্গচ্ছতি; সদ্ধম্মা ৰুট্ঠাতি; অসদ্ধম্মে পতিট্ঠাতি. ইমে খো, ভিক্খৰে, পঞ্চ আদীনৰা দুচ্চরিতে.

‘‘পঞ্চিমে, ভিক্খৰে, আনিসংসা সুচরিতে. কতমে পঞ্চ? অত্তাপি অত্তানং ন উপৰদতি; অনুৰিচ্চ ৰিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসদ্ধম্মা ৰুট্ঠাতি; সদ্ধম্মে পতিট্ঠাতি. ইমে খো, ভিক্খৰে, পঞ্চ আনিসংসা সুচরিতে’’তি. পঞ্চমং.

৬. দুতিযকাযদুচ্চরিতসুত্তং

২৪৬. ‘‘পঞ্চিমে, ভিক্খৰে, আদীনৰা কাযদুচ্চরিতে…পে… আনিসংসা কাযসুচরিতে…পে…. ছট্ঠং.

৭. দুতিযৰচীদুচ্চরিতসুত্তং

২৪৭. ‘‘পঞ্চিমে, ভিক্খৰে, আদীনৰা ৰচীদুচ্চরিতে…পে… আনিসংসা ৰচীসুচরিতে…পে…. সত্তমং.

৮. দুতিযমনোদুচ্চরিতসুত্তং

২৪৮. ‘‘পঞ্চিমে, ভিক্খৰে, আদীনৰা মনোদুচ্চরিতে…পে… আনিসংসা মনোসুচরিতে. কতমে পঞ্চ? অত্তাপি অত্তানং ন উপৰদতি; অনুৰিচ্চ ৰিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসদ্ধম্মা ৰুট্ঠাতি; সদ্ধম্মে পতিট্ঠাতি. ইমে খো, ভিক্খৰে, পঞ্চ আনিসংসা মনোসুচরিতে’’তি. অট্ঠমং.

৯. সিৰথিকসুত্তং

২৪৯. ‘‘পঞ্চিমে, ভিক্খৰে, আদীনৰা সিৰথিকায [সীৰথিকায (সী. স্যা. কং. পী.)]. কতমে পঞ্চ? অসুচি, দুগ্গন্ধা, সপ্পটিভযা, ৰাল়ানং অমনুস্সানং আৰাসো, বহুনো জনস্স আরোদনা – ইমে খো, ভিক্খৰে, পঞ্চ আদীনৰা সিৰথিকায.

‘‘এৰমেৰং খো, ভিক্খৰে, পঞ্চিমে আদীনৰা সিৰথিকূপমে পুগ্গলে. কতমে পঞ্চ? ইধ, ভিক্খৰে, একচ্চো পুগ্গলো অসুচিনা কাযকম্মেন সমন্নাগতো হোতি; অসুচিনা ৰচীকম্মেন সমন্নাগতো হোতি; অসুচিনা মনোকম্মেন সমন্নাগতো হোতি. ইদমস্স অসুচিতায ৰদামি. সেয্যথাপি সা, ভিক্খৰে, সিৰথিকা অসুচি; তথূপমাহং, ভিক্খৰে, ইমং পুগ্গলং ৰদামি.

‘‘তস্স অসুচিনা কাযকম্মেন সমন্নাগতস্স, অসুচিনা ৰচীকম্মেন সমন্নাগতস্স, অসুচিনা মনোকম্মেন সমন্নাগতস্স পাপকো কিত্তিসদ্দো অব্ভুগ্গচ্ছতি. ইদমস্স দুগ্গন্ধতায ৰদামি. সেয্যথাপি সা, ভিক্খৰে, সিৰথিকা দুগ্গন্ধা; তথূপমাহং, ভিক্খৰে, ইমং পুগ্গলং ৰদামি.

‘‘তমেনং অসুচিনা কাযকম্মেন সমন্নাগতং, অসুচিনা ৰচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্রহ্মচারী আরকা পরিৰজ্জন্তি. ইদমস্স সপ্পটিভযস্মিং ৰদামি. সেয্যথাপি সা, ভিক্খৰে, সিৰথিকা সপ্পটিভযা; তথূপমাহং, ভিক্খৰে, ইমং পুগ্গলং ৰদামি.

‘‘সো অসুচিনা কাযকম্মেন সমন্নাগতো, অসুচিনা ৰচীকম্মেন সমন্নাগতো, অসুচিনা মনোকম্মেন সমন্নাগতো সভাগেহি পুগ্গলেহি সদ্ধিং সংৰসতি. ইদমস্স ৰাল়াৰাসস্মিং ৰদামি. সেয্যথাপি সা, ভিক্খৰে, সিৰথিকা ৰাল়ানং অমনুস্সানং আৰাসো; তথূপমাহং, ভিক্খৰে, ইমং পুগ্গলং ৰদামি.

‘‘তমেনং অসুচিনা কাযকম্মেন সমন্নাগতং, অসুচিনা ৰচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্রহ্মচারী দিস্ৰা খীযধম্মং [খীযনধম্মং (সী.)] আপজ্জন্তি – ‘অহো ৰত নো দুক্খং যে মযং এৰরূপেহি পুগ্গলেহি সদ্ধিং সংৰসামা’তি! ইদমস্স আরোদনায ৰদামি. সেয্যথাপি সা, ভিক্খৰে, সিৰথিকা বহুনো জনস্স আরোদনা; তথূপমাহং, ভিক্খৰে, ইমং পুগ্গলং ৰদামি. ইমে খো, ভিক্খৰে, পঞ্চ আদীনৰা সিৰথিকূপমে পুগ্গলে’’তি. নৰমং.

১০. পুগ্গলপ্পসাদসুত্তং

২৫০. ‘‘পঞ্চিমে, ভিক্খৰে, আদীনৰা পুগ্গলপ্পসাদে. কতমে পঞ্চ? যস্মিং, ভিক্খৰে, পুগ্গলে পুগ্গলো অভিপ্পসন্নো হোতি, সো তথারূপং আপত্তিং আপন্নো হোতি যথারূপায আপত্তিযা সঙ্ঘো উক্খিপতি. তস্স এৰং হোতি – ‘যো খো ম্যাযং পুগ্গলো পিযো মনাপো সো সঙ্ঘেন উক্খিত্তো’তি. ভিক্খূসু অপ্পসাদবহুলো হোতি. ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পরিহাযতি. অযং, ভিক্খৰে, পঠমো আদীনৰো পুগ্গলপ্পসাদে.

‘‘পুন চপরং, ভিক্খৰে, যস্মিং পুগ্গলে পুগ্গলো অভিপ্পসন্নো হোতি, সো তথারূপং আপত্তিং আপন্নো হোতি যথারূপায আপত্তিযা সঙ্ঘো অন্তে নিসীদাপেতি. তস্স এৰং হোতি – ‘যো খো ম্যাযং পুগ্গলো পিযো মনাপো সো সঙ্ঘেন অন্তে নিসীদাপিতো’তি. ভিক্খূসু অপ্পসাদবহুলো হোতি. ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পরিহাযতি. অযং, ভিক্খৰে, দুতিযো আদীনৰো পুগ্গলপ্পসাদে.

‘‘পুন চপরং, ভিক্খৰে, যস্মিং পুগ্গলে পুগ্গলো অভিপ্পসন্নো হোতি, সো দিসাপক্কন্তো হোতি…পে… সো ৰিব্ভন্তো হোতি…পে… সো কালঙ্কতো হোতি. তস্স এৰং হোতি – ‘যো খো ম্যাযং পুগ্গলো পিযো মনাপো সো কালঙ্কতো’তি. অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পরিহাযতি. অযং, ভিক্খৰে, পঞ্চমো আদীনৰো পুগ্গলপ্পসাদে. ইমে খো, ভিক্খৰে, পঞ্চ আদীনৰা পুগ্গলপ্পসাদে’’তি. দসমং.

দুচ্চরিতৰগ্গো পঞ্চমো.