৪. বহূপকারসুত্তং

২৩৪. ‘‘পঞ্চহি, ভিক্খৰে, ধম্মেহি সমন্নাগতো আৰাসিকো ভিক্খু আৰাসস্স বহূপকারো হোতি. কতমেহি পঞ্চহি? সীলৰা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৰিদ্ধা; খণ্ডফুল্লং পটিসঙ্খরোতি; মহা খো পন ভিক্খুসঙ্ঘো অভিক্কন্তো নানাৰেরজ্জকা ভিক্খূ গিহীনং উপসঙ্কমিত্ৰা আরোচেতি – ‘মহা খো, আৰুসো, ভিক্খুসঙ্ঘো অভিক্কন্তো নানাৰেরজ্জকা ভিক্খূ, করোথ পুঞ্ঞানি, সমযো পুঞ্ঞানি কাতু’ন্তি; চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী. ইমেহি খো, ভিক্খৰে, পঞ্চহি ধম্মেহি সমন্নাগতো আৰাসিকো ভিক্খু আৰাসস্স বহূপকারো হোতী’’তি. চতুত্থং.