১. অক্কোসকসুত্তং

২১১. ‘‘যো সো, ভিক্খৰে, ভিক্খু অক্কোসকপরিভাসকো অরিযূপৰাদী সব্রহ্মচারীনং, তস্স পঞ্চ আদীনৰা পাটিকঙ্খা. কতমে পঞ্চ? পারাজিকো ৰা হোতি ছিন্নপরিপন্থো [ছিন্নপরিবন্ধো (ক.)], অঞ্ঞতরং ৰা সংকিলিট্ঠং আপত্তিং আপজ্জতি, বাল়্হং ৰা রোগাতঙ্কং ফুসতি, সম্মূল়্হো কালং করোতি, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. যো সো, ভিক্খৰে, ভিক্খু অক্কোসকপরিভাসকো অরিযূপৰাদী সব্রহ্মচারীনং, তস্স ইমে পঞ্চ আদীনৰা পাটিকঙ্খা’’তি. পঠমং.