৯. গিহিসুত্তং

১৭৯. অথ খো অনাথপিণ্ডিকো গহপতি পঞ্চমত্তেহি উপাসকসতেহি পরিৰুতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. অথ খো ভগৰা আযস্মন্তং সারিপুত্তং আমন্তেসি – ‘‘যং কঞ্চি [যং কিঞ্চি (সী. পী.)], সারিপুত্ত, জানেয্যাথ গিহিং ওদাতৰসনং পঞ্চসু সিক্খাপদেসু সংৰুতকম্মন্তং চতুন্নং আভিচেতসিকানং দিট্ঠধম্মসুখৰিহারানং নিকামলাভিং অকিচ্ছলাভিং অকসিরলাভিং, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি.

‘‘কতমেসু পঞ্চসু সিক্খাপদেসু সংৰুতকম্মন্তো হোতি? ইধ, সারিপুত্ত, অরিযসাৰকো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, সুরামেরযমজ্জপমাদট্ঠানা পটিৰিরতো হোতি. ইমেসু পঞ্চসু সিক্খাপদেসু সংৰুতকম্মন্তো হোতি.

‘‘কতমেসং চতুন্নং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী? ইধ, সারিপুত্ত, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি, সত্থা দেৰমনুস্সানং বুদ্ধো ভগৰা’তি. অযমস্স পঠমো আভিচেতসিকো দিট্ঠধম্মসুখৰিহারো অধিগতো হোতি অৰিসুদ্ধস্স চিত্তস্স ৰিসুদ্ধিযা অপরিযোদাতস্স চিত্তস্স পরিযোদপনায.

‘‘পুন চপরং, সারিপুত্ত, অরিযসাৰকো ধম্মে অৰেচ্চপ্পসাদেন সমন্নাগতো হোতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি. অযমস্স দুতিযো আভিচেতসিকো দিট্ঠধম্মসুখৰিহারো অধিগতো হোতি অৰিসুদ্ধস্স চিত্তস্স ৰিসুদ্ধিযা অপরিযোদাতস্স চিত্তস্স পরিযোদপনায.

‘‘পুন চপরং, সারিপুত্ত, অরিযসাৰকো সঙ্ঘে অৰেচ্চপ্পসাদেন সমন্নাগতো হোতি – ‘সুপ্পটিপন্নো ভগৰতো সাৰকসঙ্ঘো উজুপ্পটিপন্নো ভগৰতো সাৰকসঙ্ঘো ঞাযপ্পটিপন্নো ভগৰতো সাৰকসঙ্ঘো সামীচিপ্পটিপন্নো ভগৰতো সাৰকসঙ্ঘো, যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’তি. অযমস্স ততিযো আভিচেতসিকো দিট্ঠধম্মসুখৰিহারো অধিগতো হোতি অৰিসুদ্ধস্স চিত্তস্স ৰিসুদ্ধিযা অপরিযোদাতস্স চিত্তস্স পরিযোদপনায.

‘‘পুন চপরং, সারিপুত্ত, অরিযসাৰকো অরিযকন্তেহি সীলেহি সমন্নাগতো হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসত্থেহি অপরামট্ঠেহি সমাধিসংৰত্তনিকেহি. অযমস্স চতুত্থো আভিচেতসিকো দিট্ঠধম্মসুখৰিহারো অধিগতো হোতি অৰিসুদ্ধস্স চিত্তস্স ৰিসুদ্ধিযা অপরিযোদাতস্স চিত্তস্স পরিযোদপনায. ইমেসং চতুন্নং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী.

‘‘যং কঞ্চি, সারিপুত্ত, জানেয্যাথ গিহিং ওদাতৰসনং – ইমেসু পঞ্চসু সিক্খাপদেসু সংৰুতকম্মন্তং, ইমেসঞ্চ চতুন্নং আভিচেতসিকানং দিট্ঠধম্মসুখৰিহারানং নিকামলাভিং অকিচ্ছলাভিং অকসিরলাভিং, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি.

‘‘নিরযেসু ভযং দিস্ৰা, পাপানি পরিৰজ্জযে;

অরিযধম্মং সমাদায, পণ্ডিতো পরিৰজ্জযে.

‘‘ন হিংসে পাণভূতানি, ৰিজ্জমানে পরক্কমে;

মুসা চ ন ভণে জানং, অদিন্নং ন পরামসে.

‘‘সেহি দারেহি সন্তুট্ঠো, পরদারঞ্চ আরমে [নারমে (সী. স্যা.)];

মেরযং ৰারুণিং জন্তু, ন পিৰে চিত্তমোহনিং.

‘‘অনুস্সরেয্য সম্বুদ্ধং, ধম্মঞ্চানুৰিতক্কযে;

অব্যাপজ্জং [অব্যাপজ্ঝং (?) অব্যাপজ্ঝং (ক.)] হিতং চিত্তং, দেৰলোকায ভাৰযে.

‘‘উপট্ঠিতে দেয্যধম্মে, পুঞ্ঞত্থস্স জিগীসতো [জিগিংসতো (সী. স্যা. কং. পী.)];

সন্তেসু পঠমং দিন্না, ৰিপুলা হোতি দক্খিণা.

‘‘সন্তো হৰে পৰক্খামি, সারিপুত্ত সুণোহি মে;

ইতি কণ্হাসু সেতাসু, রোহিণীসু হরীসু ৰা.

‘‘কম্মাসাসু সরূপাসু, গোসু পারেৰতাসু ৰা;

যাসু কাসুচি এতাসু, দন্তো জাযতি পুঙ্গৰো.

‘‘ধোরয্হো বলসম্পন্নো, কল্যাণজৰনিক্কমো;

তমেৰ ভারে যুঞ্জন্তি, নাস্স ৰণ্ণং পরিক্খরে.

‘‘এৰমেৰং মনুস্সেসু, যস্মিং কিস্মিঞ্চি জাতিযে;

খত্তিযে ব্রাহ্মণে ৰেস্সে, সুদ্দে চণ্ডালপুক্কুসে.

‘‘যাসু কাসুচি এতাসু, দন্তো জাযতি সুব্বতো;

ধম্মট্ঠো সীলসম্পন্নো, সচ্চৰাদী হিরীমনো.

‘‘পহীনজাতিমরণো, ব্রহ্মচরিযস্স কেৰলী;

পন্নভারো ৰিসংযুত্তো, কতকিচ্চো অনাসৰো.

‘‘পারগূ সব্বধম্মানং, অনুপাদায নিব্বুতো;

তস্মিঞ্চ ৰিরজে খেত্তে, ৰিপুলা হোতি দক্খিণা.

‘‘বালা চ অৰিজানন্তা, দুম্মেধা অস্সুতাৰিনো;

বহিদ্ধা দদন্তি দানানি, ন হি সন্তে উপাসরে.

‘‘যে চ সন্তে উপাসন্তি, সপ্পঞ্ঞে ধীরসম্মতে;

সদ্ধা চ নেসং সুগতে, মূলজাতা পতিট্ঠিতা.

‘‘দেৰলোকঞ্চ তে যন্তি, কুলে ৰা ইধ জাযরে;

অনুপুব্বেন নিব্বানং, অধিগচ্ছন্তি পণ্ডিতা’’তি. নৰমং;