১০. গৰেসীসুত্তং

১৮০. একং সমযং ভগৰা কোসলেসু চারিকং চরতি মহতা ভিক্খুসঙ্ঘেন সদ্ধিং. অদ্দসা খো ভগৰা অদ্ধানমগ্গপ্পটিপন্নো অঞ্ঞতরস্মিং পদেসে মহন্তং সালৰনং; দিস্ৰান [দিস্ৰা (সী. পী.)] মগ্গা ওক্কম্ম [উক্কম্ম (কত্থচি)] যেন তং সালৰনং তেনুপসঙ্কমি; উপসঙ্কমিত্ৰা তং সালৰনং অজ্ঝোগাহেত্ৰা অঞ্ঞতরস্মিং পদেসে সিতং পাত্ৰাকাসি.

অথ খো আযস্মতো আনন্দস্স এতদহোসি – ‘‘কো নু খো হেতু কো পচ্চযো ভগৰতো সিতস্স পাতুকম্মায? ন অকারণেন তথাগতা সিতং পাতুকরোন্তী’’তি. অথ খো আযস্মা আনন্দো ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো ভগৰতো সিতস্স পাতুকম্মায? ন অকারণেন তথাগতা সিতং পাতুকরোন্তী’’তি.

‘‘ভূতপুব্বং, আনন্দ, ইমস্মিং পদেসে নগরং অহোসি ইদ্ধঞ্চেৰ ফীতঞ্চ বহুজনং আকিণ্ণমনুস্সং. তং খো পনানন্দ, নগরং কস্সপো ভগৰা অরহং সম্মাসম্বুদ্ধো উপনিস্সায ৰিহাসি. কস্সপস্স খো পনানন্দ, ভগৰতো অরহতো সম্মাসম্বুদ্ধস্স গৰেসী নাম উপাসকো অহোসি সীলেসু অপরিপূরকারী. গৰেসিনা খো, আনন্দ, উপাসকেন পঞ্চমত্তানি উপাসকসতানি পটিদেসিতানি সমাদপিতানি [সমাদাপিতানি (?)] অহেসুং সীলেসু অপরিপূরকারিনো. অথ খো, আনন্দ, গৰেসিস্স উপাসকস্স এতদহোসি – ‘অহং খো ইমেসং পঞ্চন্নং উপাসকসতানং বহূপকারো [বহুকারো (কত্থচি)] পুব্বঙ্গমো সমাদপেতা [সমাদাপেতা (?)], অহঞ্চম্হি সীলেসু অপরিপূরকারী, ইমানি চ পঞ্চ উপাসকসতানি সীলেসু অপরিপূরকারিনো. ইচ্চেতং সমসমং, নত্থি কিঞ্চি অতিরেকং; হন্দাহং অতিরেকাযা’’’তি.

‘‘অথ খো, আনন্দ, গৰেসী উপাসকো যেন তানি পঞ্চ উপাসকসতানি তেনুপসঙ্কমি; উপসঙ্কমিত্ৰা তানি পঞ্চ উপাসকসতানি এতদৰোচ – ‘অজ্জতগ্গে মং আযস্মন্তো সীলেসু পরিপূরকারিং ধারেথা’তি! অথ খো, আনন্দ, তেসং পঞ্চন্নং উপাসকসতানং এতদহোসি – ‘অয্যো খো গৰেসী অম্হাকং বহূপকারো পুব্বঙ্গমো সমাদপেতা. অয্যো হি নাম গৰেসী সীলেসু পরিপূরকারী ভৰিস্সতি. কিমঙ্গং [কিমঙ্গ (সী. পী.)] পন ময’ন্তি [পন ন মযন্তি (সী.) অ. নি. ৪.১৫৯; চূল়ৰ. ৩৩০; সং. নি. ৫.১০২০ পাল়িযা সংসন্দেতব্বং]! অথ খো, আনন্দ, তানি পঞ্চ উপাসকসতানি যেন গৰেসী উপাসকো তেনুপসঙ্কমিংসু; উপসঙ্কমিত্ৰা গৰেসিং উপাসকং এতদৰোচুং – ‘অজ্জতগ্গে অয্যো গৰেসী ইমানিপি পঞ্চ উপাসকসতানি সীলেসু পরিপূরকারিনো ধারেতূ’তি. অথ খো, আনন্দ, গৰেসিস্স উপাসকস্স এতদহোসি – ‘অহং খো ইমেসং পঞ্চন্নং উপাসকসতানং বহূপকারো পুব্বঙ্গমো সমাদপেতা, অহঞ্চম্হি সীলেসু পরিপূরকারী, ইমানিপি পঞ্চ উপাসকসতানি সীলেসু পরিপূরকারিনো. ইচ্চেতং সমসমং, নত্থি কিঞ্চি অতিরেকং; হন্দাহং অতিরেকাযা’’’তি!

‘‘অথ খো, আনন্দ, গৰেসী উপাসকো যেন তানি পঞ্চ উপাসকসতানি তেনুপসঙ্কমি; উপসঙ্কমিত্ৰা তানি পঞ্চ উপাসকসতানি এতদৰোচ – ‘অজ্জতগ্গে মং আযস্মন্তো ব্রহ্মচারিং ধারেথ আরাচারি [অনাচারিং (পী.)] ৰিরতং মেথুনা গামধম্মা’তি. অথ খো, আনন্দ, তেসং পঞ্চন্নং উপাসকসতানং এতদহোসি – ‘অয্যো খো গৰেসী অম্হাকং বহূপকারো পুব্বঙ্গমো সমাদপেতা. অয্যো হি নাম গৰেসী ব্রহ্মচারী ভৰিস্সতি আরাচারী ৰিরতো মেথুনা গামধম্মা. কিমঙ্গং পন ময’ন্তি! অথ খো, আনন্দ, তানি পঞ্চ উপাসকসতানি যেন গৰেসী উপাসকো তেনুপসঙ্কমিংসু; উপসঙ্কমিত্ৰা গৰেসিং উপাসকং এতদৰোচুং – ‘অজ্জতগ্গে অয্যো গৰেসী ইমানিপি পঞ্চ উপাসকসতানি ব্রহ্মচারিনো ধারেতু আরাচারিনো ৰিরতা মেথুনা গামধম্মা’তি. অথ খো, আনন্দ, গৰেসিস্স উপাসকস্স এতদহোসি – ‘অহং খো ইমেসং পঞ্চন্নং উপাসকসতানং বহূপকারো পুব্বঙ্গমো সমাদপেতা. অহঞ্চম্হি সীলেসু পরিপূরকারী. ইমানিপি পঞ্চ উপাসকসতানি সীলেসু পরিপূরকারিনো. অহঞ্চম্হি ব্রহ্মচারী আরাচারী ৰিরতো মেথুনা গামধম্মা. ইমানিপি পঞ্চ উপাসকসতানি ব্রহ্মচারিনো আরাচারিনো ৰিরতা মেথুনা গামধম্মা. ইচ্চেতং সমসমং, নত্থি কিঞ্চি অতিরেকং; হন্দাহং অতিরেকাযা’’’তি.

‘‘অথ খো, আনন্দ, গৰেসী উপাসকো যেন তানি পঞ্চ উপাসকসতানি তেনুপসঙ্কমি; উপসঙ্কমিত্ৰা তানি পঞ্চ উপাসকসতানি এতদৰোচ – ‘অজ্জতগ্গে মং আযস্মন্তো একভত্তিকং ধারেথ রত্তূপরতং ৰিরতং ৰিকালভোজনা’তি. অথ খো, আনন্দ, তেসং পঞ্চন্নং উপাসকসতানং এতদহোসি – ‘অয্যো খো গৰেসী বহূপকারো পুব্বঙ্গমো সমাদপেতা. অয্যো হি নাম গৰেসী একভত্তিকো ভৰিস্সতি রত্তূপরতো ৰিরতো ৰিকালভোজনা. কিমঙ্গং পন ময’ন্তি! অথ খো, আনন্দ, তানি পঞ্চ উপাসকসতানি যেন গৰেসী উপাসকো তেনুপসঙ্কমিংসু; উপসঙ্কমিত্ৰা গৰেসিং উপাসকং এতদৰোচুং – ‘অজ্জতগ্গে অয্যো গৰেসী ইমানিপি পঞ্চ উপাসকসতানি একভত্তিকে ধারেতু রত্তূপরতে ৰিরতে ৰিকালভোজনা’তি. অথ খো, আনন্দ, গৰেসিস্স উপাসকস্স এতদহোসি – ‘অহং খো ইমেসং পঞ্চন্নং উপাসকসতানং বহূপকারো পুব্বঙ্গমো সমাদপেতা. অহঞ্চম্হি সীলেসু পরিপূরকারী. ইমানিপি পঞ্চ উপাসকসতানি সীলেসু পরিপূরকারিনো. অহঞ্চম্হি ব্রহ্মচারী আরাচারী ৰিরতো মেথুনা গামধম্মা. ইমানিপি পঞ্চ উপাসকসতানি ব্রহ্মচারিনো আরাচারিনো ৰিরতা মেথুনা গামধম্মা. অহঞ্চম্হি একভত্তিকো রত্তূপরতো ৰিরতো ৰিকালভোজনা. ইমানিপি পঞ্চ উপাসকসতানি একভত্তিকা রত্তূপরতা ৰিরতা ৰিকালভোজনা. ইচ্চেতং সমসমং, নত্থি কিঞ্চি অতিরেকং; হন্দাহং অতিরেকাযা’’’তি.

‘‘অথ খো, আনন্দ, গৰেসী উপাসকো যেন কস্সপো ভগৰা অরহং সম্মাসম্বুদ্ধো তেনুপসঙ্কমি; উপসঙ্কমিত্ৰা কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘লভেয্যাহং, ভন্তে, ভগৰতো সন্তিকে পব্বজ্জং লভেয্যং উপসম্পদ’ন্তি. অলত্থ খো, আনন্দ, গৰেসী উপাসকো কস্সপস্স ভগৰতো অরহতো সম্মাসম্বুদ্ধস্স সন্তিকে পব্বজ্জং, অলত্থ উপসম্পদং. অচিরূপসম্পন্নো খো পনানন্দ, গৰেসী ভিক্খু একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি. অঞ্ঞতরো চ পনানন্দ, গৰেসী ভিক্খু অরহতং অহোসি.

‘‘অথ খো, আনন্দ, তেস পঞ্চন্নং উপাসকসতানং এতদহোসি – ‘অয্যো খো গৰেসী অম্হাকং বহূপকারো পুব্বঙ্গমো সমাদপেতা. অয্যো হি নাম গৰেসী কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিস্সতি. কিমঙ্গং পন ময’ন্তি! অথ খো, আনন্দ, তানি পঞ্চ উপাসকসতানি যেন কস্সপো ভগৰা অরহং সম্মাসম্বুদ্ধো তেনুপসঙ্কমিংসু; উপসঙ্কমিত্ৰা কস্সপং ভগৰন্তং অরহন্তং সম্মাসম্বুদ্ধং এতদৰোচুং – ‘লভেয্যাম মযং, ভন্তে, ভগৰতো সন্তিকে পব্বজ্জং, লভেয্যাম উপসম্পদ’ন্তি. অলভিংসু খো, আনন্দ, তানি পঞ্চ উপাসকসতানি কস্সপস্স ভগৰতো অরহতো সম্মাসম্বুদ্ধস্স সন্তিকে পব্বজ্জং, অলভিংসু উপসম্পদং.

‘‘অথ খো, আনন্দ, গৰেসিস্স ভিক্খুনো এতদহোসি – ‘অহং খো ইমস্স অনুত্তরস্স ৰিমুত্তিসুখস্স নিকামলাভী হোমি অকিচ্ছলাভী অকসিরলাভী. অহো ৰতিমানিপি পঞ্চ ভিক্খুসতানি ইমস্স অনুত্তরস্স ৰিমুত্তিসুখস্স নিকামলাভিনো অস্সু অকিচ্ছলাভিনো অকসিরলাভিনো’তি. অথ খো, আনন্দ, তানি পঞ্চ ভিক্খুসতানি ৰূপকট্ঠা [ভিক্খুসতানি একেকা ৰূপকট্ঠা (স্যা. কং.)] অপ্পমত্তা আতাপিনো পহিতত্তা ৰিহরন্তা নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিংসু. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞিংসু’’.

‘‘ইতি খো, আনন্দ, তানি পঞ্চ ভিক্খুসতানি গৰেসীপমুখানি উত্তরুত্তরি [উত্তরুত্তরিং (সী. স্যা. কং. পী.)] পণীতপণীতং ৰাযমমানা অনুত্তরং ৰিমুত্তিং সচ্ছাকংসু. তস্মাতিহ, আনন্দ, এৰং সিক্খিতব্বং – ‘উত্তরুত্তরি পণীতপণীতং ৰাযমমানা অনুত্তরং ৰিমুত্তিং সচ্ছিকরিস্সামা’তি. এৰঞ্হি ৰো, আনন্দ, সিক্খিতব্ব’’ন্তি. দসমং.

উপাসকৰগ্গো ততিযো.