১০. ভদ্দজিসুত্তং

১৭০. একং সমযং আযস্মা আনন্দো কোসম্বিযং ৰিহরতি ঘোসিতারামে. অথ খো আযস্মা ভদ্দজি যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো আযস্মন্তং ভদ্দজিং আযস্মা আনন্দো এতদৰোচ – ‘‘কিং নু খো, আৰুসো ভদ্দজি, দস্সনানং অগ্গং, কিং সৰনানং অগ্গং, কিং সুখানং অগ্গং, কিং সঞ্ঞানং অগ্গং, কিং ভৰানং অগ্গ’’ন্তি?

‘‘অত্থাৰুসো, ব্রহ্মা অভিভূ অনভিভূতো অঞ্ঞদত্থুদসো ৰসৰত্তী, যো তং ব্রহ্মানং পস্সতি, ইদং দস্সনানং অগ্গং. অত্থাৰুসো, আভস্সরা নাম দেৰা সুখেন অভিসন্না পরিসন্না. তে কদাচি করহচি উদানং উদানেন্তি – ‘অহো সুখং, অহো সুখ’ন্তি! যো তং সদ্দং সুণাতি, ইদং সৰনানং অগ্গং. অত্থাৰুসো, সুভকিণ্হা নাম দেৰা. তে সন্তংযেৰ তুসিতা সুখং পটিৰেদেন্তি, ইদং সুখানং অগ্গং. অত্থাৰুসো, আকিঞ্চঞ্ঞাযতনূপগা দেৰা, ইদং সঞ্ঞানং অগ্গং. অত্থাৰুসো, নেৰসঞ্ঞানাসঞ্ঞাযতনূপগা দেৰা, ইদং ভৰানং অগ্গ’’ন্তি. ‘‘সমেতি খো ইদং আযস্মতো ভদ্দজিস্স, যদিদং বহুনা জনেনা’’তি?

‘‘আযস্মা খো, আনন্দো, বহুস্সুতো. পটিভাতু আযস্মন্তংযেৰ আনন্দ’’ন্তি. ‘‘তেনহাৰুসো ভদ্দজি, সুণাহি, সাধুকং মনসি করোহি; ভাসিস্সামী’’তি. ‘‘এৰমাৰুসো’’তি খো আযস্মা ভদ্দজি আযস্মতো আনন্দস্স পচ্চস্সোসি. আযস্মা আনন্দো এতদৰোচ –

‘‘যথা পস্সতো খো, আৰুসো, অনন্তরা আসৰানং খযো হোতি, ইদং দস্সনানং অগ্গং. যথা সুণতো অনন্তরা আসৰানং খযো হোতি, ইদং সৰনানং অগ্গং. যথা সুখিতস্স অনন্তরা আসৰানং খযো হোতি, ইদং সুখানং অগ্গং. যথা সঞ্ঞিস্স অনন্তরা আসৰানং খযো হোতি, ইদং সঞ্ঞানং অগ্গং. যথা ভূতস্স অনন্তরা আসৰানং খযো হোতি, ইদং ভৰানং অগ্গ’’ন্তি. দসমং.

আঘাতৰগ্গো দুতিযো.