৮. থেরসুত্তং

৮৮. ‘‘পঞ্চহি, ভিক্খৰে, ধম্মেহি সমন্নাগতো থেরো ভিক্খু বহুজনঅহিতায পটিপন্নো হোতি বহুজনঅসুখায বহুনো জনস্স অনত্থায অহিতায দুক্খায দেৰমনুস্সানং.

‘‘কতমেহি পঞ্চহি? থেরো হোতি রত্তঞ্ঞূ চিরপব্বজিতো; ঞাতো হোতি যসস্সী সগহট্ঠপব্বজিতানং [গহট্ঠপব্বজিতানং (সী.)] বহুজনপরিৰারো; লাভী হোতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা অপ্পটিৰিদ্ধা; মিচ্ছাদিট্ঠিকো হোতি ৰিপরীতদস্সনো, সো বহুজনং সদ্ধম্মা ৰুট্ঠাপেত্ৰা অসদ্ধম্মে পতিট্ঠাপেতি. থেরো ভিক্খু রত্তঞ্ঞূ চিরপব্বজিতো ইতিপিস্স দিট্ঠানুগতিং আপজ্জন্তি, ঞাতো থেরো ভিক্খু যসস্সী সগহট্ঠপব্বজিতানং বহুজনপরিৰারো ইতিপিস্স দিট্ঠানুগতিং আপজ্জন্তি, লাভী থেরো ভিক্খু চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং ইতিপিস্স দিট্ঠানুগতিং আপজ্জন্তি, বহুস্সুতো থেরো ভিক্খু সুতধরো সুতসন্নিচযো ইতিপিস্স দিট্ঠানুগতিং আপজ্জন্তি. ইমেহি খো, ভিক্খৰে, পঞ্চহি ধম্মেহি সমন্নাগতো থেরো ভিক্খু বহুজনঅহিতায পটিপন্নো হোতি বহুজনঅসুখায বহুনো জনস্স অনত্থায অহিতায দুক্খায দেৰমনুস্সানং.

‘‘পঞ্চহি, ভিক্খৰে, ধম্মেহি সমন্নাগতো থেরো ভিক্খু বহুজনহিতায পটিপন্নো হোতি বহুজনসুখায বহুনো জনস্স অত্থায হিতায সুখায দেৰমনুস্সানং.

‘‘কতমেহি পঞ্চহি? থেরো হোতি রত্তঞ্ঞূ চিরপব্বজিতো; ঞাতো হোতি যসস্সী সগহট্ঠপব্বজিতানং বহুজনপরিৰারো; লাভী হোতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা; সম্মাদিট্ঠিকো হোতি অৰিপরীতদস্সনো, সো বহুজনং অসদ্ধম্মা ৰুট্ঠাপেত্ৰা সদ্ধম্মে পতিট্ঠাপেতি. থেরো ভিক্খু রত্তঞ্ঞূ চিরপব্বজিতো ইতিপিস্স দিট্ঠানুগতিং আপজ্জন্তি, ঞাতো থেরো ভিক্খু যসস্সী সগহট্ঠপব্বজিতানং বহুজনপরিৰারো ইতিপিস্স দিট্ঠানুগতিং আপজ্জন্তি, লাভী থেরো ভিক্খু চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং ইতিপিস্স দিট্ঠানুগতিং আপজ্জন্তি, বহুস্সুতো থেরো ভিক্খু সুতধরো সুতসন্নিচযো ইতিপিস্স দিট্ঠানুগতিং আপজ্জন্তি. ইমেহি খো, ভিক্খৰে, পঞ্চহি ধম্মেহি সমন্নাগতো থেরো ভিক্খু বহুজনহিতায পটিপন্নো হোতি বহুজনসুখায বহুনো জনস্স অত্থায হিতায সুখায দেৰমনুস্সান’’ন্তি. অট্ঠমং.