৪. সুমনৰগ্গো

১. সুমনসুত্তং

৩১. একং সমযং…পে… অনাথপিণ্ডিকস্স আরামে. অথ খো সুমনা রাজকুমারী পঞ্চহি রথসতেহি পঞ্চহি রাজকুমারিসতেহি পরিৰুতা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্না খো সুমনা রাজকুমারী ভগৰন্তং এতদৰোচ –

‘‘ইধস্সু, ভন্তে, ভগৰতো দ্ৰে সাৰকা সমসদ্ধা সমসীলা সমপঞ্ঞা – একো দাযকো, একো অদাযকো. তে কাযস্স ভেদা পরং মরণা সুগতিং সগ্গং লোকং উপপজ্জেয্যুং. দেৰভূতানং পন নেসং [তেসং (সী.)], ভন্তে, সিযা ৰিসেসো, সিযা নানাকরণ’’ন্তি?

‘‘সিযা, সুমনে’’তি ভগৰা অৰোচ – ‘‘যো সো, সুমনে, দাযকো সো অমুং অদাযকং দেৰভূতো সমানো পঞ্চহি ঠানেহি অধিগণ্হাতি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন. যো সো, সুমনে, দাযকো সো অমুং অদাযকং দেৰভূতো সমানো ইমেহি পঞ্চহি ঠানেহি অধিগণ্হাতি’’.

‘‘সচে পন তে, ভন্তে, ততো চুতা ইত্থত্তং আগচ্ছন্তি, মনুস্সভূতানং পন নেসং, ভন্তে, সিযা ৰিসেসো, সিযা নানাকরণ’’ন্তি? ‘‘সিযা, সুমনে’’তি ভগৰা অৰোচ – ‘‘যো সো, সুমনে, দাযকো সো অমুং অদাযকং মনুস্সভূতো সমানো পঞ্চহি ঠানেহি অধিগণ্হাতি – মানুসকেন আযুনা, মানুসকেন ৰণ্ণেন, মানুসকেন সুখেন, মানুসকেন যসেন, মানুসকেন আধিপতেয্যেন. যো সো, সুমনে, দাযকো সো অমুং অদাযকং মনুস্সভূতো সমানো ইমেহি পঞ্চহি ঠানেহি অধিগণ্হাতি’’.

‘‘সচে পন তে, ভন্তে, উভো অগারস্মা অনগারিযং পব্বজন্তি, পব্বজিতানং পন নেসং, ভন্তে, সিযা ৰিসেসো, সিযা নানাকরণ’’ন্তি? ‘‘সিযা, সুমনে’’তি ভগৰা অৰোচ – ‘‘যো সো, সুমনে, দাযকো সো অমুং অদাযকং পব্বজিতো সমানো পঞ্চহি ঠানেহি অধিগণ্হাতি – যাচিতোৰ বহুলং চীৰরং পরিভুঞ্জতি অপ্পং অযাচিতো, যাচিতোৰ বহুলং পিণ্ডপাতং পরিভুঞ্জতি অপ্পং অযাচিতো, যাচিতোৰ বহুলং সেনাসনং পরিভুঞ্জতি অপ্পং অযাচিতো, যাচিতোৰ বহুলং গিলানপ্পচ্চযভেসজ্জপরিক্খারং পরিভুঞ্জতি অপ্পং অযাচিতো. যেহি খো পন সব্রহ্মচারীহি সদ্ধিং ৰিহরতি ত্যস্স মনাপেনেৰ বহুলং কাযকম্মেন সমুদাচরন্তি অপ্পং অমনাপেন, মনাপেনেৰ বহুলং ৰচীকম্মেন সমুদাচরন্তি অপ্পং অমনাপেন, মনাপেনেৰ বহুলং মনোকম্মেন সমুদাচরন্তি অপ্পং অমনাপেন, মনাপংযেৰ বহুলং উপহারং উপহরন্তি অপ্পং অমনাপং. যো সো, সুমনে, দাযকো সো অমুং অদাযকং পব্বজিতো সমানো ইমেহি পঞ্চহি ঠানেহি অধিগণ্হাতী’’তি.

‘‘সচে পন তে, ভন্তে, উভো অরহত্তং পাপুণন্তি, অরহত্তপ্পত্তানং পন নেসং, ভন্তে, সিযা ৰিসেসো, সিযা নানাকরণ’’ন্তি? ‘‘এত্থ খো পনেসাহং, সুমনে, ন কিঞ্চি নানাকরণং ৰদামি, যদিদং ৰিমুত্তিযা ৰিমুত্তি’’ন্তি [ৰিমুত্তন্তি (স্যা. কং.)].

‘‘অচ্ছরিযং, ভন্তে, অব্ভুতং, ভন্তে! যাৰঞ্চিদং, ভন্তে, অলমেৰ দানানি দাতুং অলং পুঞ্ঞানি কাতুং; যত্র হি নাম দেৰভূতস্সাপি উপকারানি পুঞ্ঞানি, মনুস্সভূতস্সাপি উপকারানি পুঞ্ঞানি, পব্বজিতস্সাপি উপকারানি পুঞ্ঞানী’’তি. ‘‘এৰমেতং, সুমনে! অলঞ্হি, সুমনে, দানানি দাতুং অলং পুঞ্ঞানি কাতুং! দেৰভূতস্সাপি উপকারানি পুঞ্ঞানি, মনুস্সভূতস্সাপি উপকারানি পুঞ্ঞানি, পব্বজিতস্সাপি উপকারানি পুঞ্ঞানী’’তি.

ইদমৰোচ ভগৰা. ইদং ৰত্ৰান [ইদং ৰত্ৰা (সী. পী.) এৰমুপরিপি] সুগতো অথাপরং এতদৰোচ সত্থা –

‘‘যথাপি চন্দো ৰিমলো, গচ্ছং আকাসধাতুযা;

সব্বে তারাগণে লোকে, আভায অতিরোচতি.

‘‘তথেৰ সীলসম্পন্নো, সদ্ধো পুরিসপুগ্গলো;

সব্বে মচ্ছরিনো লোকে, চাগেন অতিরোচতি.

‘‘যথাপি মেঘো থনযং, ৰিজ্জুমালী সতক্ককু;

থলং নিন্নঞ্চ পূরেতি, অভিৰস্সং ৰসুন্ধরং.

‘‘এৰং দস্সনসম্পন্নো, সম্মাসম্বুদ্ধসাৰকো;

মচ্ছরিং অধিগণ্হাতি, পঞ্চঠানেহি পণ্ডিতো.

‘‘আযুনা যসসা চেৰ [আযুনা চ যসেন চ (ক.)], ৰণ্ণেন চ সুখেন চ;

স ৰে ভোগপরিব্যূল়্হো [ভোগপরিব্বূল়্হো (সী.)], পেচ্চ সগ্গে পমোদতী’’তি. পঠমং;

২. চুন্দীসুত্তং

৩২. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো চুন্দী রাজকুমারী পঞ্চহি রথসতেহি পঞ্চহি চ কুমারিসতেহি পরিৰুতা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্না খো চুন্দী রাজকুমারী ভগৰন্তং এতদৰোচ –

‘‘অম্হাকং, ভন্তে, ভাতা চুন্দো নাম রাজকুমারো, সো এৰমাহ – ‘যদেৰ সো হোতি ইত্থী ৰা পুরিসো ৰা বুদ্ধং সরণং গতো, ধম্মং সরণং গতো, সঙ্ঘং সরণং গতো, পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো, সো কাযস্স ভেদা পরং মরণা সুগতিংযেৰ উপপজ্জতি, নো দুগ্গতি’ন্তি. সাহং, ভন্তে, ভগৰন্তং পুচ্ছামি – ‘কথংরূপে খো, ভন্তে, সত্থরি পসন্নো কাযস্স ভেদা পরং মরণা সুগতিংযেৰ উপপজ্জতি, নো দুগ্গতিং? কথংরূপে ধম্মে পসন্নো কাযস্স ভেদা পরং মরণা সুগতিংযেৰ উপপজ্জতি, নো দুগ্গতিং? কথংরূপে সঙ্ঘে পসন্নো কাযস্স ভেদা পরং মরণা সুগতিংযেৰ উপপজ্জতি, নো দুগ্গতিং? কথংরূপেসু সীলেসু পরিপূরকারী কাযস্স ভেদা পরং মরণা সুগতিংযেৰ উপপজ্জতি, নো দুগ্গতি’’’ন্তি?

‘‘যাৰতা, চুন্দি, সত্তা অপদা ৰা দ্ৰিপদা ৰা চতুপ্পদা ৰা বহুপ্পদা ৰা [অপাদা ৰা দ্ৰীপাদা ৰাচতুপ্পাদা ৰা বহুপ্পাদা ৰা (সী.) অ. নি. ৪.৩৪; ইতিৰু. ৯০] রূপিনো ৰা অরূপিনো ৰা সঞ্ঞিনো ৰা অসঞ্ঞিনো ৰা নেৰসঞ্ঞিনাসঞ্ঞিনো ৰা, তথাগতো তেসং অগ্গমক্খাযতি অরহং সম্মাসম্বুদ্ধো. যে খো, চুন্দি, বুদ্ধে পসন্না, অগ্গে তে পসন্না. অগ্গে খো পন পসন্নানং অগ্গো ৰিপাকো হোতি.

‘‘যাৰতা, চুন্দি, ধম্মা সঙ্খতা, অরিযো অট্ঠঙ্গিকো মগ্গো তেসং অগ্গমক্খাযতি. যে, চুন্দি, অরিযে অট্ঠঙ্গিকে মগ্গে পসন্না, অগ্গে তে পসন্না, অগ্গে খো পন পসন্নানং অগ্গো ৰিপাকো হোতি.

‘‘যাৰতা, চুন্দি, ধম্মা সঙ্খতা ৰা অসঙ্খতা ৰা, ৰিরাগো তেসং [তেসং ধম্মানং (সী. পী. ক.)] অগ্গমক্খাযতি, যদিদং – মদনিম্মদনো পিপাসৰিনযো আলযসমুগ্ঘাতো ৰট্টুপচ্ছেদো তণ্হাক্খযো ৰিরাগো নিরোধো নিব্বানং. যে খো, চুন্দি, ৰিরাগে ধম্মে পসন্না, অগ্গে তে পসন্না. অগ্গে খো পন পসন্নানং অগ্গো ৰিপাকো হোতি.

‘‘যাৰতা, চুন্দি, সঙ্ঘা ৰা গণা ৰা, তথাগতসাৰকসঙ্ঘো তেসং অগ্গমক্খাযতি, যদিদং – চত্তারি পুরিসযুগানি অট্ঠ পুরিসপুগ্গলা, এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স. যে খো, চুন্দি, সঙ্ঘে পসন্না, অগ্গে তে পসন্না. অগ্গে খো পন পসন্নানং অগ্গো ৰিপাকো হোতি.

‘‘যাৰতা, চুন্দি, সীলানি, অরিযকন্তানি সীলানি তেসং [অরিযকন্তানিতেসং (সী. স্যা. কং.)] অগ্গমক্খাযতি, যদিদং – অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপ্পসত্থানি অপরামট্ঠানি সমাধিসংৰত্তনিকানি. যে খো, চুন্দি, অরিযকন্তেসু সীলেসু পরিপূরকারিনো, অগ্গে তে পরিপূরকারিনো. অগ্গে খো পন পরিপূরকারীনং অগ্গো ৰিপাকো হোতী’’তি.

‘‘অগ্গতো ৰে পসন্নানং, অগ্গং ধম্মং ৰিজানতং;

অগ্গে বুদ্ধে পসন্নানং, দক্খিণেয্যে অনুত্তরে.

‘‘অগ্গে ধম্মে পসন্নানং, ৰিরাগূপসমে সুখে;

অগ্গে সঙ্ঘে পসন্নানং, পুঞ্ঞক্খেত্তে অনুত্তরে.

‘‘অগ্গস্মিং দানং দদতং, অগ্গং পুঞ্ঞং পৰড্ঢতি;

অগ্গং আযু চ ৰণ্ণো চ, যসো কিত্তি সুখং বলং.

‘‘অগ্গস্স দাতা মেধাৰী, অগ্গধম্মসমাহিতো;

দেৰভূতো মনুস্সো ৰা, অগ্গপ্পত্তো পমোদতী’’তি. দুতিযং;

৩. উগ্গহসুত্তং

৩৩. একং সমযং ভগৰা ভদ্দিযে ৰিহরতি জাতিযা ৰনে. অথ খো উগ্গহো মেণ্ডকনত্তা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো উগ্গহো মেণ্ডকনত্তা ভগৰন্তং এতদৰোচ –

‘‘অধিৰাসেতু মে, ভন্তে, ভগৰা স্ৰাতনায অত্তচতুত্থো ভত্ত’’ন্তি. অধিৰাসেসি ভগৰা তুণ্হীভাৰেন. অথ খো উগ্গহো মেণ্ডকনত্তা ভগৰতো অধিৰাসনং ৰিদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি.

অথ খো ভগৰা তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন উগ্গহস্স মেণ্ডকনত্তুনো নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো উগ্গহো মেণ্ডকনত্তা ভগৰন্তং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো উগ্গহো মেণ্ডকনত্তা ভগৰন্তং ভুত্তাৰিং ওনীতপত্তপাণিং একমন্তং নিসীদি. একমন্তং নিসিন্নো খো উগ্গহো মেণ্ডকনত্তা ভগৰন্তং এতদৰোচ – ‘‘ইমা মে, ভন্তে, কুমারিযো পতিকুলানি গমিস্সন্তি. ওৰদতু তাসং, ভন্তে, ভগৰা; অনুসাসতু তাসং, ভন্তে, ভগৰা, যং তাসং অস্স দীঘরত্তং হিতায সুখাযা’’তি.

অথ খো ভগৰা তা কুমারিযো এতদৰোচ – ‘‘তস্মাতিহ, কুমারিযো, এৰং সিক্খিতব্বং – ‘যস্স ৰো [যস্স খো (সী. স্যা. কং.)] মাতাপিতরো ভত্তুনো দস্সন্তি অত্থকামা হিতেসিনো অনুকম্পকা অনুকম্পং উপাদায, তস্স ভৰিস্সাম পুব্বুট্ঠাযিনিযো পচ্ছানিপাতিনিযো কিংকারপটিস্সাৰিনিযো মনাপচারিনিযো পিযৰাদিনিযো’তি. এৰঞ্হি ৰো, কুমারিযো, সিক্খিতব্বং.

‘‘তস্মাতিহ, কুমারিযো, এৰং সিক্খিতব্বং – ‘যে তে ভত্তু গরুনো [গুরুনো (ক.)] ভৰিস্সন্তি মাতাতি ৰা পিতাতি ৰা সমণব্রাহ্মণাতি ৰা, তে সক্করিস্সাম গরুং করিস্সাম [গরুকরিস্সাম (সী. স্যা. কং. পী.)] মানেস্সাম পূজেস্সাম অব্ভাগতে চ আসনোদকেন পটিপূজেস্সামা’তি [পূজেস্সামাতি (সী.)]. এৰঞ্হি ৰো, কুমারিযো, সিক্খিতব্বং.

‘‘তস্মাতিহ, কুমারিযো, এৰং সিক্খিতব্বং – ‘যে তে ভত্তু অব্ভন্তরা কম্মন্তা উণ্ণাতি ৰা কপ্পাসাতি ৰা, তত্থ দক্খা ভৰিস্সাম অনলসা, তত্রুপাযায ৰীমংসায সমন্নাগতা, অলং কাতুং অলং সংৰিধাতু’ন্তি. এৰঞ্হি ৰো, কুমারিযো, সিক্খিতব্বং.

‘‘তস্মাতিহ, কুমারিযো, এৰং সিক্খিতব্বং – ‘যো সো ভত্তু অব্ভন্তরো [অব্ভন্তরে (ক.)] অন্তোজনো দাসাতি ৰা পেস্সাতি ৰা কম্মকরাতি ৰা, তেসং কতঞ্চ কততো জানিস্সাম অকতঞ্চ অকততো জানিস্সাম, গিলানকানঞ্চ বলাবলং জানিস্সাম, খাদনীযং ভোজনীযঞ্চস্স পচ্চংসেন [পচ্চযং তেন (ক. সী.), পচ্চযংসেন (স্যা. কং.), পচ্চযং সেনাসনং পচ্চত্তংসেন (ক.) অ. নি. ৮.৪৬] সংৰিভজিস্সামা’তি [ৰিভজিস্সামাতি (সী. স্যা. কং.)]. এৰঞ্হি ৰো, কুমারিযো, সিক্খিতব্বং.

‘‘তস্মাতিহ, কুমারিযো, এৰং সিক্খিতব্বং – ‘যং ভত্তা আহরিস্সতি ধনং ৰা ধঞ্ঞং ৰা রজতং ৰা জাতরূপং ৰা, তং আরক্খেন [তং আরক্খায (সী.)] গুত্তিযা সম্পাদেস্সাম, তত্থ চ ভৰিস্সাম অধুত্তী অথেনী অসোণ্ডী অৰিনাসিকাযো’তি. এৰঞ্হি ৰো, কুমারিযো, সিক্খিতব্বং. ইমেহি খো, কুমারিযো, পঞ্চহি ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতী’’তি.

‘‘যো নং ভরতি সব্বদা, নিচ্চং আতাপি উস্সুকো;

সব্বকামহরং পোসং, ভত্তারং নাতিমঞ্ঞতি.

‘‘ন চাপি সোত্থি ভত্তারং, ইস্সাচারেন [ইচ্ছাচারেন (সী.), ইস্সাৰাদেন (পী.)] রোসযে;

ভত্তু চ গরুনো সব্বে, পটিপূজেতি পণ্ডিতা.

‘‘উট্ঠাহিকা [উট্ঠাযিকা (স্যা. কং. ক.)] অনলসা, সঙ্গহিতপরিজ্জনা;

ভত্তু মনাপং [মনাপা (সী.)] চরতি, সম্ভতং অনুরক্খতি.

‘‘যা এৰং ৰত্ততী নারী, ভত্তুছন্দৰসানুগা;

মনাপা নাম তে দেৰা, যত্থ সা উপপজ্জতী’’তি. ততিযং;

৪. সীহসেনাপতিসুত্তং

৩৪. একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো সীহো সেনাপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সীহো সেনাপতি ভগৰন্তং এতদৰোচ – ‘‘সক্কা নু খো, ভন্তে, ভগৰা সন্দিট্ঠিকং দানফলং পঞ্ঞাপেতু’’ন্তি?

‘‘সক্কা, সীহা’’তি ভগৰা অৰোচ – ‘‘দাযকো, সীহ, দানপতি বহুনো জনস্স পিযো হোতি মনাপো. যম্পি, সীহ, দাযকো দানপতি বহুনো জনস্স পিযো হোতি মনাপো, ইদম্পি সন্দিট্ঠিকং দানফলং.

‘‘পুন চপরং, সীহ, দাযকং দানপতিং সন্তো সপ্পুরিসা ভজন্তি. যম্পি, সীহ, দাযকং দানপতিং সন্তো সপ্পুরিসা ভজন্তি, ইদম্পি সন্দিট্ঠিকং দানফলং.

‘‘পুন চপরং, সীহ, দাযকস্স দানপতিনো কল্যাণো কিত্তিসদ্দো অব্ভুগ্গচ্ছতি. যম্পি, সীহ, দাযকস্স দানপতিনো কল্যাণো কিত্তিসদ্দো অব্ভুগ্গচ্ছতি, ইদম্পি সন্দিট্ঠিকং দানফলং.

‘‘পুন চপরং, সীহ, দাযকো দানপতি যং যদেৰ পরিসং উপসঙ্কমতি – যদি খত্তিযপরিসং যদি ব্রাহ্মণপরিসং যদি গহপতিপরিসং যদি সমণপরিসং – ৰিসারদো [ৰিসারদোৰ (সী.) অ. নি. ৭.৫৭ পস্সিতব্বং] উপসঙ্কমতি অমঙ্কুভূতো. যম্পি, সীহ, দাযকো দানপতি যং যদেৰ পরিসং উপসঙ্কমতি – যদি খত্তিযপরিসং যদি ব্রাহ্মণপরিসং যদি গহপতিপরিসং যদি সমণপরিসং – ৰিসারদো উপসঙ্কমতি অমঙ্কুভূতো, ইদম্পি সন্দিট্ঠিকং দানফলং.

‘‘পুন চপরং, সীহ, দাযকো দানপতি কাযস্স ভেদা পরং মরণা সুগতিং সগ্গং লোকং উপপজ্জতি. যম্পি, সীহ, দাযকো দানপতি কাযস্স ভেদা পরং মরণা সুগতিং সগ্গং লোকং উপপজ্জতি, ইদং [ইদম্পি সীহ (ক.)] সম্পরাযিকং দানফল’’ন্তি.

এৰং ৰুত্তে সীহো সেনাপতি ভগৰন্তং এতদৰোচ – ‘‘যানিমানি, ভন্তে, ভগৰতা চত্তারি সন্দিট্ঠিকানি দানফলানি অক্খাতানি, নাহং এত্থ ভগৰতো সদ্ধায গচ্ছামি; অহং পেতানি জানামি. অহং, ভন্তে, দাযকো দানপতি বহুনো জনস্স পিযো মনাপো. অহং, ভন্তে, দাযকো দানপতি; মং সন্তো সপ্পুরিসা ভজন্তি. অহং, ভন্তে, দাযকো দানপতি; ময্হং কল্যাণো কিত্তিসদ্দো অব্ভুগ্গতো – ‘সীহো সেনাপতি দাযকো কারকো সঙ্ঘুপট্ঠাকো’তি. অহং, ভন্তে, দাযকো দানপতি যং যদেৰ পরিসং উপসঙ্কমামি – যদি খত্তিযপরিসং যদি ব্রাহ্মণপরিসং যদি গহপতিপরিসং যদি সমণপরিসং – ৰিসারদো উপসঙ্কমামি অমঙ্কুভূতো. যানিমানি, ভন্তে, ভগৰতা চত্তারি সন্দিট্ঠিকানি দানফলানি অক্খাতানি, নাহং এত্থ ভগৰতো সদ্ধায গচ্ছামি; অহং পেতানি জানামি. যঞ্চ খো মং, ভন্তে, ভগৰা এৰমাহ – ‘দাযকো, সীহ, দানপতি কাযস্স ভেদা পরং মরণা সুগতিং সগ্গং লোকং উপপজ্জতী’তি, এতাহং ন জানামি; এত্থ চ পনাহং ভগৰতো সদ্ধায গচ্ছামী’’তি. ‘‘এৰমেতং, সীহ, এৰমেতং, সীহ! দাযকো দানপতি কাযস্স ভেদা পরং মরণা সুগতিং সগ্গং লোকং উপপজ্জতী’’তি.

‘‘দদং পিযো হোতি ভজন্তি নং বহূ,

কিত্তিঞ্চ পপ্পোতি যসো চ ৰড্ঢতি [যসস্স ৰড্ঢতি (স্যা. কং.), যসং পৰড্ঢতি (ক.)];

অমঙ্কুভূতো পরিসং ৰিগাহতি,

ৰিসারদো হোতি নরো অমচ্ছরী.

‘‘তস্মা হি দানানি দদন্তি পণ্ডিতা,

ৰিনেয্য মচ্ছেরমলং সুখেসিনো;

তে দীঘরত্তং তিদিৰে পতিট্ঠিতা,

দেৰানং সহব্যগতা রমন্তি তে [সহব্যতং গতা রমন্তি (সী.), সহব্যতা রমন্তি তে (ক.)].

‘‘কতাৰকাসা কতকুসলা ইতো চুতা [ততো চুতা (সী.)],

সযংপভা অনুৰিচরন্তি নন্দনং [নন্দনে (স্যা. কং.)];

তে তত্থ নন্দন্তি রমন্তি মোদরে,

সমপ্পিতা কামগুণেহি পঞ্চহি;

‘‘কত্ৰান ৰাক্যং অসিতস্স তাদিনো,

রমন্তি সগ্গে [রমন্তি সুমনা (ক.), কমন্তি সব্বে (স্যা. কং.)] সুগতস্স সাৰকা’’তি. চতুত্থং;

৫. দানানিসংসসুত্তং

৩৫. ‘‘পঞ্চিমে, ভিক্খৰে, দানে আনিসংসা. কতমে পঞ্চ? বহুনো জনস্স পিযো হোতি মনাপো; সন্তো সপ্পুরিসা ভজন্তি; কল্যাণো কিত্তিসদ্দো অব্ভুগ্গচ্ছতি; গিহিধম্মা অনপগতো [গিহিধম্মা অনপেতো (সী. পী.), গিহিধম্মমনুপগতো (ক.)] হোতি; কাযস্স ভেদা পরং মরণা সুগতিং সগ্গং লোকং উপপজ্জতি. ইমে খো, ভিক্খৰে, পঞ্চ দানে আনিসংসা’’তি.

‘‘দদমানো পিযো হোতি, সতং ধম্মং অনুক্কমং;

সন্তো নং সদা ভজন্তি [সন্তো ভজন্তি সপ্পুরিসা (সী.)], সঞ্ঞতা ব্রহ্মচারযো.

‘‘তে তস্স ধম্মং দেসেন্তি, সব্বদুক্খাপনূদনং;

যং সো ধম্মং ইধঞ্ঞায, পরিনিব্বাতি অনাসৰো’’তি. পঞ্চমং;

৬. কালদানসুত্তং

৩৬. ‘‘পঞ্চিমানি, ভিক্খৰে, কালদানানি. কতমানি পঞ্চ? আগন্তুকস্স দানং দেতি; গমিকস্স দানং দেতি; গিলানস্স দানং দেতি; দুব্ভিক্খে দানং দেতি; যানি তানি নৰসস্সানি নৰফলানি তানি পঠমং সীলৰন্তেসু পতিট্ঠাপেতি. ইমানি খো, ভিক্খৰে, পঞ্চ কালদানানী’’তি.

‘‘কালে দদন্তি সপ্পঞ্ঞা, ৰদঞ্ঞূ ৰীতমচ্ছরা;

কালেন দিন্নং অরিযেসু, উজুভূতেসু তাদিসু.

‘‘ৰিপ্পসন্নমনা তস্স, ৰিপুলা হোতি দক্খিণা;

যে তত্থ অনুমোদন্তি, ৰেয্যাৰচ্চং করোন্তি ৰা;

ন তেন [ন তেসং (পী. ক.)] দক্খিণা ঊনা, তেপি পুঞ্ঞস্স ভাগিনো.

‘‘তস্মা দদে অপ্পটিৰানচিত্তো, যত্থ দিন্নং মহপ্ফলং;

পুঞ্ঞানি পরলোকস্মিং, পতিট্ঠা হোন্তি পাণিন’’ন্তি. ছট্ঠং;

৯. ভোজনসুত্তং

৩৭. ‘‘ভোজনং, ভিক্খৰে, দদমানো দাযকো পটিগ্গাহকানং পঞ্চ ঠানানি দেতি. কতমানি পঞ্চ? আযুং দেতি, ৰণ্ণং দেতি, সুখং দেতি, বলং দেতি, পটিভানং [পটিভাণং (সী.)] দেতি. আযুং খো পন দত্ৰা আযুস্স ভাগী হোতি দিব্বস্স ৰা মানুসস্স ৰা; ৰণ্ণং দত্ৰা ৰণ্ণস্স ভাগী হোতি দিব্বস্স ৰা মানুসস্স ৰা; সুখং দত্ৰা সুখস্স ভাগী হোতি দিব্বস্স ৰা মানুসস্স ৰা; বলং দত্ৰা বলস্স ভাগী হোতি দিব্বস্স ৰা মানুসস্স ৰা; পটিভানং দত্ৰা পটিভানস্স ভাগী হোতি দিব্বস্স ৰা মানুসস্স ৰা. ভোজনং, ভিক্খৰে, দদমানো দাযকো পটিগ্গাহকানং ইমানি পঞ্চ ঠানানি দেতী’’তি.

‘‘আযুদো বলদো ধীরো, ৰণ্ণদো পটিভানদো;

সুখস্স দাতা মেধাৰী, সুখং সো অধিগচ্ছতি.

‘‘আযুং দত্ৰা বলং ৰণ্ণং, সুখঞ্চ পটিভানকং [পটিভাণকং (সী.), পটিভানদো (স্যা. কং. পী. ক.)];

দীঘাযু যসৰা হোতি, যত্থ যত্থূপপজ্জতী’’তি. সত্তমং;

৮. সদ্ধসুত্তং

৩৮. ‘‘পঞ্চিমে, ভিক্খৰে, সদ্ধে কুলপুত্তে আনিসংসা. কতমে পঞ্চ? যে তে, ভিক্খৰে, লোকে সন্তো সপ্পুরিসা তে সদ্ধঞ্ঞেৰ পঠমং অনুকম্পন্তা অনুকম্পন্তি, নো তথা অস্সদ্ধং; সদ্ধঞ্ঞেৰ পঠমং উপসঙ্কমন্তা উপসঙ্কমন্তি, নো তথা অস্সদ্ধং; সদ্ধঞ্ঞেৰ পঠমং পটিগ্গণ্হন্তা পটিগ্গণ্হন্তি, নো তথা অস্সদ্ধং; সদ্ধঞ্ঞেৰ পঠমং ধম্মং দেসেন্তা দেসেন্তি, নো তথা অস্সদ্ধং; সদ্ধো কাযস্স ভেদা পরং মরণা সুগতিং সগ্গং লোকং উপপজ্জতি. ইমে খো, ভিক্খৰে, পঞ্চ সদ্ধে কুলপুত্তে আনিসংসা.

‘‘সেয্যথাপি, ভিক্খৰে, সুভূমিযং চতুমহাপথে মহানিগ্রোধো সমন্তা পক্খীনং পটিসরণং হোতি; এৰমেৰং খো, ভিক্খৰে, সদ্ধো কুলপুত্তো বহুনো জনস্স পটিসরণং হোতি ভিক্খূনং ভিক্খুনীনং উপাসকানং উপাসিকান’’ন্তি.

‘‘সাখাপত্তফলূপেতো [সাখাপত্তবহুপেতো (কত্থচি), সাখাপত্তপলাসূপেতো (?)], খন্ধিমাৰ [খন্ধিমা চ (সী.)] মহাদুমো;

মূলৰা ফলসম্পন্নো, পতিট্ঠা হোতি পক্খিনং.

‘‘মনোরমে আযতনে, সেৰন্তি নং ৰিহঙ্গমা;

ছাযং ছাযত্থিকা [ছাযত্থিনো (সী.)] যন্তি, ফলত্থা ফলভোজিনো.

‘‘তথেৰ সীলসম্পন্নং, সদ্ধং পুরিসপুগ্গলং;

নিৰাতৰুত্তিং অত্থদ্ধং, সোরতং সখিলং মুদুং.

‘‘ৰীতরাগা ৰীতদোসা, ৰীতমোহা অনাসৰা;

পুঞ্ঞক্খেত্তানি লোকস্মিং, সেৰন্তি তাদিসং নরং.

‘‘তে তস্স ধম্মং দেসেন্তি, সব্বদুক্খাপনূদনং;

যং সো ধম্মং ইধঞ্ঞায, পরিনিব্বাতি অনাসৰো’’তি. অট্ঠমং;

৯. পুত্তসুত্তং

৩৯. ‘‘পঞ্চিমানি, ভিক্খৰে, ঠানানি সম্পস্সন্তা মাতাপিতরো পুত্তং ইচ্ছন্তি কুলে জাযমানং. কতমানি পঞ্চ? ভতো ৰা নো ভরিস্সতি; কিচ্চং ৰা নো করিস্সতি; কুলৰংসো চিরং ঠস্সতি; দাযজ্জং পটিপজ্জিস্সতি; অথ ৰা পন পেতানং কালঙ্কতানং দক্খিণং অনুপ্পদস্সতীতি. ইমানি খো, ভিক্খৰে, পঞ্চ ঠানানি সম্পস্সন্তা মাতাপিতরো পুত্তং ইচ্ছন্তি কুলে জাযমান’’ন্তি.

[কথা. ৪৯১] ‘‘পঞ্চ ঠানানি সম্পস্সং, পুত্তং ইচ্ছন্তি পণ্ডিতা;

ভতো ৰা নো ভরিস্সতি, কিচ্চং ৰা নো করিস্সতি.

‘‘কুলৰংসো চিরং তিট্ঠে, দাযজ্জং পটিপজ্জতি;

অথ ৰা পন পেতানং, দক্খিণং অনুপ্পদস্সতি.

‘‘ঠানানেতানি সম্পস্সং, পুত্তং ইচ্ছন্তি পণ্ডিতা;

তস্মা সন্তো সপ্পুরিসা, কতঞ্ঞূ কতৰেদিনো.

‘‘ভরন্তি মাতাপিতরো, পুব্বে কতমনুস্সরং;

করোন্তি নেসং কিচ্চানি, যথা তং পুব্বকারিনং.

‘‘ওৰাদকারী ভতপোসী, কুলৰংসং অহাপযং;

সদ্ধো সীলেন সম্পন্নো, পুত্তো হোতি পসংসিযো’’তি. নৰমং;

১০. মহাসালপুত্তসুত্তং

৪০. ‘‘হিমৰন্তং, ভিক্খৰে, পব্বতরাজং নিস্সায মহাসালা পঞ্চহি ৰড্ঢীহি ৰড্ঢন্তি. কতমাহি পঞ্চহি? সাখাপত্তপলাসেন ৰড্ঢন্তি; তচেন ৰড্ঢন্তি; পপটিকায ৰড্ঢন্তি; ফেগ্গুনা ৰড্ঢন্তি; সারেন ৰড্ঢন্তি. হিমৰন্তং, ভিক্খৰে, পব্বতরাজং নিস্সায মহাসালা ইমাহি পঞ্চহি ৰড্ঢীহি ৰড্ঢন্তি. এৰমেৰং খো, ভিক্খৰে, সদ্ধং কুলপুত্তং নিস্সায অন্তোজনো পঞ্চহি ৰড্ঢীহি ৰড্ঢতি. কতমাহি পঞ্চহি? সদ্ধায ৰড্ঢতি; সীলেন ৰড্ঢতি; সুতেন ৰড্ঢতি; চাগেন ৰড্ঢতি; পঞ্ঞায ৰড্ঢতি. সদ্ধং, ভিক্খৰে, কুলপুত্তং নিস্সায অন্তোজনো ইমাহি পঞ্চহি ৰড্ঢীহি ৰড্ঢতী’’তি.

‘‘যথা হি পব্বতো সেলো, অরঞ্ঞস্মিং ব্রহাৰনে;

তং রুক্খা উপনিস্সায, ৰড্ঢন্তে তে ৰনপ্পতী.

‘‘তথেৰ সীলসম্পন্নং, সদ্ধং কুলপুত্তং ইমং [কুলপতিং ইধ (সী.), কুলপুত্তং ইধ (স্যা.)];

উপনিস্সায ৰড্ঢন্তি, পুত্তদারা চ বন্ধৰা;

অমচ্চা ঞাতিসঙ্ঘা চ, যে চস্স অনুজীৰিনো.

‘‘ত্যস্স সীলৰতো সীলং, চাগং সুচরিতানি চ;

পস্সমানানুকুব্বন্তি, যে ভৰন্তি ৰিচক্খণা.

‘‘ইমং ধম্মং চরিত্ৰান, মগ্গং [সগ্গং (স্যা. ক.)] সুগতিগামিনং;

নন্দিনো দেৰলোকস্মিং, মোদন্তি কামকামিনো’’তি. দসমং;

সুমনৰগ্গো চতুত্থো.