৮. পরিহানিসুত্তং

১৫৮. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘যো হি কোচি, আৰুসো, ভিক্খু ৰা ভিক্খুনী ৰা চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘পরিহাযামি কুসলেহি ধম্মেহি’. পরিহানমেতং ৰুত্তং ভগৰতা. কতমে চত্তারো? রাগৰেপুল্লত্তং [রাগৰেপুল্লতং (সী. স্যা. কং. পী.)], দোসৰেপুল্লত্তং, মোহৰেপুল্লত্তং, গম্ভীরেসু খো পনস্স ঠানাঠানেসু পঞ্ঞাচক্খু ন কমতি. যো হি কোচি, আৰুসো, ভিক্খু ৰা ভিক্খুনী ৰা ইমে চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘পরিহাযামি কুসলেহি ধম্মেহি’. পরিহানমেতং ৰুত্তং ভগৰতা.

‘‘যো হি কোচি, আৰুসো, ভিক্খু ৰা ভিক্খুনী ৰা চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘ন পরিহাযামি কুসলেহি ধম্মেহি’. অপরিহানমেতং ৰুত্তং ভগৰতা. কতমে চত্তারো? রাগতনুত্তং [রাগতনুত্তনং (ক.)], দোসতনুত্তং, মোহতনুত্তং, গম্ভীরেসু খো পনস্স ঠানাঠানেসু পঞ্ঞাচক্খু কমতি. যো হি কোচি, আৰুসো, ভিক্খু ৰা ভিক্খুনী ৰা ইমে চত্তারো ধম্মে অত্তনি সমনুপস্সতি, নিট্ঠমেত্থ গন্তব্বং – ‘ন পরিহাযামি কুসলেহি ধম্মেহি’. অপরিহানমেতং ৰুত্তং ভগৰতা’’তি. অট্ঠমং.