৭. দুতিযসীলসুত্তং

১৩৭. ‘‘চত্তারোমে, ভিক্খৰে, পুগ্গলা সন্তো সংৰিজ্জমানা লোকস্মিং. কতমে চত্তারো? ইধ, ভিক্খৰে, একচ্চো পুগ্গলো ন সীলগরু হোতি ন সীলাধিপতেয্যো, ন সমাধিগরু হোতি ন সমাধাধিপতেয্যো, ন পঞ্ঞাগরু হোতি ন পঞ্ঞাধিপতেয্যো.

‘‘ইধ পন, ভিক্খৰে, একচ্চো পুগ্গলো সীলগরু হোতি সীলাধিপতেয্যো, ন সমাধিগরু হোতি ন সমাধাধিপতেয্যো, ন পঞ্ঞাগরু হোতি ন পঞ্ঞাধিপতেয্যো.

‘‘ইধ পন, ভিক্খৰে, একচ্চো পুগ্গলো সীলগরু হোতি সীলাধিপতেয্যো, সমাধিগরু হোতি সমাধাধিপতেয্যো, ন পঞ্ঞাগরু হোতি ন পঞ্ঞাধিপতেয্যো.

‘‘ইধ পন, ভিক্খৰে, একচ্চো পুগ্গলো সীলগরু হোতি সীলাধিপতেয্যো, সমাধিগরু হোতি সমাধাধিপতেয্যো, পঞ্ঞাগরু হোতি পঞ্ঞাধিপতেয্যো. ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মি’’ন্তি. সত্তমং.