৭. আরক্খসুত্তং

১১৭. ‘‘চতূসু, ভিক্খৰে, ঠানেসু অত্তরূপেন অপ্পমাদো সতি চেতসো আরক্খো করণীযো. কতমেসু চতূসু? ‘মা মে রজনীযেসু ধম্মেসু চিত্তং রজ্জী’তি অত্তরূপেন অপ্পমাদো সতি চেতসো আরক্খো করণীযো; ‘মা মে দোসনীযেসু ধম্মেসু চিত্তং দুস্সী’তি অত্তরূপেন অপ্পমাদো সতি চেতসো আরক্খো করণীযো; ‘মা মে মোহনীযেসু ধম্মেসু চিত্তং মুয্হী’তি অত্তরূপেন অপ্পমাদো সতি চেতসো আরক্খো করণীযো; ‘মা মে মদনীযেসু ধম্মেসু চিত্তং মজ্জী’তি অত্তরূপেন অপ্পমাদো সতি চেতসো আরক্খো করণীযো.

‘‘যতো খো, ভিক্খৰে, ভিক্খুনো রজনীযেসু ধম্মেসু চিত্তং ন রজ্জতি ৰীতরাগত্তা, দোসনীযেসু ধম্মেসু চিত্তং ন দুস্সতি ৰীতদোসত্তা, মোহনীযেসু ধম্মেসু চিত্তং ন মুয্হতি ৰীতমোহত্তা, মদনীযেসু ধম্মেসু চিত্তং ন মজ্জতি ৰীতমদত্তা, সো ন ছম্ভতি ন কম্পতি ন ৰেধতি ন সন্তাসং আপজ্জতি, ন চ পন সমণৰচনহেতুপি গচ্ছতী’’তি. সত্তমং.