৯. পধানসুত্তং

৬৯. ‘‘চত্তারিমানি, ভিক্খৰে, পধানানি. কতমানি চত্তারি? সংৰরপ্পধানং, পহানপ্পধানং, ভাৰনাপ্পধানং, অনুরক্খণাপ্পধানং. কতমঞ্চ, ভিক্খৰে, সংৰরপ্পধানং? ইধ, ভিক্খৰে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইদং ৰুচ্চতি, ভিক্খৰে, সংৰরপ্পধানং.

‘‘কতমঞ্চ, ভিক্খৰে, পহানপ্পধানং? ইধ, ভিক্খৰে, ভিক্খু উপ্পন্নানং পাপকানং অকুসলানং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইদং ৰুচ্চতি, ভিক্খৰে, পহানপ্পধানং.

‘‘কতমঞ্চ, ভিক্খৰে, ভাৰনাপ্পধানং? ইধ, ভিক্খৰে, ভিক্খু অনুপ্পন্নানং কুসলানং ধম্মানং উপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইদং ৰুচ্চতি, ভিক্খৰে, ভাৰনাপ্পধানং.

‘‘কতমঞ্চ, ভিক্খৰে, অনুরক্খণাপ্পধানং? ইধ, ভিক্খৰে, ভিক্খু উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইদং ৰুচ্চতি, ভিক্খৰে, অনুরক্খণাপ্পধানং. ইমানি খো, ভিক্খৰে, চত্তারি পধানানী’’তি.

‘‘সংৰরো চ পহানঞ্চ, ভাৰনা অনুরক্খণা;

এতে পধানা চত্তারো, দেসিতাদিচ্চবন্ধুনা;

যো হি [যেহি (?)] ভিক্খু ইধাতাপী, খযং দুক্খস্স পাপুণে’’তি. নৰমং;