৭. অহিরাজসুত্তং

৬৭. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সাৰত্থিযং অঞ্ঞতরো ভিক্খু অহিনা দট্ঠো কালঙ্কতো হোতি. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, সাৰত্থিযং অঞ্ঞতরো ভিক্খু অহিনা দট্ঠো কালঙ্কতো’’তি.

‘‘ন হি নূন [ন হ নূন (সী. স্যা. কং. পী.)] সো, ভিক্খৰে, ভিক্খু চত্তারি অহিরাজকুলানি মেত্তেন চিত্তেন ফরি. সচে হি সো, ভিক্খৰে, ভিক্খু চত্তারি অহিরাজকুলানি মেত্তেন চিত্তেন ফরেয্য, ন হি সো, ভিক্খৰে, ভিক্খু অহিনা দট্ঠো কালঙ্করেয্য.

‘‘কতমানি চত্তারি? ৰিরূপক্খং অহিরাজকুলং, এরাপথং অহিরাজকুলং, ছব্যাপুত্তং অহিরাজকুলং, কণ্হাগোতমকং অহিরাজকুলং. ন হি নূন সো, ভিক্খৰে, ভিক্খু ইমানি চত্তারি অহিরাজকুলানি মেত্তেন চিত্তেন ফরি. সচে হি সো, ভিক্খৰে, ভিক্খু ইমানি চত্তারি অহিরাজকুলানি মেত্তেন চিত্তেন ফরেয্য, ন হি সো, ভিক্খৰে, ভিক্খু অহিনা দট্ঠো কালঙ্করেয্য.

‘‘অনুজানামি, ভিক্খৰে, ইমানি চত্তারি অহিরাজকুলানি মেত্তেন চিত্তেন ফরিতুং অত্তগুত্তিযা অত্তরক্খায অত্তপরিত্তাযা’’তি.

[চূল়ৰ. ২৫১; জা. ১.২.১০৫ পস্সিতব্বং] ‘‘ৰিরূপক্খেহি মে মেত্তং, মেত্তং এরাপথেহি মে;

ছব্যাপুত্তেহি মে মেত্তং, মেত্তং কণ্হাগোতমকেহি চ.

‘‘অপাদকেহি মে মেত্তং, মেত্তং দ্ৰিপাদকেহি [দিপাদকেহি (সী. স্যা. কং. পী.)] মে;

চতুপ্পদেহি মে মেত্তং, মেত্তং বহুপ্পদেহি মে.

‘‘মা মং অপাদকো হিংসি, মা মং হিংসি দ্ৰিপাদকো [দিপাদকো (সী. স্যা. কং. পী.)];

মা মং চতুপ্পদো হিংসি, মা মং হিংসি বহুপ্পদো.

‘‘সব্বে সত্তা সব্বে পাণা, সব্বে ভূতা চ কেৰলা;

সব্বে ভদ্রানি পস্সন্তু, মা কঞ্চি [কিঞ্চি (স্যা. কং. ক.)] পাপমাগমা.

‘‘অপ্পমাণো বুদ্ধো, অপ্পমাণো ধম্মো;

অপ্পমাণো সঙ্ঘো, পমাণৰন্তানি সরীসপানি [সিরিংসপানি (সী. স্যা. কং. পী.)].

‘‘অহিৰিচ্ছিকা সতপদী, উণ্ণনাভী সরবূ মূসিকা;

কতা মে রক্খা কতা মে পরিত্তা [কতং মে পরিত্তং (?)], পটিক্কমন্তু ভূতানি;

সোহং নমো ভগৰতো, নমো সত্তন্নং সম্মাসম্বুদ্ধান’’ন্তি. সত্তমং;