৪. দুতিযসংৰাসসুত্তং

৫৪. ‘‘চত্তারোমে, ভিক্খৰে, সংৰাসা. কতমে চত্তারো? ছৰো ছৰায সদ্ধিং সংৰসতি, ছৰো দেৰিযা সদ্ধিং সংৰসতি, দেৰো ছৰায সদ্ধিং সংৰসতি, দেৰো দেৰিযা সদ্ধিং সংৰসতি.

‘‘কথঞ্চ, ভিক্খৰে, ছৰো ছৰায সদ্ধিং সংৰসতি. ইধ, ভিক্খৰে, সামিকো হোতি পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচো ফরুসৰাচো সম্ফপ্পলাপী অভিজ্ঝালু ব্যাপন্নচিত্তো মিচ্ছাদিট্ঠিকো দুস্সীলো পাপধম্মো মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসকপরিভাসকো সমণব্রাহ্মণানং; ভরিযাপিস্স হোতি পাণাতিপাতিনী অদিন্নাদাযিনী কামেসুমিচ্ছাচারিনী মুসাৰাদিনী পিসুণৰাচা ফরুসৰাচা সম্ফপ্পলাপিনী অভিজ্ঝালুনী ব্যাপন্নচিত্তা মিচ্ছাদিট্ঠিকা দুস্সীলা পাপধম্মা মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসিকপরিভাসিকা সমণব্রাহ্মণানং. এৰং খো, ভিক্খৰে, ছৰো ছৰায সদ্ধিং সংৰসতি.

‘‘কথঞ্চ, ভিক্খৰে, ছৰো দেৰিযা সদ্ধিং সংৰসতি? ইধ, ভিক্খৰে, সামিকো হোতি পাণাতিপাতী…পে… মিচ্ছাদিট্ঠিকো দুস্সীলো পাপধম্মো মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসকপরিভাসকো সমণব্রাহ্মণানং; ভরিযা খ্ৰস্স হোতি পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা পিসুণায ৰাচায পটিৰিরতা ফরুসায ৰাচায পটিৰিরতা সম্ফপ্পলাপা পটিৰিরতা অনভিজ্ঝালুনী অব্যাপন্নচিত্তা সম্মাদিট্ঠিকা সীলৰতী কল্যাণধম্মা ৰিগতমলমচ্ছেরেন চেতসা অগারং অজ্ঝাৰসতি অনক্কোসিকপরিভাসিকা সমণব্রাহ্মণানং. এৰং খো, ভিক্খৰে, ছৰো দেৰিযা সদ্ধিং সংৰসতি.

‘‘কথঞ্চ, ভিক্খৰে, দেৰো ছৰায সদ্ধিং সংৰসতি? ইধ, ভিক্খৰে, সামিকো হোতি পাণাতিপাতা পটিৰিরতো অদিন্নাদানা পটিৰিরতো কামেসুমিচ্ছাচারা পটিৰিরতো মুসাৰাদা পটিৰিরতো পিসুণায ৰাচায পটিৰিরতো ফরুসায ৰাচায পটিৰিরতো সম্ফপ্পলাপা পটিৰিরতো অনভিজ্ঝালু অব্যাপন্নচিত্তো সম্মাদিট্ঠিকো সীলৰা কল্যাণধম্মো ৰিগতমলমচ্ছেরেন চেতসা অগারং অজ্ঝাৰসতি অনক্কোসকপরিভাসকো সমণব্রাহ্মণানং; ভরিযা খ্ৰস্স হোতি পাণাতিপাতিনী…পে… মিচ্ছাদিট্ঠিকা দুস্সীলা পাপধম্মা মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসিকপরিভাসিকা সমণব্রাহ্মণানং. এৰং খো, ভিক্খৰে, দেৰো ছৰায সদ্ধিং সংৰসতি.

‘‘কথঞ্চ, ভিক্খৰে, দেৰো দেৰিযা সদ্ধিং সংৰসতি? ইধ, ভিক্খৰে, সামিকো হোতি পাণাতিপাতা পটিৰিরতো…পে… সম্মাদিট্ঠিকো সীলৰা কল্যাণধম্মো ৰিগতমলমচ্ছেরেন চেতসা অগারং অজ্ঝাৰসতি অনক্কোসকপরিভাসকো সমণব্রাহ্মণানং; ভরিযাপিস্স হোতি পাণাতিপাতা পটিৰিরতা…পে… সম্মাদিট্ঠিকা সীলৰতী কল্যাণধম্মা ৰিগতমলমচ্ছেরেন চেতসা অগারং অজ্ঝাৰসতি অনক্কোসিকপরিভাসিকা সমণব্রাহ্মণানং. এৰং খো, ভিক্খৰে, দেৰো দেৰিযা সদ্ধিং সংৰসতি. ইমে খো, ভিক্খৰে, চত্তারো সংৰাসা’’তি.

‘‘উভো চ হোন্তি দুস্সীলা, কদরিযা পরিভাসকা;

তে হোন্তি জানিপতযো, ছৰা সংৰাসমাগতা.

‘‘সামিকো হোতি দুস্সীলো, কদরিযো পরিভাসকো;

ভরিযা সীলৰতী হোতি, ৰদঞ্ঞূ ৰীতমচ্ছরা;

সাপি দেৰী সংৰসতি, ছৰেন পতিনা সহ.

‘‘সামিকো সীলৰা হোতি, ৰদঞ্ঞূ ৰীতমচ্ছরো;

ভরিযা হোতি দুস্সীলা, কদরিযা পরিভাসিকা;

সাপি ছৰা সংৰসতি, দেৰেন পতিনা সহ.

‘‘উভো সদ্ধা ৰদঞ্ঞূ চ, সঞ্ঞতা ধম্মজীৰিনো;

তে হোন্তি জানিপতযো, অঞ্ঞমঞ্ঞং পিযংৰদা.

‘‘অত্থাসং পচুরা হোন্তি, ফাসুকং উপজাযতি;

অমিত্তা দুম্মনা হোন্তি, উভিন্নং সমসীলিনং.

‘‘ইধ ধম্মং চরিত্ৰান, সমসীলব্বতা উভো;

নন্দিনো দেৰলোকস্মিং, মোদন্তি কামকামিনো’’তি. চতুত্থং;