৫. পঠমসমজীৰীসুত্তং

৫৫. এৰং মে সুতং – একং সমযং ভগৰা ভগ্গেসু ৰিহরতি সুসুমারগিরে [সুংসুমারগিরে (সী. স্যা. কং. পী.)] ভেসকল়াৰনে [ভেসকলাৰনে (সী. পী. ক.)] মিগদাযে. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন নকুলপিতুনো গহপতিস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো নকুলপিতা চ গহপতি নকুলমাতা চ গহপতানী যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নো খো নকুলপিতা গহপতি ভগৰন্তং এতদৰোচ –

‘‘যতো মে, ভন্তে, নকুলমাতা গহপতানী দহরস্সেৰ দহরা আনীতা, নাভিজানামি নকুলমাতরং গহপতানিং মনসাপি অতিচরিতা, কুতো পন কাযেন! ইচ্ছেয্যাম মযং, ভন্তে, দিট্ঠে চেৰ ধম্মে অঞ্ঞমঞ্ঞং পস্সিতুং অভিসম্পরাযঞ্চ অঞ্ঞমঞ্ঞং পস্সিতু’’ন্তি. নকুলমাতাপি খো গহপতানী ভগৰন্তং এতদৰোচ – ‘‘যতোহং, ভন্তে, নকুলপিতুনো গহপতিস্স দহরস্সেৰ দহরা আনীতা, নাভিজানামি নকুলপিতরং গহপতিং মনসাপি অতিচরিতা, কুতো পন কাযেন! ইচ্ছেয্যাম মযং, ভন্তে, দিট্ঠে চেৰ ধম্মে অঞ্ঞমঞ্ঞং পস্সিতুং অভিসম্পরাযঞ্চ অঞ্ঞমঞ্ঞং পস্সিতু’’ন্তি.

‘‘আকঙ্খেয্যুং চে, গহপতযো, উভো জানিপতযো দিট্ঠে চেৰ ধম্মে অঞ্ঞমঞ্ঞং পস্সিতুং অভিসম্পরাযঞ্চ অঞ্ঞমঞ্ঞং পস্সিতুং উভোৰ [উভো চ (সী. পী.)] অস্সু সমসদ্ধা সমসীলা সমচাগা সমপঞ্ঞা, তে দিট্ঠে চেৰ ধম্মে অঞ্ঞমঞ্ঞং পস্সন্তি অভিসম্পরাযঞ্চ অঞ্ঞমঞ্ঞং পস্সন্তী’’তি [পস্সিস্সন্তীতি (ক.)].

‘‘উভো সদ্ধা ৰদঞ্ঞূ চ, সঞ্ঞতা ধম্মজীৰিনো;

তে হোন্তি জানিপতযো, অঞ্ঞমঞ্ঞং পিযংৰদা.

‘‘অত্থাসং পচুরা হোন্তি, ফাসুকং উপজাযতি;

অমিত্তা দুম্মনা হোন্তি, উভিন্নং সমসীলিনং.

‘‘ইধ ধম্মং চরিত্ৰান, সমসীলব্বতা উভো;

নন্দিনো দেৰলোকস্মিং, মোদন্তি কামকামিনো’’তি. পঞ্চমং;