৩. পঠমসংৰাসসুত্তং

৫৩. একং সমযং ভগৰা অন্তরা চ মধুরং অন্তরা চ ৰেরঞ্জং অদ্ধানমগ্গপ্পটিপন্নো হোতি. সম্বহুলাপি খো গহপতী চ গহপতানিযো চ অন্তরা চ মধুরং অন্তরা চ ৰেরঞ্জং অদ্ধানমগ্গপ্পটিপন্না হোন্তি. অথ খো ভগৰা মগ্গা ওক্কম্ম অঞ্ঞতরস্মিং রুক্খমূলে ( ) [(পঞ্ঞত্তে আসনে) (পী. ক.)] নিসীদি. অদ্দসংসু খো গহপতী চ গহপতানিযো চ ভগৰন্তং অঞ্ঞতরস্মিং রুক্খমূলে নিসিন্নং. দিস্ৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নে খো তে গহপতী চ গহপতানিযো চ ভগৰা এতদৰোচ –

‘‘চত্তারোমে, গহপতযো, সংৰাসা. কতমে চত্তারো? ছৰো ছৰায সদ্ধিং সংৰসতি, ছৰো দেৰিযা সদ্ধিং সংৰসতি, দেৰো ছৰায সদ্ধিং সংৰসতি, দেৰো দেৰিযা সদ্ধিং সংৰসতি.

‘‘কথঞ্চ, গহপতযো, ছৰো ছৰায সদ্ধিং সংৰসতি? ইধ, গহপতযো, সামিকো হোতি পাণাতিপাতী অদিন্নাদাযী কামেসুমিচ্ছাচারী মুসাৰাদী সুরামেরযমজ্জপমাদট্ঠাযী দুস্সীলো পাপধম্মো মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসকপরিভাসকো সমণব্রাহ্মণানং; ভরিযাপিস্স হোতি পাণাতিপাতিনী অদিন্নাদাযিনী কামেসুমিচ্ছাচারিনী মুসাৰাদিনী সুরামেরযমজ্জপমাদট্ঠাযিনী দুস্সীলা পাপধম্মা মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসিকপরিভাসিকা সমণব্রাহ্মণানং. এৰং খো, গহপতযো, ছৰো ছৰায সদ্ধিং সংৰসতি.

‘‘কথঞ্চ, গহপতযো, ছৰো দেৰিযা সদ্ধিং সংৰসতি? ইধ, গহপতযো, সামিকো হোতি পাণাতিপাতী অদিন্নাদাযী কামেসুমিচ্ছাচারী মুসাৰাদী সুরামেরযমজ্জপমাদট্ঠাযী দুস্সীলো পাপধম্মো মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসকপরিভাসকো সমণব্রাহ্মণানং; ভরিযা খ্ৰস্স হোতি পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা সুরামেরযমজ্জপমাদট্ঠানা পটিৰিরতা সীলৰতী কল্যাণধম্মা ৰিগতমলমচ্ছেরেন চেতসা অগারং অজ্ঝাৰসতি অনক্কোসিকপরিভাসিকা সমণব্রাহ্মণানং. এৰং খো, গহপতযো, ছৰো দেৰিযা সদ্ধিং সংৰসতি.

‘‘কথঞ্চ, গহপতযো, দেৰো ছৰায সদ্ধিং সংৰসতি? ইধ, গহপতযো, সামিকো হোতি পাণাতিপাতা পটিৰিরতো অদিন্নাদানা পটিৰিরতো কামেসুমিচ্ছাচারা পটিৰিরতো মুসাৰাদা পটিৰিরতো সুরামেরযমজ্জপমাদট্ঠানা পটিৰিরতো সীলৰা কল্যাণধম্মো ৰিগতমলমচ্ছেরেন চেতসা অগারং অজ্ঝাৰসতি অনক্কোসকপরিভাসকো সমণব্রাহ্মণানং; ভরিযা খ্ৰস্স হোতি পাণাতিপাতিনী…পে… সুরামেরযমজ্জপমাদট্ঠাযিনী দুস্সীলা পাপধম্মা মচ্ছেরমলপরিযুট্ঠিতেন চেতসা অগারং অজ্ঝাৰসতি অক্কোসিকপরিভাসিকা সমণব্রাহ্মণানং. এৰং খো, গহপতযো, দেৰো ছৰায সদ্ধিং সংৰসতি.

‘‘কথঞ্চ, গহপতযো, দেৰো দেৰিযা সদ্ধিং সংৰসতি? ইধ, গহপতযো, সামিকো হোতি পাণাতিপাতা পটিৰিরতো…পে… সীলৰা কল্যাণধম্মো ৰিগতমলমচ্ছেরেন চেতসা অগারং অজ্ঝাৰসতি অনক্কোসকপরিভাসকো সমণব্রাহ্মণানং; ভরিযাপিস্স হোতি পাণাতিপাতা পটিৰিরতা…পে… সুরামেরযমজ্জপমাদট্ঠানা পটিৰিরতা সীলৰতী কল্যাণধম্মা ৰিগতমলমচ্ছেরেন চেতসা অগারং অজ্ঝাৰসতি অনক্কোসিকপরিভাসিকা সমণব্রাহ্মণানং. এৰং খো, গহপতযো, দেৰো দেৰিযা সদ্ধিং সংৰসতি. ইমে খো, গহপতযো, চত্তারো সংৰাসা’’তি.

‘‘উভো চ হোন্তি দুস্সীলা, কদরিযা পরিভাসকা;

তে হোন্তি জানিপতযো, ছৰা সংৰাসমাগতা.

‘‘সামিকো হোতি দুস্সীলো, কদরিযো পরিভাসকো;

ভরিযা সীলৰতী হোতি, ৰদঞ্ঞূ ৰীতমচ্ছরা;

সাপি দেৰী সংৰসতি, ছৰেন পতিনা সহ.

‘‘সামিকো সীলৰা হোতি, ৰদঞ্ঞূ ৰীতমচ্ছরো;

ভরিযা হোতি দুস্সীলা, কদরিযা পরিভাসিকা;

সাপি ছৰা সংৰসতি, দেৰেন পতিনা সহ.

‘‘উভো সদ্ধা ৰদঞ্ঞূ চ, সঞ্ঞতা ধম্মজীৰিনো;

তে হোন্তি জানিপতযো, অঞ্ঞমঞ্ঞং পিযংৰদা.

‘‘অত্থাসং পচুরা হোন্তি, ফাসুকং [ফাসত্তং (সী.), ৰাসত্থং (পী.)] উপজাযতি;

অমিত্তা দুম্মনা হোন্তি, উভিন্নং সমসীলিনং.

‘‘ইধ ধম্মং চরিত্ৰান, সমসীলব্বতা উভো;

নন্দিনো দেৰলোকস্মিং, মোদন্তি কামকামিনো’’তি. ততিযং;