৮. ৰিসাখসুত্তং

৪৮. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা ৰিসাখো পঞ্চালপুত্তো [পঞ্চালিপুত্তো (সী. স্যা. কং. পী.)] উপট্ঠানসালাযং ভিক্খূ ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি, পোরিযা ৰাচায ৰিস্সট্ঠায অনেলগলায অত্থস্স ৰিঞ্ঞাপনিযা পরিযাপন্নায অনিস্সিতায. অথ খো ভগৰা সাযন্হসমযং পটিসল্লানা ৰুট্ঠিতো যেন উপট্ঠানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি –

‘‘কো নু খো, ভিক্খৰে, উপট্ঠানসালাযং ভিক্খূ ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি পোরিযা ৰাচায ৰিস্সট্ঠায অনেলগলায অত্থস্স ৰিঞ্ঞাপনিযা পরিযাপন্নায অনিস্সিতাযা’’তি? ‘‘আযস্মা, ভন্তে, ৰিসাখো পঞ্চালপুত্তো উপট্ঠানসালাযং ভিক্খূ ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি পোরিযা ৰাচায ৰিস্সট্ঠায অনেলগলায অত্থস্স ৰিঞ্ঞাপনিযা পরিযাপন্নায অনিস্সিতাযা’’তি.

অথ খো ভগৰা আযস্মন্তং ৰিসাখং পঞ্চালপুত্তং এতদৰোচ – ‘‘সাধু সাধু, ৰিসাখ! সাধু খো ত্ৰং, ৰিসাখ, ভিক্খূ ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি পোরিযা ৰাচায ৰিস্সট্ঠায অনেলগলায অত্থস্স ৰিঞ্ঞাপনিযা পরিযাপন্নায অনিস্সিতাযাতি.

‘‘নাভাসমানং জানন্তি, মিস্সং বালেহি পণ্ডিতং;

ভাসমানঞ্চ জানন্তি, দেসেন্তং অমতং পদং.

‘‘ভাসযে জোতযে ধম্মং, পগ্গণ্হে ইসিনং ধজং;

সুভাসিতধজা ইসযো, ধম্মো হি ইসিনং ধজো’’তি. অট্ঠমং;