৯. লোণকপল্লসুত্তং

১০১. ‘‘যো [যো খো (স্যা. কং.), যো চ খো (ক.)], ভিক্খৰে, এৰং ৰদেয্য – ‘যথা যথাযং পুরিসো কম্মং করোতি তথা তথা তং পটিসংৰেদিযতী’তি, এৰং সন্তং, ভিক্খৰে, ব্রহ্মচরিযৰাসো ন হোতি, ওকাসো ন পঞ্ঞাযতি সম্মা দুক্খস্স অন্তকিরিযায. যো চ খো, ভিক্খৰে, এৰং ৰদেয্য – ‘যথা যথা ৰেদনীযং অযং পুরিসো কম্মং করোতি তথা তথাস্স ৰিপাকং পটিসংৰেদিযতী’তি, এৰং সন্তং, ভিক্খৰে, ব্রহ্মচরিযৰাসো হোতি, ওকাসো পঞ্ঞাযতি সম্মা দুক্খস্স অন্তকিরিযায. ইধ, ভিক্খৰে, একচ্চস্স পুগ্গলস্স অপ্পমত্তকম্পি পাপকম্মং [পাপং কম্মং (সী. পী.)] কতং তমেনং নিরযং উপনেতি. ইধ পন, ভিক্খৰে, একচ্চস্স পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, না’ণুপি খাযতি, কিং বহুদেৰ.

‘‘কথংরূপস্স, ভিক্খৰে, পুগ্গলস্স অপ্পমত্তকম্পি পাপকম্মং কতং তমেনং নিরযং উপনেতি? ইধ পন, ভিক্খৰে, একচ্চো পুগ্গলো অভাৰিতকাযো হোতি অভাৰিতসীলো অভাৰিতচিত্তো অভাৰিতপঞ্ঞো পরিত্তো অপ্পাতুমো অপ্পদুক্খৰিহারী. এৰরূপস্স, ভিক্খৰে, পুগ্গলস্স অপ্পমত্তকম্পি পাপকম্মং কতং তমেনং নিরযং উপনেতি.

‘‘কথংরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, না’ণুপি খাযতি, কিং বহুদেৰ? ইধ, ভিক্খৰে, একচ্চো পুগ্গলো ভাৰিতকাযো হোতি ভাৰিতসীলো ভাৰিতচিত্তো ভাৰিতপঞ্ঞো অপরিত্তো মহত্তো [মহত্তা (সী. স্যা. কং. পী.)] অপ্পমাণৰিহারী. এৰরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ.

‘‘সেয্যথাপি, ভিক্খৰে, পুরিসো লোণকপল্লং [লোণফলং (সী. স্যা. কং. পী.)] পরিত্তে উদকমল্লকে [উদককপল্লকে (ক.)] পক্খিপেয্য. তং কিং মঞ্ঞথ, ভিক্খৰে, অপি নু তং পরিত্তং উদকং [উদকমল্লকে উদকং (সী. স্যা. কং. পী.)] অমুনা লোণকপল্লেন লোণং অস্স অপেয্য’’ন্তি? ‘‘এৰং, ভন্তে’’. ‘‘তং কিস্স হেতু’’? ‘‘অদুঞ্হি, ভন্তে, পরিত্তং উদককপল্লকে উদকং, তং অমুনা লোণকপল্লেন লোণং অস্স অপেয্য’’ন্তি. ‘‘সেয্যথাপি, ভিক্খৰে, পুরিসো লোণকপল্লকং গঙ্গায নদিযা পক্খিপেয্য. তং কিং মঞ্ঞথ, ভিক্খৰে, অপি নু সা গঙ্গা নদী অমুনা লোণকপল্লেন লোণং অস্স অপেয্যা’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘অসু হি, ভন্তে, গঙ্গায নদিযা মহা উদকক্খন্ধো সো অমুনা লোণকপল্লেন লোণো ন অস্স অপেয্যো’’তি [লোণং নেৰস্স অপেয্যন্তি (সী.), ন লোণো অস্স অপেয্যোতি (পী.)].

‘‘এৰমেৰং খো, ভিক্খৰে, ইধেকচ্চস্স পুগ্গলস্স অপ্পমত্তকম্পি পাপকম্মং কতং তমেনং নিরযং উপনেতি. ইধ, ভিক্খৰে, একচ্চস্স পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ.

‘‘কথংরূপস্স, ভিক্খৰে, পুগ্গলস্স অপ্পমত্তকম্পি পাপকম্মং কতং তমেনং নিরযং উপনেতি? ইধ, ভিক্খৰে, একচ্চো পুগ্গলো অভাৰিতকাযো হোতি অভাৰিতসীলো অভাৰিতচিত্তো অভাৰিতপঞ্ঞো পরিত্তো অপ্পাতুমো অপ্পদুক্খৰিহারী. এৰরূপস্স, ভিক্খৰে, পুগ্গলস্স অপ্পমত্তকম্পি পাপকম্মং কতং তমেনং নিরযং উপনেতি.

‘‘কথংরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ? ইধ, ভিক্খৰে, একচ্চো পুগ্গলো ভাৰিতকাযো হোতি ভাৰিতসীলো ভাৰিতচিত্তো ভাৰিতপঞ্ঞো অপরিত্তো মহত্তো অপ্পমাণৰিহারী. এৰরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ.

‘‘ইধ, ভিক্খৰে, একচ্চো অড্ঢকহাপণেনপি বন্ধনং নিগচ্ছতি, কহাপণেনপি বন্ধনং নিগচ্ছতি, কহাপণসতেনপি বন্ধনং নিগচ্ছতি. ইধ, ভিক্খৰে, একচ্চো অড্ঢকহাপণেনপি ন বন্ধনং নিগচ্ছতি, কহাপণেনপি ন বন্ধনং নিগচ্ছতি, কহাপণসতেনপি ন বন্ধনং নিগচ্ছতি.

‘‘কথংরূপো, ভিক্খৰে, অড্ঢকহাপণেনপি বন্ধনং নিগচ্ছতি, কহাপণেনপি বন্ধনং নিগচ্ছতি, কহাপণসতেনপি বন্ধনং নিগচ্ছতি? ইধ, ভিক্খৰে, একচ্চো দলিদ্দো হোতি অপ্পস্সকো অপ্পভোগো. এৰরূপো, ভিক্খৰে, অড্ঢকহাপণেনপি বন্ধনং নিগচ্ছতি, কহাপণেনপি বন্ধনং নিগচ্ছতি, কহাপণসতেনপি বন্ধনং নিগচ্ছতি.

‘‘কথংরূপো, ভিক্খৰে, অড্ঢকহাপণেনপি ন বন্ধনং নিগচ্ছতি, কহাপণেনপি ন বন্ধনং নিগচ্ছতি, কহাপণসতেনপি ন বন্ধনং নিগচ্ছতি? ইধ, ভিক্খৰে, একচ্চো অড্ঢো হোতি মহদ্ধনো মহাভোগো. এৰরূপো, ভিক্খৰে, অড্ঢকহাপণেনপি ন বন্ধনং নিগচ্ছতি, কহাপণেনপি ন বন্ধনং নিগচ্ছতি, কহাপণসতেনপি ন বন্ধনং নিগচ্ছতি. এৰমেৰং খো, ভিক্খৰে, ইধেকচ্চস্স পুগ্গলস্স অপ্পমত্তকং পাপকম্মং কতং. তমেনং নিরযং উপনেতি. ইধ, ভিক্খৰে, একচ্চস্স পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ.

‘‘কথংরূপস্স, ভিক্খৰে, পুগ্গলস্স অপ্পমত্তকং পাপকম্মং কতং, তমেনং নিরযং উপনেতি? ইধ, ভিক্খৰে, একচ্চো পুগ্গলো অভাৰিতকাযো হোতি অভাৰিতসীলো অভাৰিতচিত্তো অভাৰিতপঞ্ঞো পরিত্তো অপ্পাতুমো অপ্পদুক্খৰিহারী. এৰরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং তমেনং নিরযং উপনেতি.

‘‘ইধ, ভিক্খৰে, একচ্চো পুগ্গলো ভাৰিতকাযো হোতি ভাৰিতসীলো ভাৰিতচিত্তো ভাৰিতপঞ্ঞো অপরিত্তো মহত্তো অপ্পমাণৰিহারী. এৰরূপস্স, ভিক্খৰে, পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ. সেয্যথাপি, ভিক্খৰে, ওরব্ভিকো ৰা উরব্ভঘাতকো ৰা অপ্পেকচ্চং উরব্ভং অদিন্নং আদিযমানং পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং, অপ্পেকচ্চং উরব্ভং অদিন্নং আদিযমানং নপ্পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং.

‘‘কথংরূপং, ভিক্খৰে, ওরব্ভিকো ৰা উরব্ভঘাতকো ৰা উরব্ভং অদিন্নং আদিযমানং পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং? ইধ, ভিক্খৰে, একচ্চো দলিদ্দো হোতি অপ্পস্সকো অপ্পভোগো. এৰরূপং, ভিক্খৰে, ওরব্ভিকো ৰা উরব্ভঘাতকো ৰা উরব্ভং অদিন্নং আদিযমানং পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং.

‘‘কথংরূপং, ভিক্খৰে, ওরব্ভিকো ৰা উরব্ভঘাতকো ৰা উরব্ভং অদিন্নং আদিযমানং নপ্পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং. ইধ, ভিক্খৰে, একচ্চো অড্ঢো হোতি মহদ্ধনো মহাভোগো রাজা ৰা রাজমহামত্তো ৰা. এৰরূপং, ভিক্খৰে, ওরব্ভিকো ৰা উরব্ভঘাতকো ৰা উরব্ভং অদিন্নং আদিযমানং নপ্পহোতি হন্তুং ৰা বন্ধিতুং ৰা জাপেতুং ৰা যথাপচ্চযং ৰা কাতুং. অঞ্ঞদত্থু পঞ্জলিকোৰ [পঞ্জলিকো (ক.)] নং [পরং (ক.)] যাচতি – ‘দেহি মে, মারিস, উরব্ভং ৰা উরব্ভধনং ৰা’তি. এৰমেৰং খো, ভিক্খৰে, ইধেকচ্চস্স পুগ্গলস্স তাদিসংযেৰ অপ্পমত্তকম্পি পাপকম্মং কতং তমেনং নিরযং উপনেতি. ইধ পন, ভিক্খৰে, একচ্চস্স পুগ্গলস্স তাদিসংযেৰ অপ্পমত্তকং পাপকম্মং কতং দিট্ঠধম্মৰেদনীযং হোতি, নাণুপি খাযতি, কিং বহুদেৰ.

‘‘যো, ভিক্খৰে, এৰং ৰদেয্য – ‘যথা যথাযং পুরিসো কম্মং করোতি তথা তথা তং পটিসংৰেদেতী’তি, এৰং সন্তং, ভিক্খৰে, ব্রহ্মচরিযৰাসো ন হোতি, ওকাসো ন পঞ্ঞাযতি সম্মা দুক্খস্স অন্তকিরিযায. যো চ খো, ভিক্খৰে, এৰং ৰদেয্য – ‘যথা যথা ৰেদনীযং অযং পুরিসো কম্মং করোতি তথা তথা তস্স ৰিপাকং পটিসংৰেদেতী’তি, এৰং সন্তং, ভিক্খৰে, ব্রহ্মচরিযৰাসো হোতি, ওকাসো পঞ্ঞাযতি সম্মা দুক্খস্স অন্তকিরিযাযা’’তি. নৰমং.