৮. পোত্থকসুত্তং

১০০. ‘‘নৰোপি, ভিক্খৰে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ; মজ্ঝিমোপি, ভিক্খৰে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ; জিণ্ণোপি, ভিক্খৰে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ. জিণ্ণম্পি, ভিক্খৰে, পোত্থকং উক্খলিপরিমজ্জনং ৰা করোন্তি সঙ্কারকূটে ৰা নং [তং (সী.), ঠানে (ক.)] ছড্ডেন্তি.

‘‘এৰমেৰং খো, ভিক্খৰে, নৰো চেপি ভিক্খু হোতি দুস্সীলো পাপধম্মো. ইদমস্স দুব্বণ্ণতায ৰদামি. সেয্যথাপি সো, ভিক্খৰে, পোত্থকো দুব্বণ্ণো তথূপমাহং, ভিক্খৰে, ইমং পুগ্গলং ৰদামি. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং অহিতায দুক্খায. ইদমস্স দুক্খসম্ফস্সতায ৰদামি. সেয্যথাপি সো, ভিক্খৰে, পোত্থকো দুক্খসম্ফস্সো তথূপমাহং, ভিক্খৰে, ইমং পুগ্গলং ৰদামি. যেসং খো পন সো [যেসং খো পন (সী. স্যা. কং. পী.), যেসং সো (ক.) পু. প. ১১৬ পস্সিতব্বং] পটিগ্গণ্হাতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায ৰদামি. সেয্যথাপি সো, ভিক্খৰে, পোত্থকো অপ্পগ্ঘো তথূপমাহং, ভিক্খৰে, ইমং পুগ্গলং ৰদামি. মজ্ঝিমো চেপি, ভিক্খৰে, ভিক্খু হোতি…পে… থেরো চেপি, ভিক্খৰে, ভিক্খু হোতি দুস্সীলো পাপধম্মো, ইদমস্স দুব্বণ্ণতায ৰদামি. সেয্যথাপি সো, ভিক্খৰে, পোত্থকো দুব্বণ্ণো তথূপমাহং, ভিক্খৰে, ইমং পুগ্গলং ৰদামি. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং অহিতায দুক্খায. ইদমস্স দুক্খসম্ফস্সতায ৰদামি. সেয্যথাপি সো, ভিক্খৰে, পোত্থকো দুক্খসম্ফস্সো তথূপমাহং, ভিক্খৰে, ইমং পুগ্গলং ৰদামি. যেসং খো পন সো পটিগ্গণ্হাতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায ৰদামি. সেয্যথাপি সো, ভিক্খৰে, পোত্থকো অপ্পগ্ঘো তথূপমাহং, ভিক্খৰে, ইমং পুগ্গলং ৰদামি.

‘‘এৰরূপো চাযং, ভিক্খৰে, থেরো ভিক্খু সঙ্ঘমজ্ঝে ভণতি. তমেনং ভিক্খূ এৰমাহংসু – ‘কিং নু খো তুয্হং বালস্স অব্যত্তস্স ভণিতেন, ত্ৰম্পি নাম ভণিতব্বং মঞ্ঞসী’তি! সো কুপিতো অনত্তমনো তথারূপিং ৰাচং নিচ্ছারেতি যথারূপায ৰাচায সঙ্ঘো তং উক্খিপতি, সঙ্কারকূটেৰ নং পোত্থকং.

‘‘নৰম্পি, ভিক্খৰে, কাসিকং ৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ; মজ্ঝিমম্পি, ভিক্খৰে, কাসিকং ৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ; জিণ্ণম্পি, ভিক্খৰে, কাসিকং ৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ. জিণ্ণম্পি, ভিক্খৰে, কাসিকং ৰত্থং রতনপলিৰেঠনং ৰা করোতি গন্ধকরণ্ডকে ৰা নং পক্খিপন্তি.

‘‘এৰমেৰং খো, ভিক্খৰে, নৰো চেপি ভিক্খু হোতি সীলৰা কল্যাণধম্মো, ইদমস্স সুৰণ্ণতায ৰদামি. সেয্যথাপি তং, ভিক্খৰে, কাসিকং ৰত্থং ৰণ্ণৰন্তং তথূপমাহং, ভিক্খৰে, ইমং পুগ্গলং ৰদামি. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং হিতায সুখায. ইদমস্স সুখসম্ফস্সতায ৰদামি. সেয্যথাপি তং, ভিক্খৰে, কাসিকং ৰত্থং সুখসম্ফস্সং তথূপমাহং, ভিক্খৰে, ইমং পুগ্গলং ৰদামি. যেসং খো পন সো পটিগ্গণ্হাতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারং, তেসং তং মহপ্ফলং হোতি মহানিসংসং. ইদমস্স মহগ্ঘতায ৰদামি. সেয্যথাপি তং, ভিক্খৰে, কাসিকং ৰত্থং মহগ্ঘং তথূপমাহং, ভিক্খৰে, ইমং পুগ্গলং ৰদামি. মজ্ঝিমো চেপি, ভিক্খৰে, ভিক্খু হোতি…পে… থেরো চেপি, ভিক্খৰে, ভিক্খু হোতি…পে… পুগ্গলং ৰদামি.

‘‘এৰরূপো চাযং, ভিক্খৰে, থেরো ভিক্খু সঙ্ঘমজ্ঝে ভণতি. তমেনং ভিক্খূ এৰমাহংসু – ‘অপ্পসদ্দা আযস্মন্তো হোথ, থেরো ভিক্খু ধম্মঞ্চ ৰিনযঞ্চ ভণতী’তি. তস্মাতিহ, ভিক্খৰে, এৰং সিক্খিতব্বং – ‘কাসিকৰত্থূপমা ভৰিস্সাম, ন পোত্থকূপমা’তি [কাসিকং ৰত্থং তথূপমাহং ভৰিস্সামি, ন পোত্থকূপমাহন্তি (ক.)]. এৰঞ্হি ৰো, ভিক্খৰে, সিক্খিতব্ব’’ন্তি. অট্ঠমং.