৭. ততিযআজানীযসুত্তং

৯৯. ‘‘তীহি, ভিক্খৰে, অঙ্গেহি সমন্নাগতো রঞ্ঞো ভদ্রো অস্সাজানীযো রাজারহো হোতি রাজভোগ্গো, রঞ্ঞো অঙ্গন্তেৰ সঙ্খযং গচ্ছতি. কতমেহি তীহি? ইধ, ভিক্খৰে, রঞ্ঞো ভদ্রো অস্সাজানীযো ৰণ্ণসম্পন্নো চ হোতি বলসম্পন্নো চ জৰসম্পন্নো চ. ইমেহি খো, ভিক্খৰে, তীহি অঙ্গেহি সমন্নাগতো রঞ্ঞো ভদ্রো অস্সাজানীযো রাজারহো হোতি রাজভোগ্গো, রঞ্ঞো অঙ্গন্তেৰ সঙ্খ্যং গচ্ছতি. এৰমেৰং খো, ভিক্খৰে, তীহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স. কতমেহি তীহি? ইধ, ভিক্খৰে, ভিক্খু ৰণ্ণসম্পন্নো চ হোতি বলসম্পন্নো চ জৰসম্পন্নো চ.

‘‘কথঞ্চ, ভিক্খৰে, ভিক্খু ৰণ্ণসম্পন্নো হোতি? ইধ, ভিক্খৰে, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু. এৰং খো, ভিক্খৰে, ভিক্খু ৰণ্ণসম্পন্নো হোতি.

‘‘কথঞ্চ, ভিক্খৰে, ভিক্খু বলসম্পন্নো হোতি? ইধ, ভিক্খৰে, ভিক্খু আরদ্ধৰীরিযো ৰিহরতি অকুসলানং ধম্মানং পহানায কুসলানং ধম্মানং উপসম্পদায থামৰা দল়্হপরক্কমো অনিক্খিত্তধুরো কুসলেসু ধম্মেসু. এৰং খো, ভিক্খৰে, ভিক্খু বলসম্পন্নো হোতি.

‘‘কথঞ্চ, ভিক্খৰে, ভিক্খু জৰসম্পন্নো হোতি? ইধ, ভিক্খৰে, ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. এৰং খো, ভিক্খৰে, ভিক্খু জৰসম্পন্নো হোতি. ইমেহি খো, ভিক্খৰে, তীহি ধম্মেহি সমন্নাগতো ভিক্খু আহুনেয্যো হোতি…পে… অনুত্তরং পুঞ্ঞক্খেত্তং লোকস্সা’’তি. সত্তমং.