৬. পঠমসিক্খাসুত্তং

৮৭. ‘‘সাধিকমিদং, ভিক্খৰে, দিযড্ঢসিক্খাপদসতং অন্ৰদ্ধমাসং উদ্দেসং আগচ্ছতি, যত্থ অত্তকামা কুলপুত্তা সিক্খন্তি. তিস্সো ইমা, ভিক্খৰে, সিক্খা যত্থেতং সব্বং সমোধানং গচ্ছতি. কতমা তিস্সো? অধিসীলসিক্খা, অধিচিত্তসিক্খা অধিপঞ্ঞাসিক্খা – ইমা খো, ভিক্খৰে, তিস্সো সিক্খা, যত্থেতং সব্বং সমোধানং গচ্ছতি.

‘‘ইধ, ভিক্খৰে, ভিক্খু সীলেসু পরিপূরকারী হোতি সমাধিস্মিং মত্তসো কারী পঞ্ঞায মত্তসো কারী. সো যানি তানি খুদ্দানুখুদ্দকানি সিক্খাপদানি তানি আপজ্জতিপি ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি, তত্থ ধুৰসীলো [ধুৰসীলী (সী.) পু. প. ১২৭-১২৯ (থোকং ৰিসদিসং)] চ হোতি ঠিতসীলো [ঠিতসীলী (সী.)] চ, সমাদায সিক্খতি সিক্খাপদেসু. সো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযণো.

‘‘ইধ পন, ভিক্খৰে, ভিক্খু সীলেসু পরিপূরকারী হোতি সমাধিস্মিং মত্তসো কারী পঞ্ঞায মত্তসো কারী. সো যানি তানি খুদ্দানুখুদ্দকানি সিক্খাপদানি তানি আপজ্জতিপি ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি তত্থ ধুৰসীলো চ হোতি ঠিতসীলো চ, সমাদায সিক্খতি সিক্খাপদেসু. সো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি.

‘‘ইধ পন, ভিক্খৰে, ভিক্খু সীলেসু পরিপূরকারী হোতি সমাধিস্মিং পরিপূরকারী পঞ্ঞায মত্তসো কারী. সো যানি তানি খুদ্দানুখুদ্দকানি সিক্খাপদানি তানি আপজ্জতিপি ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি তত্থ ধুৰসীলো চ হোতি ঠিতসীলো চ, সমাদায সিক্খতি সিক্খাপদেসু. সো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা.

‘‘ইধ পন, ভিক্খৰে, ভিক্খু সীলেসু পরিপূরকারী হোতি সমাধিস্মিং পরিপূরকারী পঞ্ঞায পরিপূরকারী. সো যানি তানি খুদ্দানুখুদ্দকানি সিক্খাপদানি তানি আপজ্জতিপি ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি তত্থ ধুৰসীলো চ হোতি ঠিতসীলো চ, সমাদায সিক্খতি সিক্খাপদেসু. সো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি.

‘‘ইতি খো, ভিক্খৰে, পদেসং পদেসকারী আরাধেতি পরিপূরং পরিপূরকারী. অৰঞ্ঝানি ত্ৰেৰাহং [অৰঞ্চুৰনেৰাহং (ক.)], ভিক্খৰে, সিক্খাপদানি ৰদামী’’তি. ছট্ঠং.