১০. আতপ্পকরণীযসুত্তং

৫০. ‘‘তীহি, ভিক্খৰে, ঠানেহি আতপ্পং করণীযং. কতমেহি তীহি? অনুপ্পন্নানং পাপকানং অকুসলানং ধম্মানং অনুপ্পাদায আতপ্পং করণীযং, অনুপ্পন্নানং কুসলানং ধম্মানং উপ্পাদায আতপ্পং করণীযং, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসনায আতপ্পং করণীযং. ইমেহি তীহি, ভিক্খৰে, ঠানেহি আতপ্পং করণীযং.

‘‘যতো খো, ভিক্খৰে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায আতপ্পং করোতি, অনুপ্পন্নানং কুসলানং ধম্মানং উপ্পাদায আতপ্পং করোতি, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসনায আতপ্পং করোতি. অযং ৰুচ্চতি, ভিক্খৰে, ভিক্খু আতাপী নিপকো সতো সম্মা দুক্খস্স অন্তকিরিযাযা’’তি. দসমং.