৪. দেৰদূতৰগ্গো

১.সব্রহ্মকসুত্তং

৩১. ‘‘সব্রহ্মকানি, ভিক্খৰে, তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি. সপুব্বাচরিযকানি, ভিক্খৰে, তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি. সাহুনেয্যানি, ভিক্খৰে, তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি. ‘ব্রহ্মা’তি, ভিক্খৰে, মাতাপিতূনং এতং অধিৰচনং. ‘পুব্বাচরিযা’তি, ভিক্খৰে, মাতাপিতূনং এতং অধিৰচনং. ‘আহুনেয্যা’তি, ভিক্খৰে, মাতাপিতূনং এতং অধিৰচনং. তং কিস্স হেতু? বহুকারা, ভিক্খৰে, মাতাপিতরো পুত্তানং, আপাদকা পোসকা, ইমস্স লোকস্স দস্সেতারোতি.

‘‘ব্রহ্মাতি মাতাপিতরো, পুব্বাচরিযাতি ৰুচ্চরে;

আহুনেয্যা চ পুত্তানং, পজায অনুকম্পকা.

‘‘তস্মা হি নে নমস্সেয্য, সক্করেয্য চ পণ্ডিতো;

অন্নেন অথ পানেন, ৰত্থেন সযনেন চ;

উচ্ছাদনেন ন্হাপনেন [নহাপনেন (সী.)], পাদানং ধোৰনেন চ.

‘‘তায নং পারিচরিযায, মাতাপিতূসু পণ্ডিতা;

ইধেৰ [ইধ চেৰ (সী.)] নং পসংসন্তি, পেচ্চ সগ্গে পমোদতী’’তি [সগ্গে চ মোদতীতি (সী.) ইতিৰু. ১০৬ ইতিৰুত্তকে]. পঠমং;

২. আনন্দসুত্তং

৩২. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ –

‘‘সিযা নু খো, ভন্তে, ভিক্খুনো তথারূপো সমাধিপটিলাভো যথা ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা নাস্সু, বহিদ্ধা চ সব্বনিমিত্তেসু অহঙ্কারমমঙ্কারমানানুসযা নাস্সু; যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরেয্যা’’তি? ‘‘সিযা, আনন্দ, ভিক্খুনো তথারূপো সমাধিপটিলাভো যথা ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা নাস্সু, বহিদ্ধা চ সব্বনিমিত্তেসু অহঙ্কারমমঙ্কারমানানুসযা নাস্সু; যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরেয্যা’’তি.

‘‘যথা কথং পন, ভন্তে, সিযা ভিক্খুনো তথারূপো সমাধিপটিলাভো যথা ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা নাস্সু, বহিদ্ধা চ সব্বনিমিত্তেসু অহঙ্কারমমঙ্কারমানানুসযা নাস্সু; যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরেয্যা’’তি?

‘‘ইধানন্দ, ভিক্খুনো এৰং হোতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. এৰং খো, আনন্দ, সিযা ভিক্খুনো তথারূপো সমাধিপটিলাভো যথা ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা নাস্সু, বহিদ্ধা চ সব্বনিমিত্তেসু অহঙ্কারমমঙ্কারমানানুসযা নাস্সু; যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরেয্যা’’তি.

‘‘ইদঞ্চ পন মেতং, আনন্দ, সন্ধায ভাসিতং পারাযনে পুণ্ণকপঞ্হে –

‘‘সঙ্খায লোকস্মিং পরোপরানি [পরোৰরানি (সী. পী.) সু. নি. ১০৫৪; চূল়নি. পুণ্ণকমাণৰপুচ্ছা ৭৩],

যস্সিঞ্জিতং নত্থি কুহিঞ্চি লোকে;

সন্তো ৰিধূমো অনীঘো [অনিঘো (সী. স্যা. কং. পী.), অনঘো (?)] নিরাসো,

অতারি সো জাতিজরন্তি ব্রূমী’’তি. দুতিযং;

৩. সারিপুত্তসুত্তং

৩৩. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘সংখিত্তেনপি খো অহং, সারিপুত্ত, ধম্মং দেসেয্যং; ৰিত্থারেনপি খো অহং, সারিপুত্ত, ধম্মং দেসেয্যং; সংখিত্তৰিত্থারেনপি খো অহং, সারিপুত্ত, ধম্মং দেসেয্যং; অঞ্ঞাতারো চ দুল্লভা’’তি. ‘‘এতস্স, ভগৰা, কালো, এতস্স, সুগত, কালো যং ভগৰা সংখিত্তেনপি ধম্মং দেসেয্য, ৰিত্থারেনপি ধম্মং দেসেয্য, সংখিত্তৰিত্থারেনপি ধম্মং দেসেয্য. ভৰিস্সন্তি ধম্মস্স অঞ্ঞাতারো’’তি.

‘‘তস্মাতিহ, সারিপুত্ত, এৰং সিক্খিতব্বং – ‘ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা ন ভৰিস্সন্তি, বহিদ্ধা চ সব্বনিমিত্তেসু অহঙ্কারমমঙ্কারমানানুসযা ন ভৰিস্সন্তি, যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরিস্সামা’তি. এৰঞ্হি খো, সারিপুত্ত, সিক্খিতব্বং.

‘‘যতো চ খো, সারিপুত্ত, ভিক্খুনো ইমস্মিঞ্চ সৰিঞ্ঞাণকে কাযে অহঙ্কারমমঙ্কারমানানুসযা ন হোন্তি, বহিদ্ধা চ সব্বনিমিত্তেসু অহঙ্কারমমঙ্কারমানানুসযা ন হোন্তি, যঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতো অহঙ্কারমমঙ্কারমানানুসযা ন হোন্তি তঞ্চ চেতোৰিমুত্তিং পঞ্ঞাৰিমুত্তিং উপসম্পজ্জ ৰিহরতি; অযং ৰুচ্চতি, সারিপুত্ত – ‘ভিক্খু অচ্ছেচ্ছি [অচ্ছেজ্জি (স্যা. কং. ক.)] তণ্হং, ৰিৰত্তযি [ৰাৰত্তযি (সী. পী.)] সংযোজনং, সম্মা মানাভিসমযা অন্তমকাসি দুক্খস্স’. ইদঞ্চ পন মেতং, সারিপুত্ত, সন্ধায ভাসিতং পারাযনে [পারাযণে (সী.)] উদযপঞ্হে –

‘‘পহানং কামসঞ্ঞানং, দোমনস্সান চূভযং;

থিনস্স চ পনূদনং, কুক্কুচ্চানং নিৰারণং.

‘‘উপেক্খাসতিসংসুদ্ধং, ধম্মতক্কপুরেজৰং;

অঞ্ঞাৰিমোক্খং পব্রূমি, অৰিজ্জায পভেদন’’ন্তি [সু. নি. ১১১২; চূল়নি. উদযমাণৰপুচ্ছা ১৩১]. ততিযং;

৪. নিদানসুত্তং

৩৪. ‘‘তীণিমানি, ভিক্খৰে, নিদানানি কম্মানং সমুদযায. কতমানি তীণি? লোভো নিদানং কম্মানং সমুদযায, দোসো নিদানং কম্মানং সমুদযায, মোহো নিদানং কম্মানং সমুদযায.

‘‘যং, ভিক্খৰে, লোভপকতং কম্মং লোভজং লোভনিদানং লোভসমুদযং, যত্থস্স অত্তভাৰো নিব্বত্ততি তত্থ তং কম্মং ৰিপচ্চতি. যত্থ তং কম্মং ৰিপচ্চতি তত্থ তস্স কম্মস্স ৰিপাকং পটিসংৰেদেতি, দিট্ঠে ৰা ধম্মে উপপজ্জ ৰা [উপপজ্জে ৰা (সী. স্যা. কং.) উপপজ্জিত্ৰাতি ম. নি. ৩.৩০৩ পাল়িযা সংৰণ্ণনা] অপরে ৰা [অপরাপরে ৰা (ক.)] পরিযাযে.

‘‘যং, ভিক্খৰে, দোসপকতং কম্মং দোসজং দোসনিদানং দোসসমুদযং, যত্থস্স অত্তভাৰো নিব্বত্ততি তত্থ তং কম্মং ৰিপচ্চতি. যত্থ তং কম্মং ৰিপচ্চতি তত্থ তস্স কম্মস্স ৰিপাকং পটিসংৰেদেতি, দিট্ঠে ৰা ধম্মে উপপজ্জ ৰা অপরে ৰা পরিযাযে.

‘‘যং, ভিক্খৰে, মোহপকতং কম্মং মোহজং মোহনিদানং মোহসমুদযং, যত্থস্স অত্তভাৰো নিব্বত্ততি তত্থ তং কম্মং ৰিপচ্চতি. যত্থ তং কম্মং ৰিপচ্চতি তত্থ তস্স কম্মস্স ৰিপাকং পটিসংৰেদেতি, দিট্ঠে ৰা ধম্মে উপপজ্জ ৰা অপরে ৰা পরিযাযে.

‘‘সেয্যথাপি, ভিক্খৰে, বীজানি অখণ্ডানি অপূতীনি অৰাতাতপহতানি সারাদানি সুখসযিতানি সুখেত্তে সুপরিকম্মকতায ভূমিযা নিক্খিত্তানি. দেৰো চ সম্মাধারং অনুপ্পৰেচ্ছেয্য. এৰস্সু তানি, ভিক্খৰে, বীজানি ৰুদ্ধিং ৰিরুল়্হিং ৰেপুল্লং আপজ্জেয্যুং. এৰমেৰং খো, ভিক্খৰে, যং লোভপকতং কম্মং লোভজং লোভনিদানং লোভসমুদযং, যত্থস্স অত্তভাৰো নিব্বত্ততি তত্থ তং কম্মং ৰিপচ্চতি. যত্থ তং কম্মং ৰিপচ্চতি তত্থ তস্স কম্মস্স ৰিপাকং পটিসংৰেদেতি, দিট্ঠে ৰা ধম্মে উপপজ্জ ৰা অপরে ৰা পরিযাযে.

‘‘যং দোসপকতং কম্মং…পে… যং মোহপকতং কম্মং মোহজং মোহনিদানং মোহসমুদযং, যত্থস্স অত্তভাৰো নিব্বত্ততি তত্থ তং কম্মং ৰিপচ্চতি. যত্থ তং কম্মং ৰিপচ্চতি তত্থ তস্স কম্মস্স ৰিপাকং পটিসংৰেদেতি, দিট্ঠে ৰা ধম্মে উপপজ্জ ৰা অপরে ৰা পরিযাযে. ইমানি খো, ভিক্খৰে, তীণি নিদানানি কম্মানং সমুদযায.

‘‘তীণিমানি, ভিক্খৰে, নিদানানি কম্মানং সমুদযায. কতমানি তীণি? অলোভো নিদানং কম্মানং সমুদযায, অদোসো নিদানং কম্মানং সমুদযায, অমোহো নিদানং কম্মানং সমুদযায.

‘‘যং, ভিক্খৰে, অলোভপকতং কম্মং অলোভজং অলোভনিদানং অলোভসমুদযং, লোভে ৰিগতে এৰং তং কম্মং পহীনং হোতি উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং.

‘‘যং, ভিক্খৰে, অদোসপকতং কম্মং অদোসজং অদোসনিদানং অদোসসমুদযং, দোসে ৰিগতে এৰং তং কম্মং পহীনং হোতি উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং.

‘‘যং, ভিক্খৰে, অমোহপকতং কম্মং অমোহজং অমোহনিদানং অমোহসমুদযং, মোহে ৰিগতে এৰং তং কম্মং পহীনং হোতি উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং.

‘‘সেয্যথাপি, ভিক্খৰে, বীজানি অখণ্ডানি অপূতীনি অৰাতাতপহতানি সারাদানি সুখসযিতানি. তানি পুরিসো অগ্গিনা ডহেয্য. অগ্গিনা ডহিত্ৰা মসিং করেয্য. মসিং করিত্ৰা মহাৰাতে ৰা ওফুণেয্য [ওপুনেয্য (সী. পী.)] নদিযা ৰা সীঘসোতায পৰাহেয্য. এৰস্সু তানি, ভিক্খৰে, বীজানি উচ্ছিন্নমূলানি তালাৰত্থুকতানি অনভাৰঙ্কতানি [অনভাৰকতানি (সী. পী.)] আযতিং অনুপ্পাদধম্মানি. এৰমেৰং খো, ভিক্খৰে, যং অলোভপকতং কম্মং অলোভজং অলোভনিদানং অলোভসমুদযং, লোভে ৰিগতে এৰং তং কম্মং পহীনং হোতি উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং.

‘‘যং অদোসপকতং কম্মং…পে… যং অমোহপকতং কম্মং অমোহজং অমোহনিদানং অমোহসমুদযং, মোহে ৰিগতে এৰং তং কম্মং পহীনং হোতি…পে… আযতিং অনুপ্পাদধম্মং. ইমানি খো, ভিক্খৰে, তীণি নিদানানি কম্মানং সমুদযাযা’’তি.

‘‘লোভজং দোসজঞ্চেৰ [দোসজং কম্মং (ক.)], মোহজঞ্চাপৰিদ্দসু;

যং তেন পকতং কম্মং, অপ্পং ৰা যদি ৰা বহুং;

ইধেৰ তং ৰেদনিযং, ৰত্থু অঞ্ঞং ন ৰিজ্জতি.

‘‘তস্মা লোভঞ্চ দোসঞ্চ, মোহজঞ্চাপি ৰিদ্দসু;

ৰিজ্জং উপ্পাদযং ভিক্খু, সব্বা দুগ্গতিযো জহে’’তি. চতুত্থং;

৫. হত্থকসুত্তং

৩৫. এৰং মে সুতং – একং সমযং ভগৰা আল়ৰিযং ৰিহরতি গোমগ্গে সিংসপাৰনে পণ্ণসন্থরে. অথ খো হত্থকো আল়ৰকো জঙ্ঘাৰিহারং অনুচঙ্কমমানো অনুৰিচরমানো অদ্দস ভগৰন্তং গোমগ্গে সিংসপাৰনে পণ্ণসন্থরে নিসিন্নং. দিস্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো হত্থকো আল়ৰকো ভগৰন্তং এতদৰোচ – ‘‘কচ্চি, ভন্তে, ভগৰা সুখমসযিত্থা’’তি? ‘‘এৰং, কুমার, সুখমসযিত্থং. যে চ পন লোকে সুখং সেন্তি, অহং তেসং অঞ্ঞতরো’’তি.

‘‘সীতা, ভন্তে, হেমন্তিকা রত্তি, অন্তরট্ঠকো হিমপাতসমযো, খরা গোকণ্টকহতা ভূমি, তনুকো পণ্ণসন্থরো, ৰিরল়ানি রুক্খস্স পত্তানি, সীতানি কাসাযানি ৰত্থানি, সীতো চ ৰেরম্ভো ৰাতো ৰাযতি. অথ চ পন ভগৰা এৰমাহ – ‘এৰং, কুমার, সুখমসযিত্থং. যে চ পন লোকে সুখং সেন্তি, অহং তেসং অঞ্ঞতরো’’’তি.

‘‘তেন হি, কুমার, তঞ্ঞেৰেত্থ পটিপুচ্ছিস্সামি. যথা তে খমেয্য তথা নং ব্যাকরেয্যাসি. তং কিং মঞ্ঞসি, কুমার, ইধস্স গহপতিস্স ৰা গহপতিপুত্তস্স ৰা কূটাগারং উল্লিত্তাৰলিত্তং নিৰাতং ফুসিতগ্গল়ং পিহিতৰাতপানং. তত্রস্স পল্লঙ্কো গোনকত্থতো পটিকত্থতো পটলিকত্থতো কদলিমিগপৰরপচ্চত্থরণো [কাদলিমিগপৰরপচ্চত্থরণো (সী.)] সউত্তরচ্ছদো উভতো লোহিতকূপধানো; তেলপ্পদীপো চেত্থ ঝাযেয্য [জালেয্য (ক.)]; চতস্সো চ [তস্সেৰ (ক.)] পজাপতিযো মনাপামনাপেন পচ্চুপট্ঠিতা অস্সু. তং কিং মঞ্ঞসি, কুমার, সুখং ৰা সো সযেয্য নো ৰা? কথং ৰা তে এত্থ হোতী’’তি? ‘‘সুখং সো, ভন্তে, সযেয্য. যে চ পন লোকে সুখং সেন্তি, সো তেসং অঞ্ঞতরো’’তি.

‘‘তং কিং মঞ্ঞসি, কুমার, অপি নু তস্স গহপতিস্স ৰা গহপতিপুত্তস্স ৰা উপ্পজ্জেয্যুং রাগজা পরিল়াহা কাযিকা ৰা চেতসিকা ৰা যেহি সো রাগজেহি পরিল়াহেহি পরিডয্হমানো দুক্খং সযেয্যা’’তি? ‘‘এৰং, ভন্তে’’তি.

‘‘যেহি খো সো, কুমার, গহপতি ৰা গহপতিপুত্তো ৰা রাগজেহি পরিল়াহেহি পরিডয্হমানো দুক্খং সযেয্য, সো রাগো তথাগতস্স পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো. তস্মাহং সুখমসযিত্থং.

‘‘তং কিং মঞ্ঞসি, কুমার, অপি নু তস্স গহপতিস্স ৰা গহপতিপুত্তস্স ৰা উপ্পজ্জেয্যুং দোসজা পরিল়াহা…পে… মোহজা পরিল়াহা কাযিকা ৰা চেতসিকা ৰা যেহি সো মোহজেহি পরিল়াহেহি পরিডয্হমানো দুক্খং সযেয্যা’’তি? ‘‘এৰং, ভন্তে’’তি.

‘‘যে হি খো সো, কুমার, গহপতি ৰা গহপতিপুত্তো ৰা মোহজেহি পরিল়াহেহি পরিডয্হমানো দুক্খং সযেয্য, সো মোহো তথাগতস্স পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো. তস্মাহং সুখমসযিত্থ’’ন্তি.

[চূল়ৰ. ৩০৫; সং. নি. ১.২৪২] ‘‘সব্বদা ৰে সুখং সেতি, ব্রাহ্মণো পরিনিব্বুতো;

যো ন লিম্পতি [লিপ্পতি (সী. স্যা. কং. ক.)] কামেসু, সীতিভূতো নিরূপধি.

‘‘সব্বা আসত্তিযো ছেত্ৰা, ৰিনেয্য হদযে দরং;

উপসন্তো সুখং সেতি, সন্তিং পপ্পুয্য চেতসো’’তি. পঞ্চমং;

৬. দেৰদূতসুত্তং

৩৬. ‘‘তীণিমানি, ভিক্খৰে, দেৰদূতানি. কতমানি তীণি? ইধ, ভিক্খৰে, একচ্চো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. তমেনং, ভিক্খৰে, নিরযপালা নানাবাহাসু গহেত্ৰা যমস্স রঞ্ঞো দস্সেন্তি – ‘অযং, দেৰ, পুরিসো অমত্তেয্যো অপেত্তেয্যো অসামঞ্ঞো অব্রহ্মঞ্ঞো, ন কুলে জেট্ঠাপচাযী. ইমস্স দেৰো দণ্ডং পণেতূ’’’তি.

‘‘তমেনং, ভিক্খৰে, যমো রাজা পঠমং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো, পুরিস, ন ত্ৰং অদ্দস মনুস্সেসু পঠমং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা আসীতিকং ৰা নাৰুতিকং ৰা ৰস্সসতিকং ৰা [পস্স ম. নি. ৩.২৬৩] জাতিযা জিণ্ণং গোপানসিৰঙ্কং ভোগ্গং দণ্ডপরাযণং [দণ্ডপরাযনং (স্যা. কং. পী.)] পৰেধমানং গচ্ছন্তং আতুরং গতযোব্বনং খণ্ডদন্তং পলিতকেসং ৰিলূনং খল্লিতসিরং [খলিতং সিরো (সী. পী.), খলিতসিরং (স্যা. কং.) ম. নি. ৩.২৬৩] ৰলিতং তিলকাহতগত্ত’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো, পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি জরাধম্মো জরং অনতীতো, হন্দাহং কল্যাণং করোমি, কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে. পমাদস্সং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো, পুরিস, পমাদতায [পমাদৰতায (সী. স্যা. কং. পী.) ম. নি. ৩.২৬২] ন কল্যাণমকাসি কাযেন ৰাচায মনসা. তগ্ঘ ত্ৰং [তং (ক.)], অম্ভো পুরিস, তথা করিস্সন্তি যথা তং [তে (ক.)] পমত্তং. তং খো পন তে এতং [তং খো পনেতং (সী. স্যা. কং. পী.)] পাপকম্মং [পাপং কম্মং (সী.)] নেৰ মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং, ন দেৰতাহি কতং, ন সমণব্রাহ্মণেহি কতং; অথ খো তযাৰেতং পাপকম্মং কতং, ত্ৰঞ্ঞেৰেতস্স ৰিপাকং পটিসংৰেদিস্সসী’’’তি.

‘‘তমেনং, ভিক্খৰে, যমো রাজা পঠমং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা, দুতিযং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু দুতিযং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’তি. ‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা আবাধিকং দুক্খিতং বাল়্হগিলানং, সকে মুত্তকরীসে পলিপন্নং সেমানং, অঞ্ঞেহি ৰুট্ঠাপিযমানং, অঞ্ঞেহি সংৰেসিযমান’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি ব্যাধিধম্মো ব্যাধিং অনতীতো, হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে. পমাদস্সং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, পমাদতায ন কল্যাণমকাসি কাযেন ৰাচায মনসা. তগ্ঘ ত্ৰং, অম্ভো পুরিস, তথা করিস্সন্তি যথা তং পমত্তং. তং খো পন তে এতং পাপকম্মং নেৰ মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং, ন দেৰতাহি কতং, ন সমণব্রাহ্মণেহি কতং; অথ খো তযাৰেতং পাপকম্মং কতং. ত্ৰঞ্ঞেৰেতস্স ৰিপাকং পটিসংৰেদিস্সসী’’’তি.

‘‘তমেনং, ভিক্খৰে, যমো রাজা দুতিযং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা, ততিযং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু ততিযং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা একাহমতং ৰা দ্ৰীহমতং ৰা তীহমতং ৰা উদ্ধুমাতকং ৰিনীলকং ৰিপুব্বকজাত’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি মরণধম্মো মরণং অনতীতো, হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে. পমাদস্সং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, পমাদতায ন কল্যাণমকাসি কাযেন ৰাচায মনসা. তগ্ঘ ত্ৰং, অম্ভো পুরিস, তথা করিস্সন্তি যথা তং পমত্তং. তং খো পন তে এতং পাপকম্মং নেৰ মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং, ন দেৰতাহি কতং, ন সমণব্রাহ্মণেহি কতং; অথ খো তযাৰেতং পাপকম্মং কতং. ত্ৰঞ্ঞেৰেতস্স ৰিপাকং পটিসংৰেদিস্সসী’’’তি.

‘‘তমেনং, ভিক্খৰে, যমো রাজা ততিযং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা তুণ্হী হোতি. তমেনং, ভিক্খৰে, নিরযপালা পঞ্চৰিধবন্ধনং নাম কারণং করোন্তি. তত্তং অযোখিলং হত্থে গমেন্তি. তত্তং অযোখিলং দুতিযস্মিং হত্থে গমেন্তি. তত্তং অযোখিলং পাদে গমেন্তি. তত্তং অযোখিলং দুতিযস্মিং পাদে গমেন্তি. তত্তং অযোখিলং মজ্ঝে উরস্মিং গমেন্তি. সো তত্থ দুক্খা তিব্বা [তিপ্পা (সী.)] খরা কটুকা ৰেদনা ৰেদিযতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তমেনং, ভিক্খৰে, নিরযপালা সংৰেসেত্ৰা [সংকড্ঢিত্ৰা (ক.)] কুধারীহি তচ্ছন্তি. সো তত্থ দুক্খা তিব্বা খরা কটুকা ৰেদনা ৰেদিযতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা ৰাসীহি তচ্ছন্তি…পে… তমেনং, ভিক্খৰে, নিরযপালা রথে যোজেত্ৰা আদিত্তায ভূমিযা সম্পজ্জলিতায সজোতিভূতায [সঞ্জোতিভূতায (স্যা. কং.)] সারেন্তিপি পচ্চাসারেন্তিপি…পে… তমেনং, ভিক্খৰে, নিরযপালা মহন্তং অঙ্গারপব্বতং আদিত্তং সম্পজ্জলিতং সজোতিভূতং আরোপেন্তিপি ওরোপেন্তিপি…পে… তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা তত্তায লোহকুম্ভিযা পক্খিপন্তি, আদিত্তায সম্পজ্জলিতায সজোতিভূতায. সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিরিযং গচ্ছতি. সো তত্থ দুক্খা তিব্বা খরা কটুকা ৰেদনা ৰেদিযতি, ন চ তাৰ কালং করোতি যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা মহানিরযে পক্খিপন্তি. সো খো পন, ভিক্খৰে, মহানিরযো –

‘‘চতুক্কণ্ণো চতুদ্ৰারো, ৰিভত্তো ভাগসো মিতো;

অযোপাকারপরিযন্তো, অযসা পটিকুজ্জিতো.

‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফরিত্ৰা তিট্ঠতি সব্বদা’’তি [পে. ৰ. ৭০-৭১, ২৪০-২৪১].

‘‘ভূতপুব্বং, ভিক্খৰে, যমস্স রঞ্ঞো এতদহোসি – ‘যে কির, ভো, লোকে পাপকানি কম্মানি করোন্তি তে এৰরূপা ৰিৰিধা কম্মকারণা করীযন্তি. অহো ৰতাহং মনুস্সত্তং লভেয্যং, তথাগতো চ লোকে উপ্পজ্জেয্য অরহং সম্মাসম্বুদ্ধো, তঞ্চাহং ভগৰন্তং পযিরুপাসেয্যং. সো চ মে ভগৰা ধম্মং দেসেয্য, তস্স চাহং ভগৰতো ধম্মং আজানেয্য’ন্তি. তং খো পনাহং, ভিক্খৰে, ন অঞ্ঞস্স সমণস্স ৰা ব্রাহ্মণস্স ৰা সুত্ৰা এৰং ৰদামি, অপি চ খো, ভিক্খৰে, যদেৰ মে সামং ঞাতং সামং দিট্ঠং সামং ৰিদিতং তদেৰাহং ৰদামী’’তি.

‘‘চোদিতা দেৰদূতেহি, যে পমজ্জন্তি মাণৰা;

তে দীঘরত্তং সোচন্তি, হীনকাযূপগা নরা.

‘‘যে চ খো দেৰদূতেহি, সন্তো সপ্পুরিসা ইধ;

চোদিতা নপ্পমজ্জন্তি, অরিযধম্মে কুদাচনং.

‘‘উপাদানে ভযং দিস্ৰা, জাতিমরণসম্ভৰে;

অনুপাদা ৰিমুচ্চন্তি, জাতিমরণসঙ্খযে.

‘‘তে অপ্পমত্তা [তে খোপ্পমত্তা (সী.), তে খেমপ্পত্তা (স্যা. কং. পী.) ম. নি. ৩.২৭১] সুখিনো [সুখিতা (সী. স্যা.)], দিট্ঠধম্মাভিনিব্বুতা;

সব্বৰেরভযাতীতা, সব্বদুক্খং উপচ্চগু’’ন্তি. ছট্ঠং;

৭. চতুমহারাজসুত্তং

৩৭. ‘‘অট্ঠমিযং, ভিক্খৰে, পক্খস্স চতুন্নং মহারাজানং অমচ্চা পারিসজ্জা ইমং লোকং অনুৰিচরন্তি – ‘কচ্চি বহূ মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তী’তি. চাতুদ্দসিং, ভিক্খৰে, পক্খস্স চতুন্নং মহারাজানং পুত্তা ইমং লোকং অনুৰিচরন্তি – ‘কচ্চি বহূ মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তী’তি. তদহু, ভিক্খৰে, উপোসথে পন্নরসে চত্তারো মহারাজানো সামঞ্ঞেৰ ইমং লোকং অনুৰিচরন্তি – ‘কচ্চি বহূ মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তী’’’তি.

‘‘সচে, ভিক্খৰে, অপ্পকা হোন্তি মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তি. তমেনং, ভিক্খৰে, চত্তারো মহারাজানো দেৰানং তাৰতিংসানং সুধম্মায সভায সন্নিসিন্নানং সন্নিপতিতানং আরোচেন্তি – ‘অপ্পকা খো, মারিসা, মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তী’তি. তেন খো, ভিক্খৰে, দেৰা তাৰতিংসা অনত্তমনা হোন্তি – ‘দিব্বা ৰত, ভো, কাযা পরিহাযিস্সন্তি, পরিপূরিস্সন্তি অসুরকাযা’’’তি.

‘‘সচে পন, ভিক্খৰে, বহূ হোন্তি মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তি. তমেনং, ভিক্খৰে, চত্তারো মহারাজানো দেৰানং তাৰতিংসানং সুধম্মায সভায সন্নিসিন্নানং সন্নিপতিতানং আরোচেন্তি – ‘বহূ খো, মারিসা, মনুস্সা মনুস্সেসু মত্তেয্যা পেত্তেয্যা সামঞ্ঞা ব্রহ্মঞ্ঞা কুলে জেট্ঠাপচাযিনো উপোসথং উপৰসন্তি পটিজাগরোন্তি পুঞ্ঞানি করোন্তী’তি. তেন, ভিক্খৰে, দেৰা তাৰতিংসা অত্তমনা হোন্তি – ‘দিব্বা ৰত, ভো, কাযা পরিপূরিস্সন্তি, পরিহাযিস্সন্তি অসুরকাযা’’’তি.

‘‘ভূতপুব্বং, ভিক্খৰে, সক্কো দেৰানমিন্দো দেৰে তাৰতিংসে অনুনযমানো তাযং ৰেলাযং ইমং গাথং অভাসি –

‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং;

উপোসথং উপৰসেয্য, যোপিস্স [যোপস্স (সী. স্যা. কং. পী.)] মাদিসো নরো’’তি.

‘‘সা খো পনেসা, ভিক্খৰে, সক্কেন দেৰানমিন্দেন গাথা দুগ্গীতা ন সুগীতা দুব্ভাসিতা ন সুভাসিতা. তং কিস্স হেতু? সক্কো হি, ভিক্খৰে, দেৰানমিন্দো অৰীতরাগো অৰীতদোসো অৰীতমোহো.

‘‘যো চ খো সো, ভিক্খৰে, ভিক্খু অরহং খীণাসৰো ৰুসিতৰা ব্রহ্মচরিযো কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো, তস্স খো এতং, ভিক্খৰে, ভিক্খুনো [তস্স খো এতং ভিক্খুনো (সী. স্যা.), তস্স খো এৰং ভিক্খৰে ভিক্খুনো (ক.)] কল্লং ৰচনায –

‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং;

উপোসথং উপৰসেয্য, যোপিস্স মাদিসো নরো’’তি.

‘‘তং কিস্স হেতু? সো হি, ভিক্খৰে, ভিক্খু ৰীতরাগো ৰীতদোসো ৰীতমোহো’’তি. সত্তমং.

৮. দুতিযচতুমহারাজসুত্তং

৩৮. ‘‘ভূতপুব্বং, ভিক্খৰে, সক্কো দেৰানমিন্দো দেৰে তাৰতিংসে অনুনযমানো তাযং ৰেলাযং ইমং গাথং অভাসি –

‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং;

উপোসথং উপৰসেয্য, যোপিস্স মাদিসো নরো’’তি.

‘‘সা খো পনেসা, ভিক্খৰে, সক্কেন দেৰানমিন্দেন গাথা দুগ্গীতা ন সুগীতা দুব্ভাসিতা ন সুভাসিতা. তং কিস্স হেতু? সক্কো হি, ভিক্খৰে, দেৰানমিন্দো অপরিমুত্তো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, অপরিমুত্তো দুক্খস্মাতি ৰদামি.

‘‘যো চ খো সো, ভিক্খৰে, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো, তস্স খো এতং, ভিক্খৰে, ভিক্খুনো কল্লং ৰচনায –

‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং;

উপোসথং উপৰসেয্য, যোপিস্স মাদিসো নরো’’তি.

‘‘তং কিস্স হেতু? সো হি, ভিক্খৰে, ভিক্খু পরিমুত্তো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুত্তো দুক্খস্মাতি ৰদামী’’তি. অট্ঠমং.

৯. সুখুমালসুত্তং

৩৯. ‘‘সুখুমালো অহং, ভিক্খৰে, পরমসুখুমালো অচ্চন্তসুখুমালো. মম সুদং, ভিক্খৰে, পিতু নিৰেসনে পোক্খরণিযো কারিতা হোন্তি. একত্থ সুদং, ভিক্খৰে, উপ্পলং ৰপ্পতি [পুপ্ফতি (সী. পী.)], একত্থ পদুমং, একত্থ পুণ্ডরীকং, যাৰদেৰ মমত্থায. ন খো পনস্সাহং, ভিক্খৰে, অকাসিকং চন্দনং ধারেমি [কাসিকং চন্দনং ধারেমি (স্যা. কং. ক.), অকাসিকং ধারেমি (?)]. কাসিকং, ভিক্খৰে, সু মে তং ৰেঠনং হোতি, কাসিকা কঞ্চুকা, কাসিকং নিৰাসনং, কাসিকো উত্তরাসঙ্গো. রত্তিন্দিৰং [রত্তিদিৰং (ক.)] খো পন মে সু তং, ভিক্খৰে, সেতচ্ছত্তং ধারীযতি – ‘মা নং ফুসি সীতং ৰা উণ্হং ৰা তিণং ৰা রজো ৰা উস্সাৰো ৰা’’’তি.

‘‘তস্স ময্হং, ভিক্খৰে, তযো পাসাদা অহেসুং – একো হেমন্তিকো, একো গিম্হিকো, একো ৰস্সিকো. সো খো অহং, ভিক্খৰে, ৰস্সিকে পাসাদে ৰস্সিকে চত্তারো মাসে নিপ্পুরিসেহি তূরিযেহি পরিচারযমানো [পরিচারিযমানো (স্যা. কং. পী. ক.)] ন হেট্ঠাপাসাদং ওরোহামি. যথা খো পন, ভিক্খৰে, অঞ্ঞেসং নিৰেসনে দাসকম্মকরপোরিসস্স কণাজকং ভোজনং দীযতি বিলঙ্গদুতিযং, এৰমেৰস্সু মে, ভিক্খৰে, পিতু নিৰেসনে দাসকম্মকরপোরিসস্স সালিমংসোদনো দীযতি.

‘‘তস্স ময্হং, ভিক্খৰে, এৰরূপায ইদ্ধিযা সমন্নাগতস্স এৰরূপেন চ সুখুমালেন এতদহোসি – ‘অস্সুতৰা খো পুথুজ্জনো অত্তনা জরাধম্মো সমানো জরং অনতীতো পরং জিণ্ণং দিস্ৰা অট্টীযতি হরাযতি জিগুচ্ছতি অত্তানংযেৰ অতিসিত্ৰা, অহম্পি খোম্হি জরাধম্মো জরং অনতীতো. অহঞ্চেৰ [অহঞ্চে (?)] খো পন জরাধম্মো সমানো জরং অনতীতো পরং জিণ্ণং দিস্ৰা অট্টীযেয্যং হরাযেয্যং জিগুচ্ছেয্যং ন মেতং অস্স পতিরূপ’ন্তি. তস্স ময্হং, ভিক্খৰে, ইতি পটিসঞ্চিক্খতো যো যোব্বনে যোব্বনমদো সো সব্বসো পহীযি.

‘‘অস্সুতৰা খো পুথুজ্জনো অত্তনা ব্যাধিধম্মো সমানো ব্যাধিং অনতীতো পরং ব্যাধিতং দিস্ৰা অট্টীযতি হরাযতি জিগুচ্ছতি অত্তানংযেৰ অতিসিত্ৰা – ‘অহম্পি খোম্হি ব্যাধিধম্মো ব্যাধিং অনতীতো, অহঞ্চেৰ খো পন ব্যাধিধম্মো সমানো ব্যাধিং অনতীতো পরং ব্যাধিকং দিস্ৰা অট্টীযেয্যং হরাযেয্যং জিগুচ্ছেয্যং, ন মেতং অস্স পতিরূপ’ন্তি. তস্স ময্হং, ভিক্খৰে, ইতি পটিসঞ্চিক্খতো যো আরোগ্যে আরোগ্যমদো সো সব্বসো পহীযি.

‘‘অস্সুতৰা খো পুথুজ্জনো অত্তনা মরণধম্মো সমানো মরণং অনতীতো পরং মতং দিস্ৰা অট্টীযতি হরাযতি জিগুচ্ছতি অত্তানংযেৰ অতিসিত্ৰা – ‘অহম্পি খোম্হি মরণধম্মো, মরণং অনতীতো, অহং চেৰ খো পন মরণধম্মো সমানো মরণং অনতীতো পরং মতং দিস্ৰা অট্টীযেয্যং হরাযেয্যং জিগুচ্ছেয্যং, ন মেতং অস্স পতিরূপ’ন্তি. তস্স ময্হং, ভিক্খৰে, ইতি পটিসঞ্চিক্খতো যো জীৰিতে জীৰিতমদো সো সব্বসো পহীযী’’তি.

‘‘তযোমে, ভিক্খৰে, মদা. কতমে তযো? যোব্বনমদো, আরোগ্যমদো, জীৰিতমদো. যোব্বনমদমত্তো ৰা, ভিক্খৰে, অস্সুতৰা পুথুজ্জনো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. আরোগ্যমদমত্তো ৰা, ভিক্খৰে, অস্সুতৰা পুথুজ্জনো…পে… জীৰিতমদমত্তো ৰা, ভিক্খৰে, অস্সুতৰা পুথুজ্জনো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি.

‘‘যোব্বনমদমত্তো ৰা, ভিক্খৰে, ভিক্খু সিক্খং পচ্চক্খায হীনাযাৰত্ততি. আরোগ্যমদমত্তো ৰা, ভিক্খৰে, ভিক্খু…পে… জীৰিতমদমত্তো ৰা, ভিক্খৰে, ভিক্খু সিক্খং পচ্চক্খায হীনাযাৰত্ততী’’তি.

‘‘ব্যাধিধম্মা জরাধম্মা, অথো মরণধম্মিনো;

যথাধম্মা [ব্যাধিধম্মো জরাধম্মো, অথো মরণধম্মিকো; যথা ধম্মো (ক.)] তথাসন্তা, জিগুচ্ছন্তি পুথুজ্জনা.

‘‘অহঞ্চে তং জিগুচ্ছেয্যং, এৰংধম্মেসু পাণিসু;

ন মেতং পতিরূপস্স, মম এৰং ৰিহারিনো.

‘‘সোহং এৰং ৰিহরন্তো, ঞত্ৰা ধম্মং নিরূপধিং;

আরোগ্যে যোব্বনস্মিঞ্চ, জীৰিতস্মিঞ্চ যে মদা.

‘‘সব্বে মদে অভিভোস্মি [অতীতোস্মি (ক.)], নেক্খম্মে দট্ঠু খেমতং;

তস্স মে অহু উস্সাহো, নিব্বানং অভিপস্সতো.

‘‘নাহং ভব্বো এতরহি, কামানি পটিসেৰিতুং;

অনিৰত্তি ভৰিস্সামি, ব্রহ্মচরিযপরাযণো’’তি. নৰমং;

১০. আধিপতেয্যসুত্তং

৪০. ‘‘তীণিমানি, ভিক্খৰে, আধিপতেয্যানি. কতমানি তীণি? অত্তাধিপতেয্যং, লোকাধিপতেয্যং, ধম্মাধিপতেয্যং. কতমঞ্চ, ভিক্খৰে, অত্তাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো. ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো. অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো. অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথাতি. অহঞ্চেৰ খো পন যাদিসকে [যাদিসকে ৰা (সী. পী. ক.)] কামে ওহায অগারস্মা অনগারিযং পব্বজিতো তাদিসকে ৰা [চ (ক.)] কামে পরিযেসেয্যং ততো ৰা [চ (ক.)] পাপিট্ঠতরে, ন মেতং পতিরূপ’ন্তি. সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি. সো অত্তানংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি. ইদং ৰুচ্চতি, ভিক্খৰে, অত্তাধিপতেয্যং.

‘‘কতমঞ্চ, ভিক্খৰে, লোকাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো. ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো. অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো. অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথা’তি. অহঞ্চেৰ খো পন এৰং পব্বজিতো সমানো কামৰিতক্কং ৰা ৰিতক্কেয্যং, ব্যাপাদৰিতক্কং ৰা ৰিতক্কেয্যং, ৰিহিংসাৰিতক্কং ৰা ৰিতক্কেয্যং, মহা খো পনাযং লোকসন্নিৰাসো. মহন্তস্মিং খো পন লোকসন্নিৰাসে সন্তি সমণব্রাহ্মণা ইদ্ধিমন্তো দিব্বচক্খুকা পরচিত্তৰিদুনো. তে দূরতোপি পস্সন্তি, আসন্নাপি ন দিস্সন্তি, চেতসাপি চিত্তং পজানন্তি [জানন্তি (ক.)]. তেপি মং এৰং জানেয্যুং – ‘পস্সথ, ভো, ইমং কুলপুত্তং সদ্ধা অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি. দেৰতাপি খো সন্তি ইদ্ধিমন্তিনিযো দিব্বচক্খুকা পরচিত্তৰিদুনিযো. তা দূরতোপি পস্সন্তি, আসন্নাপি ন দিস্সন্তি, চেতসাপি চিত্তং জানন্তি. তাপি মং এৰং জানেয্যুং – ‘পস্সথ, ভো, ইমং কুলপুত্তং সদ্ধা অগারস্মা অনগারিযং পব্বজিতো সমানো ৰোকিণ্ণো ৰিহরতি পাপকেহি অকুসলেহি ধম্মেহী’তি. সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি. সো লোকংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি. ইদং ৰুচ্চতি, ভিক্খৰে, লোকাধিপতেয্যং.

‘‘কতমঞ্চ, ভিক্খৰে, ধম্মাধিপতেয্যং? ইধ, ভিক্খৰে, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি – ‘ন খো পনাহং চীৰরহেতু অগারস্মা অনগারিযং পব্বজিতো. ন পিণ্ডপাতহেতু, ন সেনাসনহেতু, ন ইতিভৰাভৰহেতু অগারস্মা অনগারিযং পব্বজিতো. অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো. অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথাতি. স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহীতি. সন্তি খো পন মে সব্রহ্মচারী জানং পস্সং ৰিহরন্তি. অহঞ্চেৰ খো পন এৰং স্ৰাক্খাতে ধম্মৰিনযে পব্বজিতো সমানো কুসীতো ৰিহরেয্যং পমত্তো, ন মেতং অস্স পতিরূপ’ন্তি. সো ইতি পটিসঞ্চিক্খতি – ‘আরদ্ধং খো পন মে ৰীরিযং ভৰিস্সতি অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গ’ন্তি. সো ধম্মংযেৰ অধিপতিং করিত্ৰা অকুসলং পজহতি, কুসলং ভাৰেতি, সাৰজ্জং পজহতি, অনৰজ্জং ভাৰেতি, সুদ্ধং অত্তানং পরিহরতি. ইদং ৰুচ্চতি, ভিক্খৰে, ধম্মাধিপতেয্যং. ইমানি খো, ভিক্খৰে, তীণি আধিপতেয্যানী’’তি.

‘‘নত্থি লোকে রহো নাম, পাপকম্মং পকুব্বতো;

অত্তা তে পুরিস জানাতি, সচ্চং ৰা যদি ৰা মুসা.

‘‘কল্যাণং ৰত ভো সক্খি, অত্তানং অতিমঞ্ঞসি;

যো সন্তং অত্তনি পাপং, অত্তানং পরিগূহসি.

‘‘পস্সন্তি দেৰা চ তথাগতা চ,

লোকস্মিং বালং ৰিসমং চরন্তং;

তস্মা হি অত্তাধিপতেয্যকো চ [অত্তাধিপকো সকো চরে (সী. স্যা. কং. পী.)],

লোকাধিপো চ নিপকো চ ঝাযী.

‘‘ধম্মাধিপো চ অনুধম্মচারী,

ন হীযতি সচ্চপরক্কমো মুনি;

পসয্হ মারং অভিভুয্য অন্তকং,

যো চ ফুসী জাতিক্খযং পধানৰা;

সো তাদিসো লোকৰিদূ সুমেধো,

সব্বেসু ধম্মেসু অতম্মযো মুনী’’তি. দসমং;

দেৰদূতৰগ্গো চতুত্থো.