৩. আসংসসুত্তং

১৩. ‘‘তযোমে, ভিক্খৰে, পুগ্গলা সন্তো সংৰিজ্জমানা লোকস্মিং. কতমে তযো? নিরাসো, আসংসো, ৰিগতাসো. কতমো চ, ভিক্খৰে পুগ্গলো নিরাসো? ইধ, ভিক্খৰে, একচ্চো পুগ্গলো নীচে কুলে পচ্চাজাতো হোতি, চণ্ডালকুলে ৰা ৰেনকুলে [ৰেণকুলে (স্যা. কং. পী.)] ৰা নেসাদকুলে ৰা রথকারকুলে ৰা পুক্কুসকুলে ৰা দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বৰ্হাবাধো [বহ্ৰাবাধো (স্যা. কং. পী. ক.)] কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো সুণাতি – ‘ইত্থন্নামো কির খত্তিযো খত্তিযেহি খত্তিযাভিসেকেন অভিসিত্তো’তি. তস্স ন এৰং হোতি – ‘কুদাস্সু নাম মম্পি খত্তিযা খত্তিযাভিসেকেন অভিসিঞ্চিস্সন্তী’তি! অযং ৰুচ্চতি, ভিক্খৰে, পুগ্গলো নিরাসো.

‘‘কতমো চ, ভিক্খৰে, পুগ্গলো আসংসো? ইধ, ভিক্খৰে, রঞ্ঞো খত্তিযস্স মুদ্ধাৰসিত্তস্স জেট্ঠো পুত্তো হোতি আভিসেকো অনভিসিত্তো অচলপ্পত্তো [মচলপ্পত্তো (সী. পী.)]. সো সুণাতি – ‘ইত্থন্নামো কির খত্তিযো খত্তিযেহি খত্তিযাভিসেকেন অভিসিত্তো’তি. তস্স এৰং হোতি – ‘কুদাস্সু নাম মম্পি খত্তিযা খত্তিযাভিসেকেন অভিসিঞ্চিস্সন্তী’তি! অযং ৰুচ্চতি, ভিক্খৰে, পুগ্গলো আসংসো.

‘‘কতমো চ, ভিক্খৰে, পুগ্গলো ৰিগতাসো? ইধ, ভিক্খৰে, রাজা হোতি খত্তিযো মুদ্ধাৰসিত্তো. সো সুণাতি – ‘ইত্থন্নামো কির খত্তিযো খত্তিযেহি খত্তিযাভিসেকেন অভিসিত্তো’তি. তস্স ন এৰং হোতি – ‘কুদাস্সু নাম মম্পি খত্তিযা খত্তিযাভিসেকেন অভিসিঞ্চিস্সন্তী’তি! তং কিস্স হেতু? যা হিস্স, ভিক্খৰে, পুব্বে অনভিসিত্তস্স অভিসেকাসা সা [সাস্স (সী. স্যা. কং. পী.)] পটিপ্পস্সদ্ধা. অযং ৰুচ্চতি, ভিক্খৰে, পুগ্গলো ৰিগতাসো. ইমে খো, ভিক্খৰে, তযো পুগ্গলা সন্তো সংৰিজ্জমানা লোকস্মিং.

‘‘এৰমেৰং খো, ভিক্খৰে, তযো পুগ্গলা সন্তো সংৰিজ্জমানা ভিক্খূসু. কতমে তযো? নিরাসো, আসংসো, ৰিগতাসো. কতমো চ, ভিক্খৰে, পুগ্গলো নিরাসো? ইধ, ভিক্খৰে, একচ্চো পুগ্গলো দুস্সীলো হোতি পাপধম্মো অসুচি সঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো. সো সুণাতি – ‘ইত্থন্নামো কির ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’তি. তস্স ন এৰং হোতি – ‘কুদাস্সু নাম অহম্পি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সামী’তি! অযং ৰুচ্চতি, ভিক্খৰে, পুগ্গলো নিরাসো.

‘‘কতমো চ, ভিক্খৰে, পুগ্গলো আসংসো? ইধ, ভিক্খৰে, ভিক্খু সীলৰা হোতি কল্যাণধম্মো. সো সুণাতি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’তি. তস্স এৰং হোতি – ‘কুদাস্সু নাম অহম্পি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সামী’তি! অযং ৰুচ্চতি, ভিক্খৰে, পুগ্গলো আসংসো.

‘‘কতমো চ, ভিক্খৰে, পুগ্গলো ৰিগতাসো? ইধ, ভিক্খৰে, ভিক্খু অরহং হোতি খীণাসৰো. সো সুণাতি – ‘ইত্থন্নামো কির ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’তি. তস্স ন এৰং হোতি – ‘কুদাস্সু নাম অহম্পি আসৰানং খযা…পে… সচ্ছিকত্ৰা উপসম্পজ্জ ৰিহরিস্সামী’তি! তং কিস্স হেতু? যা হিস্স, ভিক্খৰে, পুব্বে অৰিমুত্তস্স ৰিমুত্তাসা সা পটিপ্পস্সদ্ধা. অযং ৰুচ্চতি, ভিক্খৰে, পুগ্গলো ৰিগতাসো. ইমে খো, ভিক্খৰে, তযো পুগ্গলা সন্তো সংৰিজ্জমানা ভিক্খূসূ’’তি. ততিযং.