(২০) ৫. অপরপুগ্গলৰগ্গো

নসেৰিতব্বাদিসুত্তানি

১৯৯. ‘‘দসহি, ভিক্খৰে, ধম্মেহি সমন্নাগতো পুগ্গলো ন সেৰিতব্বো. কতমেহি দসহি? পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণৰাচো হোতি, ফরুসৰাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো ন সেৰিতব্বো.

‘‘দসহি, ভিক্খৰে, ধম্মেহি সমন্নাগতো পুগ্গলো সেৰিতব্বো. কতমেহি দসহি? পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো সেৰিতব্বো’’.

২০০-২০৯. ‘‘দসহি, ভিক্খৰে, ধম্মেহি সমন্নাগতো পুগ্গলো ন ভজিতব্বো…পে… ভজিতব্বো… ন পযিরুপাসিতব্বো… পযিরুপাসিতব্বো… ন পুজ্জো হোতি… পুজ্জো হোতি… ন পাসংসো হোতি… পাসংসো হোতি… অগারৰো হোতি… গারৰো হোতি… অপ্পতিস্সো হোতি… সপ্পতিস্সো হোতি… ন আরাধকো হোতি… আরাধকো হোতি… ন ৰিসুজ্ঝতি… ৰিসুজ্ঝতি… মানং নাধিভোতি [নাভিভোতি (সী.) অ. নি. ১০.১৫৬-১৬৬] … মানং অধিভোতি… পঞ্ঞায ন ৰড্ঢতি… পঞ্ঞায ৰড্ঢতি…পে….

২১০. ‘‘দসহি, ভিক্খৰে, ধম্মেহি সমন্নাগতো পুগ্গলো বহুং অপুঞ্ঞং পসৰতি… বহুং পুঞ্ঞং পসৰতি. কতমেহি দসহি? পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো বহুং পুঞ্ঞং পসৰতী’’তি.

অপরপুগ্গলৰগ্গো পঞ্চমো.