(১৬) ১. পুগ্গলৰগ্গো

১. সেৰিতব্বসুত্তং

১৫৫. ‘‘দসহি, ভিক্খৰে, ধম্মেহি সমন্নাগতো পুগ্গলো ন সেৰিতব্বো. কতমেহি দসহি? মিচ্ছাদিট্ঠিকো হোতি, মিচ্ছাসঙ্কপ্পো হোতি, মিচ্ছাৰাচো হোতি, মিচ্ছাকম্মন্তো হোতি, মিচ্ছাআজীৰো হোতি, মিচ্ছাৰাযামো হোতি, মিচ্ছাসতি হোতি, মিচ্ছাসমাধি হোতি, মিচ্ছাঞাণী হোতি, মিচ্ছাৰিমুত্তি হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো ন সেৰিতব্বো.

‘‘দসহি, ভিক্খৰে, ধম্মেহি সমন্নাগতো পুগ্গলো সেৰিতব্বো. কতমেহি দসহি? সম্মাদিট্ঠিকো হোতি, সম্মাসঙ্কপ্পো হোতি, সম্মাৰাচো হোতি, সম্মাকম্মন্তো হোতি, সম্মাআজীৰো হোতি, সম্মাৰাযামো হোতি, সম্মাসতি হোতি, সম্মাসমাধি হোতি, সম্মাঞাণী হোতি, সম্মাৰিমুত্তি হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো সেৰিতব্বো’’তি.

২-১২. ভজিতব্বাদিসুত্তানি

১৫৬-১৬৬. ‘‘দসহি, ভিক্খৰে, ধম্মেহি সমন্নাগতো পুগ্গলো ন ভজিতব্বো…পে… ভজিতব্বো…পে… ন পযিরুপাসিতব্বো… পযিরুপাসিতব্বো…পে… ন পুজ্জো হোতি… পুজ্জো হোতি…পে… ন পাসংসো হোতি… পাসংসো হোতি…পে… অগারৰো হোতি… সগারৰো হোতি…পে… অপ্পতিস্সো হোতি… সপ্পতিস্সো হোতি…পে… ন আরাধকো হোতি … আরাধকো হোতি…পে… ন ৰিসুজ্ঝতি… ৰিসুজ্ঝতি…পে… মানং নাধিভোতি… মানং অধিভোতি…পে. … পঞ্ঞায ন ৰড্ঢতি… পঞ্ঞায ৰড্ঢতি…পে….

‘‘বহুং অপুঞ্ঞং পসৰতি… বহুং পুঞ্ঞং পসৰতি. কতমেহি দসহি? সম্মাদিট্ঠিকো হোতি, সম্মাসঙ্কপ্পো হোতি, সম্মাৰাচো হোতি, সম্মাকম্মন্তো হোতি, সম্মাআজীৰো হোতি, সম্মাৰাযামো হোতি, সম্মাসতি হোতি, সম্মাসমাধি হোতি, সম্মাঞাণী হোতি, সম্মাৰিমুত্তি হোতি – ইমেহি খো, ভিক্খৰে, দসহি ধম্মেহি সমন্নাগতো পুগ্গলো বহুং পুঞ্ঞং পসৰতী’’তি.

পুগ্গলৰগ্গো পঠমো.