(১৩) ৩. পরিসুদ্ধৰগ্গো

১. পঠমসুত্তং

১২৩. ‘‘দসযিমে, ভিক্খৰে, ধম্মা পরিসুদ্ধা পরিযোদাতা, নাঞ্ঞত্র সুগতৰিনযা. কতমে দস? সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি, সম্মাঞাণং, সম্মাৰিমুত্তি – ইমে খো, ভিক্খৰে, দস ধম্মা পরিসুদ্ধা পরিযোদাতা, নাঞ্ঞত্র সুগতৰিনযা’’তি. পঠমং.

২. দুতিযসুত্তং

১২৪. ‘‘দসযিমে, ভিক্খৰে, ধম্মা অনুপ্পন্না উপ্পজ্জন্তি, নাঞ্ঞত্র সুগতৰিনযা. কতমে দস? সম্মাদিট্ঠি …পে… সম্মাৰিমুত্তি – ইমে খো, ভিক্খৰে, দস ধম্মা অনুপ্পন্না উপ্পজ্জন্তি, নাঞ্ঞত্র সুগতৰিনযা’’তি. দুতিযং.

৩. ততিযসুত্তং

১২৫. ‘‘দসযিমে, ভিক্খৰে, ধম্মা মহপ্ফলা মহানিসংসা, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা মহপ্ফলা মহানিসংসা, নাঞ্ঞত্র সুগতৰিনযা’’তি. ততিযং.

৪. চতুত্থসুত্তং

১২৬. ‘‘দসযিমে, ভিক্খৰে, ধম্মা রাগৰিনযপরিযোসানা হোন্তি দোসৰিনযপরিযোসানা হোন্তি মোহৰিনযপরিযোসানা হোন্তি, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা রাগৰিনযপরিযোসানা হোন্তি দোসৰিনযপরিযোসানা হোন্তি মোহৰিনযপরিযোসানা হোন্তি, নাঞ্ঞত্র সুগতৰিনযা’’তি. চতুত্থং.

৫. পঞ্চমসুত্তং

১২৭. ‘‘দসযিমে, ভিক্খৰে, ধম্মা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তি, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তি, নাঞ্ঞত্র সুগতৰিনযা’’তি. পঞ্চমং.

৬. ছট্ঠসুত্তং

১২৮. ‘‘দসযিমে, ভিক্খৰে, ধম্মা ভাৰিতা বহুলীকতা অনুপ্পন্না উপ্পজ্জন্তি, নাঞ্ঞত্র সুগতৰিনযা. কতমে দস? সম্মাদিট্ঠি …পে… সম্মাৰিমুত্তি – ইমে খো, ভিক্খৰে, দস ধম্মা ভাৰিতা বহুলীকতা অনুপ্পন্না উপ্পজ্জন্তি, নাঞ্ঞত্র সুগতৰিনযা’’তি. ছট্ঠং.

৭. সত্তমসুত্তং

১২৯. ‘‘দসযিমে, ভিক্খৰে, ধম্মা ভাৰিতা বহুলীকতা মহপ্ফলা হোন্তি মহানিসংসা, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা ভাৰিতা বহুলীকতা মহপ্ফলা হোন্তি মহানিসংসা, নাঞ্ঞত্র সুগতৰিনযা’’তি. সত্তমং.

৮. অট্ঠমসুত্তং

১৩০. ‘‘দসযিমে, ভিক্খৰে, ধম্মা ভাৰিতা বহুলীকতা রাগৰিনযপরিযোসানা হোন্তি দোসৰিনযপরিযোসানা হোন্তি মোহৰিনযপরিযোসানা হোন্তি, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা ভাৰিতা বহুলীকতা রাগৰিনযপরিযোসানা হোন্তি দোসৰিনযপরিযোসানা হোন্তি মোহৰিনযপরিযোসানা হোন্তি, নাঞ্ঞত্র সুগতৰিনযা’’তি. অট্ঠমং.

৯. নৰমসুত্তং

১৩১. ‘‘দসযিমে, ভিক্খৰে, ধম্মা ভাৰিতা বহুলীকতা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তি, নাঞ্ঞত্র সুগতৰিনযা. কতমে দস? সম্মাদিট্ঠি…পে… সম্মাৰিমুত্তি – ইমে খো, ভিক্খৰে, দস ধম্মা ভাৰিতা বহুলীকতা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তি, নাঞ্ঞত্র সুগতৰিনযা’’তি. নৰমং.

১০. দসমসুত্তং

১৩২. ‘‘দসযিমে, ভিক্খৰে, মিচ্ছত্তা. কতমে দস? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৰিমুত্তি – ইমে খো, ভিক্খৰে, দস মিচ্ছত্তা’’তি. দসমং.

১১. একাদসমসুত্তং

১৩৩. ‘‘দসযিমে, ভিক্খৰে, সম্মত্তা. কতমে দস? সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি, সম্মাঞাণং, সম্মাৰিমুত্তি – ইমে খো, ভিক্খৰে, দস সম্মত্তা’’তি. একাদসমং.

পরিসুদ্ধৰগ্গো ততিযো.