(১৪) ৪. সাধুৰগ্গো

১. সাধুসুত্তং

১৩৪. [অ. নি. ১০.১৭৮] ‘‘সাধুঞ্চ ৰো, ভিক্খৰে, দেসেস্সামি অসাধুঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমঞ্চ, ভিক্খৰে, অসাধু? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৰিমুত্তি – ইদং ৰুচ্চতি, ভিক্খৰে, অসাধু. কতমঞ্চ, ভিক্খৰে, সাধু? সম্মাদিট্ঠি, সম্মাসঙ্কপ্পো, সম্মাৰাচা সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি, সম্মাঞাণং, সম্মাৰিমুত্তি – ইদং ৰুচ্চতি, ভিক্খৰে, সাধূ’’তি. পঠমং.

২. অরিযধম্মসুত্তং

১৩৫. ‘‘অরিযধম্মঞ্চ ৰো, ভিক্খৰে, দেসেস্সামি অনরিযধম্মঞ্চ. তং সুণাথ…পে… কতমো চ, ভিক্খৰে, অনরিযো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, অনরিযো ধম্মো. কতমো চ, ভিক্খৰে, অরিযো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অরিযো ধম্মো’’তি. দুতিযং.

৩. অকুসলসুত্তং

১৩৬. ‘‘অকুসলঞ্চ ৰো, ভিক্খৰে, দেসেস্সামি কুসলঞ্চ. তং সুণাথ …পে… কতমঞ্চ, ভিক্খৰে, অকুসলং? মিচ্ছাদিট্ঠি…পে… মিচ্ছাৰিমুত্তি – ইদং ৰুচ্চতি, ভিক্খৰে, অকুসলং. কতমঞ্চ, ভিক্খৰে, কুসলং? সম্মাদিট্ঠি…পে… সম্মাৰিমুত্তি – ইদং ৰুচ্চতি, ভিক্খৰে, কুসল’’ন্তি. ততিযং.

৪. অত্থসুত্তং

১৩৭. ‘‘অত্থঞ্চ ৰো, ভিক্খৰে, দেসেস্সামি অনত্থঞ্চ. তং সুণাথ…পে… কতমো চ, ভিক্খৰে, অনত্থো? মিচ্ছাদিট্ঠি …পে… মিচ্ছাৰিমুত্তি – অযং ৰুচ্চতি, ভিক্খৰে, অনত্থো. কতমো চ, ভিক্খৰে, অত্থো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অত্থো’’তি. চতুত্থং.

৫. ধম্মসুত্তং

১৩৮. ‘‘ধম্মঞ্চ ৰো, ভিক্খৰে, দেসেস্সামি অধম্মঞ্চ. তং সুণাথ…পে… কতমো চ, ভিক্খৰে, অধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, অধম্মো. কতমো চ, ভিক্খৰে, ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, ধম্মো’’তি. পঞ্চমং.

৬. সাসৰসুত্তং

১৩৯. ‘‘সাসৰঞ্চ ৰো, ভিক্খৰে, ধম্মং দেসেস্সামি অনাসৰঞ্চ. তং সুণাথ…পে… কতমো চ, ভিক্খৰে, সাসৰো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, সাসৰো ধম্মো. কতমো চ, ভিক্খৰে, অনাসৰো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অনাসৰো ধম্মো’’তি. ছট্ঠং.

৭. সাৰজ্জসুত্তং

১৪০. ‘‘সাৰজ্জঞ্চ ৰো, ভিক্খৰে, ধম্মং দেসেস্সামি অনৰজ্জঞ্চ. তং সুণাথ…পে… কতমো চ, ভিক্খৰে, সাৰজ্জো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, সাৰজ্জো ধম্মো. কতমো চ, ভিক্খৰে, অনৰজ্জো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অনৰজ্জো ধম্মো’’তি. সত্তমং.

৮. তপনীযসুত্তং

১৪১. ‘‘তপনীযঞ্চ ৰো, ভিক্খৰে, ধম্মং দেসেস্সামি অতপনীযঞ্চ. তং সুণাথ…পে… কতমো চ, ভিক্খৰে, তপনীযো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, তপনীযো ধম্মো. কতমো চ, ভিক্খৰে, অতপনীযো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অতপনীযো ধম্মো’’তি. অট্ঠমং.

৯. আচযগামিসুত্তং

১৪২. ‘‘আচযগামিঞ্চ ৰো, ভিক্খৰে, ধম্মং দেসেস্সামি অপচযগামিঞ্চ. তং সুণাথ…পে… কতমো চ, ভিক্খৰে, আচযগামী ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, আচযগামী ধম্মো. কতমো চ, ভিক্খৰে, অপচযগামী ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, অপচযগামী ধম্মো’’তি. নৰমং.

১০. দুক্খুদ্রযসুত্তং

১৪৩. ‘‘দুক্খুদ্রযঞ্চ ৰো, ভিক্খৰে, ধম্মং দেসেস্সামি সুখুদ্রযঞ্চ. তং সুণাথ…পে… কতমো চ, ভিক্খৰে, দুক্খুদ্রযো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, দুক্খুদ্রযো ধম্মো. কতমো চ, ভিক্খৰে, সুখুদ্রযো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, সুখুদ্রযো ধম্মো’’তি. দসমং.

১১. দুক্খৰিপাকসুত্তং

১৪৪. ‘‘দুক্খৰিপাকঞ্চ ৰো, ভিক্খৰে, ধম্মং দেসেস্সামি সুখৰিপাকঞ্চ. তং সুণাথ…পে… কতমো চ, ভিক্খৰে, দুক্খৰিপাকো ধম্মো? মিচ্ছাদিট্ঠি…পে… মিচ্ছাৰিমুত্তি – অযং ৰুচ্চতি, ভিক্খৰে, দুক্খৰিপাকো ধম্মো. কতমো চ, ভিক্খৰে, সুখৰিপাকো ধম্মো? সম্মাদিট্ঠি…পে… সম্মাৰিমুত্তি – অযং ৰুচ্চতি, ভিক্খৰে, সুখৰিপাকো ধম্মো’’তি. একাদসমং.

সাধুৰগ্গো চতুত্থো.