১০. সত্তসমথনানত্থাদি

৩৫৪. সম্মুখাৱিনযোতি ৱা সতিৱিনযোতি ৱা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৱ নানং? সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি ৱা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৱ নানং? সম্মুখাৱিনযোতি ৱা সতিৱিনযোতি ৱা – ইমে ধম্মা নানত্থা চেৱ নানাব্যঞ্জনা চ. সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি ৱা – ইমে ধম্মা নানত্থা চেৱ নানা ব্যঞ্জনা চ.

৩৫৫. [চূড়ৱ. ২২৪] ৱিৱাদো ৱিৱাদাধিকৰণং, ৱিৱাদো নো অধিকৰণং, অধিকৰণং নো ৱিৱাদো, অধিকৰণঞ্চেৱ ৱিৱাদো চ? সিযা ৱিৱাদো ৱিৱাদাধিকৰণং, সিযা ৱিৱাদো নো অধিকৰণং, সিযা অধিকৰণং নো ৱিৱাদো, সিযা অধিকৰণঞ্চেৱ ৱিৱাদো চ.

তত্থ কতমো ৱিৱাদো ৱিৱাদাধিকৰণং? ইধ ভিক্খূ ৱিৱদন্তি ধম্মোতি ৱা অধম্মোতি ৱা…পে… দুট্ঠুল্লা আপত্তীতি ৱা অদুট্ঠুল্লা আপত্তীতি ৱা. যং তত্থ ভণ্ডনং, কলহো, ৱিগ্গহো, ৱিৱাদো, নানাৱাদো, অঞ্ঞথাৱাদো, ৱিপচ্চতায ৱোহাৰো, মেধকং – অযং ৱিৱাদো ৱিৱাদাধিকৰণং.

তত্থ কতমো ৱিৱাদো নো অধিকৰণং? মাতাপি পুত্তেন ৱিৱদতি, পুত্তোপি মাতৰা ৱিৱদতি, পিতাপি পুত্তেন ৱিৱদতি, পুত্তোপি পিতৰা ৱিৱদতি, ভাতাপি ভাতৰা ৱিৱদতি, ভাতাপি ভগিনিযা ৱিৱদতি, ভগিনীপি ভাতৰা ৱিৱদতি, সহাযোপি সহাযেন ৱিৱদতি – অযং ৱিৱাদো নো অধিকৰণং.

তত্থ কতমং অধিকৰণং নো ৱিৱাদো? অনুৱাদাধিকৰণং, আপত্তাধিকৰণং, কিচ্চাধিকৰণং – ইদং অধিকৰণং নো ৱিৱাদো.

তত্থ কতমং অধিকৰণঞ্চেৱ ৱিৱাদো চ? ৱিৱাদাধিকৰণং অধিকৰণঞ্চেৱ ৱিৱাদো চ.

৩৫৬. [চূড়ৱ. ২২৪ আদযো] অনুৱাদো অনুৱাদাধিকৰণং, অনুৱাদো নো অধিকৰণং, অধিকৰণং নো অনুৱাদো, অধিকৰণঞ্চেৱ অনুৱাদো চ? সিযা অনুৱাদো অনুৱাদাধিকৰণং, সিযা অনুৱাদো নো অধিকৰণং, সিযা অধিকৰণং নো অনুৱাদো, সিযা অধিকৰণঞ্চেৱ অনুৱাদো চ.

তত্থ কতমো অনুৱাদো অনুৱাদাধিকৰণং? ইধ ভিক্খূ ভিক্খুং অনুৱদন্তি সীলৱিপত্তিযা ৱা আচাৰৱিপত্তিযা ৱা দিট্ঠিৱিপত্তিযা ৱা আজীৱৱিপত্তিযা ৱা. যো তত্থ অনুৱাদো, অনুৱদনা অনুল্লপনা অনুভণনা অনুসম্পৱঙ্কতা অব্ভুস্সহনতা অনুবলপ্পদানং – অযং অনুৱাদো অনুৱাদাধিকৰণং.

তত্থ কতমো অনুৱাদো নো অধিকৰণং? মাতাপি পুত্তং অনুৱদতি, পুত্তোপি মাতৰং অনুৱদতি, পিতাপি পুত্তং অনুৱদতি, পুত্তোপি পিতৰং অনুৱদতি, ভাতাপি ভাতৰং অনুৱদতি, ভাতাপি ভগিনিং অনুৱদতি, ভগিনীপি ভাতৰং অনুৱদতি, সহাযোপি সহাযং অনুৱদতি – অযং অনুৱাদো নো অধিকৰণং.

তত্থ কতমং অধিকৰণং নো অনুৱাদো? আপত্তাধিকৰণং কিচ্চাধিকৰণং ৱিৱাদাধিকৰণং – ইদং অধিকৰণং নো অনুৱাদো.

তত্থ কতমং অধিকৰণঞ্চেৱ অনুৱাদো চ? অনুৱাদাধিকৰণং অধিকৰণঞ্চেৱ অনুৱাদো চ.

৩৫৭. আপত্তি আপত্তাধিকৰণং, আপত্তি নো অধিকৰণং, অধিকৰণং নো আপত্তি, অধিকৰণঞ্চেৱ আপত্তি চ? সিযা আপত্তি আপত্তাধিকৰণং, সিযা আপত্তি নো অধিকৰণং, সিযা অধিকৰণং নো আপত্তি, সিযা অধিকৰণঞ্চেৱ আপত্তি চ.

তত্থ কতমা আপত্তি আপত্তাধিকৰণং? পঞ্চপি আপত্তিক্খন্ধা আপত্তাধিকৰণং. সত্তপি আপত্তিক্খন্ধা আপত্তাধিকৰণং. অযং আপত্তি আপত্তাধিকৰণং.

তত্থ কতমা আপত্তি নো অধিকৰণং? সোতাপত্তি সমাপত্তি – অযং আপত্তি নো অধিকৰণং.

তত্থ কতমং অধিকৰণং নো আপত্তি? কিচ্চাধিকৰণং ৱিৱাদাধিকৰণং অনুৱাদাধিকৰণং – ইদং অধিকৰণং নো আপত্তি.

তত্থ কতমং অধিকৰণঞ্চেৱ আপত্তি চ? আপত্তাধিকৰণং অধিকৰণঞ্চেৱ আপত্তি চ.

৩৫৮. [চূড়ৱ. ২২৩] কিচ্চং কিচ্চাধিকৰণং, কিচ্চং নো অধিকৰণং, অধিকৰণং নো কিচ্চং, অধিকৰণঞ্চেৱ কিচ্চঞ্চ? সিযা কিচ্চং কিচ্চাধিকৰণং, সিযা কিচ্চং নো অধিকৰণং, সিযা অধিকৰণং নো কিচ্চং, সিযা অধিকৰণঞ্চেৱ কিচ্চঞ্চ.

তত্থ কতমং কিচ্চং কিচ্চাধিকৰণং? যা সঙ্ঘস্স কিচ্চযতা কৰণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং – ইদং কিচ্চং কিচ্চাধিকৰণং.

তত্থ কতমং কিচ্চং নো অধিকৰণং? আচৰিযকিচ্চং উপজ্ঝাযকিচ্চং [উপজ্ঝাযকিচ্চং সকিচ্চং (ক.)] সমানুপজ্ঝাযকিচ্চং সমানাচৰিযকিচ্চং – ইদং কিচ্চং নো অধিকৰণং.

তত্থ কতমং অধিকৰণং নো কিচ্চং? ৱিৱাদাধিকৰণং অনুৱাদাধিকৰণং আপত্তাধিকৰণং – ইদং অধিকৰণং নো কিচ্চং.

তত্থ কতমং অধিকৰণঞ্চেৱ কিচ্চঞ্চ? কিচ্চাধিকৰণং অধিকৰণঞ্চেৱ কিচ্চং চাতি.

অধিকৰণভেদো নিট্ঠিতো.