অপৰগাথাসঙ্গণিকং

১. চোদনাদিপুচ্ছাৱিস্সজ্জনা

৩৫৯. চোদনা কিমত্থায, সাৰণা কিস্স কাৰণা;

সঙ্ঘো কিমত্থায, মতিকম্মং পন কিস্স কাৰণা.

চোদনা সাৰণত্থায, নিগ্গহত্থায সাৰণা;

সঙ্ঘো পৰিগ্গহত্থায, মতিকম্মং পন পাটিযেক্কং.

মা খো তুৰিতো অভণি, মা খো চণ্ডিকতো ভণি;

মা খো পটিঘং জনযি, সচে অনুৱিজ্জকো তুৱং.

মা খো সহসা অভণি, কথং ৱিগ্গাহিকং অনত্থসংহিতং;

সুত্তে ৱিনযে অনুলোমে, পঞ্ঞত্তে অনুলোমিকে.

অনুযোগৱত্তং নিসাময, কুসলেন বুদ্ধিমতা কতং;

সুৱুত্তং সিক্খাপদানুলোমিকং, গতিং ন নাসেন্তো সম্পৰাযিকং;

হিতেসী অনুযুঞ্জস্সু, কালেনত্থূপসংহিতং.

চুদিতস্স চ চোদকস্স চ;

সহসা ৱোহাৰং মা পধাৰেসি;

চোদকো আহ আপন্নোতি;

চুদিতকো আহ অনাপন্নোতি.

উভো অনুক্খিপন্তো, পটিঞ্ঞানুসন্ধিতেন কাৰযে;

পটিঞ্ঞা লজ্জীসু কতা, অলজ্জীসু এৱং ন ৱিজ্জতি;

বহুম্পি অলজ্জী ভাসেয্য, ৱত্তানুসন্ধিতেন [ৱুত্তানুসন্ধিতেন (সী. স্যা. ক.)] কাৰযে.

অলজ্জী কীদিসো হোতি, পটিঞ্ঞা যস্স ন ৰূহতি;

এতঞ্চ [এৱঞ্চ (ক.)] তাহং পুচ্ছামি, কীদিসো ৱুচ্চতি অলজ্জী পুগ্গলো.

সঞ্চিচ্চ আপত্তিং আপজ্জতি, আপত্তিং পৰিগূহতি;

অগতিগমনঞ্চ গচ্ছতি, এদিসো ৱুচ্চতি অলজ্জীপুগ্গলো.

সচ্চং অহম্পি জানামি, এদিসো ৱুচ্চতি অলজ্জীপুগ্গলো;

অঞ্ঞঞ্চ তাহং পুচ্ছামি, কীদিসো ৱুচ্চতি লজ্জীপুগ্গলো.

সঞ্চিচ্চ আপত্তিং নাপজ্জতি, আপত্তিং ন পৰিগূহতি;

অগতিগমনং ন গচ্ছতি, এদিসো ৱুচ্চতি লজ্জীপুগ্গলো.

সচ্চং অহম্পি জানামি, এদিসো ৱুচ্চতি লজ্জীপুগ্গলো;

অঞ্ঞঞ্চ তাহং পুচ্ছামি, কীদিসো ৱুচ্চতি অধম্মচোদকো.

অকালে চোদেতি অভূতেন;

ফৰুসেন অনত্থসংহিতেন;

দোসন্তৰো চোদেতি নো মেত্তাচিত্তো;

এদিসো ৱুচ্চতি অধম্মচোদকো.

সচ্চং অহম্পি জানামি, এদিসো ৱুচ্চতি অধম্মচোদকো;

অঞ্ঞঞ্চ তাহং পুচ্ছামি, কীদিসো ৱুচ্চতি ধম্মচোদকো.

কালেন চোদেতি ভূতেন, সণ্হেন অত্থসংহিতেন;

মেত্তাচিত্তো চোদেতি নো দোসন্তৰো;

এদিসো ৱুচ্চতি ধম্মচোদকো.

সচ্চং অহম্পি জানামি, এদিসো ৱুচ্চতি ধম্মচোদকো;

অঞ্ঞঞ্চ তাহং পুচ্ছামি, কীদিসো ৱুচ্চতি বালচোদকো.

পুব্বাপৰং ন জানাতি, পুব্বাপৰস্স অকোৱিদো;

অনুসন্ধিৱচনপথং ন জানাতি;

অনুসন্ধিৱচনপথস্স অকোৱিদো;

এদিসো ৱুচ্চতি বালচোদকো.

সচ্চং অহম্পি জানামি, এদিসো ৱুচ্চতি বালচোদকো;

অঞ্ঞঞ্চ তাহং পুচ্ছামি, কীদিসো ৱুচ্চতি পণ্ডিতচোদকো.

পুব্বাপৰম্পি জানাতি, পুব্বাপৰস্স কোৱিদো;

অনুসন্ধিৱচনপথং জানাতি, অনুসন্ধিৱচনপথস্স কোৱিদো;

এদিসো ৱুচ্চতি পণ্ডিতচোদকো.

সচ্চং অহম্পি জানামি, এদিসো ৱুচ্চতি পণ্ডিতচোদকো;

অঞ্ঞঞ্চ তাহং পুচ্ছামি, চোদনা কিন্তি ৱুচ্চতি.

সীলৱিপত্তিযা চোদেতি, অথো আচাৰদিট্ঠিযা;

আজীৱেনপি চোদেতি, চোদনা তেন ৱুচ্চতীতি.

অপৰং গাথাসঙ্গণিকং নিট্ঠিতং.