অধিকৰণভেদো

১. উক্কোটনভেদাদি

৩৪০. [চূড়ৱ. ২১৫; পৰি. ২৭৫] চত্তাৰি অধিকৰণানি. ৱিৱাদাধিকৰণং, অনুৱাদাধিকৰণং, আপত্তাধিকৰণং, কিচ্চাধিকৰণং – ইমানি চত্তাৰি অধিকৰণানি.

ইমেসং চতুন্নং অধিকৰণানং কতি উক্কোটা? ইমেসং চতুন্নং অধিকৰণানং দস উক্কোটা. ৱিৱাদাধিকৰণস্স দ্ৱে উক্কোটা, অনুৱাদাধিকৰণস্স চত্তাৰো উক্কোটা, আপত্তাধিকৰণস্স তযো উক্কোটা, কিচ্চাধিকৰণস্স একো উক্কোটো – ইমেসং চতুন্নং অধিকৰণানং ইমে দস উক্কোটা.

ৱিৱাদাধিকৰণং উক্কোটেন্তো কতি সমথে উক্কোটেতি? অনুৱাদাধিকৰণং উক্কোটেন্তো কতি সমথে উক্কোটেতি? আপত্তাধিকৰণং উক্কোটেন্তো কতি সমথে উক্কোটেতি? কিচ্চাধিকৰণং উক্কোটেন্তো কতি সমথে উক্কোটেতি?

ৱিৱাদাধিকৰণং উক্কোটেন্তো দ্ৱে সমথে উক্কোটেতি. অনুৱাদাধিকৰণং উক্কোটেন্তো চত্তাৰো সমথে উক্কোটেতি. আপত্তাধিকৰণং উক্কোটেন্তো তযো সমথে উক্কোটেতি. কিচ্চাধিকৰণং উক্কোটেন্তো একং সমথং উক্কোটেতি.

৩৪১. কতি উক্কোটা? কতিহাকাৰেহি উক্কোটনং পসৱতি? কতিহঙ্গেহি সমন্নাগতো পুগ্গলো অধিকৰণং উক্কোটেতি? কতি পুগ্গলা অধিকৰণং উক্কোটেন্তা আপত্তিং আপজ্জন্তি?

দ্ৱাদস উক্কোটা. দসহাকাৰেহি উক্কোটনং পসৱতি. চতূহঙ্গেহি সমন্নাগতো পুগ্গলো অধিকৰণং উক্কোটেতি. চত্তাৰো পুগ্গলা অধিকৰণং উক্কোটেন্তা আপত্তিং আপজ্জন্তি?

কতমে দ্ৱাদস উক্কোটা? অকতং কম্মং, দুক্কটং কম্মং, পুন কাতব্বং কম্মং, অনিহতং, দুন্নিহতং, পুন নিহনিতব্বং, অৱিনিচ্ছিতং, দুৱিনিচ্ছিতং, পুন ৱিনিচ্ছিতব্বং, অৱূপসন্তং, দুৱূপসন্তং, পুন ৱূপসমেতব্বন্তি – ইমে দ্ৱাদস উক্কোটা.

কতমেহি দসহাকাৰেহি উক্কোটনং পসৱতি? তত্থ জাতকং অধিকৰণং উক্কোটেতি, তত্থ জাতকং ৱূপসন্তং অধিকৰণং উক্কোটেতি, অন্তৰামগ্গে অধিকৰণং উক্কোটেতি, অন্তৰামগ্গে ৱূপসন্তং অধিকৰণং উক্কোটেতি, তত্থ গতং অধিকৰণং উক্কোটেতি, তত্থ গতং ৱূপসন্তং অধিকৰণং উক্কোটেতি, সতিৱিনযং উক্কোটেতি, অমূড়্হৱিনযং উক্কোটেতি, তস্সপাপিযসিকং উক্কোটেতি, তিণৱত্থাৰকং উক্কোটেতি – ইমেহি দসহাকাৰেহি উক্কোটনং পসৱতি.

কতমেহি চতূহঙ্গেহি সমন্নাগতো পুগ্গলো অধিকৰণং উক্কোটেতি? ছন্দাগতিং গচ্ছন্তো অধিকৰণং উক্কোটেতি, দোসাগতিং গচ্ছন্তো অধিকৰণং উক্কোটেতি, মোহাগতিং গচ্ছন্তো অধিকৰণং উক্কোটেতি, ভযাগতিং গচ্ছন্তো অধিকৰণং উক্কোটেতি – ইমেহি চতূহঙ্গেহি সমন্নাগতো পুগ্গলো অধিকৰণং উক্কোটেতি.

কতমে চত্তাৰো পুগ্গলা অধিকৰণং উক্কোটেন্তা আপত্তিং আপজ্জন্তি? তদহুপসম্পন্নো উক্কোটেতি উক্কোটনকং পাচিত্তিযং, আগন্তুকো উক্কোটেতি উক্কোটনকং পাচিত্তিযং, কাৰকো উক্কোটেতি উক্কোটনকং পাচিত্তিযং, ছন্দদাযকো উক্কোটেতি উক্কোটনকং পাচিত্তিযং – ইমে চত্তাৰো পুগ্গলা অধিকৰণং উক্কোটেন্তা আপত্তিং আপজ্জন্তি.

২. অধিকৰণনিদানাদি

৩৪২. ৱিৱাদাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? অনুৱাদাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? আপত্তাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? কিচ্চাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং?

ৱিৱাদাধিকৰণং ৱিৱাদনিদানং ৱিৱাদসমুদযং ৱিৱাদজাতিকং ৱিৱাদপভৱং ৱিৱাদসম্ভাৰং ৱিৱাদসমুট্ঠানং. অনুৱাদাধিকৰণং অনুৱাদনিদানং অনুৱাদসমুদযং অনুৱাদজাতিকং অনুৱাদপভৱং অনুৱাদসম্ভাৰং অনুৱাদসমুট্ঠানং. আপত্তাধিকৰণং আপত্তিনিদানং আপত্তিসমুদযং আপত্তিজাতিকং আপত্তিপভৱং আপত্তিসম্ভাৰং আপত্তিসমুট্ঠানং. কিচ্চাধিকৰণং কিচ্চযনিদানং কিচ্চযসমুদযং কিচ্চযজাতিকং কিচ্চযপভৱং কিচ্চযসম্ভাৰং কিচ্চযসমুট্ঠানং.

ৱিৱাদাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? অনুৱাদাধিকৰণং…পে… আপত্তাধিকৰণং…পে… কিচ্চাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং?

ৱিৱাদাধিকৰণং হেতুনিদানং, হেতুসমুদযং, হেতুজাতিকং, হেতুপভৱং, হেতুসম্ভাৰং, হেতুসমুট্ঠানং. অনুৱাদাধিকৰণং…পে… আপত্তাধিকৰণং…পে… কিচ্চাধিকৰণং হেতুনিদানং, হেতুসমুদযং, হেতুজাতিকং, হেতুপভৱং, হেতুসম্ভাৰং, হেতুসমুট্ঠানং.

ৱিৱাদাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? অনুৱাদাধিকৰণং …পে… আপত্তাধিকৰণং…পে… কিচ্চাধিকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং?

ৱিৱাদাধিকৰণং পচ্চযনিদানং, পচ্চযসমুদযং, পচ্চযজাতিকং, পচ্চযপভৱং, পচ্চযসম্ভাৰং, পচ্চযসমুট্ঠানং. অনুৱাদাধিকৰণং…পে… আপত্তাধিকৰণং…পে… কিচ্চাধিকৰণং পচ্চযনিদানং, পচ্চযসমুদযং, পচ্চযজাতিকং, পচ্চযপভৱং, পচ্চযসম্ভাৰং, পচ্চযসমুট্ঠানং.

৩. অধিকৰণমূলাদি

৩৪৩. চতুন্নং অধিকৰণানং কতি মূলানি, কতি সমুট্ঠানা? চতুন্নং অধিকৰণানং তেত্তিংস মূলানি, তেত্তিংস সমুট্ঠানা.

চতুন্নং অধিকৰণানং কতমানি তেত্তিংস মূলানি? ৱিৱাদাধিকৰণস্স দ্ৱাদস মূলানি, অনুৱাদাধিকৰণস্স চুদ্দস মূলানি, আপত্তাধিকৰণস্স ছ মূলানি, কিচ্চাধিকৰণস্স একং মূলং, সঙ্ঘো – চতুন্নং অধিকৰণানং ইমানি তেত্তিংস মূলানি.

চতুন্নং অধিকৰণানং কতমে তেত্তিংস সমুট্ঠানা? ৱিৱাদাধিকৰণস্স অট্ঠাৰসভেদকৰৱত্থূনি সমুট্ঠানা, অনুৱাদাধিকৰণস্স চতস্সো ৱিপত্তিযো সমুট্ঠানা, আপত্তাধিকৰণস্স সত্তাপত্তিক্খন্ধা সমুট্ঠানা, কিচ্চাধিকৰণস্স চত্তাৰি কম্মানি সমুট্ঠানা – চতুন্নং অধিকৰণানং ইমে তেত্তিংস সমুট্ঠানা.

৪. অধিকৰণপচ্চযাপত্তি

৩৪৪. ৱিৱাদাধিকৰণং আপত্তানাপত্তীতি? ৱিৱাদাধিকৰণং ন আপত্তি. কিং পন ৱিৱাদাধিকৰণপচ্চযা আপত্তিং আপজ্জেয্যাতি? আম, ৱিৱাদাধিকৰণপচ্চযা আপত্তিং আপজ্জেয্য. ৱিৱাদাধিকৰণপচ্চযা কতি আপত্তিযো আপজ্জতি? ৱিৱাদাধিকৰণপচ্চযা দ্ৱে আপত্তিযো আপজ্জতি. উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স – ৱিৱাদাধিকৰণপচ্চযা ইমা দ্ৱে আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি? চতুন্নং অধিকৰণানং কতমং অধিকৰণং? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? কতিহি অধিকৰণেহি কতিসু ঠানেসু কতিহি সমথেহি সম্মন্তি?

তা আপত্তিযো চতুন্নং ৱিপত্তীনং একং ৱিপত্তিং ভজন্তি – আচাৰৱিপত্তিং. চতুন্নং অধিকৰণানং, আপত্তাধিকৰণং. সত্তন্নং আপত্তিক্খন্ধানং দ্ৱীহি আপত্তিক্খন্ধেহি সঙ্গহিতা – সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি. একেন অধিকৰণেন – কিচ্চাধিকৰণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

৩৪৫. অনুৱাদাধিকৰণং আপত্তানাপত্তীতি? অনুৱাদাধিকৰণং ন আপত্তি. কিং পন অনুৱাদাধিকৰণপচ্চযা আপত্তিং আপজ্জেয্যাতি? আম, অনুৱাদাধিকৰণপচ্চযা আপত্তিং আপজ্জেয্য. অনুৱাদাধিকৰণপচ্চযা, কতি আপত্তিযো আপজ্জতি? অনুৱাদাধিকৰণপচ্চযা তিস্সো আপত্তিযো আপজ্জতি. ভিক্খুং অমূলকেন পাৰাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; অমূলকেন সঙ্ঘাদিসেসেন অনুদ্ধংসেতি, আপত্তি পাচিত্তিযস্স; অমূলিকায আচাৰৱিপত্তিযা অনুদ্ধংসেতি, আপত্তি দুক্কটস্স – অনুৱাদাধিকৰণপচ্চযা ইমা তিস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. চতুন্নং অধিকৰণানং, আপত্তাধিকৰণং. সত্তন্নং আপত্তিক্খন্ধানং তীহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি. যা তা আপত্তিযো গৰুকা তা আপত্তিযো একেন অধিকৰণেন – কিচ্চাধিকৰণেন; একম্হি ঠানে – সঙ্ঘমজ্ঝে; দ্ৱীহি সমথেহি সম্মন্তি – সম্মুখাৱিনযেন চ পটিঞ্ঞাতকৰণেন চ. যা তা আপত্তিযো লহুকা তা আপত্তিযো একেন অধিকৰণেন – কিচ্চাধিকৰণেন; তীসু ঠানেসু – সঙ্ঘমজ্ঝে গণমজ্ঝে পুগ্গলস্স সন্তিকে; তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

৩৪৬. আপত্তাধিকৰণং আপত্তানাপত্তীতি? আপত্তাধিকৰণং আপত্তি. কিং পন আপত্তাধিকৰণপচ্চযা আপত্তিং আপজ্জেয্যাতি? আম, আপত্তাধিকৰণপচ্চযা আপত্তিং আপজ্জেয্য. আপত্তাধিকৰণপচ্চযা কতি আপত্তিযো আপজ্জতি? আপত্তাধিকৰণপচ্চযা চতস্সো আপত্তিযো আপজ্জতি. ভিক্খুনী জানং পাৰাজিকং ধম্মং [পাৰাজিকং ধম্মং অজ্ঝাপন্নং (স্যা.)] পটিচ্ছাদেতি, আপত্তি পাৰাজিকস্স; ৱেমতিকা পটিচ্ছাদেতি, আপত্তি থুল্লচ্চযস্স; ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স; আচাৰৱিপত্তিং পটিচ্ছাদেতি, আপত্তি দুক্কটস্স – আপত্তাধিকৰণপচ্চযা ইমা চতস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং সিযা আচাৰৱিপত্তিং. চতুন্নং অধিকৰণানং – আপত্তাধিকৰণং. সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. যা সা আপত্তি অনৱসেসা সা আপত্তি ন কতমেন অধিকৰণেন, ন কতমম্হি ঠানে, ন কতমেন সমথেন সম্মতি. যা তা আপত্তিযো লহুকা তা আপত্তিযো একেন অধিকৰণেন – কিচ্চাধিকৰণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

৩৪৭. কিচ্চাধিকৰণং আপত্তানাপত্তীতি? কিচ্চাধিকৰণং ন আপত্তি. কিং পন কিচ্চাধিকৰণপচ্চযা আপত্তিং আপজ্জেয্যাতি? আম, কিচ্চাধিকৰণপচ্চযা আপত্তিং আপজ্জেয্য. কিচ্চাধিকৰণপচ্চযা কতি আপত্তিযো আপজ্জতি? কিচ্চাধিকৰণপচ্চযা পঞ্চ আপত্তিযো আপজ্জতি. উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জতি, ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি পাৰাজিকস্স; ভেদকানুৱত্তকা ভিক্খূ যাৱততিযং সমনুভাসনায ন পটিনিস্সজ্জন্তি, আপত্তি সঙ্ঘাদিসেসস্স; পাপিকায দিট্ঠিযা যাৱততিযং সমনুভাসনায ন পটিনিস্সজ্জন্তি, আপত্তি পাচিত্তিযস্স – কিচ্চাধিকৰণপচ্চযা ইমা পঞ্চ আপত্তিযো আপজ্জতি.

তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং সিযা আচাৰৱিপত্তিং. চতুন্নং অধিকৰণানং – আপত্তাধিকৰণং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. যা সা আপত্তি অনৱসেসা সা আপত্তি ন কতমেন অধিকৰণেন, ন কতমম্হি ঠানে, ন কতমেন সমথেন সম্মতি. যা সা আপত্তি গৰুকা সা আপত্তি একেন অধিকৰণেন – কিচ্চাধিকৰণেন; একম্হি ঠানে – সঙ্ঘমজ্ঝে; দ্ৱীহি সমথেহি সম্মতি – সম্মুখাৱিনযেন চ পটিঞ্ঞাতকৰণেন চ. যা তা আপত্তিযো লহুকা তা আপত্তিযো একেন অধিকৰণেন – কিচ্চাধিকৰণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

৫. অধিকৰণাধিপ্পাযো

৩৪৮. ৱিৱাদাধিকৰণং হোতি অনুৱাদাধিকৰণং, হোতি আপত্তাধিকৰণং, হোতি কিচ্চাধিকৰণং. ৱিৱাদাধিকৰণং ন হোতি অনুৱাদাধিকৰণং, ন হোতি আপত্তাধিকৰণং, ন হোতি কিচ্চাধিকৰণং; অপি চ, ৱিৱাদাধিকৰণপচ্চযা হোতি অনুৱাদাধিকৰণং, হোতি আপত্তাধিকৰণং, হোতি কিচ্চাধিকৰণং. যথা কথং ৱিয? [চূড়ৱ. ২১৫; পৰি. ৩১৪] ইধ ভিক্খূ ৱিৱদন্তি – ধম্মোতি ৱা অধম্মোতি ৱা দুট্ঠুল্লাপত্তীতি ৱা অদুট্ঠুল্লাপত্তীতি ৱা. যং তত্থ ভণ্ডনং কলহো ৱিগ্গহো ৱিৱাদো নানাৱাদো অঞ্ঞথাৱাদো ৱিপচ্চতায ৱোহাৰো মেধকং, ইদং ৱুচ্চতি ৱিৱাদাধিকৰণং. ৱিৱাদাধিকৰণে সঙ্ঘো ৱিৱদতি ৱিৱাদাধিকৰণং. ৱিৱদমানো অনুৱদতি অনুৱাদাধিকৰণং. অনুৱদমানো আপত্তিং আপজ্জতি আপত্তাধিকৰণং. তায আপত্তিযা সঙ্ঘো কম্মং কৰোতি কিচ্চাধিকৰণং. এৱং ৱিৱাদাধিকৰণপচ্চযা হোতি অনুৱাদাধিকৰণং, হোতি আপত্তাধিকৰণং, হোতি কিচ্চাধিকৰণং.

অনুৱাদাধিকৰণং হোতি আপত্তাধিকৰণং, হোতি কিচ্চাধিকৰণং, হোতি ৱিৱাদাধিকৰণং. অনুৱাদাধিকৰণং ন হোতি আপত্তাধিকৰণং, ন হোতি কিচ্চাধিকৰণং, ন হোতি ৱিৱাদাধিকৰণং; অপি চ, অনুৱাদাধিকৰণপচ্চযা হোতি আপত্তাধিকৰণং, হোতি কিচ্চাধিকৰণং, হোতি ৱিৱাদাধিকৰণং. যথা কথং ৱিয? ইধ ভিক্খূ ভিক্খুং অনুৱদন্তি সীলৱিপত্তিযা ৱা আচাৰৱিপত্তিযা ৱা দিট্ঠিৱিপত্তিযা ৱা আজীৱৱিপত্তিযা ৱা. যো তত্থ অনুৱাদো অনুৱদনা অনুল্লপনা অনুভণনা অনুসম্পৱঙ্কতা অব্ভুস্সহনতা অনুবলপ্পদানং, ইদং ৱুচ্চতি অনুৱাদাধিকৰণং. অনুৱাদাধিকৰণে সঙ্ঘো ৱিৱদতি, ৱিৱাদাধিকৰণং. ৱিৱদমানো অনুৱদতি, অনুৱাদাধিকৰণং. অনুৱদমানো আপত্তিং আপজ্জতি, আপত্তাধিকৰণং. তায আপত্তিযা সঙ্ঘো কম্মং কৰোতি, কিচ্চাধিকৰণং. এৱং অনুৱাদাধিকৰণপচ্চযা হোতি আপত্তাধিকৰণং, হোতি কিচ্চাধিকৰণং, হোতি ৱিৱাদাধিকৰণং.

আপত্তাধিকৰণং হোতি কিচ্চাধিকৰণং, হোতি ৱিৱাদাধিকৰণং, হোতি অনুৱাদাধিকৰণং. আপত্তাধিকৰণং ন হোতি কিচ্চাধিকৰণং, ন হোতি ৱিৱাদাধিকৰণং, ন হোতি অনুৱাদাধিকৰণং; অপি চ, আপত্তাধিকৰণপচ্চযা হোতি কিচ্চাধিকৰণং, হোতি ৱিৱাদাধিকৰণং, হোতি অনুৱাদাধিকৰণং. যথা কথং ৱিয? [চূড়ৱ. ২১৫; পৰি. ৩৪৮] পঞ্চপি আপত্তিক্খন্ধা আপত্তাধিকৰণং, সত্তপি আপত্তিক্খন্ধা আপত্তাধিকৰণং, ইদং ৱুচ্চতি আপত্তাধিকৰণং. আপত্তাধিকৰণে সঙ্ঘো ৱিৱদতি ৱিৱাদাধিকৰণং. ৱিৱদমানো অনুৱদতি অনুৱাদাধিকৰণং. অনুৱদমানো আপত্তিং আপজ্জতি আপত্তাধিকৰণং. তায আপত্তিযা সঙ্ঘো কম্মং কৰোতি কিচ্চাধিকৰণং. এৱং আপত্তাধিকৰণপচ্চযা হোতি কিচ্চাধিকৰণং, হোতি ৱিৱাদাধিকৰণং, হোতি অনুৱাদাধিকৰণং.

কিচ্চাধিকৰণং হোতি ৱিৱাদাধিকৰণং, হোতি অনুৱাদাধিকৰণং, হোতি আপত্তাধিকৰণং. কিচ্চাধিকৰণং ন হোতি ৱিৱাদাধিকৰণং, ন হোতি অনুৱাদাধিকৰণং, ন হোতি আপত্তাধিকৰণং; অপি চ, কিচ্চাধিকৰণপচ্চযা হোতি ৱিৱাদাধিকৰণং, হোতি অনুৱাদাধিকৰণং, হোতি আপত্তাধিকৰণং. যথা কথং ৱিয? যা সঙ্ঘস্স কিচ্চযতা কৰণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং, ইদং ৱুচ্চতি কিচ্চাধিকৰণং. কিচ্চাধিকৰণে সঙ্ঘো ৱিৱদতি ৱিৱাদাধিকৰণং. ৱিৱদমানো অনুৱদতি অনুৱাদাধিকৰণং. অনুৱদমানো আপত্তিং আপজ্জতি আপত্তাধিকৰণং. তায আপত্তিযা সঙ্ঘো কম্মং কৰোতি কিচ্চাধিকৰণং. এৱং কিচ্চাধিকৰণপচ্চযা হোতি ৱিৱাদাধিকৰণং, হোতি অনুৱাদাধিকৰণং, হোতি আপত্তাধিকৰণং.

৬. পুচ্ছাৱাৰো

৩৪৯. যত্থ সতিৱিনযো তত্থ সম্মুখাৱিনযো? যত্থ সম্মুখাৱিনযো তত্থ সতিৱিনযো? যত্থ অমূড়্হৱিনযো তত্থ সম্মুখাৱিনযো? যত্থ সম্মুখাৱিনযো তত্থ অমূড়্হৱিনযো? যত্থ পটিঞ্ঞাতকৰণং তত্থ সম্মুখাৱিনযো? যত্থ সম্মুখাৱিনযো তত্থ পটিঞ্ঞাতকৰণং? যত্থ যেভুয্যসিকা তত্থ সম্মুখাৱিনযো? যত্থ সম্মুখাৱিনযো তত্থ যেভুয্যসিকা? যত্থ তস্সপাপিযসিকা তত্থ সম্মুখাৱিনযো? যত্থ সম্মুখাৱিনযো তত্থ তস্সপাপিযসিকা? যত্থ তিণৱত্থাৰকো তত্থ সম্মুখাৱিনযো? যত্থ সম্মুখাৱিনযো তত্থ তিণৱত্থাৰকো?

৭. ৱিস্সজ্জনাৱাৰো

৩৫০. যস্মিং সমযে সম্মুখাৱিনযেন চ সতিৱিনযেন চ অধিকৰণং ৱূপসম্মতি – যত্থ সতিৱিনযো তত্থ সম্মুখাৱিনযো, যত্থ সম্মুখাৱিনযো তত্থ সতিৱিনযো, ন তত্থ অমূড়্হৱিনযো, ন তত্থ পটিঞ্ঞাতকৰণং, ন তত্থ যেভুয্যসিকা, ন তত্থ তস্সপাপিযসিকা, ন তত্থ তিণৱত্থাৰকো. যস্মিং সমযে সম্মুখাৱিনযেন চ অমূড়্হৱিনযেন চ…পে… সম্মুখাৱিনযেন চ পটিঞ্ঞাতকৰণেন চ…পে… সম্মুখাৱিনযেন চ যেভুয্যসিকায চ…পে… সম্মুখাৱিনযেন চ তস্সপাপিযসিকায চ…পে… সম্মুখাৱিনযেন চ তিণৱত্থাৰকেন চ অধিকৰণং ৱূপসম্মতি – যত্থ তিণৱত্থাৰকো তত্থ সম্মুখাৱিনযো, যত্থ সম্মুখাৱিনযো তত্থ তিণৱত্থাৰকো, ন তত্থ সতিৱিনযো, ন তত্থ অমূড়্হৱিনযো, ন তত্থ পটিঞ্ঞাতকৰণং, ন তত্থ যেভুয্যসিকা, ন তত্থ তস্সপাপিযসিকা.

৮. সংসট্ঠৱাৰো

৩৫১. সম্মুখাৱিনযোতি ৱা সতিৱিনযোতি ৱা – ইমে ধম্মা সংসট্ঠা উদাহু ৱিসংসট্ঠা? লব্ভা চ পনিমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং? সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি – ইমে ধম্মা সংসট্ঠা উদাহু ৱিসংসট্ঠা? লব্ভা চ পনিমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং?

সম্মুখাৱিনযোতি ৱা সতিৱিনযোতি ৱা – ইমে ধম্মা সংসট্ঠা, নো ৱিসংসট্ঠা; ন চ লব্ভা ইমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং. সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি ৱা – ইমে ধম্মা সংসট্ঠা, নো ৱিসংসট্ঠা; ন চ লব্ভা ইমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং.

৯. সত্তসমথনিদানং

৩৫২. সম্মুখাৱিনযো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো কিংসমুট্ঠানো? সতিৱিনযো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো, কিংসমুট্ঠানো? অমূড়্হৱিনযো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো, কিংসমুট্ঠানো? পটিঞ্ঞাতকৰণং কিংনিদানং, কিংসমুদযং, কিংজাতিকং, কিংপভৱং, কিংসম্ভাৰং, কিংসমুট্ঠানং? যেভুয্যসিকা কিংনিদানা, কিংসমুদযা, কিংজাতিকা, কিংপভৱা, কিংসম্ভাৰা, কিংসমুট্ঠানা? তস্সপাপিযসিকা কিংনিদানা, কিংসমুদযা, কিংজাতিকা, কিংপভৱা, কিংসম্ভাৰা, কিংসমুট্ঠানা তিণৱত্থাৰকো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো, কিংসমুট্ঠানো?

সম্মুখাৱিনযো নিদাননিদানো, নিদানসমুদযো, নিদানজাতিকো, নিদানপভৱো, নিদানসম্ভাৰো, নিদানসমুট্ঠানো. সতিৱিনযো…পে… অমূড়্হৱিনযো…পে… পটিঞ্ঞাতকৰণং নিদাননিদানং, নিদানসমুদযং, নিদানজাতিকং, নিদানপভৱং, নিদানসম্ভাৰং, নিদানসমুট্ঠানং. যেভুয্যসিকা…পে… তস্সপাপিযসিকা নিদাননিদানা, নিদানসমুদযা, নিদানজাতিকা, নিদানপভৱা, নিদানসম্ভাৰা, নিদানসমুট্ঠানা. তিণৱত্থাৰকো নিদাননিদানো, নিদানসমুদযো, নিদানজাতিকো, নিদানপভৱো, নিদানসম্ভাৰো, নিদানসমুট্ঠানো.

সম্মুখাৱিনযো হেতুনিদানো, হেতুসমুদযো, হেতুজাতিকো, হেতুপভৱো, হেতুসম্ভাৰো, হেতুসমুট্ঠানো. সতিৱিনযো…পে… অমূড়্হৱিনযো…পে… পটিঞ্ঞাতকৰণং হেতুনিদানং, হেতুসমুদযং, হেতুজাতিকং, হেতুপভৱং, হেতুসম্ভাৰং, হেতুসমুট্ঠানং. যেভুয্যসিকা…পে… তস্সপাপিযসিকা হেতুনিদানা, হেতুসমুদযা, হেতুজাতিকা, হেতুপভৱা, হেতুসম্ভাৰা, হেতুসমুট্ঠানা. তিণৱত্থাৰকো হেতুনিদানো, হেতুসমুদযো, হেতুজাতিকো, হেতুপভৱো, হেতুসম্ভাৰো, হেতুসমুট্ঠানো.

সম্মুখাৱিনযো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো, কিংসমুট্ঠানো? সতিৱিনযো…পে… অমূড়্হৱিনযো…পে… পটিঞ্ঞাতকৰণং…পে… যেভুয্যসিকা…পে… তস্সপাপিযসিকা…পে… তিণৱত্থাৰকো কিংনিদানো, কিংসমুদযো, কিংজাতিকো, কিংপভৱো, কিংসম্ভাৰো, কিংসমুট্ঠানো? সম্মুখাৱিনযো পচ্চযনিদানো, পচ্চযসমুদযো, পচ্চযজাতিকো, পচ্চযপভৱো, পচ্চযসম্ভাৰো, পচ্চযসমুট্ঠানো. সতিৱিনযো…পে… অমূড়্হৱিনযো…পে… পটিঞ্ঞাতকৰণং পচ্চযনিদানং, পচ্চযসমুদযং, পচ্চযজাতিকং, পচ্চযপভৱং, পচ্চযসম্ভাৰং, পচ্চযসমুট্ঠানং. যেভুয্যসিকা…পে… তস্সপাপিযসিকা পচ্চযনিদানা, পচ্চযসমুদযা, পচ্চযজাতিকা, পচ্চযপভৱা, পচ্চযসম্ভাৰা, পচ্চযসমুট্ঠানা. তিণৱত্থাৰকো পচ্চযনিদানো, পচ্চযসমুদযো, পচ্চযজাতিকো, পচ্চযপভৱো, পচ্চযসম্ভাৰো, পচ্চযসমুট্ঠানো.

৩৫৩. সত্তন্নং সমথানং কতি মূলানি, কতি সমুট্ঠানা? সত্তন্নং সমথানং ছব্বীস মূলানি, ছত্তিংস সমুট্ঠানা. সত্তন্নং সমথানং কতমানি ছব্বী মূলানি? সম্মুখাৱিনযস্স চত্তাৰি মূলানি. সঙ্ঘসম্মুখতা, ধম্মসম্মুখতা, ৱিনযসম্মুখতা, পুগ্গলসম্মুখতা; সতিৱিনযস্স চত্তাৰি মূলানি; অমূড়্হৱিনযস্স চত্তাৰি মূলানি; পটিঞ্ঞাতকৰণস্স দ্ৱে মূলানি – যো চ দেসেতি যস্স চ দেসেতি; যেভুয্যসিকায চত্তাৰি মূলানি; তস্সপাপিযসিকায চত্তাৰি মূলানি; তিণৱত্থাৰকস্স চত্তাৰি মূলানি – সঙ্ঘসম্মুখতা, ধম্মসম্মুখতা, ৱিনযসম্মুখতা, পুগ্গলসম্মুখতা – সত্তন্নং সমথানং ইমানি ছব্বীস মূলানি.

সত্তন্নং সমথানং কতমে ছত্তিংস সমুট্ঠানা? সতিৱিনযস্স কম্মস্স কিৰিযা, কৰণং, উপগমনং, অজ্ঝুপগমনং, অধিৱাসনা, অপ্পটিক্কোসনা. অমূড়্হৱিনযস্স কম্মস্স…পে… পটিঞ্ঞাতকৰণস্স কম্মস্স… যেভুয্যসিকায কম্মস্স… তস্সপাপিযসিকায কম্মস্স… তিণৱত্থাৰকস্স কম্মস্স কিৰিযা, কৰণং, উপগমনং, অজ্ঝুপগমনং, অধিৱাসনা, অপ্পটিক্কোসনা – সত্তন্নং সমথানং ইমে ছত্তিংস সমুট্ঠানা.

১০. সত্তসমথনানত্থাদি

৩৫৪. সম্মুখাৱিনযোতি ৱা সতিৱিনযোতি ৱা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৱ নানং? সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি ৱা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৱ নানং? সম্মুখাৱিনযোতি ৱা সতিৱিনযোতি ৱা – ইমে ধম্মা নানত্থা চেৱ নানাব্যঞ্জনা চ. সম্মুখাৱিনযোতি ৱা অমূড়্হৱিনযোতি ৱা…পে… সম্মুখাৱিনযোতি ৱা পটিঞ্ঞাতকৰণন্তি ৱা… সম্মুখাৱিনযোতি ৱা যেভুয্যসিকাতি ৱা… সম্মুখাৱিনযোতি ৱা তস্সপাপিযসিকাতি ৱা… সম্মুখাৱিনযোতি ৱা তিণৱত্থাৰকোতি ৱা – ইমে ধম্মা নানত্থা চেৱ নানা ব্যঞ্জনা চ.

৩৫৫. [চূড়ৱ. ২২৪] ৱিৱাদো ৱিৱাদাধিকৰণং, ৱিৱাদো নো অধিকৰণং, অধিকৰণং নো ৱিৱাদো, অধিকৰণঞ্চেৱ ৱিৱাদো চ? সিযা ৱিৱাদো ৱিৱাদাধিকৰণং, সিযা ৱিৱাদো নো অধিকৰণং, সিযা অধিকৰণং নো ৱিৱাদো, সিযা অধিকৰণঞ্চেৱ ৱিৱাদো চ.

তত্থ কতমো ৱিৱাদো ৱিৱাদাধিকৰণং? ইধ ভিক্খূ ৱিৱদন্তি ধম্মোতি ৱা অধম্মোতি ৱা…পে… দুট্ঠুল্লা আপত্তীতি ৱা অদুট্ঠুল্লা আপত্তীতি ৱা. যং তত্থ ভণ্ডনং, কলহো, ৱিগ্গহো, ৱিৱাদো, নানাৱাদো, অঞ্ঞথাৱাদো, ৱিপচ্চতায ৱোহাৰো, মেধকং – অযং ৱিৱাদো ৱিৱাদাধিকৰণং.

তত্থ কতমো ৱিৱাদো নো অধিকৰণং? মাতাপি পুত্তেন ৱিৱদতি, পুত্তোপি মাতৰা ৱিৱদতি, পিতাপি পুত্তেন ৱিৱদতি, পুত্তোপি পিতৰা ৱিৱদতি, ভাতাপি ভাতৰা ৱিৱদতি, ভাতাপি ভগিনিযা ৱিৱদতি, ভগিনীপি ভাতৰা ৱিৱদতি, সহাযোপি সহাযেন ৱিৱদতি – অযং ৱিৱাদো নো অধিকৰণং.

তত্থ কতমং অধিকৰণং নো ৱিৱাদো? অনুৱাদাধিকৰণং, আপত্তাধিকৰণং, কিচ্চাধিকৰণং – ইদং অধিকৰণং নো ৱিৱাদো.

তত্থ কতমং অধিকৰণঞ্চেৱ ৱিৱাদো চ? ৱিৱাদাধিকৰণং অধিকৰণঞ্চেৱ ৱিৱাদো চ.

৩৫৬. [চূড়ৱ. ২২৪ আদযো] অনুৱাদো অনুৱাদাধিকৰণং, অনুৱাদো নো অধিকৰণং, অধিকৰণং নো অনুৱাদো, অধিকৰণঞ্চেৱ অনুৱাদো চ? সিযা অনুৱাদো অনুৱাদাধিকৰণং, সিযা অনুৱাদো নো অধিকৰণং, সিযা অধিকৰণং নো অনুৱাদো, সিযা অধিকৰণঞ্চেৱ অনুৱাদো চ.

তত্থ কতমো অনুৱাদো অনুৱাদাধিকৰণং? ইধ ভিক্খূ ভিক্খুং অনুৱদন্তি সীলৱিপত্তিযা ৱা আচাৰৱিপত্তিযা ৱা দিট্ঠিৱিপত্তিযা ৱা আজীৱৱিপত্তিযা ৱা. যো তত্থ অনুৱাদো, অনুৱদনা অনুল্লপনা অনুভণনা অনুসম্পৱঙ্কতা অব্ভুস্সহনতা অনুবলপ্পদানং – অযং অনুৱাদো অনুৱাদাধিকৰণং.

তত্থ কতমো অনুৱাদো নো অধিকৰণং? মাতাপি পুত্তং অনুৱদতি, পুত্তোপি মাতৰং অনুৱদতি, পিতাপি পুত্তং অনুৱদতি, পুত্তোপি পিতৰং অনুৱদতি, ভাতাপি ভাতৰং অনুৱদতি, ভাতাপি ভগিনিং অনুৱদতি, ভগিনীপি ভাতৰং অনুৱদতি, সহাযোপি সহাযং অনুৱদতি – অযং অনুৱাদো নো অধিকৰণং.

তত্থ কতমং অধিকৰণং নো অনুৱাদো? আপত্তাধিকৰণং কিচ্চাধিকৰণং ৱিৱাদাধিকৰণং – ইদং অধিকৰণং নো অনুৱাদো.

তত্থ কতমং অধিকৰণঞ্চেৱ অনুৱাদো চ? অনুৱাদাধিকৰণং অধিকৰণঞ্চেৱ অনুৱাদো চ.

৩৫৭. আপত্তি আপত্তাধিকৰণং, আপত্তি নো অধিকৰণং, অধিকৰণং নো আপত্তি, অধিকৰণঞ্চেৱ আপত্তি চ? সিযা আপত্তি আপত্তাধিকৰণং, সিযা আপত্তি নো অধিকৰণং, সিযা অধিকৰণং নো আপত্তি, সিযা অধিকৰণঞ্চেৱ আপত্তি চ.

তত্থ কতমা আপত্তি আপত্তাধিকৰণং? পঞ্চপি আপত্তিক্খন্ধা আপত্তাধিকৰণং. সত্তপি আপত্তিক্খন্ধা আপত্তাধিকৰণং. অযং আপত্তি আপত্তাধিকৰণং.

তত্থ কতমা আপত্তি নো অধিকৰণং? সোতাপত্তি সমাপত্তি – অযং আপত্তি নো অধিকৰণং.

তত্থ কতমং অধিকৰণং নো আপত্তি? কিচ্চাধিকৰণং ৱিৱাদাধিকৰণং অনুৱাদাধিকৰণং – ইদং অধিকৰণং নো আপত্তি.

তত্থ কতমং অধিকৰণঞ্চেৱ আপত্তি চ? আপত্তাধিকৰণং অধিকৰণঞ্চেৱ আপত্তি চ.

৩৫৮. [চূড়ৱ. ২২৩] কিচ্চং কিচ্চাধিকৰণং, কিচ্চং নো অধিকৰণং, অধিকৰণং নো কিচ্চং, অধিকৰণঞ্চেৱ কিচ্চঞ্চ? সিযা কিচ্চং কিচ্চাধিকৰণং, সিযা কিচ্চং নো অধিকৰণং, সিযা অধিকৰণং নো কিচ্চং, সিযা অধিকৰণঞ্চেৱ কিচ্চঞ্চ.

তত্থ কতমং কিচ্চং কিচ্চাধিকৰণং? যা সঙ্ঘস্স কিচ্চযতা কৰণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং – ইদং কিচ্চং কিচ্চাধিকৰণং.

তত্থ কতমং কিচ্চং নো অধিকৰণং? আচৰিযকিচ্চং উপজ্ঝাযকিচ্চং [উপজ্ঝাযকিচ্চং সকিচ্চং (ক.)] সমানুপজ্ঝাযকিচ্চং সমানাচৰিযকিচ্চং – ইদং কিচ্চং নো অধিকৰণং.

তত্থ কতমং অধিকৰণং নো কিচ্চং? ৱিৱাদাধিকৰণং অনুৱাদাধিকৰণং আপত্তাধিকৰণং – ইদং অধিকৰণং নো কিচ্চং.

তত্থ কতমং অধিকৰণঞ্চেৱ কিচ্চঞ্চ? কিচ্চাধিকৰণং অধিকৰণঞ্চেৱ কিচ্চং চাতি.

অধিকৰণভেদো নিট্ঠিতো.