৩. তিকৱাৰো

৩২৩. অত্থাপত্তি তিট্ঠন্তে ভগৱতি আপজ্জতি, নো পৰিনিব্বুতে; অত্থাপত্তি পৰিনিব্বুতে ভগৱতি আপজ্জতি, নো তিট্ঠন্তে; অত্থাপত্তি তিট্ঠন্তেপি ভগৱতি আপজ্জতি পৰিনিব্বুতেপি. অত্থাপত্তি কালে আপজ্জতি, নো ৱিকালে; অত্থাপত্তি ৱিকালে আপজ্জতি, নো কালে; অত্থাপত্তি কালে চেৱ আপজ্জতি ৱিকালে চ. অত্থাপত্তি ৰত্তিং আপজ্জতি, নো দিৱা; অত্থাপত্তি দিৱা আপজ্জতি, নো ৰত্তিং; অত্থাপত্তি ৰত্তিঞ্চেৱ আপজ্জতি দিৱা চ. অত্থাপত্তি দসৱস্সো আপজ্জতি, নো ঊনদসৱস্সো; অত্থাপত্তি ঊনদসৱস্সো আপজ্জতি, নো দসৱস্সো; অত্থাপত্তি দসৱস্সো চেৱ আপজ্জতি ঊনদসৱস্সো চ. অত্থাপত্তি পঞ্চৱস্সো আপজ্জতি, নো ঊনপঞ্চৱস্সো; অত্থাপত্তি ঊনপঞ্চৱস্সো আপজ্জতি, নো পঞ্চৱস্সো; অত্থাপত্তি পঞ্চৱস্সো চেৱ আপজ্জতি ঊনপঞ্চৱস্সো চ. অত্থাপত্তি কুসলচিত্তো আপজ্জতি; অত্থাপত্তি অকুসলচিত্তো আপজ্জতি; অত্থাপত্তি অব্যাকতচিত্তো আপজ্জতি. অত্থাপত্তি সুখৱেদনাসমঙ্গী আপজ্জতি; অত্থাপত্তি দুক্খৱেদনাসমঙ্গী আপজ্জতি; অত্থাপত্তি অদুক্খমসুখৱেদনাসমঙ্গী আপজ্জতি. তীণি চোদনাৱত্থূনি – দিট্ঠেন, সুতেন, পৰিসঙ্কায. তযো সলাকগ্গাহা – গুড়্হকো, ৱিৱটকো [ৱিৱট্টকো (ক.)], সকণ্ণজপ্পকো. তযো পটিক্খেপা – মহিচ্ছতা, অসন্তুট্ঠিতা [অসন্তুট্ঠতা (স্যা.)], অসল্লেখতা. তযো অনুঞ্ঞাতা – অপ্পিচ্ছতা, সন্তুট্ঠিতা, সল্লেখতা. অপৰেপি তযো পটিক্খেপা – মহিচ্ছতা, অসন্তুট্ঠিতা, অমত্তঞ্ঞুতা. তযো অনুঞ্ঞাতা – অপ্পিচ্ছতা, সন্তুট্ঠিতা, মত্তঞ্ঞুতা. তিস্সো পঞ্ঞত্তিযো – পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তি. অপৰাপি তিস্সো পঞ্ঞত্তিযো – সব্বত্থপঞ্ঞত্তি, পদেসপঞ্ঞত্তি, সাধাৰণপঞ্ঞত্তি. অপৰাপি তিস্সো পঞ্ঞত্তিযো – অসাধাৰণপঞ্ঞত্তি, একতোপঞ্ঞত্তি, উভতোপঞ্ঞত্তি.

অত্থাপত্তি বালো আপজ্জতি, নো পণ্ডিতো; অত্থাপত্তি পণ্ডিতো আপজ্জতি, নো বালো; অত্থাপত্তি বালো চেৱ আপজ্জতি পণ্ডিতো চ. অত্থাপত্তি কাড়ে আপজ্জতি, নো জুণ্হে; অত্থাপত্তি জুণ্হে আপজ্জতি, নো কাড়ে; অত্থাপত্তি কাড়ে চেৱ আপজ্জতি জুণ্হে চ. অত্থি কাড়ে কপ্পতি, নো জুণ্হে; অত্থি জুণ্হে কপ্পতি, নো কাড়ে; অত্থি কাড়ে চেৱ কপ্পতি জুণ্হে চ. অত্থাপত্তি হেমন্তে আপজ্জতি, নো গিম্হে নো ৱস্সে; অত্থাপত্তি গিম্হে আপজ্জতি, নো হেমন্তে নো ৱস্সে; অত্থাপত্তি ৱস্সে আপজ্জতি, নো হেমন্তে নো গিম্হে. অত্থাপত্তি সঙ্ঘো আপজ্জতি, ন গণো ন পুগ্গলো; অত্থাপত্তি গণো আপজ্জতি, ন সঙ্ঘো ন পুগ্গলো; অত্থাপত্তি পুগ্গলো আপজ্জতি, ন সঙ্ঘো ন গণো. অত্থি সঙ্ঘস্স কপ্পতি, ন গণস্স ন পুগ্গলস্স; অত্থি গণস্স কপ্পতি, ন সঙ্ঘস্স ন পুগ্গলস্স; অত্থি পুগ্গলস্স কপ্পতি, ন সঙ্ঘস্স ন গণস্স. তিস্সো ছাদনা ৱত্থুং ছাদেতি, নো আপত্তিং; আপত্তিং ছাদেতি, নো ৱত্থুং; ৱত্থুঞ্চেৱ ছাদেতি আপত্তিঞ্চ. তিস্সো পটিচ্ছাদিযো – জন্তাঘৰপটিচ্ছাদি, উদকপটিচ্ছাদি, ৱত্থপটিচ্ছাদি. [অ. নি. ৩.১৩২] তীণি পটিচ্ছন্নানি ৱহন্তি, নো ৱিৱটানি – মাতুগামো পটিচ্ছন্নো ৱহতি, নো ৱিৱটো; ব্ৰাহ্মণানং মন্তা পটিচ্ছন্না ৱহন্তি, নো ৱিৱটা; মিচ্ছাদিট্ঠি পটিচ্ছন্না ৱহতি, নো ৱিৱটা. তীণি ৱিৱটানি ৱিৰোচন্তি, নো পটিচ্ছন্নানি – চন্দমণ্ডলং ৱিৱটং ৱিৰোচতি, নো পটিচ্ছন্নং; সূৰিযমণ্ডলং ৱিৱটং ৱিৰোচতি, নো পটিচ্ছন্নং; তথাগতপ্পৱেদিতো ধম্মৱিনযো ৱিৱটো ৱিৰোচতি, নো পটিচ্ছন্নো. তযো সেনাসনগ্গাহা – পুৰিমকো, পচ্ছিমকো, অন্তৰামুত্তকো. অত্থাপত্তি গিলানো আপজ্জতি, নো অগিলানো; অত্থাপত্তি অগিলানো আপজ্জতি, নো গিলানো; অত্থাপত্তি গিলানো চেৱ আপজ্জতি অগিলানো চ.

তীণি অধম্মিকানি পাতিমোক্খট্ঠপনানি. তীণি ধম্মিকানি পাতিমোক্খট্ঠপনানি. তযো পৰিৱাসা – পটিচ্ছন্নপৰিৱাসো, অপ্পটিচ্ছন্নপৰিৱাসো, সুদ্ধন্তপৰিৱাসো. তযো মানত্তা – পটিচ্ছন্নমানত্তং, অপ্পটিচ্ছন্নমানত্তং, পক্খমানত্তং. তযো পাৰিৱাসিকস্স ভিক্খুনো ৰত্তিচ্ছেদা – সহৱাসো, ৱিপ্পৱাসো, অনাৰোচনা. অত্থাপত্তি অন্তো আপজ্জতি, নো বহি; অত্থাপত্তি বহি আপজ্জতি, নো অন্তো; অত্থাপত্তি অন্তো চেৱ আপজ্জতি বহি চ. অত্থাপত্তি অন্তোসীমায আপজ্জতি, নো বহিসীমায; অত্থাপত্তি বহিসীমায আপজ্জতি, নো অন্তোসীমায; অত্থাপত্তি অন্তোসীমায চেৱ আপজ্জতি বহিসীমায চ. তীহাকাৰেহি আপত্তিং আপজ্জতি – কাযেন আপজ্জতি, ৱাচায আপজ্জতি, কাযেন ৱাচায আপজ্জতি. অপৰেহিপি তীহাকাৰেহি আপত্তিং আপজ্জতি – সঙ্ঘমজ্ঝে, গণমজ্ঝে, পুগ্গলস্স সন্তিকে. তীহাকাৰেহি আপত্তিযা ৱুট্ঠাতি – কাযেন ৱুট্ঠাতি, ৱাচায ৱুট্ঠাতি, কাযেন ৱাচায ৱুট্ঠাতি. অপৰেহিপি তীহাকাৰেহি আপত্তিযা ৱুট্ঠাতি – সঙ্ঘমজ্ঝে, গণমজ্ঝে, পুগ্গলস্স সন্তিকে. তীণি অধম্মিকানি অমূড়্হৱিনযস্স দানানি. তীণি ধম্মিকানি অমূড়্হৱিনযস্স দানানি.

[চূড়ৱ. ৬] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো তজ্জনীযকম্মং কৰেয্য – ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো গিহিসংসট্ঠো ৱিহৰতি অননুলোমিকেহি গিহিসংসগ্গেহি. [চূড়ৱ. ১৫] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো নিযস্সকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো গিহিসংসট্ঠো ৱিহৰতি অননুলোমিকেহি গিহিসংসগ্গেহি. [চূড়ৱ. ২৭] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পব্বাজনীযকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো কুলদূককো হোতি পাপসমাচাৰো পাপসমাচাৰা দিস্সন্তি চেৱ সুয্যন্তি চ. তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পটিসাৰণীযকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তি বহুলো অনপদানো গিহী অক্কোসতি পৰিভাসতি. [চূড়ৱ. ৫০] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আপত্তিযা অদস্সনে উক্খেপনীযকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো আপত্তিং আপজ্জিত্ৱা ন ইচ্ছতি আপত্তিং পস্সিতুং. [চূড়ৱ. ৫৯] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আপত্তিযা অপ্পটিকম্মে উক্খেপনীযকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো আপত্তিং আপজ্জিত্ৱা ন ইচ্ছতি আপত্তিং পটিকাতুং. [চূড়ৱ. ৬৯] তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰেয্য – ভণ্ডনকাৰকো হোতি…পে… সঙ্ঘে অধিকৰণকাৰকো, বালো হোতি অব্যত্তো, আপত্তিবহুলো অনপদানো ন ইচ্ছতি পাপিকং দিট্ঠিং পটিনিস্সজ্জিতুং.

তীহঙ্গেহি সমন্নাগতস্স ভিক্খুনো আকঙ্খমানো সঙ্ঘো আগাড়্হায চেতেয্য – ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো, বালো হোতি অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি. তীহঙ্গেহি সমন্নাগতস্স ভিক্খুনো কম্মং কাতব্বং – অলজ্জী চ হোতি, বালো চ, অপকতত্তো চ. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন দৱেন সমন্নাগতো হোতি, ৱাচসিকেন দৱেন সমন্নাগতো হোতি, কাযিকৱাচসিকেন দৱেন সমন্নাগতো হোতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন অনাচাৰেন সমন্নাগতো হোতি, ৱাচসিকেন অনাচাৰেন সমন্নাগতো হোতি, কাযিকৱাচসিকেন অনাচাৰেন সমন্নাগতো হোতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন উপঘাতিকেন সমন্নাগতো হোতি, ৱাচসিকেন উপঘাতিকেন সমন্নাগতো হোতি, কাযিকৱাচসিকেন উপঘাতিকেন সমন্নাগতো হোতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – কাযিকেন মিচ্ছাজীৱেন সমন্নাগতো হোতি, ৱাচসিকেন মিচ্ছাজীৱেন সমন্নাগতো হোতি, কাযিকৱাচসিকেন মিচ্ছাজীৱেন সমন্নাগতো হোতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – আপত্তিং আপন্নো কম্মকতো উপসম্পাদেতি, নিস্সযং দেতি, সামণেৰং উপট্ঠাপেতি. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – যায আপত্তিযা সঙ্ঘেন কম্মং কতং হোতি তং আপত্তিং আপজ্জতি, অঞ্ঞং ৱা তাদিসিকং, ততো ৱা পাপিট্ঠতৰং. অপৰেহিপি তীহঙ্গেহি সমন্নাগতস্স ভিক্খুনো কম্মং কাতব্বং – বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি.

তীহঙ্গেহি সমন্নাগতস্স ভিক্খুনো সঙ্ঘমজ্ঝে উপোসথং ঠপেন্তস্স – ‘‘অলং, ভিক্খু, মা ভণ্ডনং মা কলহং মা ৱিগ্গহং মা ৱিৱাদ’’ন্তি ওমদ্দিত্ৱা সঙ্ঘেন উপোসথো কাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো সঙ্ঘমজ্ঝে পৱাৰণং ঠপেন্তস্স – ‘‘অলং, ভিক্খু, মা ভণ্ডনং মা কলহং মা ৱিগ্গহং মা ৱিৱাদ’’ন্তি ওমদ্দিত্ৱা সঙ্ঘেন পৱাৰেতব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ন কাচি সঙ্ঘসম্মুতি দাতব্বা – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা সঙ্ঘে ন ৱোহৰিতব্বং [সংঘো ন ৱোহৰিতব্বো (স্যা.)] – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতো ভিক্খু ন কিস্মিং চি পচ্চেকট্ঠানে ঠপেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো নিস্সায ন ৱত্থব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো নিস্সযো ন দাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ওকাসকম্মং কাৰাপেন্তস্স নালং ওকাসকম্মং কাতুং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো সৱচনীযং নাদাতব্বং – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ৱিনযো ন পুচ্ছিতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ৱিনযো ন পুচ্ছিতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো ৱিনযো ন ৱিস্সজ্জেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ৱিনযো ন ৱিস্সজ্জেতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতস্স ভিক্খুনো অনুযোগো ন দাতব্বো – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা সদ্ধিং ৱিনযো ন সাকচ্ছিতব্বো [সাকচ্ছাতব্বো (ক.)] – অলজ্জী চ হোতি, বালো চ, অপকতত্তো চ. তীহঙ্গেহি সমন্নাগতেন ভিক্খুনা ন উপসম্পাদেতব্বং ন নিস্সযো দাতব্বো ন সামণেৰো উপট্ঠাপেতব্বো – অলজ্জী চ হোতি, বালো চ, অপকতত্তো চ.

তযো উপোসথা – চাতুদ্দসিকো, পন্নৰসিকো, সামগ্গিউপোসথো. অপৰেপি তযো উপোসথা – সঙ্ঘেউপোসথো, গণেউপোসথো, পুগ্গলেউপোসথো. অপৰেপি তযো উপোসথা – সুত্তুদ্দেসোউপোসথো, পাৰিসুদ্ধিউপোসথো, অধিট্ঠানুপোসথো. তিস্সো পৱাৰণা – চাতুদ্দসিকা, পন্নৰসিকা, সামগ্গিপৱাৰণা. অপৰাপি তিস্সো পৱাৰণা – সঙ্ঘেপৱাৰণা, গণেপৱাৰণা, পুগ্গলেপৱাৰণা. অপৰাপি তিস্সো পৱাৰণা – তেৱাচিকাপৱাৰণা, দ্ৱেৱাচিকাপৱাৰণা, সমানৱস্সিকাপৱাৰণা.

তযো আপাযিকা নেৰযিকা – ইদমপ্পহায, যো চ অব্ৰহ্মচাৰী ব্ৰহ্মচাৰিপটিঞ্ঞো, যো চ সুদ্ধং ব্ৰহ্মচাৰিং পৰিসুদ্ধব্ৰহ্মচৰিযং চৰন্তং অমূলকেন অব্ৰহ্মচৰিযেন অনুদ্ধংসেতি, যো চাযং এৱংৱাদী এৱংদিট্ঠি [এৱংদিট্ঠী (সী.)] – ‘‘নত্থি কামেসু দোসো’’তি সো কামেসু পাতব্যতং আপজ্জতি. [অ. নি. ৩.৭০] তীণি অকুসলমূলানি – লোভো অকুসলমূলং, দোসো অকুসলমূলং, মোহো অকুসলমূলং. [অ. নি. ৩.৭০] তীণি কুসলমূলানি – অলোভো কুসলমূলং, অদোসো কুসলমূলং, অমোহো কুসলমূলং. তীণি দুচ্চৰিতানি – কাযদুচ্চৰিতং, ৱচীদুচ্চৰিতং, মনোদুচ্চৰিতং. তীণি সুচৰিতানি – কাযসুচৰিতং, ৱচীসুচৰিতং, মনোসুচৰিতং. তযো অত্থৱসে পটিচ্চ ভগৱতা কুলেসু তিকভোজনং পঞ্ঞত্তং – দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৱিহাৰায, ‘‘মা পাপিচ্ছা পক্খং নিস্সায সঙ্ঘং ভিন্দেয্যু’’ন্তি কুলানুদ্দযতায চ. [চূড়ৱ. ৩৫০] তীহি অসদ্ধম্মেহি অভিভূতো পৰিযাদিন্নচিত্তো দেৱদত্তো আপাযিকো নেৰযিকো কপ্পট্ঠো অতেকিচ্ছো পাপিচ্ছতা পাপমিত্ততা ওৰমত্তকেন ৱিসেসাধিগমেন অন্তৰা ৱোসানং আপাদি. তিস্সো সম্মুতিযো – দণ্ডসম্মুতি, সিক্কাসম্মুতি, দণ্ডসিক্কাসম্মুতি. তিস্সো পাদুকা ধুৱট্ঠানিকা অসঙ্কমনীযা – ৱচ্চপাদুকা, পস্সাৱপাদুকা, আচমনপাদুকা. তিস্সো পাদঘংসনিযো – সক্খৰং, কথলা, সমুদ্দফেণকোতি.

তিকং নিট্ঠিতং.

তস্সুদ্দানং –

তিট্ঠন্তে কালে ৰত্তিঞ্চ, দস পঞ্চ কুসলেন;

ৱেদনা চোদনা ৱত্থু, সলাকা দ্ৱে পটিক্খিপা.

পঞ্ঞত্তি অপৰে দ্ৱে চ, বালো কাড়ে চ কপ্পতি;

হেমন্তে সঙ্ঘো সঙ্ঘস্স, ছাদনা চ পটিচ্ছাদি.

পটিচ্ছন্না ৱিৱটা চ, সেনাসনগিলাযনা;

পাতিমোক্খং পৰিৱাসং, মানত্তা পাৰিৱাসিকা.

অন্তো অন্তো চ সীমায, আপজ্জতি পুনাপৰে;

ৱুট্ঠাতি অপৰে চেৱ, অমূড়্হৱিনযা দুৱে.

তজ্জনীযা নিযস্সা চ, পব্বাজপটিসাৰণী;

অদস্সনা পটিকম্মে, অনিস্সগ্গে চ দিট্ঠিযা.

আগাড়্হকম্মাধিসীলে, দৱানাচাৰ ঘাতিকা;

আজীৱাপন্না তাদিসিকা, অৱণ্ণুপোসথেন চ.

পৱাৰণা সম্মুতি চ, ৱোহাৰপচ্চেকেন চ;

ন ৱত্থব্বং ন দাতব্বং, ওকাসং ন কৰে তথা.

ন কৰে সৱচনীযং, ন পুচ্ছিতব্বকা দুৱে;

ন ৱিস্সজ্জে দুৱে চেৱ, অনুযোগম্পি নো দদে.

সাকচ্ছা উপসম্পদা, নিস্সযসামণেৰা চ;

উপোসথতিকা তীণি, পৱাৰণতিকা তযো.

আপাযিকা অকুসলা, কুসলা চৰিতা দুৱে;

তিকভোজনসদ্ধম্মে, সম্মুতি পাদুকেন চ;

পাদঘংসনিকা চেৱ, উদ্দানং তিককে ইদন্তি.