১১. একাদসকৱাৰো

৩৩১. একাদ পুগ্গলা অনুপসম্পন্না ন উপসম্পাদেতব্বা, উপসম্পন্না নাসেতব্বা. একাদস পাদুকা অকপ্পিযা. একাদস পত্তা অকপ্পিযা. একাদস চীৱৰানি অকপ্পিযানি. একাদস যাৱততিযকা. ভিক্খুনীনং একাদস অন্তৰাযিকা ধম্মা পুচ্ছিতব্বা. একাদস চীৱৰানি অধিট্ঠাতব্বানি. একাদস চীৱৰানি ন ৱিকপ্পেতব্বানি. একাদসে অৰুণুগ্গমনে নিস্সগ্গিযং হোতি. একাদস গণ্ঠিকা কপ্পিযা. একাদস ৱিধা [ৱীথা (স্যা.)] কপ্পিযা. একাদস পথৱী অকপ্পিযা. একাদস পথৱী কপ্পিযা. একাদস নিস্সযপটিপ্পস্সদ্ধিযো. একাদস পুগ্গলা অৱন্দিযা. একাদস পৰমানি. একাদস ৱৰানি যাচিংসু. একাদস সীমাদোসা. অক্কোসকপৰিভাসকে পুগ্গলে একাদসাদীনৱা পাটিকঙ্খা. [অ. নি. ১১.১৫; মি. প. ৪.৪.৬] মেত্তায চেতোৱিমুত্তিযা আসেৱিতায ভাৱিতায বহুলীকতায যানীকতায ৱত্থুকতায অনুট্ঠিতায পৰিচিতায সুসমাৰদ্ধায একাদসানিসংসা পাটিকঙ্খা. সুখং সুপতি, সুখং পটিবুজ্ঝতি, ন পাপকং সুপিনং পস্সতি, মনুস্সানং পিযো হোতি, অমনুস্সানং পিযো হোতি, দেৱতা ৰক্খন্তি, নাস্স অগ্গি ৱা ৱিসং ৱা সত্থং ৱা কমতি, তুৱট্টং চিত্তং সমাধিযতি, মুখৱণ্ণো ৱিপ্পসীদতি, অসম্মূড়্হো কালঙ্কৰোতি, উত্তৰি অপ্পটিৱিজ্ঝন্তো ব্ৰহ্মলোকূপগো হোতি – মেত্তায চেতোৱিমুত্তিযা আসেৱিতায ভাৱিতায বহুলীকতায যানীকতায ৱত্থুকতায অনুট্ঠিতায পৰিচিতায সুসমাৰদ্ধায ইমে একাদসানিসংসা পাটিকঙ্খাতি.

একাদসকং নিট্ঠিতং.

তস্সুদ্দানং –

নাসেতব্বা পাদুকা চ, পত্তা চ চীৱৰানি চ;

ততিযা পুচ্ছিতব্বা চ, অধিট্ঠানৱিকপ্পনা.

অৰুণা গণ্ঠিকা ৱিধা, অকপ্পিযা চ কপ্পিযং;

নিস্সযাৱন্দিযা চেৱ, পৰমানি ৱৰানি চ;

সীমাদোসা চ অক্কোসা, মেত্তাযেকাদসা কতাতি.

একুত্তৰিকনযো.

তস্সুদ্দানং –

এককা চ দুকা চেৱ, তিকা চ চতুপঞ্চকা;

ছসত্তট্ঠনৱকা চ, দস একাদসানি চ.

হিতায সব্বসত্তানং, ঞাতধম্মেন তাদিনা;

একুত্তৰিকা ৱিমলা, মহাৱীৰেন দেসিতাতি.

একুত্তৰিকনযো নিট্ঠিতো.