১০. দসকৱাৰো

৩৩০. দস আঘাতৱত্থূনি. দস আঘাতপটিৱিনযা. দস ৱিনীতৱত্থূনি. দসৱত্থুকা মিচ্ছাদিট্ঠি. দসৱত্থুকা সম্মাদিট্ঠি. দস অন্তগ্গাহিকা দিট্ঠি. দস মিচ্ছত্তা. দস সম্মত্তা. দস অকুসলকম্মপথা. দস কুসলকম্মপথা. দস অধম্মিকা সলাকগ্গাহা. দস ধম্মিকা সলাকগ্গাহা. সামণেৰানং দস সিক্খাপদানি. দসহঙ্গেহি সমন্নাগতো সামণেৰো নাসেতব্বো.

দসহঙ্গেহি সমন্নাগতো ৱিনযধৰো বালো ত্ৱেৱ সঙ্খং গচ্ছতি – অত্তনো ভাসপৰিযন্তং ন উগ্গণ্হাতি, পৰস্স ভাসপৰিযন্তং ন উগ্গণ্হাতি, অত্তনো ভাসপৰিযন্তং অনুগ্গহেত্ৱা পৰস্স ভাসপৰিযন্তং অনুগ্গহেত্ৱা অধম্মেন কাৰেতি, অপ্পটিঞ্ঞায আপত্তিং ন জানাতি, আপত্তিযা মূলং ন জানাতি, আপত্তিসমুদযং ন জানাতি, আপত্তিনিৰোধং ন জানাতি, আপত্তিনিৰোধগামিনিং পটিপদং ন জানাতি.

দসহঙ্গেহি সমন্নাগতো ৱিনযধৰো পণ্ডিতো ত্ৱেৱ সঙ্খং গচ্ছতি – অত্তনো ভাসপৰিযন্তং উগ্গণ্হাতি, পৰস্স ভাসপৰিযন্তং উগ্গণ্হাতি, অত্তনো ভাসপৰিযন্তং উগ্গহেত্ৱা পৰস্স ভাসপৰিযন্তং উগ্গহেত্ৱা ধম্মেন কাৰেতি, পটিঞ্ঞায আপত্তিং জানাতি, আপত্তিযা মূলং জানাতি, আপত্তিসমুদযং জানাতি, আপত্তিনিৰোধং জানাতি, আপত্তিনিৰোধগামিনিং পটিপদং জানাতি.

অপৰেহিপি দসহঙ্গেহি সমন্নাগতো ৱিনযধৰো বালো ত্ৱেৱ সঙ্খং গচ্ছতি – অধিকৰণং ন জানাতি, অধিকৰণস্স মূলং ন জানাতি, অধিকৰণসমুদযং ন জানাতি, অধিকৰণনিৰোধং ন জানাতি, অধিকৰণনিৰোধগামিনিং পটিপদং ন জানাতি, ৱত্থুং ন জানাতি, নিদানং [উদ্দানং (ক.)] ন জানাতি, পঞ্ঞত্তিং ন জানাতি, অনুপঞ্ঞত্তিং ন জানাতি, অনুসন্ধিৱচনপথং ন জানাতি.

দসহঙ্গেহি সমন্নাগতো ৱিনযধৰো পণ্ডিতো ত্ৱেৱ সঙ্খং গচ্ছতি – অধিকৰণং জানাতি, অধিকৰণস্স মূলং জানাতি, অধিকৰণসমুদযং জানাতি, অধিকৰণনিৰোধং জানাতি, অধিকৰণনিৰোধগামিনিং পটিপদং জানাতি, ৱত্থুং জানাতি, নিদানং জানাতি, পঞ্ঞত্তিং জানাতি, অনুপঞ্ঞত্তিং জানাতি, অনুসন্ধিৱচনপথং জানাতি.

অপৰেহিপি দসহঙ্গেহি সমন্নাগতো ৱিনযধৰো বালো ত্ৱেৱ সঙ্খং গচ্ছতি – ঞত্তিং ন জানাতি, ঞত্তিযা কৰণং ন জানাতি, ন পুব্বকুসলো হোতি, ন অপৰকুসলো হোতি, অকালঞ্ঞূ চ হোতি, আপত্তানাপত্তিং ন জানাতি, লহুকগৰুকং আপত্তিং ন জানাতি, সাৱসেসানৱসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, আচৰিযপৰম্পৰা খো পনস্স ন সুগ্গহিতা হোতি ন সুমনসিকতা ন সূপধাৰিতা.

দসহঙ্গেহি সমন্নাগতো ৱিনযধৰো পণ্ডিতো ত্ৱেৱ সঙ্খং গচ্ছতি – ঞত্তিং জানাতি, ঞত্তিযা কৰণং জানাতি, পুব্বকুসলো হোতি, অপৰকুসলো হোতি, কালঞ্ঞূ চ হোতি, আপত্তানাপত্তিং জানাতি, লহুকগৰুকং আপত্তিং জানাতি, সাৱসেসানৱসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, আচৰিযপৰম্পৰা খো পনস্স সুগ্গহিতা হোতি সুমনসিকতা সূপধাৰিতা.

অপৰেহিপি দসহঙ্গেহি সমন্নাগতো ৱিনযধৰো বালো ত্ৱেৱ সঙ্খং গচ্ছতি – আপত্তানাপত্তিং ন জানাতি, লহুকগৰুকং আপত্তিং ন জানাতি, সাৱসেসানৱসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, উভযানি খো পনস্স পাতিমোক্খানি ৱিত্থাৰেন ন স্ৱাগতানি হোন্তি ন সুৱিভত্তানি ন সুপ্পৱত্তীনি ন সুৱিনিচ্ছিতানি সুত্তসো অনুব্যঞ্জনসো, আপত্তানাপত্তিং ন জানাতি, লহুকগৰুকং আপত্তিং ন জানাতি, সাৱসেসানৱসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, অধিকৰণে চ ন ৱিনিচ্ছযকুসলো হোতি.

দসহঙ্গেহি সমন্নাগতো ৱিনযধৰো পণ্ডিতো ত্ৱেৱ সঙ্খং গচ্ছতি – আপত্তানাপত্তিং জানাতি, লহুকগৰুকং আপত্তিং জানাতি, সাৱসেসানৱসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো, আপত্তানাপত্তিং জানাতি, লহুকগৰুকং আপত্তিং জানাতি, সাৱসেসানৱসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, অধিকৰণে চ ৱিনিচ্ছযকুসলো হোতি.

[অ. নি. ১০.৩৩] দসহঙ্গেহি সমন্নাগতো ভিক্খু উব্বাহিকায সম্মন্নিতব্বো. দস অত্থৱসে পটিচ্চ তথাগতেন সাৱকানং সিক্খাপদং পঞ্ঞত্তং. দস আদীনৱা ৰাজন্তেপুৰপ্পৱেসনে. দস দানৱত্থূনি. দস ৰতনানি. দসৱগ্গো ভিক্খুসঙ্ঘো. দসৱগ্গেন গণেন উপসম্পাদেতব্বং. দস পংসুকূলানি. দস চীৱৰধাৰণা [চীৱৰধাৰণানি (স্যা.)]. দসাহপৰমং অতিৰেকচীৱৰং ধাৰেতব্বং. দস সুক্কানি. দস ইত্থিযো. দস ভৰিযাযো. ৱেসালিযা দস ৱত্থূনি দীপেন্তি. দস পুগ্গলা অৱন্দিযা. দস অক্কোসৱত্থূনি. দসহাকাৰেহি পেসুঞ্ঞং উপসংহৰতি. দস সেনাসনানি. দস ৱৰানি যাচিংসু. দস অধম্মিকানি পাতিমোক্খট্ঠপনানি. দস ধম্মিকানি পাতিমোক্খট্ঠপনানি. দসানিসংসা যাগুযা. দস মংসা অকপ্পিযা. দস পৰমানি. দসৱস্সেন ভিক্খুনা ব্যত্তেন পটিবলেন পব্বাজেতব্বং উপসম্পাদেতব্বং নিস্সযো দাতব্বো সামণেৰো উপট্ঠাপেতব্বো. দসৱস্সায ভিক্খুনিযা ব্যত্তায পটিবলায পব্বাজেতব্বং উপসম্পাদেতব্বং নিস্সযো দাতব্বো সামণেৰী উপট্ঠাপেতব্বা. দসৱস্সায ভিক্খুনিযা ব্যত্তায পটিবলায ৱুট্ঠাপনসম্মুতি সাদিতব্বা. দসৱস্সায গিহিগতায সিক্খা দাতব্বাতি.

দসকং নিট্ঠিতং.

তস্সুদ্দানং –

আঘাতং ৱিনযং ৱত্থু, মিচ্ছা সম্মা চ অন্তগা;

মিচ্ছত্তা চেৱ সম্মত্তা, অকুসলা কুসলাপি চ.

সলাকা অধম্মা ধম্মা, সামণেৰা চ নাসনা;

ভাসাধিকৰণঞ্চেৱ, ঞত্তিলহুকমেৱ চ.

লহুকা গৰুকা এতে, কণ্হসুক্কা ৱিজানথ;

উব্বাহিকা চ সিক্খা চ, অন্তেপুৰে চ ৱত্থূনি.

ৰতনং দসৱগ্গো চ, তথেৱ উপসম্পদা;

পংসুকূলধাৰণা চ, দসাহসুক্কইত্থিযো.

ভৰিযা দস ৱত্থূনি, অৱন্দিযক্কোসেন চ;

পেসুঞ্ঞঞ্চেৱ সেনানি, ৱৰানি চ অধম্মিকা.

ধম্মিকা যাগুমংসা চ, পৰমা ভিক্খু ভিক্খুনী;

ৱুট্ঠাপনা গিহিগতা, দসকা সুপ্পকাসিতাতি.