১৯. সমথাধিকৰণৱাৰো

৩০৯. সমথা সমথেহি সম্মন্তি? সমথা অধিকৰণেহি সম্মন্তি? অধিকৰণা সমথেহি সম্মন্তি? অধিকৰণা অধিকৰণেহি সম্মন্তি?

সিযা সমথা সমথেহি সম্মন্তি, সিযা সমথা সমথেহি ন সম্মন্তি. সিযা সমথা অধিকৰণেহি সম্মন্তি, সিযা সমথা অধিকৰণেহি ন সম্মন্তি. সিযা অধিকৰণা সমথেহি সম্মন্তি, সিযা অধিকৰণা সমথেহি ন সম্মন্তি. সিযা অধিকৰণা অধিকৰণেহি সম্মন্তি, সিযা অধিকৰণা অধিকৰণেহি ন সম্মন্তি.

৩১০. কথং সিযা সমথা সমথেহি সম্মন্তি, কথং সিযা সমথা সমথেহি ন সম্মন্তি? যেভুয্যসিকা সম্মুখাৱিনযেন সম্মতি; সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি, তস্সপাপিযসিকায ন সম্মতি, তিণৱত্থাৰকেন ন সম্মতি.

সতিৱিনযো সম্মুখাৱিনযেন সম্মতি; অমূড়্হৱিনযেন ন সম্মতি, পটিঞ্ঞাতকৰণেন ন সম্মাতি, তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি.

অমূড়্হৱিনযো সম্মুখাৱিনযেন সম্মতি; পটিঞ্ঞাতকৰণেন ন সম্মতি, তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি.

পটিঞ্ঞাতকৰণং সম্মুখাৱিনযেন সম্মতি; তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি.

তস্সপাপিযসিকা সম্মুখাৱিনযেন সম্মতি; তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি.

তিণৱত্থাৰকো সম্মুখাৱিনযেন সম্মতি; যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি, তস্সপাপিযসিকায ন সম্মতি. এৱং সিযা সমথা সমথেহি সম্মন্তি. এৱং সিযা সমথা সমথেহি ন সম্মন্তি.

৩১১. কথং সিযা সমথা অধিকৰণেহি সম্মন্তি, কথং সিযা সমথা অধিকৰণেহি ন সম্মন্তি? সম্মুখাৱিনযো ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

যেভুয্যসিকা ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

সতিৱিনযো ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

অমূড়্হৱিনযো ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

পটিঞ্ঞাতকৰণং ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

তস্সপাপিযসিকা ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

তিণৱত্থাৰকো ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি. এৱং সিযা সমথা অধিকৰণেহি সম্মন্তি. এৱং সিযা সমথা অধিকৰণেহি ন সম্মন্তি.

৩১২. কথং সিযা অধিকৰণা সমথেহি সম্মন্তি, কথং সিযা অধিকৰণা সমথেহি ন সম্মন্তি? ৱিৱাদাধিকৰণং সম্মুখাৱিনযেন চ যেভুয্যসিকায চ সম্মতি; সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ ন সম্মতি.

অনুৱাদাধিকৰণং সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকায চ সম্মতি; যেভুয্যসিকায চ পটিঞ্ঞাতকৰণেন চ তিণৱত্থাৰকেন চ ন সম্মতি.

আপত্তাধিকৰণং সম্মুখাৱিনযেন চ পটিঞ্ঞাতকৰণেন চ তিণৱত্থাৰকেন চ সম্মতি; যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ ন সম্মতি.

কিচ্চাধিকৰণং সম্মুখাৱিনযেন সম্মতি; যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায তিণৱত্থাৰকেন চ ন সম্মতি. এৱং সিযা অধিকৰণা সমথেহি সম্মন্তি. এৱং সিযা অধিকৰণা সমথেহি ন সম্মন্তি.

৩১৩. কথং সিযা অধিকৰণা অধিকৰণেহি সম্মন্তি? কথং সিযা অধিকৰণা অধিকৰণেহি ন সম্মন্তি? ৱিৱাদাধিকৰণং ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

অনুৱাদাধিকৰণং ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

আপত্তাধিকৰণং ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

কিচ্চাধিকৰণং ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি. এৱং সিযা অধিকৰণা অধিকৰণেহি সম্মন্তি. এৱং সিযা অধিকৰণা অধিকৰণেহি ন সম্মন্তি.

ছাপি সমথা চত্তাৰোপি অধিকৰণা সম্মুখাৱিনযেন সম্মন্তি; সম্মুখাৱিনযো ন কেনচি সম্মতি.

সমথাধিকৰণৱাৰো নিট্ঠিতো একূনৱীসতিমো.