অন্তৰপেয্যালং

কতিপুচ্ছাৱাৰো

২৭১. কতি আপত্তিযো? কতি আপত্তিক্খন্ধা? কতি ৱিনীতৱত্থূনি? কতি অগাৰৱা? কতি গাৰৱা? কতি ৱিনীতৱত্থূনি? কতি ৱিপত্তিযো? কতি আপত্তিসমুট্ঠানা? কতি ৱিৱাদমূলানি? কতি অনুৱাদমূলানি? কতি সাৰণীযা ধম্মা? কতি ভেদকৰৱত্থূনি? কতি অধিকৰণানি? কতি সমথা?

পঞ্চ আপত্তিযো. পঞ্চ আপত্তিক্খন্ধা. পঞ্চ ৱিনীতৱত্থূনি. সত্ত আপত্তিযো. সত্ত আপত্তিক্খন্ধা. সত্ত ৱিনীতৱত্থূনি. ছ অগাৰৱা. ছ গাৰৱা. ছ ৱিনীতৱত্থূনি. চতস্সো ৱিপত্তিযো. ছ আপত্তিসমুট্ঠানা. ছ ৱিৱাদমূলানি. ছ অনুৱাদমূলানি. ছ সাৰণীযা ধম্মা. অট্ঠাৰস ভেদকৰৱত্থূনি. চত্তাৰি অধিকৰণানি. সত্ত সমথা.

তত্থ কতমা পঞ্চ আপত্তিযো? পাৰাজিকাপত্তি, সঙ্ঘাদিসেসাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি – ইমা পঞ্চ আপত্তিযো.

তত্থ কতমে পঞ্চ আপত্তিক্খন্ধা? পাৰাজিকাপত্তিক্খন্ধো, সঙ্ঘাদিসেসাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো – ইমে পঞ্চ আপত্তিক্খন্ধা.

তত্থ কতমানি পঞ্চ ৱিনীতৱত্থূনি? পঞ্চহি আপত্তিক্খন্ধেহি আৰতি ৱিৰতি পটিৱিৰতি ৱেৰমণী অকিৰিযা অকৰণং অনজ্ঝাপত্তি ৱেলাঅনতিক্কমো সেতুঘাতো – ইমানি পঞ্চ ৱিনীতৱত্থূনি.

তত্থ কতমা সত্ত আপত্তিযো? পাৰাজিকাপত্তি, সঙ্ঘাদিসেসাপত্তি, থুল্লচ্চযাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি, দুব্ভাসিতাপত্তি – ইমা সত্ত আপত্তিযো.

তত্থ কতমে সত্ত আপত্তিক্খন্ধা? পাৰাজিকাপত্তিক্খন্ধো, সঙ্ঘাদিসেসাপত্তিক্খন্ধো, থুল্লচ্চযাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো, দুব্ভাসিতাপত্তিক্খন্ধো – ইমে সত্ত আপত্তিক্খন্ধা.

তত্থ কতমানি সত্ত ৱিনীতৱত্থূনি? সত্তহি আপত্তিক্খন্ধেহি আৰতি ৱিৰতি পটিৱিৰতি ৱেৰমণী অকিৰিযা অকৰণং অনজ্ঝাপত্তি ৱেলাঅনতিক্কমো সেতুঘাতো – ইমানি সত্ত ৱিনীতৱত্থূনি.

তত্থ কতমে ছ অগাৰৱা? বুদ্ধে অগাৰৱো, ধম্মে অগাৰৱো, সঙ্ঘে অগাৰৱো, সিক্খায অগাৰৱো, অপ্পমাদে অগাৰৱো, পটিসন্ধাৰে অগাৰৱো – ইমে ছ অগাৰৱা.

তত্থ কতমে ছ গাৰৱা? বুদ্ধে গাৰৱো, ধম্মে গাৰৱো, সঙ্ঘে গাৰৱো, সিক্খায গাৰৱো, অপ্পমাদে গাৰৱো, পটিসন্ধাৰে গাৰৱো – ইমে ছ গাৰৱা.

তত্থ কতমানি ছ ৱিনীতৱত্থূনি? ছহি অগাৰৱেহি আৰতি ৱিৰতি পটিৱিৰতি ৱেৰমণী অকিৰিযা অকৰণং অনজ্ঝাপত্তি ৱেলাঅনতিক্কমো সেতুঘাতো – ইমানি ছ ৱিনীতৱত্থূনি.

তত্থ কতমা চতস্সো ৱিপত্তিযো? সীলৱিপত্তি, আচাৰৱিপত্তি, দিট্ঠিৱিপত্তি, আজীৱৱিপত্তি – ইমা চতস্সো ৱিপত্তিযো.

তত্থ কতমে ছ আপত্তিসমুট্ঠানা? অত্থাপত্তি কাযতো সমুট্ঠাতি, ন ৱাচতো ন চিত্ততো; অত্থাপত্তি ৱাচতো সমুট্ঠাতি, ন কাযতো ন চিত্ততো; অত্থাপত্তি কাযতো চ ৱাচতো চ সমুট্ঠাতি, ন চিত্ততো; অত্থাপত্তি কাযতো চ চিত্ততো চ সমুট্ঠাতি, ন ৱাচতো; অত্থাপত্তি ৱাচতো চ চিত্ততো চ সমুট্ঠাতি, ন কাযতো; অত্থাপত্তি কাযতো চ ৱাচতো চ চিত্ততো চ সমুট্ঠাতি – ইমে ছ আপত্তিসমুট্ঠানা.

২৭২. তত্থ [চূড়ৱ. ২১৬; অ. নি. ৬.৩৬; ম. নি. ৩.৪৪; দী. নি. ৩.৩২৫] কতমানি ছ ৱিৱাদমূলানি? ইধ ভিক্খু কোধনো হোতি উপনাহী. যো সো ভিক্খু কোধনো হোতি উপনাহী সো সত্থৰিপি অগাৰৱো ৱিহৰতি অপ্পতিস্সো, ধম্মেপি অগাৰৱো ৱিহৰতি অপ্পতিস্সো, সঙ্ঘেপি অগাৰৱো ৱিহৰতি অপ্পতিস্সো, সিক্খাযপি ন পৰিপূৰকাৰী হোতি. যো সো ভিক্খু সত্থৰি অগাৰৱো ৱিহৰতি অপ্পতিস্সো, ধম্মে…পে… সঙ্ঘে…পে… সিক্খায ন পৰিপূৰকাৰী, সো সঙ্ঘে ৱিৱাদং জনেতি. যো হোতি ৱিৱাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৱমনুস্সানং. এৱৰূপং চে তুম্হে ৱিৱাদমূলং অজ্ঝত্তং ৱা বহিদ্ধা ৱা সমনুপস্সেয্যাথ তত্ৰ তুম্হে তস্সেৱ পাপকস্স ৱিৱাদমূলস্স পহানায ৱাযমেয্যাথ. এৱৰূপং চে তুম্হে ৱিৱাদমূলং অজ্ঝত্তং ৱা বহিদ্ধা ৱা ন সমনুপস্সেয্যাথ তত্ৰ তুম্হে তস্সেৱ পাপকস্স ৱিৱাদমূলস্স আযতিং অনৱস্সৱায পটিপজ্জেয্যাথ. এৱমেতস্স পাপকস্স ৱিৱাদমূলস্স পহানং হোতি. এৱমেতস্স পাপকস্স ৱিৱাদমূলস্স আযতিং অনৱস্সৱো হোতি.

[চূড়ৱ. ২১৬] পুন চপৰং ভিক্খু মক্খী হোতি পড়াসী…পে… ইস্সুকী হোতি মচ্ছৰী, সঠো হোতি মাযাৱী, পাপিচ্ছো হোতি মিচ্ছাদিট্ঠি, সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী. যো সো ভিক্খু সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী সো সত্থৰিপি অগাৰৱো ৱিহৰতি অপ্পতিস্সো, ধম্মেপি অগাৰৱো ৱিহৰতি অপ্পতিস্সো, সঙ্ঘেপি অগাৰৱো ৱিহৰতি অপ্পতিস্সো, সিক্খাযপি ন পৰিপূৰকাৰী হোতি. যো সো ভিক্খু সত্থৰি অগাৰৱো ৱিহৰতি অপ্পতিস্সো ধম্মে…পে… সঙ্ঘে…পে… সিক্খায ন পৰিপূৰকাৰী, সো সঙ্ঘে ৱিৱাদং জনেতি. যো সো হোতি ৱিৱাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৱমনুস্সানং. এৱৰূপং চে তুম্হে ৱিৱাদমূলং অজ্ঝত্তং ৱা বহিদ্ধা ৱা সমনুপস্সেয্যাথ তত্ৰ তুম্হে তস্সেৱ পাপকস্স ৱিৱাদমূলস্স পহানায ৱাযমেয্যাথ. এৱৰূপং চে তুম্হে ৱিৱাদমূলং অজ্ঝত্তং ৱা বহিদ্ধা ৱা ন সমনুপস্সেয্যাথ তত্ৰ তুম্হে তস্সেৱ পাপকস্স ৱিৱাদমূলস্স আযতিং অনৱস্সৱায পটিপজ্জেয্যাথ. এৱমেতস্স পাপকস্স ৱিৱাদমূলস্স পহানং হোতি. এৱমেতস্স পাপকস্স ৱিৱাদমূলস্স আযতিং অনৱস্সৱো হোতি. ইমানি ছ ৱিৱাদমূলানি.

২৭৩. [চূড়ৱ. ২১৭] তত্থ কতমানি ছ অনুৱাদমূলানি? ইধ ভিক্খু কোধনো হোতি উপনাহী. যো সো ভিক্খু কোধনো হোতি উপনাহী সো সত্থৰিপি অগাৰৱো ৱিহৰতি অপ্পতিস্সো, ধম্মেপি অগাৰৱো ৱিহৰতি অপ্পতিস্সো, সঙ্ঘেপি অগাৰৱো ৱিহৰতি অপ্পতিস্সো, সিক্খাযপি ন পৰিপূৰকাৰী হোতি. যো সো ভিক্খু সত্থৰি অগাৰৱো ৱিহৰতি অপ্পতিস্সো ধম্মে…পে… সঙ্ঘে …পে… সিক্খায ন পৰিপূৰকাৰী সো সঙ্ঘে অনুৱাদং জনেতি. যো হোতি অনুৱাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৱমনুস্সানং. এৱৰূপং চে তুম্হে অনুৱাদমূলং অজ্ঝত্তং ৱা বহিদ্ধা ৱা সমনুপস্সেয্যাথ তত্ৰ তুম্হে তস্সেৱ পাপকস্স অনুৱাদমূলস্স পহানায ৱাযমেয্যাথ. এৱৰূপং চে তুম্হে অনুৱাদমূলং অজ্ঝত্তং ৱা বহিদ্ধা ৱা ন সমনুপস্সেয্যাথ তত্ৰ তুম্হে তস্সেৱ পাপকস্স অনুৱাদমূলস্স আযতিং অনৱস্সৱায পটিপজ্জেয্যাথ. এৱমেতস্স পাপকস্স অনুৱাদমূলস্স পহানং হোতি. এৱমেতস্স পাপকস্স অনুৱাদমূলস্স আযতিং অনৱস্সৱো হোতি.

পুন চপৰং ভিক্খু মক্খী হোতি পলাসী…পে… ইস্সুকী হোতি মচ্ছৰী, সঠো হোতি মাযাৱী, পাপিচ্ছো হোতি মিচ্ছাদিট্ঠি, সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী. যো সো ভিক্খু সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী সো সত্থৰিপি অগাৰৱো ৱিহৰতি অপ্পতিস্সো, ধম্মেপি অগাৰৱো ৱিহৰতি অপ্পতিস্সো, সঙ্ঘেপি অগাৰৱো ৱিহৰতি অপ্পতিস্সো, সিক্খাযপি ন পৰিপূৰকাৰী হোতি. যো ভিক্খু সত্থৰি অগাৰৱো ৱিহৰতি অপ্পতিস্সো ধম্মে…পে… সঙ্ঘে…পে… সিক্খায ন পৰিপূৰকাৰী সো সঙ্ঘে অনুৱাদং জনেতি. যো হোতি অনুৱাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৱমনুস্সানং. এৱৰূপং চে তুম্হে অনুৱাদমূলং অজ্ঝত্তং ৱা বহিদ্ধা ৱা সমনুপস্সেয্যাথ তত্ৰ তুম্হে তস্সেৱ পাপকস্স অনুৱাদমূলস্স পহানায ৱাযমেয্যাথ. এৱৰূপং চে তুম্হে অনুৱাদমূলং অজ্ঝত্তং ৱা বহিদ্ধা ৱা ন সমনুপস্সেয্যাথ তত্ৰ তুম্হে তস্সেৱ পাপকস্স অনুৱাদমূলস্স আযতিং অনৱস্সৱায পটিপজ্জেয্যাথ. এৱমেতস্স পাপকস্স অনুৱাদমূলস্স পহানং হোতি. এৱমেতস্স পাপকস্স অনুৱাদমূলস্স আযতিং অনৱস্সৱো হোতি. ইমানি ছ অনুৱাদমূলানি.

২৭৪. [দী. নি. ৩.৩২৪; অ. নি. ৬.১১] তত্থ কতমে ছ সাৰণীযা ধম্মা? ইধ ভিক্খুনো মেত্তং কাযকম্মং পচ্চুপট্ঠিতং হোতি সব্ৰহ্মচাৰীসু আৱি চেৱ ৰহো চ. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি.

পুন চপৰং ভিক্খুনো মেত্তং ৱচীকম্মং পচ্চুপট্ঠিতং হোতি সব্ৰহ্মচাৰীসু আৱি চেৱ ৰহো চ. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি.

পুন চপৰং ভিক্খুনো মেত্তং মনোকম্মং পচ্চুপট্ঠিতং হোতি সব্ৰহ্মচাৰীসু আৱি চেৱ ৰহো চ. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি.

পুন চপৰং ভিক্খু যে তে লাভা ধম্মিকা ধম্মলদ্ধা অন্তমসো পত্তপৰিযাপন্নমত্তম্পি তথাৰূপেহি লাভেহি অপ্পটিৱিভত্তভোগী হোতি সীলৱন্তেহি সব্ৰহ্মচাৰীহি সাধাৰণভোগী. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি.

পুন চপৰং ভিক্খু যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৱিঞ্ঞুপসত্থানি অপৰামট্ঠানি সমাধিসংৱত্তনিকানি, তথাৰূপেসু সীলেসু সীলসামঞ্ঞগতো ৱিহৰতি সব্ৰহ্মচাৰীহি আৱি চেৱ ৰহো চ. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি.

পুন চপৰং ভিক্খু যাযং দিট্ঠি অৰিযা নিয্যানিকা নিয্যাতি তক্কৰস্স সম্মা দুক্খক্খযায তথাৰূপায দিট্ঠিযা দিট্ঠিসামঞ্ঞগতো ৱিহৰতি সব্ৰহ্মচাৰীহি আৱি চেৱ ৰহো চ. অযম্পি ধম্মো সাৰণীযো পিযকৰণো গৰুকৰণো সঙ্গহায অৱিৱাদায সামগ্গিযা একীভাৱায সংৱত্ততি. ইমে ছ সাৰণীযা ধম্মা.

২৭৫. তত্থ কতমানি অট্ঠাৰস ভেদকৰৱত্থূনি? ইধ ভিক্খু অধম্মং ‘‘ধম্মো’’তি দীপেতি, ধম্মং ‘‘অধম্মো’’তি দীপেতি, অৱিনযং ‘‘ৱিনযো’’তি দীপেতি, ৱিনযং ‘‘অৱিনযো’’তি দীপেতি, অভাসিতং অলপিতং তথাগতেন ‘‘ভাসিতং লপিতং তথাগতেনা’’তি দীপেতি, ভাসিতং লপিতং তথাগতেন ‘‘অভাসিতং অলপিতং তথাগতেনা’’তি দীপেতি, অনাচিণ্ণং তথাগতেন ‘‘আচিণ্ণং তথাগতেনা’’তি দীপেতি, আচিণ্ণং তথাগতেন ‘‘অনাচিণ্ণং তথাগতেনা’’তি দীপেতি, অপঞ্ঞত্তং তথাগতেন ‘‘পঞ্ঞত্তং তথাগতেনা’’তি দীপেতি, পঞ্ঞত্তং তথাগতেন ‘‘অপঞ্ঞত্তং তথাগতেনা’’তি দীপেতি, আপত্তিং ‘‘অনাপত্তী’’তি দীপেতি, অনাপত্তিং ‘‘আপত্তী’’তি দীপেতি, লহুকং আপত্তিং ‘‘গৰুকা আপত্তী’’তি দীপেতি, গৰুকং আপত্তিং ‘‘লহুকা আপত্তী’’তি দীপেতি, সাৱসেসং আপত্তিং ‘‘অনৱসেসা আপত্তী’’তি দীপেতি, অনৱসেসং আপত্তিং ‘‘সাৱসেসা আপত্তী’’তি দীপেতি, দুট্ঠুল্লং আপত্তিং ‘‘অদুট্ঠুল্লা আপত্তী’’তি দীপেতি, অদুট্ঠুল্লং আপত্তিং ‘‘দুট্ঠুল্লা আপত্তী’’তি দীপেতি. ইমানি অট্ঠাৰস ভেদকৰৱত্থূনি.

[চূড়ৱ. ২১৫; পৰি. ৩৪০] তত্থ কতমানি চত্তাৰি অধিকৰণানি? ৱিৱাদাধিকৰণং, অনুৱাদাধিকৰণং, আপত্তাধিকৰণং, কিচ্চাধিকৰণং – ইমানি চত্তাৰি অধিকৰণানি.

তত্থ কতমে সত্ত সমথা? সম্মুখাৱিনযো, সতিৱিনযো, অমূড়্হৱিনযো, পটিঞ্ঞাতকৰণং, যেভুয্যসিকা, তস্সপাপিযসিকা, তিণৱত্থাৰকো – ইমে সত্ত সমথা.

কতিপুচ্ছাৱাৰো নিট্ঠিতো.

তস্সুদ্দানং –

আপত্তি আপত্তিক্খন্ধা, ৱিনীতা সত্তধা পুন;

ৱিনীতাগাৰৱা চেৱ, গাৰৱা মূলমেৱ চ.

পুন ৱিনীতা ৱিপত্তি, সমুট্ঠানা ৱিৱাদনা;

অনুৱাদা সাৰণীযং, ভেদাধিকৰণেন চ.

সত্তেৱ সমথা ৱুত্তা, পদা সত্তৰসা ইমেতি.

১. ছআপত্তিসমুট্ঠানৱাৰো

২৭৬. পঠমেন আপত্তিসমুট্ঠানেন পাৰাজিকং আপজ্জেয্যাতি? ন হীতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? সিযাতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? ন হীতি ৱত্তব্বং.

দুতিযেন আপত্তিসমুট্ঠানেন পাৰাজিকং আপজ্জেয্যাতি? ন হীতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? ন হীতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? ন হীতি ৱত্তব্বং.

ততিযেন আপত্তিসমুট্ঠানেন পাৰাজিকং আপজ্জেয্যাতি? ন হীতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? সিযাতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? ন হীতি ৱত্তব্বং.

চতুত্থে আপত্তিসমুট্ঠানেন পাৰাজিকং আপজ্জেয্যাতি? সিযাতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? সিযাতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? ন হীতি ৱত্তব্বং.

পঞ্চমেন আপত্তিসমুট্ঠানেন পাৰাজিকং আপজ্জেয্যাতি? সিযাতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? ন হীতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? সিযাতি ৱত্তব্বং.

ছট্ঠেন আপত্তিসমুট্ঠানেন পাৰাজিকং আপজ্জেয্যাতি? সিযাতি ৱত্তব্বং. সঙ্ঘাদিসেসং আপজ্জেয্যাতি? সিযাতি ৱত্তব্বং. থুল্লচ্চযং আপজ্জেয্যাতি? সিযাতি ৱত্তব্বং. পাচিত্তিযং আপজ্জেয্যাতি? সিযাতি ৱত্তব্বং. পাটিদেসনীযং আপজ্জেয্যাতি? সিযাতি ৱত্তব্বং. দুক্কটং আপজ্জেয্যাতি? সিযাতি ৱত্তব্বং. দুব্ভাসিতং আপজ্জেয্যাতি? ন হীতি ৱত্তব্বং.

ছআপত্তিসমুট্ঠানৱাৰো নিট্ঠিতো পঠমো.

২. কতাপত্তিৱাৰো

২৭৭. পঠমেন আপত্তিসমুট্ঠানেন কতি আপত্তিযো আপজ্জতি? পঠমেন আপত্তিসমুট্ঠানেন পঞ্চ আপত্তিযো আপজ্জতি. ভিক্খু কপ্পিযসঞ্ঞী সঞ্ঞাচিকায কুটিং কৰোতি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স; ভিক্খু কপ্পিযসঞ্ঞী ৱিকালে ভোজনং ভুঞ্জতি, আপত্তি পাচিত্তিযস্স; ভিক্খু কপ্পিযসঞ্ঞী অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জতি, আপত্তি পাটিদেসনীযস্স – পঠমেন আপত্তিসমুট্ঠানেন ইমা পঞ্চ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকৰণানং কতমং অধিকৰণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো সমুট্ঠন্তি, ন ৱাচতো ন চিত্ততো. চতুন্নং অধিকৰণানং আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৭৮. দুতিযেন আপত্তিসমুট্ঠানেন কতি আপত্তিযো আপজ্জতি? দুতিযেন আপত্তিসমুট্ঠানেন চতস্সো আপত্তিযো আপজ্জতি – ভিক্খু কপ্পিযসঞ্ঞী সমাদিসতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু কপ্পিযসঞ্ঞী অনুপসম্পন্নং পদসো ধম্মং ৱাচেতি, আপত্তি পাচিত্তিযস্স – দুতিযেন আপত্তিসমুট্ঠানেন ইমা চতস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – ৱাচতো সমুট্ঠন্তি, ন কাযতো ন চিত্ততো. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৭৯. ততিযেন আপত্তিসমুট্ঠানেন কতি আপত্তিযো আপজ্জতি? ততিযেন আপত্তিসমুট্ঠানেন পঞ্চ আপত্তিযো আপজ্জতি. ভিক্খু কপ্পিযসঞ্ঞী সংৱিদহিত্ৱা কুটিং কৰোতি অদেসিতৱত্থুকং পমাণাতিক্কন্তং সাৰম্ভং অপৰিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু কপ্পিযসঞ্ঞী পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স. ভিক্খু কপ্পিযসঞ্ঞী ভিক্খুনিযা ৱোসাসন্তিযা ন নিৱাৰেত্ৱা ভুঞ্জতি, আপত্তি পাটিদেসনীযস্স – ততিযেন আপত্তিসমুট্ঠানেন ইমা পঞ্চ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ সমুট্ঠন্তি, ন চিত্ততো. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮০. চতুত্থেন আপত্তিসমুট্ঠানেন কতি আপত্তিযো আপজ্জতি? চতুত্থেন আপত্তিসমুট্ঠানেন ছ আপত্তিযো আপজ্জতি – ভিক্খু মেথুনং ধম্মং পটিসেৱতি, আপত্তি পাৰাজিকস্স; ভিক্খু অকপ্পিযসঞ্ঞী সঞ্ঞাচিকায কুটিং কৰোতি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু অকপ্পিযসঞ্ঞী ৱিকালে ভোজনং ভুঞ্জতি, আপত্তি পাচিত্তিযস্স. ভিক্খু অকপ্পিযসঞ্ঞী অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জতি, আপত্তি পাটিদেসনীযস্স. চতুত্থেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৱাচতো. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮১. পঞ্চমেন আপত্তিসমুট্ঠানেন কতি আপত্তিযো আপজ্জতি? পঞ্চমেন আপত্তিসমুট্ঠানেন ছ আপত্তিযো আপজ্জতি. ভিক্খু পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স; ভিক্খু অকপ্পিযসঞ্ঞী সমাদিসতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু অকপ্পিযসঞ্ঞী অনুপসম্পন্নং পদসো ধম্মং ৱাচেতি, আপত্তি পাচিত্তিযস্স. ন খুংসেতুকামো ন ৱম্ভেতুকামো ন মঙ্কুকত্তুকামো দৱকম্যতা হীনেন হীনং ৱদেতি, আপত্তি দুব্ভাসিতস্স – পঞ্চমেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন, সিযা দুব্ভাসিতাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – ৱাচতো চ চিত্ততো চ সমুট্ঠন্তি, ন কাযতো. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮২. ছট্ঠেন আপত্তিসমুট্ঠানেন কতি আপত্তিযো আপজ্জতি? ছট্ঠেন আপত্তিসমুট্ঠানেন ছ আপত্তিযো আপজ্জতি – ভিক্খু সংৱিদহিত্ৱা ভণ্ডং অৱহৰতি, আপত্তি পাৰাজিকস্স; ভিক্খু অকপ্পিযসঞ্ঞী সংৱিদহিত্ৱা কুটিং কৰোতি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স. ভিক্খু অকপ্পিযসঞ্ঞী পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স. ভিক্খু অকপ্পিযসঞ্ঞী ভিক্খুনিযা ৱোসাসন্তিযা ন নিৱাৰেত্ৱা ভুঞ্জতি, আপত্তি পাটিদেসনীযস্স – ছট্ঠেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি আপত্তিসমুট্ঠানেহি সমুট্ঠন্তি? চতুন্নং অধিকৰণানং কতমং অধিকৰণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চাতি.

ছন্নং আপত্তিসমুট্ঠানানং

কতাপত্তিৱাৰো নিট্ঠিতো দুতিযো.