সমথভেদো

৬. অধিকৰণপৰিযাযৱাৰো

২৯২. ৱিৱাদাধিকৰণস্স – কিং পুব্বঙ্গমং? কতি ঠানানি? কতি ৱত্থূনি? কতি ভূমিযো? কতি হেতূ? কতি মূলানি? কতিহাকাৰেহি ৱিৱদতি? ৱিৱাদাধিকৰণং কতিহি সমথেহি সম্মতি?

অনুৱাদাধিকৰণস্স – কিং পুব্বঙ্গমং? কতি ঠানানি? কতি ৱত্থূনি? কতি ভূমিযো? কতি হেতূ? কতি মূলানি? কতিহাকাৰেহি অনুৱদতি? অনুৱাদাধিকৰণং কতিহি সমথেহি সম্মতি?

আপত্তাধিকৰণস্স – কিং পুব্বঙ্গমং? কতি ঠানানি? কতি ৱত্থূনি? কতি ভূমিযো? কতি হেতূ? কতি মূলানি? কতিহাকাৰেহি আপত্তিং আপজ্জতি? আপত্তাধিকৰণং কতিহি সমথেহি সম্মতি?

কিচ্চাধিকৰণস্স – কিং পুব্বঙ্গমং? কতি ঠানানি? কতি ৱত্থূনি? কতি ভূমিযো? কতি হেতূ? কতি মূলানি? কতিহাকাৰেহি কিচ্চং জাযতি? কিচ্চাধিকৰণং কতিহি সমথেহি সম্মতি?

২৯৩. ৱিৱাদাধিকৰণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? অট্ঠাৰস ভেদকৰৱত্থূনি ঠানানি. কতি ৱত্থূনীতি? অট্ঠাৰস ভেদকৰৱত্থূনি. কতি ভূমিযোতি? অট্ঠাৰস ভেদকৰৱত্থূনি ভূমিযো. কতি হেতূতি? নৱ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? দ্ৱাদস মূলানি. কতিহাকাৰেহি ৱিৱদতীতি? দ্ৱীহাকাৰেহি ৱিৱদতি – ধম্মদিট্ঠি ৱা অধম্মদিট্ঠি ৱা. [চূড়ৱ. ২২৮] ৱিৱাদাধিকৰণং কতিহি সমথেহি সম্মতীতি? ৱিৱাদাধিকৰণং দ্ৱীহি সমথেহি সম্মতি – সম্মুখাৱিনযেন চ যেভুয্যসিকায চ.

২৯৪. অনুৱাদাধিকৰণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? চতস্সো ৱিপত্তিযো ঠানানি. কতি ৱত্থূনীতি? চতস্সো ৱিপত্তিযো ৱত্থূনি. কতি ভূমিযোতি? চতস্সো ৱিপত্তিযো ভূমিযো. কতি হেতূতি? নৱ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? চুদ্দস মূলানি. কতিহাকাৰেহি অনুৱদতীতি? দ্ৱীহাকাৰেহি অনুৱদতি – ৱত্থুতো ৱা আপত্তিতো ৱা. [চূড়ৱ. ২৩৬] অনুৱাদাধিকৰণং কতিহি সমথেহি সম্মতীতি? অনুৱাদাধিকৰণং চতূহি সমথেহি সম্মতি – সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকায চ.

২৯৫. আপত্তাধিকৰণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? সত্ত আপত্তিক্খন্ধা ঠানানি. কতি ৱত্থূনীতি? সত্ত আপত্তিক্খন্ধা ৱত্থূনি. কতি ভূমিযোতি? সত্ত আপত্তিক্খন্ধা ভূমিযো. কতি হেতূতি? ছ হেতূ [কতি হেতূতি নৱ হেতূ, তযো কুসলহেতূ (সী. স্যা.)] – তযো অকুসলহেতূ, তযো অব্যাকতহেতূ. কতি মূলানীতি? ছ আপত্তিসমুট্ঠানানি মূলানি. কতিহাকাৰেহি আপত্তিং আপজ্জতীতি? ছহাকাৰেহি আপত্তিং আপজ্জতি – অলজ্জিতা, অঞ্ঞাণতা, কুক্কুচ্চপকততা, অকপ্পিযে কপ্পিযসঞ্ঞিতা, কপ্পিযে অকপ্পিযসঞ্ঞিতা, সতিসম্মোসা. [চূড়ৱ. ২৩৯] আপত্তাধিকৰণং কতিহি সমথেহি সম্মতীতি? আপত্তাধিকৰণং তীহি সমথেহি সম্মতি – সম্মুখাৱিনযেন চ পটিঞ্ঞাতকৰণেন চ, সম্মুখাৱিনযেন চ তিণৱত্থাৰকেন চ.

২৯৬. কিচ্চাধিকৰণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? চত্তাৰি কম্মানি ঠানানি. কতি ৱত্থূনীতি? চত্তাৰি কম্মানি ৱত্থূনি. কতি ভূমিযোতি? চত্তাৰি কম্মানি ভূমিযো. কতি হেতূতি? নৱ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? একং মূলং – সঙ্ঘো. কতিহাকাৰেহি কিচ্চং জাযতীতি? দ্ৱীহাকাৰেহি কিচ্চং জাযতি – ঞত্তিতো ৱা অপলোকনতো ৱা. [চূড়ৱ. ২৪২] কিচ্চাধিকৰণং কতিহি সমথেহি সম্মতীতি? কিচ্চাধিকৰণং একেন সমথেন সম্মতি – সম্মুখাৱিনযেন.

কতি সমথা? সত্ত সমথা. সম্মুখাৱিনযো, সতিৱিনযো, অমূড়্হৱিনযো, পটিঞ্ঞাতকৰণং, যেভুয্যসিকা, তস্সপাপিযসিকা, তিণৱত্থাৰকো – ইমে সত্ত সমথা.

সিযা ইমে সত্ত সমথা দস সমথা হোন্তি, দস সমথা সত্ত সমথা হোন্তি ৱত্থুৱসেন পৰিযাযেন সিযাতি.

কথঞ্চ সিযা? ৱিৱাদাধিকৰণস্স দ্ৱে সমথা, অনুৱাদাধিকৰণস্স চত্তাৰো সমথা, আপত্তাধিকৰণস্স তযো সমথা, কিচ্চাধিকৰণস্স একো সমথো. এৱং ইমে সত্ত সমথা দস সমথা হোন্তি, দস সমথা সত্ত সমথা হোন্তি ৱত্থুৱসেন পৰিযাযেন.

পৰিযাযৱাৰো নিট্ঠিতো ছট্ঠো.

৭. সাধাৰণৱাৰো

২৯৭. কতি সমথা ৱিৱাদাধিকৰণস্স সাধাৰণা? কতি সমথা ৱিৱাদাধিকৰণস্স অসাধাৰণা? কতি সমথা অনুৱাদাধিকৰণস্স সাধাৰণা? কতি সমথা অনুৱাদাধিকৰণস্স অসাধাৰণা? কতি সমথা আপত্তাধিকৰণস্স সাধাৰণা? কতি সমথা আপত্তাধিকৰণস্স অসাধাৰণা? কতি সমথা কিচ্চাধিকৰণস্স সাধাৰণা? কতি সমথা কিচ্চাধিকৰণস্স অসাধাৰণা?

দ্ৱে সমথা ৱিৱাদাধিকৰণস্স সাধাৰণা – সম্মুখাৱিনযো, যেভুয্যসিকা. পঞ্চ সমথা ৱিৱাদাধিকৰণস্স অসাধাৰণা – সতিৱিনযো, অমূড়্হৱিনযো, পটিঞ্ঞাতকৰণং, তস্সপাপিযসিকা, তিণৱত্থাৰকো.

চত্তাৰো সমথা অনুৱাদাধিকৰণস্স সাধাৰণা – সম্মুখাৱিনযো; সতিৱিনযো, অমূড়্হৱিনযো, তস্সপাপিযসিকা. তযো সমথা অনুৱাদাধিকৰণস্স অসাধাৰণা – যেভুয্যসিকা, পটিঞ্ঞাতকৰণং, তিণৱত্থাৰকো.

তযো সমথা আপত্তাধিকৰণস্স সাধাৰণা – সম্মুখাৱিনযো, পটিঞ্ঞাতকৰণং, তিণৱত্থাৰকো. চত্তাৰো সমথা আপত্তাধিকৰণস্স অসাধাৰণা – যেভুয্যসিকা, সতিৱিনযো, অমূড়্হৱিনযো, তস্সপাপিযসিকা.

একো সমথো কিচ্চাধিকৰণস্স সাধাৰণো – সম্মুখাৱিনযো. ছ সমথা কিচ্চাধিকৰণস্স অসাধাৰণা – যেভুয্যসিকা, সতিৱিনযো, অমূড়্হৱিনযো, পটিঞ্ঞাতকৰণং, তস্সপাপিযসিকা, তিণৱত্থাৰকো.

সাধাৰণৱাৰো নিট্ঠিতো সত্তমো.

৮. তব্ভাগিযৱাৰো

২৯৮. কতি সমথা ৱিৱাদাধিকৰণস্স তব্ভাগিযা? কতি সমথা ৱিৱাদাধিকৰণস্স অঞ্ঞভাগিযা? কতি সমথা অনুৱাদাধিকৰণস্স তব্ভাগিযা? কতি সমথা অনুৱাদাধিকৰণস্স অঞ্ঞভাগিযা? কতি সমথা আপত্তাধিকৰণস্স তব্ভাগিযা? কতি সমথা আপত্তাধিকৰণস্স অঞ্ঞভাগিযা? কতি সমথা কিচ্চাধিকৰণস্স তব্ভাগিযা? কতি সমথা কিচ্চাধিকৰণস্স অঞ্ঞভাগিযা?

দ্ৱে সমথা ৱিৱাদাধিকৰণস্স তব্ভাগিযা – সম্মুখাৱিনযো, যেভুয্যসিকা. পঞ্চ সমথা ৱিৱাদাধিকৰণস্স অঞ্ঞভাগিযা – সতিৱিনযো, অমূড়্হৱিনযো, পটিঞ্ঞাতকৰণং, তস্সপাপিযসিকা, তিণৱত্থাৰকো.

চত্তাৰো সমথা অনুৱাদাধিকৰণস্স তব্ভাগিযা – সম্মুখাৱিনযো, সতিৱিনযো, অমূড়্হৱিনযো, তস্সপাপিযসিকা. তযো সমথা অনুৱাদাধিকৰণস্স অঞ্ঞভাগিযা – যেভুয্যসিকা, পটিঞ্ঞাতকৰণং, তিণৱত্থাৰকো.

তযো সমথা আপত্তাধিকৰণস্স তব্ভাগিযা – সম্মুখাৱিনযো, পটিঞ্ঞাতকৰণং, তিণৱত্থাৰকো. চত্তাৰো সমথা আপত্তাধিকৰণস্স অঞ্ঞভাগিযা – যেভুয্যসিকা, সতিৱিনযো, অমূড়্হৱিনযো, তস্সপাপিযসিকা.

একো সমথো কিচ্চাধিকৰণস্স তব্ভাগিযো – সম্মুখাৱিনযো. ছ সমথা কিচ্চাধিকৰণস্স অঞ্ঞভাগিযা – যেভুয্যসিকা, সতিৱিনযো, অমূড়্হৱিনযো, পটিঞ্ঞাতকৰণং, তস্সপাপিযসিকা, তিণৱত্থাৰকো.

তব্ভাগিযৱাৰো নিট্ঠিতো অট্ঠমো.

৯. সমথা সমথস্স সাধাৰণৱাৰো

২৯৯. সমথা সমথস্স সাধাৰণা, সমথা সমথস্স অসাধাৰণা. সিযা সমথা সমথস্স সাধাৰণা, সিযা সমথা সমথস্স অসাধাৰণা.

কথং সিযা সমথা সমথস্স সাধাৰণা? কথং সিযা সমথা সমথস্স অসাধাৰণা? যেভুয্যসিকা সম্মুখাৱিনযস্স সাধাৰণা, সতিৱিনযস্স অমূড়্হৱিনযস্স পটিঞ্ঞাতকৰণস্স তস্সপাপিযসিকায তিণৱত্থাৰকস্স অসাধাৰণা.

সতিৱিনযো সম্মুখাৱিনযস্স সাধাৰণো, অমূড়্হৱিনযস্স পটিঞ্ঞাতকৰণস্স তস্সপাপিযসিকায তিণৱত্থাৰকস্স যেভুয্যসিকায অসাধাৰণো.

অমূড়্হৱিনযো সম্মুখাৱিনযস্স সাধাৰণো, পটিঞ্ঞাতকৰণস্স তস্সপাপিযসিকায তিণৱত্থাৰকস্স যেভুয্যসিকায সতিৱিনযস্স অসাধাৰণো.

পটিঞ্ঞাতকৰণং সম্মুখাৱিনযস্স সাধাৰণং, তস্সপাপিযসিকায তিণৱত্থাৰকস্স যেভুয্যসিকায সতিৱিনযস্স অমূড়্হৱিনযস্স অসাধাৰণং.

তস্সপাপিযসিকা সম্মুখাৱিনযস্স সাধাৰণা, তিণৱত্থাৰকস্স যেভুয্যসিকায সতিৱিনযস্স অমূড়্হৱিনযস্স পটিঞ্ঞাতকৰণস্স অসাধাৰণা.

তিণৱত্থাৰকো সম্মুখাৱিনযস্স সাধাৰণো, যেভুয্যসিকায সতিৱিনযস্স অমূড়্হৱিনযস্স পটিঞ্ঞাতকৰণস্স তস্সপাপিযসিকায অসাধাৰণো. এৱং সিযা সমথা সমথস্স সাধাৰণা; এৱং সিযা সমথা সমথস্স অসাধাৰণা.

সমথা সমথস্স সাধাৰণৱাৰো নিট্ঠিতো নৱমো.

১০. সমথা সমথস্স তব্ভাগিযৱাৰো

৩০০. সমথা সমথস্স তব্ভাগিযা, সমথা সমথস্স অঞ্ঞভাগিযা. সিযা সমথা সমথস্স তব্ভাগিযা, সিযা সমথা সমথস্স অঞ্ঞভাগিযা.

কথং সিযা সমথা সমথস্স তব্ভাগিযা? কথং সিযা সমথা সমথস্স অঞ্ঞভাগিযা? যেভুয্যসিকা সম্মুখাৱিনযস্স তব্ভাগিযা, সতিৱিনযস্স অমূড়্হৱিনযস্স পটিঞ্ঞাতকৰণস্স তস্সপাপিযসিকায তিণৱত্থাৰকস্স অঞ্ঞভাগিযা.

সতিৱিনযো সম্মুখাৱিনযস্স তব্ভাগিযো, অমূড়্হৱিনযস্স পটিঞ্ঞাতকৰণস্স তস্সপাপিযসিকায তিণৱত্থাৰকস্স যেভুয্যসিকায অঞ্ঞভাগিযো.

অমূড়্হৱিনযো সম্মুখাৱিনযস্স তব্ভাগিযো, পটিঞ্ঞাতকৰণস্স তস্সপাপিযসিকায তিণৱত্থাৰকস্স যেভুয্যসিকায সতিৱিনযস্স অঞ্ঞভাগিযো.

পটিঞ্ঞাতকৰণং সম্মুখাৱিনযস্স তব্ভাগিযং, তস্সপাপিযসিকায তিণৱত্থাৰকস্স যেভুয্যসিকায সতিৱিনযস্স অমূড়্হৱিনযস্স অঞ্ঞভাগিযং.

তস্সপাপিযসিকা সম্মুখাৱিনযস্স তব্ভাগিযা, তিণৱত্থাৰকস্স যেভুয্যসিকায সতিৱিনযস্স অমূড়্হৱিনযস্স পটিঞ্ঞাতকৰণস্স অঞ্ঞভাগিযা.

তিণৱত্থাৰকো সম্মুখাৱিনযস্স তব্ভাগিযো, যেভুয্যসিকায সতিৱিনযস্স অমূড়্হৱিনযস্স পটিঞ্ঞাতকৰণস্স তস্সপাপিযসিকায অঞ্ঞভাগিযো. এৱং সিযা সমথা সমথস্স তব্ভাগিযা, এৱং সিযা সমথা সমথস্স অঞ্ঞভাগিযা.

সমথা সমথস্স তব্ভাগিযৱাৰো নিট্ঠিতো দসমো.

১১. সমথসম্মুখাৱিনযৱাৰো

৩০১. সমথো সম্মুখাৱিনযো, সম্মুখাৱিনযো সমথো? সমথো যেভুয্যসিকা, যেভুয্যসিকা সমথো? সমথো সতিৱিনযো, সতিৱিনযো সমথো? সমথো অমূড়্হৱিনযো, অমূড়্হৱিনযো সমথো? সমথো পটিঞ্ঞাতকৰণং, পটিঞ্ঞাতকৰণং সমথো? সমথো তস্সপাপিযসিকা, তস্সপাপিযসিকা সমথো? সমথো তিণৱত্থাৰকো, তিণৱত্থাৰকো সমথো?

যেভুয্যসিকা সতিৱিনযো অমূড়্হৱিনযো পটিঞ্ঞাতকৰণং তস্সপাপিযসিকা তিণৱত্থাৰকো – ইমে সমথা সমথা, নো সম্মুখাৱিনযো. সম্মুখাৱিনযো সমথো চেৱ সম্মুখাৱিনযো চ.

সতিৱিনযো অমূড়্হৱিনযো পটিঞ্ঞাতকৰণং তস্সপাপিযসিকা তিণৱত্থাৰকো সম্মুখাৱিনযো – ইমে সমথা সমথা, নো যেভুয্যসিকা. যেভুয্যসিকা সমথো চেৱ যেভুয্যসিকা চ.

অমূড়্হৱিনযো পটিঞ্ঞাতকৰণং তস্সপাপিযসিকা তিণৱত্থাৰকো সম্মুখাৱিনযো যেভুয্যসিকা – ইমে সমথা সমথা, নো সতিৱিনযো. সতিৱিনযো সমথো চেৱ সতিৱিনযো চ.

পটিঞ্ঞাতকৰণং তস্সপাপিযসিকা তিণৱত্থাৰকো সম্মুখাৱিনযো যেভুয্যসিকা সতিৱিনযো – ইমে সমথা সমথা, নো অমূড়্হৱিনযো. অমূড়্হৱিনযো সমথো চেৱ অমূড়্হৱিনযো চ.

তস্সপাপিযসিকা তিণৱত্থাৰকো সম্মুখাৱিনযো যেভুয্যসিকা সতিৱিনযো অমূড়্হৱিনযো – ইমে সমথা সমথা, নো পটিঞ্ঞাতকৰণং. পটিঞ্ঞাতকৰণং সমথো চেৱ পটিঞ্ঞাতকৰণঞ্চ.

তিণৱত্থাৰকো সম্মুখাৱিনযো যেভুয্যসিকা সতিৱিনযো অমূড়্হৱিনযো পটিঞ্ঞাতকৰণং – ইমে সমথা সমথা, নো তস্সপাপিযসিকা. তস্সপাপিযসিকা সমথো চেৱ তস্সপাপিযসিকা চ.

সম্মুখাৱিনযো যেভুয্যসিকা সতিৱিনযো অমূড়্হৱিনযো পটিঞ্ঞাতকৰণং তস্সপাপিযসিকা – ইমে সমথা সমথা, নো তিণৱত্থাৰকো. তিণৱত্থাৰকো সমথো চেৱ তিণৱত্থাৰকো চ.

সমথসম্মুখাৱিনযৱাৰো নিট্ঠিতো একাদসমো.

১২. ৱিনযৱাৰো

৩০২. ৱিনযো সম্মুখাৱিনযো, সম্মুখাৱিনযো ৱিনযো? ৱিনযো যেভুয্যসিকা, যেভুয্যসিকা ৱিনযো? ৱিনযো সতিৱিনযো, সতিৱিনযো ৱিনযো? ৱিনযো অমূড়্হৱিনযো, অমূড়্হৱিনযো ৱিনযো? ৱিনযো পটিঞ্ঞাতকৰণং, পটিঞ্ঞাতকৰণং ৱিনযো? ৱিনযো তস্সপাপিযসিকা, তস্সপাপিযসিকা ৱিনযো? ৱিনযো তিণৱত্থাৰকো, তিণৱত্থাৰকো ৱিনযো?

ৱিনযো সিযা সম্মুখাৱিনযো সিযা ন সম্মুখাৱিনযো. সম্মুখাৱিনযো ৱিনযো চেৱ সম্মুখাৱিনযো চ.

ৱিনযো সিযা যেভুয্যসিকা, সিযা ন যেভুয্যসিকা. যেভুয্যসিকা ৱিনযো চেৱ যেভুয্যসিকা চ.

ৱিনযো সিযা সতিৱিনযো, সিযা ন সতিৱিনযো. সতিৱিনযো ৱিনযো চেৱ সতিৱিনযো চ.

ৱিনযো সিযা অমূড়্হৱিনযো, সিযা ন অমূড়্হৱিনযো. অমূড়্হৱিনযো ৱিনযো চেৱ অমূড়্হৱিনযো চ.

ৱিনযো সিযা পটিঞ্ঞাতকৰণং, সিযা ন পটিঞ্ঞাতকৰণং. পটিঞ্ঞাতকৰণং ৱিনযো চেৱ পটিঞ্ঞাতকৰণঞ্চ.

ৱিনযো সিযা তস্সপাপিযসিকা, সিযা ন তস্সপাপিযসিকা. তস্সপাপিযসিকা ৱিনযো চেৱ তস্সপাপিযসিকা চ.

ৱিনযো সিযা তিণৱত্থাৰকো, সিযা ন তিণৱত্থাৰকো. তিণৱত্থাৰকো ৱিনযো চেৱ তিণৱত্থাৰকো চ.

ৱিনযৱাৰো নিট্ঠিতো দ্ৱাদসমো.

১৩. কুসলৱাৰো

৩০৩. সম্মুখাৱিনযো কুসলো অকুসলো অব্যাকতো? যেভুয্যসিকা কুসলা অকুসলা অব্যাকতা? সতিৱিনযো কুসলো অকুসলো অব্যাকতো? অমূড়্হৱিনযো কুসলো অকুসলো অব্যাকতো? পটিঞ্ঞাতকৰণং কুসলং অকুসলং অব্যাকতং? তস্সপাপিযসিকা কুসলা অকুসলা অব্যাকতা? তিণৱত্থাৰকো কুসলো অকুসলো অব্যাকতো?

সম্মুখাৱিনযো সিযা কুসলো, সিযা অব্যাকতো. নত্থি সম্মুখাৱিনযো অকুসলো.

যেভুয্যসিকা সিযা কুসলা, সিযা অকুসলা, সিযা অব্যাকতা.

সতিৱিনযো সিযা কুসলো, সিযা অকুসলো, সিযা অব্যাকতো.

অমূড়্হৱিনযো সিযা কুসলো, সিযা অকুসলো, সিযা অব্যাকতো.

পটিঞ্ঞাতকৰণং সিযা কুসলং, সিযা অকুসলং, সিযা অব্যাকতং.

তস্সপাপিযসিকা সিযা কুসলা, সিযা অকুসলা সিযা অব্যাকতা.

তিণৱত্থাৰকো সিযা কুসলো, সিযা অকুসলো, সিযা অব্যাকতো.

ৱিৱাদাধিকৰণং কুসলং অকুসলং অব্যাকতং. অনুৱাদাধিকৰণং কুসলং অকুসলং অব্যাকতং. আপত্তাধিকৰণং কুসলং অকুসলং অব্যাকতং. কিচ্চাধিকৰণং কুসলং অকুসলং অব্যাকতং.

ৱিৱাদাধিকৰণং সিযা কুসলং, সিযা অকুসলং, সিযা অব্যাকতং.

অনুৱাদাধিকৰণং সিযা কুসলং, সিযা অকুসলং, সিযা অব্যাকতং.

আপত্তাধিকৰণং সিযা অকুসলং, সিযা অব্যাকতং. নত্থি আপত্তাধিকৰণং কুসলং.

কিচ্চাধিকৰণং সিযা কুসলং, সিযা অকুসলং, সিযা অব্যাকতং.

কুসলৱাৰো নিট্ঠিতো তেৰসমো.

১৪. যত্থৱাৰো, পুচ্ছাৱাৰো

৩০৪. যত্থ যেভুয্যসিকা লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ যেভুয্যসিকা লব্ভতি. ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি.

যত্থ সতিৱিনযো লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ সতিৱিনযো লব্ভতি. ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি.

যত্থ অমূড়্হৱিনযো লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ অমূড়্হৱিনযো লব্ভতি. ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি.

যত্থ পটিঞ্ঞাতকৰণং লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ পটিঞ্ঞাতকৰণং লব্ভতি. ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি.

যত্থ তস্সপাপিযসিকা লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ তস্সপাপিযসিকা লব্ভতি. ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি.

যত্থ তিণৱত্থাৰকো লব্ভতি, তত্থ সম্মুখাৱিনযো লব্ভতি; যত্থ সম্মুখাৱিনযো লব্ভতি, তত্থ তিণৱত্থাৰকো লব্ভতি. ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি.

যত্থ যেভুয্যসিকা তত্থ সম্মুখাৱিনযো; যত্থ সম্মুখাৱিনযো তত্থ যেভুয্যসিকা. ন তত্থ সতিৱিনযো, ন তত্থ অমূড়্হৱিনযো, ন তত্থ পটিঞ্ঞাতকৰণং, ন তত্থ তস্সপাপিযসিকা, ন তত্থ তিণৱত্থাৰকো.

যত্থ সতিৱিনযো তত্থ সম্মুখাৱিনযো; যত্থ সম্মুখাৱিনযো তত্থ সতিৱিনযো. ন তত্থ অমূড়্হৱিনযো, ন তত্থ পটিঞ্ঞাতকৰণং, ন তত্থ তস্সপাপিযসিকা, ন তত্থ তিণৱত্থাৰকো, ন তত্থ যেভুয্যসিকা. সম্মুখাৱিনযং কাতুন মূলং…পে….

যত্থ তিণৱত্থাৰকো তত্থ সম্মুখাৱিনযো; যত্থ সম্মুখাৱিনযো তত্থ তিণৱত্থাৰকো. ন তত্থ যেভুয্যসিকা, ন তত্থ সতিৱিনযো, ন তত্থ অমূড়্হৱিনযো, ন তত্থ পটিঞ্ঞাতকৰণং, ন তত্থ তস্সপাপিযসিকা.

চক্কপেয্যালং.

যত্থৱাৰো নিট্ঠিতো চুদ্দসমো.

১৫. সমথৱাৰো, ৱিস্সজ্জনাৱাৰো

৩০৫. যস্মিং সমযে সম্মুখাৱিনযেন চ যেভুয্যসিকায চ অধিকৰণং ৱূপসম্মতি, যত্থ যেভুয্যসিকা লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ যেভুয্যসিকা লব্ভতি. ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি.

যস্মিং সমযে সম্মুখাৱিনযেন চ সতিৱিনযেন চ অধিকৰণং ৱূপসম্মতি, যত্থ সতিৱিনযো লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ সতিৱিনযো লব্ভতি. ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি.

যস্মিং সমযে সম্মুখাৱিনযেন চ অমূড়্হৱিনযেন চ অধিকৰণং ৱূপসম্মতি, যত্থ অমূড়্হৱিনযো লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ অমূড়্হৱিনযো লব্ভতি. ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি.

যস্মিং সমযে সম্মুখাৱিনযেন চ পটিঞ্ঞাতকৰণেন চ অধিকৰণং ৱূপসম্মতি, যত্থ পটিঞ্ঞাতকৰণং লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ পটিঞ্ঞাতকৰণং লব্ভতি. ন তত্থ তস্সপাপিযসিকা লব্ভতি, ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি.

যস্মিং সমযে সম্মুখাৱিনযেন চ তস্সপাপিযসিকায চ অধিকৰণং ৱূপসম্মতি, যত্থ তস্সপাপিযসিকা লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ তস্সপাপিযসিকা লব্ভতি. ন তত্থ তিণৱত্থাৰকো লব্ভতি, ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি.

যস্মিং সমযে সম্মুখাৱিনযেন চ তিণৱত্থাৰকেন চ অধিকৰণং ৱূপসম্মতি, যত্থ তিণৱত্থাৰকো লব্ভতি তত্থ সম্মুখাৱিনযো লব্ভতি, যত্থ সম্মুখাৱিনযো লব্ভতি তত্থ তিণৱত্থাৰকো লব্ভতি. ন তত্থ যেভুয্যসিকা লব্ভতি, ন তত্থ সতিৱিনযো লব্ভতি, ন তত্থ অমূড়্হৱিনযো লব্ভতি, ন তত্থ পটিঞ্ঞাতকৰণং লব্ভতি, ন তত্থ তস্সপাপিযসিকা লব্ভতি.

সমথৱাৰো নিট্ঠিতো পন্নৰসমো.

১৬. সংসট্ঠৱাৰো

৩০৬. অধিকৰণন্তি ৱা সমথাতি ৱা ইমে ধম্মা সংসট্ঠা উদাহু ৱিসংসট্ঠা? লব্ভা চ পনিমেসং ধম্মানং ৱিনিব্ভুজিত্ৱা ৱিনিব্ভুজিত্ৱা [ৱিনিব্ভুজ্জিত্ৱা ৱিনিব্ভুজ্জিত্ৱা (ক.), টীকাযং একপদমেৱ দিস্সতি] নানাকৰণং পঞ্ঞাপেতুন্তি?

অধিকৰণন্তি ৱা সমথাতি ৱা ইমে ধম্মা ৱিসংসট্ঠা, নো সংসট্ঠা. লব্ভা চ পনিমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুন্তি. সো – ‘‘মা হেৱ’’ন্তিস্স ৱচনীযো. অধিকৰণন্তি ৱা সমথাতি ৱা ইমে ধম্মা সংসট্ঠা, নো ৱিসংসট্ঠা. নো চ লব্ভা [ন চ লব্ভা (ক.)] ইমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং. তং কিস্স হেতু? ননু ৱুত্তং ভগৱতা – ‘‘চত্তাৰিমানি, ভিক্খৱে, অধিকৰণানি, সত্ত সমথা. অধিকৰণা সমথেহি সম্মন্তি, সমথা অধিকৰণেহি সম্মন্তি. এৱং, ইমে ধম্মা সংসট্ঠা নো ৱিসংসট্ঠা; নো চ লব্ভা ইমেসং ধম্মানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতু’’ন্তি.

সংসট্ঠৱাৰো নিট্ঠিতো সোড়সমো.

১৭. সম্মতিৱাৰো

৩০৭. ৱিৱাদাধিকৰণং কতিহি সমথেহি সম্মতি? অনুৱাদাধিকৰণং কতিহি সমথেহি সম্মতি? আপত্তাধিকৰণং কতিহি সমথেহি সম্মতি? কিচ্চাধিকৰণং কতিহি সমথেহি সম্মতি?

[চূড়ৱ. ২২৮, ২৩৬ আদযো] ৱিৱাদাধিকৰণং দ্ৱীহি সমথেহি সম্মতি – সম্মুখাৱিনযেন চ যেভুয্যসিকায চ.

[চূড়ৱ. ২২৮, ২৩৬ আদযো] অনুৱাদাধিকৰণং চতূহি সমথেহি সম্মতি – সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকায চ.

[চূড়ৱ. ২৩৯, ২৪২ আদযো] আপত্তাধিকৰণং তীহি সমথেহি সম্মতি – সম্মুখাৱিনযেন চ পটিঞ্ঞাতকৰণেন চ তিণৱত্থাৰকেন চ.

[চূড়ৱ. ২৩৯, ২৪২ আদযো] কিচ্চাধিকৰণং একেন সমথেন সম্মতি – সম্মুখাৱিনযেন.

ৱিৱাদাধিকৰণঞ্চ অনুৱাদাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ পঞ্চহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ.

ৱিৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ আপত্তাধিকৰণঞ্চ চতূহি সমথেহি সম্মন্তি – সম্মুখাৱিনযেন চ যেভুয্যসিকায চ পটিঞ্ঞাতকৰণেন চ তিণৱত্থাৰকেন চ.

ৱিৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ কিচ্চাধিকৰণঞ্চ দ্ৱীহি সমথেহি সম্মন্তি – সম্মুখাৱিনযেন চ যেভুয্যসিকায চ.

অনুৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? অনুৱাদাধিকৰণঞ্চ আপত্তাধিকৰণঞ্চ ছহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

অনুৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? অনুৱাদাধিকৰণঞ্চ কিচ্চাধিকৰণঞ্চ চতূহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকায চ.

আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? আপত্তাধিকৰণঞ্চ কিচ্চাধিকৰণঞ্চ তীহি সমথেহি সম্মন্তি – সম্মুখাৱিনযেন চ পটিঞ্ঞাতকৰণেন চ তিণৱত্থাৰকেন চ.

ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ সত্তহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

ৱিৱাদাধিকৰণঞ্চ অনুৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ কিচ্চাধিকৰণঞ্চ পঞ্চহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ.

অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ ছহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ সত্তহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

সম্মতিৱাৰো নিট্ঠিতো সত্তৰসমো.

১৮. সম্মন্তি ন সম্মন্তিৱাৰো

৩০৮. ৱিৱাদাধিকৰণং কতিহি সমথেহি সম্মতি, কতিহি সমথেহি ন সম্মতি? অনুৱাদাধিকৰণং কতিহি সমথেহি সম্মতি, কতিহি সমথেহি ন সম্মতি? আপত্তাধিকৰণং কতিহি সমথেহি সম্মতি, কতিহি সমথেহি ন সম্মতি? কিচ্চাধিকৰণং কতিহি সমথেহি সম্মতি, কতিহি সমথেহি ন সম্মতি?

ৱিৱাদাধিকৰণং দ্ৱীহি সমথেহি সম্মতি – সম্মুখাৱিনযেন চ যেভুয্যসিকায চ. পঞ্চহি সমথেহি ন সম্মতি – সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

অনুৱাদাধিকৰণং চতূহি সমথেহি সম্মতি – সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকায চ. তীহি সমথেহি ন সম্মতি – যেভুয্যসিকায চ পটিঞ্ঞাতকৰণেন চ তিণৱত্থাৰকেন চ.

[চূড়ৱ. ২৩৯] আপত্তাধিকৰণং তীহি সমথেহি সম্মতি – সম্মুখাৱিনযেন চ পটিঞ্ঞাতকৰণেন চ তিণৱত্থাৰকেন চ. চতূহি সমথেহি ন সম্মতি – যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ.

কিচ্চাধিকৰণং একেন সমথেন সম্মতি – সম্মুখাৱিনযেন. ছহি সমথেহি ন সম্মতি – যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

ৱিৱাদাধিকৰণঞ্চ অনুৱাদাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ পঞ্চহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ. দ্ৱীহি সমথেহি ন সম্মন্তি – পটিঞ্ঞাতকৰণেন চ তিণৱত্থাৰকেন চ.

ৱিৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ আপত্তাধিকৰণঞ্চ চতূহি সমথেহি সম্মন্তি – সম্মুখাৱিনযেন চ যেভুয্যসিকায চ পটিঞ্ঞাতকৰণেন চ তিণৱত্থাৰকেন চ. তীহি সমথেহি ন সম্মন্তি – সতিৱিনযেন চ অমূড়্হৱিনযেন চ তস্সপাপিযসিকায চ.

ৱিৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ কিচ্চাধিকৰণঞ্চ দ্ৱীহি সমথেহি সম্মন্তি – সম্মুখাৱিনযেন চ যেভুয্যসিকায চ. পঞ্চহি সমথেহি ন সম্মন্তি – সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

অনুৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৱাদাধিকৰণঞ্চ আপত্তাধিকৰণঞ্চ ছহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ. একেন সমথেন ন সম্মন্তি – যেভুয্যসিকায.

অনুৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৱাদাধিকৰণঞ্চ কিচ্চাধিকৰণঞ্চ চতূহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ তস্সপাপিযসিকা চ. তীহি সমথেহি ন সম্মন্তি – যেভুয্যসিকায চ পটিঞ্ঞাতকৰণেন চ তিণৱত্থাৰকেন চ.

আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? আপত্তাধিকৰণঞ্চ কিচ্চাধিকৰণঞ্চ তীহি সমথেহি সম্মন্তি – সম্মুখাৱিনযেন চ পটিঞ্ঞাতকৰণেন চ তিণৱত্থাৰকেন চ. চতূহি সমথেহি ন সম্মন্তি – যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ.

ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ সত্তহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

ৱিৱাদাধিকৰণঞ্চ অনুৱাদাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ কিচ্চাধিকৰণঞ্চ পঞ্চহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ তস্সপাপিযসিকায চ. দ্ৱীহি সমথেহি ন সম্মন্তি – পটিঞ্ঞাতকৰণেন চ তিণৱত্থাৰকেন চ.

অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ ছহি সমথেহি সম্মন্তি – সম্মুখাৱিনযেন চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ. একেন সমথেন ন সম্মন্তি – যেভুয্যসিকায.

ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৱিৱাদাধিকৰণঞ্চ অনুৱাদাধিকৰণঞ্চ আপত্তাধিকৰণঞ্চ কিচ্চাধিকৰণঞ্চ সত্তহি সমথেহি সম্মন্তি – সম্মুখাৱিনযেন চ যেভুয্যসিকায চ সতিৱিনযেন চ অমূড়্হৱিনযেন চ পটিঞ্ঞাতকৰণেন চ তস্সপাপিযসিকায চ তিণৱত্থাৰকেন চ.

সম্মন্তি ন সম্মন্তিৱাৰো নিট্ঠিতো অট্ঠাৰসমো.

১৯. সমথাধিকৰণৱাৰো

৩০৯. সমথা সমথেহি সম্মন্তি? সমথা অধিকৰণেহি সম্মন্তি? অধিকৰণা সমথেহি সম্মন্তি? অধিকৰণা অধিকৰণেহি সম্মন্তি?

সিযা সমথা সমথেহি সম্মন্তি, সিযা সমথা সমথেহি ন সম্মন্তি. সিযা সমথা অধিকৰণেহি সম্মন্তি, সিযা সমথা অধিকৰণেহি ন সম্মন্তি. সিযা অধিকৰণা সমথেহি সম্মন্তি, সিযা অধিকৰণা সমথেহি ন সম্মন্তি. সিযা অধিকৰণা অধিকৰণেহি সম্মন্তি, সিযা অধিকৰণা অধিকৰণেহি ন সম্মন্তি.

৩১০. কথং সিযা সমথা সমথেহি সম্মন্তি, কথং সিযা সমথা সমথেহি ন সম্মন্তি? যেভুয্যসিকা সম্মুখাৱিনযেন সম্মতি; সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি, তস্সপাপিযসিকায ন সম্মতি, তিণৱত্থাৰকেন ন সম্মতি.

সতিৱিনযো সম্মুখাৱিনযেন সম্মতি; অমূড়্হৱিনযেন ন সম্মতি, পটিঞ্ঞাতকৰণেন ন সম্মাতি, তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি.

অমূড়্হৱিনযো সম্মুখাৱিনযেন সম্মতি; পটিঞ্ঞাতকৰণেন ন সম্মতি, তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি.

পটিঞ্ঞাতকৰণং সম্মুখাৱিনযেন সম্মতি; তস্সপাপিযসিকায ন সম্মতি, তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি.

তস্সপাপিযসিকা সম্মুখাৱিনযেন সম্মতি; তিণৱত্থাৰকেন ন সম্মতি, যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি.

তিণৱত্থাৰকো সম্মুখাৱিনযেন সম্মতি; যেভুয্যসিকায ন সম্মতি, সতিৱিনযেন ন সম্মতি, অমূড়্হৱিনযেন ন সম্মতি, পটিঞ্ঞাতকৰণেন ন সম্মতি, তস্সপাপিযসিকায ন সম্মতি. এৱং সিযা সমথা সমথেহি সম্মন্তি. এৱং সিযা সমথা সমথেহি ন সম্মন্তি.

৩১১. কথং সিযা সমথা অধিকৰণেহি সম্মন্তি, কথং সিযা সমথা অধিকৰণেহি ন সম্মন্তি? সম্মুখাৱিনযো ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.

যেভুয্যসিকা ৱিৱাদাধিকৰণেন ন সম্মতি, অনুৱাদাধিকৰণেন ন সম্মতি, আপত্তাধিকৰণেন ন সম্মতি; কিচ্চাধিকৰণেন সম্মতি.