৫. অধিকৰণপচ্চযৱাৰো

২৮৮. ৱিৱাদাধিকৰণপচ্চযা কতি আপত্তিযো আপজ্জতি? ৱিৱাদাধিকৰণপচ্চযা দ্ৱে আপত্তিযো আপজ্জতি – উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স – ৱিৱাদাধিকৰণপচ্চযা ইমা দ্ৱে আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং একং ৱিপত্তিং ভজন্তি – আচাৰৱিপত্তিং. সত্তন্নং আপত্তিক্খন্ধানং দ্ৱীহি আপত্তিক্খন্ধেহি সঙ্গহিতা – সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮৯. অনুৱাদাধিকৰণপচ্চযা কতি আপত্তিযো আপজ্জতি? অনুৱাদাধিকৰণপচ্চযা তিস্সো আপত্তিযো আপজ্জতি. ভিক্খুং অমূলকেন পাৰাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; অমূলকেন সঙ্ঘাদিসেসেন অনুদ্ধংসেতি, আপত্তি পাচিত্তিযস্স; অমূলিকায আচাৰৱিপত্তিযা অনুদ্ধংসেতি, আপত্তি দুক্কটস্স – অনুৱাদাধিকৰণপচ্চযা ইমা তিস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং তীহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৯০. আপত্তাধিকৰণপচ্চযা কতি আপত্তিযো আপজ্জতি? আপত্তাধিকৰণপচ্চযা চতস্সো আপত্তিযো আপজ্জতি. ভিক্খুনী জানং পাৰাজিকং ধম্মং পটিচ্ছাদেতি, আপত্তি পাৰাজিকস্স; ৱেমতিকা পটিচ্ছাদেতি, আপত্তি থুল্লচ্চযস্স; ভিক্খু সঙ্ঘাদিসেসং পটিচ্ছাদেতি; আপত্তি পাচিত্তিযস্স; আচাৰৱিপত্তিং পটিচ্ছাদেতি, আপত্তি দুক্কটস্স – আপত্তাধিকৰণপচ্চযা ইমা চতস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৯১. কিচ্চাধিকৰণপচ্চযা কতি আপত্তিযো আপজ্জতি? কিচ্চাধিকৰণপচ্চযা পঞ্চ আপত্তিযো আপজ্জতি. উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জতি, ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি পাৰাজিকস্স. ভেদকানুৱত্তকা ভিক্খূ যাৱততিযং সমনুভাসনায ন পটিনিস্সজ্জন্তি, আপত্তি সঙ্ঘাদিসেসস্স; পাপিকায দিট্ঠিযা যাৱততিযং সমনুভাসনায ন পটিনিস্সজ্জতি, আপত্তি পাচিত্তিযস্স – কিচ্চাধিকৰণপচ্চযা ইমা পঞ্চ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

ঠপেত্ৱা সত্ত আপত্তিযো সত্ত আপত্তিক্খন্ধে, অৱসেসা আপত্তিযো চতুন্নং ৱিপত্তীনং কতি ৱিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকৰণানং কতমং অধিকৰণং? সত্তন্নং সমথানং কতিহি সমথেহি সম্মন্তি? ঠপেত্ৱা সত্ত আপত্তিযো সত্ত আপত্তিক্খন্ধে অৱসেসা আপত্তিযো চতুন্নং ৱিপত্তীনং ন কতমং ৱিপত্তিং ভজন্তি? সত্তন্নং আপত্তিক্খন্ধানং ন কতমেন আপত্তিক্খন্ধেন সঙ্গহিতা. ছন্নং আপত্তিসমুট্ঠানানং ন কতমেন আপত্তিসমুট্ঠানেন সমুট্ঠন্তি. চতুন্নং অধিকৰণানং ন কতমং অধিকৰণং. সত্তন্নং সমথানং ন কতমেন সমথেন সম্মন্তি. তং কিস্স হেতু? ঠপেত্ৱা সত্ত আপত্তিযো সত্ত আপত্তিক্খন্ধে, নত্থঞ্ঞা আপত্তিযোতি.

অধিকৰণপচ্চযৱাৰো নিট্ঠিতো পঞ্চমো.

অন্তৰপেয্যালং [অনন্তৰপেয্যালং (সী. স্যা.)] নিট্ঠিতং.

তস্সুদ্দানং –

কতিপুচ্ছা সমুট্ঠানা, কতাপত্তি তথেৱ চ;

সমুট্ঠানা ৱিপত্তি চ, তথাধিকৰণেন চাতি.