৪. ৱিপত্তিপচ্চযৱাৰো

২৮৪. সীলৱিপত্তিপচ্চযা কতি আপত্তিযো আপজ্জতি? সীলৱিপত্তিপচ্চযা চতস্সো আপত্তিযো আপজ্জতি – ভিক্খুনী জানং পাৰাজিকং ধম্মং পটিচ্ছাদেতি, আপত্তি পাৰাজিকস্স; ৱেমতিকা পটিচ্ছাদেতি, আপত্তি থুল্লচ্চযস্স; ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স; অত্তনো দুট্ঠুল্লং আপত্তিং পটিচ্ছাদেতি, আপত্তি দুক্কটস্স – সীলৱিপত্তিপচ্চযা ইমা চতস্সো আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮৫. আচাৰৱিপত্তিপচ্চযা কতি আপত্তিযো আপজ্জতি? আচাৰৱিপত্তিপচ্চযা একং আপত্তিং আপজ্জতি. আচাৰৱিপত্তিং পটিচ্ছাদেতি, আপত্তি দুক্কটস্স – আচাৰৱিপত্তিপচ্চযা ইমং একং আপত্তিং আপজ্জতি.

সা আপত্তি চতুন্নং ৱিপত্তীনং কতি ৱিপত্তিযো ভজতি …পে… সত্তন্নং সমথানং কতিহি সমথেহি সম্মতি? সা আপত্তি চতুন্নং ৱিপত্তীনং একং ৱিপত্তিং ভজতি – আচাৰৱিপত্তিং. সত্তন্নং আপত্তিক্খন্ধানং একেন আপত্তিক্খন্ধেন সঙ্গহিতা – দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি. চতুন্নং অধিকৰণানং আপত্তাধিকৰণং. সত্তন্নং সমথানং তীহি সমথেহি সম্মতি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮৬. দিট্ঠিৱিপত্তিপচ্চযা কতি আপত্তিযো আপজ্জতি? দিট্ঠিৱিপত্তিপচ্চযা দ্ৱে আপত্তিযো আপজ্জতি. পাপিকায দিট্ঠিযা যাৱততিযং সমনুভাসনায ন পটিনিস্সজ্জতি, ঞত্তিযা দুক্কটং [ঞত্তিযা দুক্কটং, দ্ৱীহি কম্মৱাচাহি দুক্কটা (স্যা. ক.)]; কম্মৱাচাপৰিযোসানে আপত্তি পাচিত্তিযস্স – দিট্ঠিৱিপত্তিপচ্চযা ইমা দ্ৱে আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৱিপত্তীনং একং ৱিপত্তিং ভজন্তি – আচাৰৱিপত্তিং. সত্তন্নং আপত্তিক্খন্ধানং দ্ৱীহি আপত্তিক্খন্ধেহি সঙ্গহিতা – সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

২৮৭. আজীৱৱিপত্তিপচ্চযা কতি আপত্তিযো আপজ্জতি? আজীৱৱিপত্তিপচ্চযা ছ আপত্তিযো আপজ্জতি – আজীৱহেতু আজীৱকাৰণা পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স; আজীৱহেতু আজীৱকাৰণা সঞ্চৰিত্তং সমাপজ্জতি, আপত্তি সঙ্ঘাদিসেসস্স; আজীৱহেতু আজীৱকাৰণা ‘‘যো তে ৱিহাৰে ৱসতি, সো ভিক্খু অৰহা’’তি ভণতি, পটিৱিজানন্তস্স আপত্তি থুল্লচ্চযস্স; আজীৱহেতু আজীৱকাৰণা ভিক্খু পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স; আজীৱহেতু আজীৱকাৰণা ভিক্খুনী পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাটিদেসনীযস্স; আজীৱহেতু আজীৱকাৰণা সূপং ৱা ওদনং ৱা অগিলানো অত্তনো অত্থায ৱিঞ্ঞাপেত্ৱা ভুঞ্জতি, আপত্তি দুক্কটস্স – আজীৱৱিপত্তিপচ্চযা ইমা ছ আপত্তিযো আপজ্জতি.

তা আপত্তিযো চতুন্নং ৱিপত্তীনং কতি ৱিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি. তা আপত্তিযো চতুন্নং ৱিপত্তীনং দ্ৱে ৱিপত্তিযো ভজন্তি – সিযা সীলৱিপত্তিং, সিযা আচাৰৱিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পাৰাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৱাচতো ন চিত্ততো; সিযা ৱাচতো সমুট্ঠন্তি, ন কাযতো ন চিত্ততো; সিযা কাযতো চ ৱাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি. চতুন্নং অধিকৰণানং, আপত্তাধিকৰণং. সত্তন্নং সমথানং তীহি সমথেহি সম্মন্তি – সিযা সম্মুখাৱিনযেন চ পটিঞ্ঞাতকৰণেন চ, সিযা সম্মুখাৱিনযেন চ তিণৱত্থাৰকেন চ.

ৱিপত্তিপচ্চযৱাৰো নিট্ঠিতো চতুত্থো.