৮. ভিক্খুনোৱাদৱগ্গো

৪৫০. ‘‘কতিহি নু খো, ভন্তে, অঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্ব’’ন্তি? ‘‘পঞ্চহুপালি, অঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং, অৱন্দিযো সো ভিক্খু ভিক্খুনিসঙ্ঘেন. কতমেহি পঞ্চহি? ৱিৱৰিত্ৱা কাযং ভিক্খুনীনং দস্সেতি, ঊৰুং দস্সেতি, অঙ্গজাতং দস্সেতি, উভো অংসকূটে দস্সেতি, ওভাসতি, গিহী সম্পযোজেতি – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং. অৱন্দিযো সো ভিক্খু ভিক্খুনিসঙ্ঘেন.

‘‘অপৰেহিপি, উপালি, পঞ্চহঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং, অৱন্দিযো সো ভিক্খু ভিক্খুনিসঙ্ঘেন. কতমেহি পঞ্চহি? ভিক্খুনীনং অলাভায পৰিসক্কতি, ভিক্খুনীনং অনত্থায পৰিসক্কতি, ভিক্খুনীনং অৱাসায পৰিসক্কতি, ভিক্খুনিযো অক্কোসতি পৰিভাসতি, ভিক্খূ ভিক্খুনীহি ভেদেতি – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং, অৱন্দিযো সো ভিক্খু ভিক্খুনিসঙ্ঘেন.

‘‘অপৰেহিপি, উপালি, পঞ্চহঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং, অৱন্দিযো সো ভিক্খু ভিক্খুনিসঙ্ঘেন. কতমেহি পঞ্চহি? ভিক্খুনীনং অলাভায পৰিসক্কতি, ভিক্খুনীনং অনত্থায পৰিসক্কতি, ভিক্খুনীনং অৱাসায পৰিসক্কতি, ভিক্খুনিযো অক্কোসতি পৰিভাসতি, ভিক্খূ ভিক্খুনীহি সম্পযোজেতি – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ভিক্খুনিসঙ্ঘেনেৱ কম্মং কাতব্বং, অৱন্দিযো সো ভিক্খু ভিক্খুনিসঙ্ঘেনা’’তি.

৪৫১. ‘‘কতিহি নু খো, ভন্তে, অঙ্গেহি সমন্নাগতায ভিক্খুনিযা কম্মং কাতব্ব’’ন্তি? পঞ্চহুপালি, অঙ্গেহি সমন্নাগতায ভিক্খুনিযা কম্মং কাতব্বং. কতমেহি পঞ্চহি? ৱিৱৰিত্ৱা কাযং ভিক্খূনং দস্সেতি, ঊৰুং দস্সেতি, অঙ্গজাতং দস্সেতি, উভো অংসকূটে দস্সেতি, ওভাসতি, গিহী সম্পযোজেতি – ইমেহি খো, উপালি, পঞ্চহঙ্গেহি সমন্নাগতায ভিক্খুনিযা কম্মং কাতব্বং.

‘‘অপৰেহিপি, উপালি, পঞ্চহঙ্গেহি সমন্নাগতায ভিক্খুনিযা কম্মং কাতব্বং. কতমেহি পঞ্চহি? ভিক্খূনং অলাভায পৰিসক্কতি, ভিক্খূনং অনত্থায পৰিসক্কতি, ভিক্খূনং অৱাসায পৰিসক্কতি, ভিক্খূ অক্কোসতি পৰিভাসতি, ভিক্খুনিযো ভিক্খূহি ভেদেতি – ইমেহি খো, উপালি, পঞ্চহঙ্গেহি সমন্নাগতায ভিক্খুনিযা কম্মং কাতব্বং.

‘‘অপৰেহিপি, উপালি, পঞ্চহঙ্গেহি সমন্নাগতায ভিক্খুনিযা কম্মং কাতব্বং. কতমেহি পঞ্চহি? ভিক্খূনং অলাভায পৰিসক্কতি, ভিক্খূনং অনত্থায পৰিসক্কতি, ভিক্খূনং অৱাসায পৰিসক্কতি, ভিক্খূ অক্কোসতি পৰিভাসতি, ভিক্খুনিযো ভিক্খূহি সম্পযোজেতি – ইমেহি খো, উপালি, পঞ্চহঙ্গেহি সমন্নাগতায ভিক্খুনিযা কম্মং কাতব্ব’’ন্তি.

৪৫২. ‘‘কতিহি নু খো, ভন্তে, অঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো’’তি? ‘‘পঞ্চহুপালি, অঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো. কতমেহি পঞ্চহি? অলজ্জী চ হোতি, বালো চ, অপকতত্তো চ, চাৱনাধিপ্পাযো ৱত্তা হোতি, নো ৱুট্ঠানাধিপ্পাযো – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো.

‘‘অপৰেহিপি, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো. কতমেহি পঞ্চহি? অপৰিসুদ্ধকাযসমাচাৰো হোতি, অপৰিসুদ্ধৱচীসমাচাৰো হোতি, অপৰিসুদ্ধাজীৱো হোতি, বালো হোতি, অব্যত্তো, ন পটিবলো অনুযুঞ্জিযমানো অনুযোগং দাতুং – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো.

‘‘অপৰেহিপি, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো. কতমেহি পঞ্চহি? কাযিকেন অনাচাৰেন সমন্নাগতো হোতি, ৱাচসিকেন অনাচাৰেন সমন্নাগতো হোতি, কাযিকৱাচসিকেন অনাচাৰেন সমন্নাগতো হোতি, ভিক্খুনীনং অক্কোসকপৰিভাসকো হোতি, ভিক্খুনীহি সদ্ধিং সংসট্ঠো ৱিহৰতি অননুলোমিকেন সংসগ্গেন – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো.

‘‘অপৰেহিপি, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো. কতমেহি পঞ্চহি? অলজ্জী চ হোতি, বালো চ, অপকতত্তো চ, ভণ্ডনকাৰকো চ হোতি কলহকাৰকো, সিক্খায চ ন পৰিপূৰিকাৰী – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন ঠপেতব্বো’’তি.

৪৫৩. ‘‘কতিহি নু খো, ভন্তে, অঙ্গেহি সমন্নাগতেন ভিক্খুনা ভিক্খুনীনং ওৱাদো ন গহেতব্বো’’তি? ‘‘পঞ্চহুপালি, অঙ্গেহি সমন্নাগতেন ভিক্খুনা ভিক্খুনীনং ওৱাদো ন গহেতব্বো. কতমেহি পঞ্চহি? কাযিকেন অনাচাৰেন সমন্নাগতো হোতি, ৱাচসিকেন অনাচাৰেন সমন্নাগতো হোতি, কাযিকৱাচসিকেন অনাচাৰেন সমন্নাগতো হোতি, ভিক্খুনীনং অক্কোসকপৰিভাসকো হোতি, ভিক্খুনীহি সদ্ধিং সংসট্ঠো ৱিহৰতি অননুলোমিকেন সংসগ্গেন – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন গহেতব্বো.

‘‘অপৰেহিপি, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন গহেতব্বো. কতমেহি পঞ্চহি? অলজ্জী চ হোতি, বালো চ, অপকতত্তো চ, গমিকো ৱা হোতি, গিলানো ৱা – ইমেহি খো, উপালি, পঞ্চহঙ্গেহি সমন্নাগতেন ভিক্খুনা ভিক্খুনীনং ওৱাদো ন গহেতব্বো’’তি.

৪৫৪. ‘‘কতিহি নু খো, ভন্তে, অঙ্গেহি সমন্নাগতেন ভিক্খুনা সদ্ধিং ন সাকচ্ছিতব্বো’’তি? ‘‘পঞ্চহুপালি, অঙ্গেহি সমন্নাগতেন ভিক্খুনা সদ্ধিং ন সাকচ্ছিতব্বো. কতমেহি পঞ্চহি? ন অসেক্খেন সীলক্খন্ধেন সমন্নাগতো হোতি, ন অসেক্খেন সমাধিক্খন্ধেন সমন্নাগতো হোতি, ন অসেক্খেন পঞ্ঞাক্খন্ধেন সমন্নাগতো হোতি, ন অসেক্খেন ৱিমুত্তিক্খন্ধেন সমন্নাগতো হোতি, ন অসেক্খেন ৱিমুত্তিঞাণদস্সনক্খন্ধেন সমন্নাগতো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং ন সাকচ্ছিতব্বো. পঞ্চহুপালি, অঙ্গেহি সমন্নাগতেন ভিক্খুনা সদ্ধিং সাকচ্ছিতব্বো. কতমেহি পঞ্চহি? অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন সমন্নাগতো হোতি, অসেক্খেন পঞ্ঞাক্খন্ধেন সমন্নাগতো হোতি, অসেক্খেন ৱিমুত্তিক্খন্ধেন সমন্নাগতো হোতি, অসেক্খেন ৱিমুত্তিঞাণদস্সনক্খন্ধেন সমন্নাগতো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং সাকচ্ছিতব্বো.

‘‘অপৰেহিপি, উপালি, পঞ্চহঙ্গেহি সমন্নাগতেন ভিক্খুনা সদ্ধিং ন সাকচ্ছিতব্বো. কতমেহি পঞ্চহি? ন অত্থপটিসম্ভিদাপত্তো হোতি, ন ধম্মপটিসম্ভিদাপত্তো হোতি, ন নিৰুত্তিপটিসম্ভিদাপত্তো হোতি, ন পটিভানপটিসম্ভিদাপত্তো হোতি, যথাৱিমুত্তং চিত্তং ন পচ্চৱেক্খিতা – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং ন সাকচ্ছিতব্বো. পঞ্চহুপালি, অঙ্গেহি সমন্নাগতেন ভিক্খুনা সদ্ধিং সাকচ্ছিতব্বো. কতমেহি পঞ্চহি? অত্থপটিসম্ভিদাপত্তো হোতি, ধম্মপটিসম্ভিদাপত্তো হোতি, নিৰুত্তিপটিসম্ভিদাপত্তো হোতি, পটিভানপটিসম্ভিদাপত্তো হোতি, যথাৱিমুত্তং চিত্তং পচ্চৱেক্খিতা – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং সাকচ্ছিতব্বো’’তি.

ভিক্খুনোৱাদৱগ্গো নিট্ঠিতো অট্ঠমো.

তস্সুদ্দানং –

ভিক্খুনীহেৱ কাতব্বং, অপৰেহি তথা দুৱে;

ভিক্খুনীনং তযো কম্মা, ন ঠপেতব্বা দ্ৱে দুকা;

ন গহেতব্বা দ্ৱে ৱুত্তা, সাকচ্ছাসু চ দ্ৱে দুকাতি.