১৩. আৱাসিকৱগ্গো

৪৬১. ‘‘কতিহি নু খো, ভন্তে, অঙ্গেহি সমন্নাগতো আৱাসিকো ভিক্খু যথাভতং নিক্খিত্তো এৱং নিৰযে’’তি? ‘‘পঞ্চহুপালি, অঙ্গেহি সমন্নাগতো আৱাসিকো ভিক্খু যথাভতং নিক্খিত্তো এৱং নিৰযে. কতমেহি পঞ্চহি? ছন্দাগতিং গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি, সঙ্ঘিকং পুগ্গলিকপৰিভোগেন পৰিভুঞ্জতি – ইমেহি খো, উপালি, পঞ্চহঙ্গেহি সমন্নাগতো আৱাসিকো ভিক্খু যথাভতং নিক্খিত্তো এৱং নিৰযে.

‘‘পঞ্চহুপালি, অঙ্গেহি সমন্নাগতো আৱাসিকো ভিক্খু যথাভতং নিক্খিত্তো এৱং সগ্গে. কতমেহি পঞ্চহি? ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, সঙ্ঘিকং ন পুগ্গলিকপৰিভোগেন পৰিভুঞ্জতি – ইমেহি খো, উপালি, পঞ্চহঙ্গেহি সমন্নাগতো আৱাসিকো ভিক্খু যথাভতং নিক্খিত্তো এৱং সগ্গে’’তি.

৪৬২. ‘‘কতি নু খো, ভন্তে, অধম্মিকা ৱিনযব্যাকৰণা’’তি? ‘‘পঞ্চিমে, উপালি, অধম্মিকা ৱিনযব্যাকৰণা. কতমে পঞ্চ? ইধুপালি, ভিক্খু অধম্মং ধম্মোতি পৰিণামেতি, ধম্মং অধম্মোতি পৰিণামেতি, অৱিনযং ৱিনযোতি পৰিণামেতি, ৱিনযং অৱিনযোতি পৰিণামেতি, অপঞ্ঞত্তং পঞ্ঞাপেতি, পঞ্ঞত্তং সমুচ্ছিন্দতি – ইমে খো, উপালি, পঞ্চ অধম্মিকা ৱিনযব্যাকৰণা. পঞ্চিমে, উপালি, ধম্মিকা ৱিনযব্যাকৰণা. কতমে পঞ্চ? ইধুপালি, ভিক্খু অধম্মং অধম্মোতি পৰিণামেতি, ধম্মং ধম্মোতি পৰিণামেতি, অৱিনযং অৱিনযোতি পৰিণামেতি, ৱিনযং ৱিনযোতি পৰিণামেতি, অপঞ্ঞত্তং ন পঞ্ঞপেতি, পঞ্ঞত্তং ন সমুচ্ছিন্দতি – ইমে খো, উপালি, পঞ্চ ধম্মিকা ৱিনযব্যাকৰণা’’তি.

৪৬৩. [অ. নি. ৫.২৭২-২৮৫] ‘‘কতিহি নু খো, ভন্তে, অঙ্গেহি সমন্নাগতো ভত্তুদ্দেসকো যথাভতং নিক্খিত্তো এৱং নিৰযে’’তি? ‘‘পঞ্চহুপালি, অঙ্গেহি সমন্নাগতো ভত্তুদ্দেসকো যথাভতং নিক্খিত্তো এৱং নিৰযে. কতমেহি পঞ্চহি? ছন্দাগতিং গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি, উদ্দিট্ঠানুদ্দিট্ঠং ন জানাতি – ইমেহি খো, উপালি, পঞ্চহঙ্গেহি সমন্নাগতো ভত্তুদ্দেসকো যথাভতং নিক্খিত্তো এৱং নিৰযে.

[অ. নি. ৫.২৭২-২৮৫] ‘‘পঞ্চহুপালি, অঙ্গেহি সমন্নাগতো ভত্তুদ্দেসকো যথাভতং নিক্খিত্তো এৱং সগ্গে. কতমেহি পঞ্চহি? ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, উদ্দিট্ঠানুদ্দিট্ঠং জানাতি – ইমেহি খো, উপালি, পঞ্চহঙ্গেহি সমন্নাগতো ভত্তুদ্দেসকো যথাভতং নিক্খিত্তো এৱং সগ্গে’’তি.

৪৬৪. ‘‘কতিহি নু খো, ভন্তে, অঙ্গেহি সমন্নাগতো সেনাসনপঞ্ঞাপকো…পে… ভণ্ডাগাৰিকো…পে… চীৱৰপটিগ্গাহকো…পে… চীৱৰভাজকো…পে… যাগুভাজকো…পে… ফলভাজকো…পে… খজ্জভাজকো…পে… অপ্পমত্তকৱিস্সজ্জকো…পে… সাটিযগ্গাহাপকো…পে… পত্তগ্গাহাপকো…পে… আৰামিকপেসকো…পে… সামণেৰপেসকো যথাভতং নিক্খিত্তো এৱং নিৰযে’’তি? ‘‘পঞ্চহুপালি, অঙ্গেহি সমন্নাগতো সামণেৰপেসকো যথাভতং নিক্খিত্তো এৱং নিৰযে. কতমেহি পঞ্চহি? ছন্দাগতিং গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি, পেসিতাপেসিতং ন জানাতি – ইমেহি খো, উপালি, পঞ্চহঙ্গেহি সমন্নাগতো সামণেৰপেসকো যথাভতং নিক্খিত্তো এৱং নিৰযে. পঞ্চহুপালি, অঙ্গেহি সমন্নাগতো সামণেৰপেসকো যথাভতং নিক্খিত্তো এৱং সগ্গে. কতমেহি পঞ্চহি? ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, পেসিতাপেসিতং জানাতি – ইমেহি খো, উপালি, পঞ্চহঙ্গেহি সমন্নাগতো সামণেৰপেসকো যথাভতং নিক্খিত্তো এৱং সগ্গে’’তি.

আৱাসিকৱগ্গো নিট্ঠিতো তেৰসমো.

তস্সুদ্দানং –

আৱাসিকব্যাকৰণা, ভত্তুসেনাসনানি চ;

ভণ্ডচীৱৰগ্গাহো চ, চীৱৰস্স চ ভাজকো.

যাগু ফলং খজ্জকঞ্চ, অপ্পসাটিযগাহকো;

পত্তো আৰামিকো চেৱ, সামণেৰেন পেসকোতি.