১২. দুতিযসঙ্ঘভেদকৱগ্গো

৪৬০. ‘‘কতিহি নু খো, ভন্তে, অঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো’’তি? ‘‘পঞ্চহুপালি, অঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায দিট্ঠিং কম্মেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায দিট্ঠিং উদ্দেসেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায দিট্ঠিং ৱোহৰন্তো. ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায দিট্ঠিং অনুস্সাৱনেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায দিট্ঠিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায খন্তিং কম্মেন…পে… অৱিনিধায খন্তিং উদ্দেসেন…পে… অৱিনিধায খন্তিং ৱোহৰন্তো…পে… অৱিনিধায খন্তিং অনুস্সাৱনেন…পে… অৱিনিধায খন্তিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায ৰুচিং কম্মেন…পে… অৱিনিধায ৰুচিং উদ্দেসেন…পে… অৱিনিধায ৰুচিং ৱোহৰন্তো…পে… অৱিনিধায ৰুচিং অনুস্সাৱনেন…পে… অৱিনিধায ৰুচিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, অৱিনিধায সঞ্ঞং কম্মেন…পে… অৱিনিধায সঞ্ঞং উদ্দেসেন…পে… অৱিনিধায সঞ্ঞং ৱোহৰন্তো…পে… অৱিনিধায সঞ্ঞং অনুস্সাৱনেন…পে… অৱিনিধায সঞ্ঞং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো’’তি.

দুতিযসঙ্ঘভেদকৱগ্গো নিট্ঠিতো দ্ৱাদসমো.

তস্সুদ্দানং –

অৱিনিধায দিট্ঠিং কম্মেন, উদ্দেসে ৱোহৰেন চ;

অনুস্সাৱনে সলাকেন, পঞ্চেতে দিট্ঠিনিস্সিতা.

খন্তিং ৰুচিঞ্চ সঞ্ঞঞ্চ, তযো তে পঞ্চধা নযা.

হেট্ঠিমে কণ্হপক্খম্হি, সমৱীসতি ৱিধী যথা;

তথেৱ সুক্কপক্খম্হি, সমৱীসতি জানথাতি.