১১. সঙ্ঘভেদকৱগ্গো

৪৫৯. [চূড়ৱ. ৩৫৪-৩৫৫; অ. নি. ১০.৩৮ আদযো] ‘‘কতিহি নু খো, ভন্তে, অঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো’’তি? ‘‘পঞ্চহুপালি, অঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায দিট্ঠিং কম্মেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায দিট্ঠিং উদ্দেসেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায দিট্ঠি ৱোহৰন্তো – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায দিট্ঠিং অনুস্সাৱনেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায দিট্ঠিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায খন্তিং কম্মেন…পে… ৱিনিধায খন্তিং উদ্দেসেন…পে… ৱিনিধায খন্তিং ৱোহৰন্তো…পে… ৱিনিধায খন্তিং অনুস্সাৱনেন…পে… ৱিনিধায খন্তিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায ৰুচিং কম্মেন…পে… ৱিনিধায ৰুচিং উদ্দেসেন…পে… ৱিনিধায ৰুচিং ৱোহৰন্তো…পে… ৱিনিধায ৰুচিং অনুস্সাৱনেন…পে… ৱিনিধায ৰুচিং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো.

‘‘অপৰেহিপি, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো. কতমেহি পঞ্চহি? ইধুপালি, ভিক্খু অধম্মং ধম্মোতি দীপেতি, ধম্মং অধম্মোতি দীপেতি, অৱিনযং ৱিনযোতি দীপেতি, ৱিনযং অৱিনযোতি দীপেতি, ৱিনিধায সঞ্ঞং কম্মেন…পে… ৱিনিধায সঞ্ঞং উদ্দেসেন…পে… ৱিনিধায সঞ্ঞং ৱোহৰন্তো…পে… ৱিনিধায সঞ্ঞং অনুস্সাৱনেন…পে… ৱিনিধায সঞ্ঞং সলাকগ্গাহেন – ইমেহি খো, উপালি, পঞ্চহঙ্গেহি সমন্নাগতো সঙ্ঘভেদকো আপাযিকো নেৰযিকো কপ্পট্ঠো অতেকিচ্ছো’’তি.

সঙ্ঘভেদকৱগ্গো নিট্ঠিতো একাদসমো.

তস্সুদ্দানং –

ৱিনিধায দিট্ঠিং কম্মেন, উদ্দেসে ৱোহৰেন চ;

অনুস্সাৱনে সলাকেন, পঞ্চেতে দিট্ঠিনিস্সিতা;

খন্তিং ৰুচিঞ্চ সঞ্ঞঞ্চ, তযো তে পঞ্চধা নযাতি.