১. পাৰাজিককণ্ডং

২৪৯. কাযসংসগ্গং সাদিযনপচ্চযা কতি আপত্তিযো আপজ্জতি? কাযসংসগ্গং সাদিযনপচ্চযা পঞ্চ আপত্তিযো আপজ্জতি. অৱস্সুতা ভিক্খুনী অৱস্সুতস্স পুৰিসপুগ্গলস্স অধক্খকং উব্ভজাণুমণ্ডলং গহণং সাদিযতি, আপত্তি পাৰাজিকস্স; ভিক্খু কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স; অঙ্গুলিপতোদকে পাচিত্তিযং – কাযসংসগ্গং সাদিযনপচ্চযা ইমা পঞ্চ আপত্তিযো আপজ্জতি.

ৱজ্জপ্পটিচ্ছাদনপচ্চযা কতি আপত্তিযো আপজ্জতি? ৱজ্জপ্পটিচ্ছাদনপচ্চযা চতস্সো আপত্তিযো আপজ্জতি. ভিক্খুনী জানং পাৰাজিকং ধম্মং [ধম্মং অজ্ঝাপন্নং (স্যা.)] পটিচ্ছাদেতি, আপত্তি পাৰাজিকস্স; ৱেমতিকা পটিচ্ছাদেতি, আপত্তি থুল্লচ্চযস্স; ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স; আচাৰৱিপত্তিং পটিচ্ছাদেতি, আপত্তি দুক্কটস্স – ৱজ্জপ্পটিচ্ছাদনপচ্চযা ইমা চতস্সো আপত্তিযো আপজ্জতি.

যাৱততিযং সমনুভাসনায ন পটিনিস্সজ্জনপচ্চযা কতি আপত্তিযো আপজ্জতি? যাৱততিযং সমনুভাসনায ন পটিনিস্সজ্জনপচ্চযা পঞ্চ আপত্তিযো আপজ্জতি. উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জতি, ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি পাৰাজিকস্স; ভেদকানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জতি, আপত্তি সঙ্ঘাদিসেসস্স; পাপিকায দিট্ঠিযা যাৱততিযং সমনুভাসনায ন পটিনিস্সজ্জতি, আপত্তি পাচিত্তিযস্স – যাৱততিযং সমনুভাসনায ন পটিনিস্সজ্জনপচ্চযা ইমা পঞ্চ আপত্তিযো আপজ্জতি.

অট্ঠমং ৱত্থুং পৰিপূৰণপচ্চযা কতি আপত্তিযো আপজ্জতি? অট্ঠমং ৱত্থুং পৰিপূৰণপচ্চযা তিস্সো আপত্তিযো আপজ্জতি. পুৰিসেন – ‘‘ইত্থন্নামং ওকাসং আগচ্ছা’’তি ৱুত্তা গচ্ছতি, আপত্তি দুক্কটস্স; পুৰিসস্স হত্থপাসং ওক্কন্তমত্তে আপত্তি থুল্লচ্চযস্স; অট্ঠমং ৱত্থুং পৰিপূৰেতি, আপত্তি পাৰাজিকস্স – অট্ঠমং ৱত্থুং পৰিপূৰণপচ্চযা ইমা তিস্সো আপত্তিযো আপজ্জতি.

পাৰাজিকা নিট্ঠিতা.