২. সঙ্ঘাদিসেসকণ্ডাদি

২৫০. উস্সযৱাদিকা ভিক্খুনী অড্ডং কৰণপচ্চযা তিস্সো আপত্তিযো আপজ্জতি. একস্স আৰোচেতি, আপত্তি দুক্কটস্স; দুতিযস্স আৰোচেতি, আপত্তি থুল্লচ্চযস্স; অড্ডপৰিযোসানে আপত্তি সঙ্ঘাদিসেসস্স.

চোৰিং ৱুট্ঠাপনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

একা গামন্তৰং গমনপচ্চযা তিস্সো আপত্তিযো আপজ্জতি. গচ্ছতি, আপত্তি দুক্কটস্স; পঠমং পাদং পৰিক্খেপং অতিক্কামেতি, আপত্তি থুল্লচ্চযস্স; দুতিযং পাদং অতিক্কামেতি, আপত্তি সঙ্ঘাদিসেসস্স.

সমগ্গেন সঙ্ঘেন উক্খিত্তং ভিক্খুনিং ধম্মেন ৱিনযেন সত্থুসাসনেন অনপলোকেত্ৱা কাৰকসঙ্ঘং অনঞ্ঞায গণস্স ছন্দং ওসাৰণপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

অৱস্সুতা ভিক্খুনী অৱস্সুতস্স পুৰিসপুগ্গলস্স হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জনপচ্চযা তিস্সো আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স; অজ্ঝোহাৰে অজ্ঝোহাৰে আপত্তি সঙ্ঘাদিসেসস্স; উদকদন্তপোনং পটিগ্গণ্হাতি, আপত্তি দুক্কটস্স.

‘‘কিং তে, অয্যে, এসো পুৰিসপুগ্গলো কৰিস্সতি অৱস্সুতো ৱা অনৱস্সুতো ৱা, যতো ত্ৱং অনৱস্সুতা! ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা ভোজনীযং ৱা তং ত্ৱং সহত্থা পটিগ্গহেত্ৱা খাদ ৱা ভুঞ্জ ৱা’’তি, উয্যোজনপচ্চযা তিস্সো আপত্তিযো আপজ্জতি. তস্সা ৱচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি থুল্লচ্চযস্স; ভোজনপৰিযোসানে আপত্তি সঙ্ঘাদিসেসস্স.

কুপিতা ভিক্খুনী যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

কিস্মিঞ্চিদেৱ অধিকৰণে পচ্চাকতা ভিক্খুনী যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

সংসট্ঠা ভিক্খুনী যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

‘‘সংসট্ঠাৱ, অয্যে, তুম্হে ৱিহৰথ, মা তুম্হে নানা ৱিহৰিত্থা’’তি উয্যোজেন্তী যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

দস সঙ্ঘাদিসেসা নিট্ঠিতা…পে….

(যথা হেট্ঠা তথা ৱিত্থাৰেতব্বা পচ্চযমেৱ নানাকৰণং)

দধিং ৱিঞ্ঞাপেত্ৱা ভুঞ্জনপচ্চযা কতি আপত্তিযো আপজ্জতি? দধিং ৱিঞ্ঞাপেত্ৱা ভুঞ্জনপচ্চযা দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স – দধিং ৱিঞ্ঞাপেত্ৱা ভুঞ্জনপচ্চযা ইমা দ্ৱে আপত্তিযো আপজ্জতি.

কতাপত্তিৱাৰো নিট্ঠিতো দুতিযো.