২. কতাপত্তিৱাৰো

১. পাৰাজিককণ্ডং

২২৮. অৱস্সুতা ভিক্খুনী অৱস্সুতস্স পুৰিসপুগ্গলস্স কাযসংসগ্গং সাদিযন্তী কতি আপত্তিযো আপজ্জতি? অৱস্সুতা ভিক্খুনী অৱস্সুতস্স পুৰিসপুগ্গলস্স কাযসংসগ্গং সাদিযন্তী তিস্সো আপত্তিযো আপজ্জতি. অধক্খকং উব্ভজাণুমণ্ডলং গহণং সাদিযতি, আপত্তি পাৰাজিকস্স; উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স; কাযপটিবদ্ধং গহণং সাদিযতি, আপত্তি দুক্কটস্স – অৱস্সুতা ভিক্খুনী অৱস্সুতস্স পুৰিসপুগ্গলস্স কাযসংসগ্গং সাদিযন্তী ইমা তিস্সো আপত্তিযো আপজ্জতি.

ৱজ্জপ্পটিচ্ছাদিকা ভিক্খুনী ৱজ্জং পটিচ্ছাদেন্তী কতি আপত্তিযো আপজ্জতি? ৱজ্জপ্পটিচ্ছাদিকা ভিক্খুনী ৱজ্জং পটিচ্ছাদেন্তী তিস্সো আপত্তিযো আপজ্জতি. জানং পাৰাজিকং ধম্মং পটিচ্ছাদেতি, আপত্তি পাৰাজিকস্স; ৱেমতিকা পটিচ্ছাদেতি, আপত্তি থুল্লচ্চযস্স; আচাৰৱিপত্তিং পটিচ্ছাদেতি, আপত্তি দুক্কটস্স – ৱজ্জপ্পটিচ্ছাদিকা ভিক্খুনী ৱজ্জং পটিচ্ছাদেন্তী ইমা তিস্সো আপত্তিযো আপজ্জতি.

উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জন্তী কতি আপত্তিযো আপজ্জতি? উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি পাৰাজিকস্স – উক্খিত্তানুৱত্তিকা ভিক্খুনী যাৱততিযং সমনুভাসনায ন পটিনিস্সজ্জন্তী ইমা তিস্সো আপত্তিযো আপজ্জতি.

অট্ঠমং ৱত্থুং পৰিপূৰেন্তী কতি আপত্তিযো আপজ্জতি? অট্ঠমং ৱত্থুং পৰিপূৰেন্তী তিস্সো আপত্তিযো আপজ্জতি. পুৰিসেন – ‘‘ইত্থন্নামং ওকাসং [ইত্থন্নামং গহনং (সী.), ইত্থন্নামং গব্ভং (স্যা.)] আগচ্ছা’’তি ৱুত্তা গচ্ছতি, আপত্তি দুক্কটস্স; পুৰিসস্স হত্থপাসং ওক্কন্তমত্তে আপত্তি থুল্লচ্চযস্স; অট্ঠমং ৱত্থুং পৰিপূৰেতি, আপত্তি পাৰাজিকস্স – অট্ঠমং ৱত্থুং পৰিপূৰেন্তী ইমা তিস্সো আপত্তিযো আপজ্জতি.

পাৰাজিকা নিট্ঠিতা.

২. সঙ্ঘাদিসেসকণ্ডং

২২৯. উস্সযৱাদিকা ভিক্খুনী অড্ডং কৰোন্তী তিস্সো আপত্তিযো আপজ্জতি. একস্স আৰোচেতি, আপত্তি দুক্কটস্স; দুতিযস্স আৰোচেতি, আপত্তি থুল্লচ্চযস্স; অড্ডপৰিযোসানে আপত্তি সঙ্ঘাদিসেসস্স.

চোৰিং ৱুট্ঠাপেন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

একা গামন্তৰং গচ্ছন্তী তিস্সো আপত্তিযো আপজ্জতি. গচ্ছতি, আপত্তি দুক্কটস্স; পঠমং পাদং পৰিক্খেপং অতিক্কামেতি, আপত্তি থুল্লচ্চযস্স; দুতিযং পাদং অতিক্কামেতি, আপত্তি সঙ্ঘাদিসেসস্স.

সমগ্গেন সঙ্ঘেন উক্খিত্তং ভিক্খুনিং ধম্মেন ৱিনযেন সত্থুসাসনেন অনপলোকেত্ৱা কাৰকসঙ্ঘং অনঞ্ঞায গণস্স ছন্দং ওসাৰেন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

অৱস্সুতা ভিক্খুনী অৱস্সুতস্স পুৰিসপুগ্গলস্স হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তী তিস্সো আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স; অজ্ঝোহাৰে অজ্ঝোহাৰে আপত্তি সঙ্ঘাদিসেসস্স; উদকদন্তপোনং পটিগ্গণ্হাতি, আপত্তি দুক্কটস্স.

‘‘কিং তে, অয্যে, এসো পুৰিসপুগ্গলো কৰিস্সতি অৱস্সুতো ৱা অনৱস্সুতো ৱা, যতো ত্ৱং অনৱস্সুতা! ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা ভোজনীযং ৱা, তং ত্ৱং সহত্থা পটিগ্গহেত্ৱা খাদ ৱা ভুঞ্জ ৱা’’তি উয্যোজেন্তী তিস্সো আপত্তিযো আপজ্জতি. তস্সা ৱচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি থুল্লচ্চযস্স; ভোজনপৰিযোসানে আপত্তি সঙ্ঘাদিসেসস্স.

কুপিতা ভিক্খুনী যাৱততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

কিস্মিঞ্চিদেৱ অধিকৰণে পচ্চাকতা ভিক্খুনী যাৱততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

সংসট্ঠা ভিক্খুনিযো যাৱততিযং সমনুভাসনায ন পটিনিস্সজ্জন্তিযো তিস্সো আপত্তিযো আপজ্জন্তি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

‘‘সংসট্ঠাৱ, অয্যে, তুম্হে ৱিহৰথ. মা তুম্হে নানা ৱিহৰিত্থা’’তি উয্যোজেন্তী যাৱততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

সঙ্ঘাদিসেসা নিট্ঠিতা.

৩. নিস্সগ্গিযকণ্ডং

২৩০. পত্তসন্নিচযং কৰোন্তী একং আপত্তিং আপজ্জতি. নিস্সগ্গিযং পাচিত্তিযং.

অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেন্তী দ্ৱে আপত্তিযো আপজ্জতি. ভাজাপেতি, পযোগে দুক্কটং; ভাজাপিতে নিস্সগ্গিযং পাচিত্তিযং.

ভিক্খুনিযা সদ্ধিং চীৱৰং পৰিৱত্তেত্ৱা অচ্ছিন্দন্তী দ্ৱে আপত্তিযো আপজ্জতি. অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং.

অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেন্তী দ্ৱে আপত্তিযো আপজ্জতি. ৱিঞ্ঞাপেতি, পযোগে দুক্কটং; ৱিঞ্ঞাপিতে নিস্সগ্গিযং পাচিত্তিযং.

অঞ্ঞং চেতাপেত্ৱা অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকে পৰিক্খাৰেন অঞ্ঞুদ্দিসিকেন সঙ্ঘিকেন সংযাচিকেন অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সংযাচিকেন অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পৰিক্খাৰেন অঞ্ঞুদ্দিসিকে পুগ্গলিকেন সংযাচিকেন অঞ্ঞং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অতিৰেকচতুক্কংসপৰমং গৰুপাৱুৰণং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অতিৰেকঅড্ঢতেয্যকংসপৰমং লহুপাৱুৰণং চেতাপেন্তী দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

নিস্সগ্গিযা পাচিত্তিযা নিট্ঠিতা.

৪. পাচিত্তিযকণ্ডং

১. লসুণৱগ্গো

২৩১. লসুণং খাদন্তী দ্ৱে আপত্তিযো আপজ্জতি. খাদিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

সম্বাধে লোমং সংহৰাপেন্তী দ্ৱে আপত্তিযো আপজ্জতি. সংহৰাপেতি, পযোগে দুক্কটং; সংহৰাপিতে আপত্তি পাচিত্তিযস্স.

তলঘাতকং কৰোন্তী দ্ৱে আপত্তিযো আপজ্জতি. কৰোতি, পযোগে দুক্কটং; কতে আপত্তি পাচিত্তিযস্স.

জতুমট্ঠকং আদিযন্তী দ্ৱে আপত্তিযো আপজ্জতি. আদিযতি, পযোগে দুক্কটং, আদিন্নে আপত্তি পাচিত্তিযস্স.

অতিৰেকদ্ৱঙ্গুলপব্বপৰমং উদকসুদ্ধিকং আদিযন্তী দ্ৱে আপত্তিযো আপজ্জতি. আদিযতি, পযোগে দুক্কটং; আদিন্নে আপত্তি পাচিত্তিযস্স.

ভিক্খুস্স ভুঞ্জন্তস্স পানীযেন ৱা ৱিধূপনেন ৱা উপতিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

আমকধঞ্ঞং ৱিঞ্ঞাপেত্ৱা ভুঞ্জন্তী দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা তিৰোকুট্টে ৱা তিৰোপাকাৰে ৱা ছড্ডেন্তী দ্ৱে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা হৰিতে ছড্ডেন্তী দ্ৱে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

নচ্চং ৱা গীতং ৱা ৱাদিতং ৱা দস্সনায গচ্ছন্তী দ্ৱে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি ৱা সুণাতি ৱা, আপত্তি পাচিত্তিযস্স.

লসুণৱগ্গো পঠমো.

২. ৰত্তন্ধকাৰৱগ্গো

২৩২. ৰত্তন্ধকাৰে অপ্পদীপে পুৰিসেন সদ্ধিং একেনেকা সন্তিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

পটিচ্ছন্নে ওকাসে পুৰিসেন সদ্ধিং একেনেকা সন্তিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

অজ্ঝোকাসে পুৰিসেন সদ্ধিং একেনেকা সন্তিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

ৰথিকায ৱা ব্যূহে ৱা সিঙ্ঘাটকে ৱা পুৰিসেন সদ্ধিং একেনেকা সন্তিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

পুৰেভত্তং কুলানি উপসঙ্কমিত্ৱা আসনে নিসীদিত্ৱা সামিকে অনাপুচ্ছা পক্কমন্তী দ্ৱে আপত্তিযো আপজ্জতি. পঠমং পাদং অনোৱস্সকং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

পচ্ছাভত্তং কুলানি উপসঙ্কমিত্ৱা সামিকে অনাপুচ্ছা আসনে নিসীদন্তী দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

ৱিকালে কুলানি উপসঙ্কমিত্ৱা সামিকে অনাপুচ্ছা সেয্যং সন্থৰিত্ৱা ৱা সন্থৰাপেত্ৱা ৱা অভিনিসীদন্তী দ্ৱে আপত্তিযো আপজ্জতি. অভিনিসীদতি, পযোগে দুক্কটং; অভিনিসিন্নে আপত্তি পাচিত্তিযস্স.

দুগ্গহিতেন দূপধাৰিতেন পৰং উজ্ঝাপেন্তী দ্ৱে আপত্তিযো আপজ্জতি. উজ্ঝাপেতি, পযোগে দুক্কটং; উজ্ঝাপিতে আপত্তি পাচিত্তিযস্স.

অত্তানং ৱা পৰং ৱা নিৰযেন ৱা ব্ৰহ্মচৰিযেন ৱা অভিসপন্তী দ্ৱে আপত্তিযো আপজ্জতি. অভিসপতি, পযোগে দুক্কটং; অভিসপিতে আপত্তি পাচিত্তিযস্স.

অত্তানং ৱধিত্ৱা ৱধিত্ৱা ৰোদন্তী দ্ৱে আপত্তিযো আপজ্জতি. ৱধতি ৰোদতি, আপত্তি পাচিত্তিযস্স; ৱধতি ন ৰোদতি, আপত্তি দুক্কটস্স.

ৰত্তন্ধকাৰৱগ্গো দুতিযো.

৩. নহানৱগ্গো

২৩৩. নগ্গা নহাযন্তী দ্ৱে আপত্তিযো আপজ্জতি. নহাযতি, পযোগে দুক্কটং; নহানপৰিযোসানে আপত্তি পাচিত্তিযস্স.

পমাণাতিক্কন্তং উদকসাটিকং কাৰাপেন্তী দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে, আপত্তি পাচিত্তিযস্স.

ভিক্খুনিযা চীৱৰং ৱিসিব্বেত্ৱা ৱা ৱিসিব্বাপেত্ৱা ৱা নেৱ সিব্বেন্তী ন সিব্বাপনায উস্সুক্কং কৰোন্তী একং আপত্তিং আপজ্জতি. পাচিত্তিযং.

পঞ্চাহিকং সঙ্ঘাটিচাৰং অতিক্কামেন্তী একং আপত্তিং আপজ্জতি. পাচিত্তিযং. চীৱৰসঙ্কমনীযং ধাৰেন্তী দ্ৱে আপত্তিযো আপজ্জতি. ধাৰেতি, পযোগে দুক্কটং; ধাৰিতে, আপত্তি পাচিত্তিযস্স.

গণস্স চীৱৰলাভং অন্তৰাযং কৰোন্তী দ্ৱে আপত্তিযো আপজ্জতি. কৰোতি, পযোগে দুক্কটং; কতে, আপত্তি পাচিত্তিযস্স.

ধম্মিকং চীৱৰৱিভঙ্গং পটিবাহন্তী দ্ৱে আপত্তিযো আপজ্জতি. পটিবাহতি, পযোগে দুক্কটং; পটিবাহিতে, আপত্তি পাচিত্তিযস্স.

অগাৰিকস্স ৱা পৰিব্বাজকস্স ৱা পৰিব্বাজিকায ৱা সমণচীৱৰং দেন্তী দ্ৱে আপত্তিযো আপজ্জতি. দেতি, পযোগে দুক্কটং; দিন্নে, আপত্তি পাচিত্তিযস্স.

দুব্বলচীৱৰপচ্চাসা চীৱৰকালসমযং অতিক্কামেন্তী দ্ৱে আপত্তিযো আপজ্জতি. অতিক্কামেতি, পযোগে দুক্কটং; অতিক্কামিতে, আপত্তি পাচিত্তিযস্স.

ধম্মিকং কথিনুদ্ধাৰং পটিবাহন্তী দ্ৱে আপত্তিযো আপজ্জতি. পটিবাহতি, পযোগে দুক্কটং; পটিবাহিতে, আপত্তি পাচিত্তিযস্স.

নহানৱগ্গো ততিযো.

৪. তুৱট্টৱগ্গো

২৩৪. দ্ৱে ভিক্খুনিযো একমঞ্চে তুৱট্টেন্তিযো দ্ৱে আপত্তিযো আপজ্জন্তি. নিপজ্জন্তি, পযোগে দুক্কটং; নিপন্নে, আপত্তি পাচিত্তিযস্স.

দ্ৱে ভিক্খুনিযো একত্থৰণপাৱুৰণা তুৱট্টেন্তিযো দ্ৱে আপত্তিযো আপজ্জন্তি. নিপজ্জন্তি, পযোগে দুক্কটং; নিপন্নে, আপত্তি পাচিত্তিযস্স.

ভিক্খুনিযা সঞ্চিচ্চ অফাসুং কৰোন্তী দ্ৱে আপত্তিযো আপজ্জতি. কৰোতি, পযোগে দুক্কটং; কতে, আপত্তি পাচিত্তিযস্স.

দুক্খিতং সহজীৱিনিং নেৱ উপট্ঠেন্তী ন উপট্ঠাপনায উস্সুক্কং কৰোন্তী একং আপত্তিং আপজ্জতি. পাচিত্তিযং.

ভিক্খুনিযা উপস্সযং দত্ৱা কুপিতা অনত্তমনা নিক্কড্ঢন্তী দ্ৱে আপত্তিযো আপজ্জতি. নিক্কড্ঢতি, পযোগে দুক্কটং; নিক্কড্ঢিতে, আপত্তি পাচিত্তিযস্স.

সংসট্ঠা ভিক্খুনী যাৱততিযং সমনুভাসনায ন পটিনিস্সজ্জন্তী দ্ৱে আপত্তিযো আপজ্জতি. ঞত্তিযা দুক্কটং; কম্মৱাচাপৰিযোসানে আপত্তি পাচিত্তিযস্স.

অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তী দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তী দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

অন্তোৱস্সং চাৰিকং চৰন্তী দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

ৱস্সংৱুট্ঠা ভিক্খুনী চাৰিকং ন পক্কমন্তী একং আপত্তিং আপজ্জতি. পাচিত্তিযং.

তুৱট্টৱগ্গো চতুত্থো.

৫. চিত্তাগাৰৱগ্গো

২৩৫. ৰাজাগাৰং ৱা চিত্তাগাৰং ৱা আৰামং ৱা উয্যানং ৱা পোক্খৰণিং ৱা দস্সনায গচ্ছন্তী দ্ৱে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি, আপত্তি পাচিত্তিযস্স.

আসন্দিং ৱা পল্লঙ্কং ৱা পৰিভুঞ্জন্তী দ্ৱে আপত্তিযো আপজ্জতি. পৰিভুঞ্জতি, পযোগে দুক্কটং; পৰিভুত্তে, আপত্তি পাচিত্তিযস্স.

সুত্তং কন্তন্তী দ্ৱে আপত্তিযো আপজ্জতি. কন্ততি, পযোগে দুক্কটং; উজ্জৱুজ্জৱে, আপত্তি পাচিত্তিযস্স.

গিহিৱেয্যাৱচ্চং কৰোন্তী দ্ৱে আপত্তিযো আপজ্জতি. কৰোতি, পযোগে দুক্কটং; কতে, আপত্তি পাচিত্তিযস্স.

ভিক্খুনিযা – ‘‘এহায্যে ইমং অধিকৰণং ৱূপসমেহী’’তি ৱুচ্চমানা – ‘‘সাধূ’’তি পটিস্সুণিত্ৱা নেৱ ৱূপসমেন্তী ন ৱূপসমায উস্সুক্কং কৰোন্তী একং আপত্তিং আপজ্জতি. পাচিত্তিযং.

অগাৰিকস্স ৱা পৰিব্বাজকস্স ৱা পৰিব্বাজিকায ৱা সহত্থা খাদনীযং ৱা ভোজনীযং ৱা দেন্তী দ্ৱে আপত্তিযো আপজ্জতি. দেতি, পযোগে দুক্কটং; দিন্নে, আপত্তি পাচিত্তিযস্স.

আৱসথচীৱৰং অনিস্সজ্জিত্ৱা পৰিভুঞ্জন্তী দ্ৱে আপত্তিযো আপজ্জতি. পৰিভুঞ্জতি, পযোগে দুক্কটং; পৰিভুত্তে, আপত্তি পাচিত্তিযস্স.

আৱসথং অনিস্সজ্জিত্ৱা চাৰিকং পক্কমন্তী দ্ৱে আপত্তিযো আপজ্জতি. পঠমং পাদং পৰিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

তিৰচ্ছানৱিজ্জং পৰিযাপুণন্তী দ্ৱে আপত্তিযো আপজ্জতি. পৰিযাপুণাতি, পযোগে দুক্কটং; পদে পদে আপত্তি পাচিত্তিযস্স.

তিৰচ্ছানৱিজ্জং ৱাচেন্তী দ্ৱে আপত্তিযো আপজ্জতি. ৱাচেতি, পযোগে দুক্কটং; পদে পদে আপত্তি পাচিত্তিযস্স.

চিত্তাগাৰৱগ্গো পঞ্চমো.

৬. আৰামৱগ্গো

২৩৬. জানং সভিক্খুকং আৰামং অনাপুচ্ছা পৱিসন্তী দ্ৱে আপত্তিযো আপজ্জতি. পঠমং পাদং পৰিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ভিক্খুং অক্কোসন্তী পৰিভাসন্তী দ্ৱে আপত্তিযো আপজ্জতি. অক্কোসতি, পযোগে দুক্কটং; অক্কোসিতে, আপত্তি পাচিত্তিযস্স.

চণ্ডীকতা গণং পৰিভাসন্তী দ্ৱে আপত্তিযো আপজ্জতি. পৰিভাসতি, পযোগে দুক্কটং; পৰিভাসিতে, আপত্তি পাচিত্তিযস্স.

নিমন্তিতা ৱা পৱাৰিতা ৱা খাদনীযং ৱা ভোজনীযং ৱা ভুঞ্জন্তী দ্ৱে আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

কুলং মচ্ছৰাযন্তী দ্ৱে আপত্তিযো আপজ্জতি. মচ্ছৰাযতি, পযোগে দুক্কটং; মচ্ছৰিতে, আপত্তি পাচিত্তিযস্স.

অভিক্খুকে আৱাসে ৱস্সং ৱসন্তী দ্ৱে আপত্তিযো আপজ্জতি. ‘‘ৱস্সং ৱসিস্সামী’’তি সেনাসনং পঞ্ঞপেতি পানীযং পৰিভোজনীযং উপট্ঠপেতি পৰিৱেণং সম্মজ্জতি, আপত্তি দুক্কটস্স; সহ অৰুণুগ্গমনা আপত্তি পাচিত্তিযস্স.

ৱস্সংৱুট্ঠা ভিক্খুনী উভতোসঙ্ঘে তীহি ঠানেহি ন পৱাৰেন্তী একং আপত্তিং আপজ্জতি. পাচিত্তিযং.

ওৱাদায ৱা সংৱাসায ৱা ন গচ্ছন্তী একং আপত্তিং আপজ্জতি. পাচিত্তিযং.

উপোসথম্পি ন পুচ্ছন্তী ওৱাদম্পি ন যাচন্তী একং আপত্তিং আপজ্জতি. পাচিত্তিযং.

পসাখে জাতং গণ্ডং ৱা ৰুধিতং ৱা অনপলোকেত্ৱা সঙ্ঘং ৱা গণং ৱা পুৰিসেন সদ্ধিং একেনেকা ভেদাপেন্তী দ্ৱে আপত্তিযো আপজ্জতি. ভেদাপেতি, পযোগে দুক্কটং; ভিন্নে, আপত্তি পাচিত্তিযস্স.

আৰামৱগ্গো ছট্ঠো.

৭. গব্ভিনীৱগ্গো

২৩৭. গব্ভিনিং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পাযন্তিং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

দ্ৱে ৱস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

ঊনদ্ৱাদসৱস্সং গিহিগতং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হন্তী নানুগ্গণ্হাপেন্তী একং আপত্তিং আপজ্জতি. পাচিত্তিযং.

ৱুট্ঠাপিতং পৱত্তিনিং দ্ৱে ৱস্সানি নানুবন্ধন্তী একং আপত্তিং আপজ্জতি. পাচিত্তিযং.

সহজীৱিনিং ৱুট্ঠাপেত্ৱা নেৱ ৱূপকাসেন্তী ন ৱূপকাসাপেন্তী একং আপত্তিং আপজ্জতি. পাচিত্তিযং.

গব্ভিনীৱগ্গো সত্তমো.

৮. কুমাৰীভূতৱগ্গো

২৩৮. ঊনৱীসতিৱস্সং কুমাৰিভূতং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু অসিক্খিতসিক্খং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পৰিপুণ্ণৱীসতিৱস্সং কুমাৰিভূতং দ্ৱে ৱস্সানি ছসু ধম্মেসু সিক্খিতসিক্খং সঙ্ঘেন অসম্মতং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

ঊনদ্ৱাদসৱস্সা ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

‘‘অলং তাৱ তে, অয্যে, ৱুট্ঠাপিতেনা’’তি ৱুচ্চমানা ‘‘সাধূ’’তি পটিস্সুণিত্ৱা পচ্ছা খীযনধম্মং আপজ্জন্তী দ্ৱে আপত্তিযো আপজ্জতি. খিয্যতি, পযোগে দুক্কটং; খিয্যিতে, আপত্তি পাচিত্তিযস্স.

সিক্খমানং – ‘‘সচে মে ত্ৱং, অয্যে, চীৱৰং দস্সসি, এৱাহং তং ৱুট্ঠাপেস্সামী’’তি ৱত্ৱা নেৱ ৱুট্ঠাপেন্তী ন ৱুট্ঠাপনায উস্সুক্কং কৰোন্তী একং আপত্তিং আপজ্জতি. পাচিত্তিযং.

সিক্খমানং – ‘‘সচে মং ত্ৱং, অয্যে, দ্ৱে ৱস্সানি অনুবন্ধিস্সসি, এৱাহং তং ৱুট্ঠাপেস্সামী’’তি ৱত্ৱা নেৱ ৱুট্ঠাপেন্তী ন ৱুট্ঠাপনায উস্সুক্কং কৰোন্তী একং আপত্তিং আপজ্জতি. পাচিত্তিযং.

পুৰিসসংসট্ঠং কুমাৰকসংসট্ঠং চণ্ডিং সোকাৱাসং সিক্খমানং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

মাতাপিতূহি ৱা সামিকেন ৱা অননুঞ্ঞাতং সিক্খমানং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

পাৰিৱাসিকছন্দদানে সিক্খমানং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

অনুৱস্সং ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

একং ৱস্সং দ্ৱে ৱুট্ঠাপেন্তী দ্ৱে আপত্তিযো আপজ্জতি. ৱুট্ঠাপেতি, পযোগে দুক্কটং; ৱুট্ঠাপিতে, আপত্তি পাচিত্তিযস্স.

কুমাৰীভূতৱগ্গো অট্ঠমো.

৯. ছত্তুপাহনৱগ্গো

২৩৯. ছত্তুপাহনং ধাৰেন্তী দ্ৱে আপত্তিযো আপজ্জতি. ধাৰেতি, পযোগে দুক্কটং; ধাৰিতে, আপত্তি পাচিত্তিযস্স.

যানেন যাযন্তী দ্ৱে আপত্তিযো আপজ্জতি. যাযতি, পযোগে দুক্কটং; যাযিতে, আপত্তি পাচিত্তিযস্স.

সঙ্ঘাণিং ধাৰেন্তী দ্ৱে আপত্তিযো আপজ্জতি. ধাৰেতি, পযোগে দুক্কটং; ধাৰিতে, আপত্তি পাচিত্তিযস্স.

ইত্থালঙ্কাৰং ধাৰেন্তী দ্ৱে আপত্তিযো আপজ্জতি. ধাৰেতি, পযোগে দুক্কটং; ধাৰিতে, আপত্তি পাচিত্তিযস্স.

গন্ধৱণ্ণকেন নহাযন্তী দ্ৱে আপত্তিযো আপজ্জতি. নহাযতি, পযোগে দুক্কটং; নহানপৰিযোসানে, আপত্তি পাচিত্তিযস্স.

ৱাসিতকেন পিঞ্ঞাকেন নহাযন্তী দ্ৱে আপত্তিযো আপজ্জতি. নহাযতি, পযোগে দুক্কটং; নহানপৰিযোসানে, আপত্তি পাচিত্তিযস্স.

ভিক্খুনিযা উম্মদ্দাপেন্তী পৰিমদ্দাপেন্তী দ্ৱে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

সিক্খমানায উম্মদ্দাপেন্তী পৰিমদ্দাপেন্তী দ্ৱে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

সামণেৰিযা উম্মদ্দাপেন্তী পৰিমদ্দাপেন্তী দ্ৱে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

গিহিনিযা উম্মদ্দাপেন্তী পৰিমদ্দাপেন্তী দ্ৱে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

ভিক্খুস্স পুৰতো অনাপুচ্ছা আসনে নিসীদন্তী দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে, আপত্তি পাচিত্তিযস্স.

অনোকাসকতং ভিক্খুং পঞ্হং পুচ্ছন্তী দ্ৱে আপত্তিযো আপজ্জতি. পুচ্ছতি, পযোগে দুক্কটং; পুচ্ছিতে, আপত্তি পাচিত্তিযস্স.

অসঙ্কচ্চিকা গামং পৱিসন্তী দ্ৱে আপত্তিযো আপজ্জতি. পঠমং পাদং পৰিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ছত্তুপাহনৱগ্গো নৱমো.

খুদ্দকং নিট্ঠিতং.

৫. পাটিদেসনীযকণ্ডং

২৪০. সপ্পিং ৱিঞ্ঞাপেত্ৱা ভুঞ্জন্তী দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স.