সমুট্ঠানসীসসঙ্খেপো

সমুট্ঠানস্সুদ্দানং

২৫৭. অনিচ্চা সব্বে সঙ্খাৰা, দুক্খানত্তা চ সঙ্খতা;

নিব্বানঞ্চেৱ পঞ্ঞত্তি, অনত্তা ইতি নিচ্ছযা.

বুদ্ধচন্দে অনুপ্পন্নে, বুদ্ধাদিচ্চে অনুগ্গতে;

তেসং সভাগধম্মানং, নামমত্তং ন নাযতি.

দুক্কৰং ৱিৱিধং কত্ৱা, পূৰযিত্ৱান পাৰমী;

উপ্পজ্জন্তি মহাৱীৰা, চক্খুভূতা সব্ৰহ্মকে.

তে দেসযন্তি সদ্ধম্মং, দুক্খহানিং সুখাৱহং;

অঙ্গীৰসো সক্যমুনি, সব্বভূতানুকম্পকো.

সব্বসত্তুত্তমো সীহো, পিটকে তীণি দেসযি;

সুত্তন্তমভিধম্মঞ্চ, ৱিনযঞ্চ মহাগুণং.

এৱং নীযতি সদ্ধম্মো, ৱিনযো যদি তিট্ঠতি;

উভতো চ ৱিভঙ্গানি, খন্ধকা যা চ মাতিকা.

মালা সুত্তগুণেনেৱ, পৰিৱাৰেন গন্থিতা;

তস্সেৱ পৰিৱাৰস্স, সমুট্ঠানং নিযতো কতং.

সম্ভেদং নিদানং চঞ্ঞং, সুত্তে দিস্সন্তি উপৰি;

তস্মা সিক্খে পৰিৱাৰং, ধম্মকামো সুপেসলোতি.

তেৰসসমুট্ঠানং

ৱিভঙ্গে দ্ৱীসু পঞ্ঞত্তং, উদ্দিসন্তি উপোসথে;

পৱক্খামি সমুট্ঠানং, যথাঞাযং সুণাথ মে.

পাৰাজিকং যং পঠমং, দুতিযঞ্চ ততো পৰং;

সঞ্চৰিত্তানুভাসনঞ্চ, অতিৰেকঞ্চ চীৱৰং.

লোমানি পদসোধম্মো, ভূতং সংৱিধানেন চ;

থেয্যদেসনচোৰী চ, অননুঞ্ঞাতায তেৰস.

তেৰসেতে সমুট্ঠান নযা, ৱিঞ্ঞূহি চিন্তিতা.

একেকস্মিং সমুট্ঠানে, সদিসা ইধ দিস্সৰে.

১. পঠমপাৰাজিকসমুট্ঠানং

২৫৮. মেথুনং সুক্কসংসগ্গো, অনিযতা পঠমিকা;

পুব্বূপপৰিপাচিতা, ৰহো ভিক্খুনিযা সহ.

সভোজনে ৰহো দ্ৱে চ, অঙ্গুলি উদকে হসং;

পহাৰে উগ্গিৰে চেৱ, তেপঞ্ঞাসা চ সেখিযা.

অধক্খগামাৱস্সুতা, তলমট্ঠঞ্চ সুদ্ধিকা;

ৱস্সংৱুট্ঠা চ ওৱাদং, নানুবন্ধে পৱত্তিনিং.

ছসত্ততি ইমে সিক্খা, কাযমানসিকা কতা;

সব্বে একসমুট্ঠানা, পঠমং পাৰাজিকং যথা.

পঠমপাৰাজিকসমুট্ঠানং নিট্ঠিতং.

২. দুতিযপাৰাজিকসমুট্ঠানং

২৫৯. অদিন্নং ৱিগ্গহুত্তৰি, দুট্ঠুল্লা অত্তকামিনং;

অমূলা অঞ্ঞভাগিযা, অনিযতা দুতিযিকা.

অচ্ছিন্দে পৰিণামনে, মুসা ওমসপেসুণা;

দুট্ঠুল্লা পথৱীখণে, ভূতং অঞ্ঞায উজ্ঝাপে.

নিক্কড্ঢনং সিঞ্চনঞ্চ, আমিসহেতু ভুত্তাৱী;

এহি অনাদৰি ভিংসা, অপনিধে চ জীৱিতং.

জানং সপ্পাণকং কম্মং, ঊনসংৱাসনাসনা;

সহধম্মিকৱিলেখা, মোহো অমূলকেন চ.

কুক্কুচ্চং ধম্মিকং চীৱৰং, দত্ৱা [কুক্কুচ্চং ধম্মিকং চীৱৰং (সী.), কুক্কুচ্চং ধম্মিকং দত্ৱা (স্যা.)] পৰিণামেয্য পুগ্গলে;

কিং তে অকালং অচ্ছিন্দে, দুগ্গহী নিৰযেন চ.

গণং ৱিভঙ্গং দুব্বলং, কথিনাফাসুপস্সযং;

অক্কোসচণ্ডী মচ্ছৰী, গব্ভিনী চ পাযন্তিযা.

দ্ৱেৱস্সং সিক্খা সঙ্ঘেন, তযো চেৱ গিহীগতা;

কুমাৰিভূতা তিস্সো চ, ঊনদ্ৱাদসসম্মতা.

অলং তাৱ সোকাৱাসং, ছন্দা অনুৱস্সা চ দ্ৱে;

সিক্খাপদা সত্ততিমে, সমুট্ঠানা তিকা কতা.

কাযচিত্তেন ন ৱাচা, ৱাচাচিত্তং ন কাযিকং;

তীহি দ্ৱাৰেহি জাযন্তি, পাৰাজিকং দুতিযং যথা.

দুতিযপাৰাজিকসমুট্ঠানং নিট্ঠিতং.

৩. সঞ্চৰিত্তসমুট্ঠানং

২৬০. সঞ্চৰী কুটি ৱিহাৰো, ধোৱনঞ্চ পটিগ্গহো;

ৱিঞ্ঞত্তুত্তৰি অভিহট্ঠুং, উভিন্নং দূতকেন চ.

কোসিযা সুদ্ধদ্ৱেভাগা, ছব্বস্সানি নিসীদনং;

ৰিঞ্চন্তি ৰূপিকা চেৱ, উভো নানপ্পকাৰকা.

ঊনবন্ধনৱস্সিকা, সুত্তং ৱিকপ্পনেন চ;

দ্ৱাৰদানসিব্বানি [দ্ৱাৰদানসিব্বিনী (সী. স্যা.)] চ, পূৱপচ্চযজোতি চ.

ৰতনং সূচি মঞ্চো চ, তূলং নিসীদনকণ্ডু চ;

ৱস্সিকা চ সুগতেন, ৱিঞ্ঞত্তি অঞ্ঞং চেতাপনা.

দ্ৱে সঙ্ঘিকা মহাজনিকা, দ্ৱে পুগ্গললহুকা গৰু;

দ্ৱে ৱিঘাসা সাটিকা চ, সমণচীৱৰেন চ.

সমপঞ্ঞাসিমে ধম্মা, ছহি ঠানেহি জাযৰে;

কাযতো ন ৱাচাচিত্তা, ৱাচতো ন কাযমনা.

কাযৱাচা ন চ চিত্তা [ন চিত্ততো (সী. স্যা.)], কাযচিত্তা ন ৱাচিকা [ন ৱাচতো (সী. স্যা.)];

ৱাচাচিত্তা ন কাযেন, তীহি দ্ৱাৰেহি [তীহি ঠানেহি (স্যা.)] জাযৰে.

ছসমুট্ঠানিকা এতে, সঞ্চৰিত্তেন সাদিসা.

সঞ্চৰিত্তসমুট্ঠানং নিট্ঠিতং.

৪. সমনুভাসনাসমুট্ঠানং

২৬১. ভেদানুৱত্তদুব্বচ, দূসদুট্ঠুল্লদিট্ঠি চ;

ছন্দং উজ্জগ্ঘিকা দ্ৱে চ, দ্ৱে চ সদ্দা ন ব্যাহৰে.

ছমা নীচাসনে ঠানং, পচ্ছতো উপ্পথেন চ;

ৱজ্জানুৱত্তিগহণা, ওসাৰে পচ্চাচিক্খনা.

কিস্মিং সংসট্ঠা দ্ৱে ৱধি, ৱিসিব্বে দুক্খিতায চ;

পুন সংসট্ঠা ন ৱূপসমে, আৰামঞ্চ পৱাৰণা.

অন্ৱদ্ধং [অন্ৱদ্ধমাসং (সী. স্যা.)] সহ জীৱিনিং, দ্ৱে চীৱৰং অনুবন্ধনা;

সত্ততিংস ইমে ধম্মা, কাযৱাচায চিত্ততো.

সব্বে একসমুট্ঠানা, সমনুভাসনা যথা.

সমনুভাসনাসমুট্ঠানং নিট্ঠিতং.

৫. কথিনসমুট্ঠানং

২৬২. উব্ভতং কথিনং তীণি, পঠমং পত্তভেসজ্জং;

অচ্চেকং চাপি সাসঙ্কং, পক্কমন্তেন ৱা দুৱে.

উপস্সযং পৰম্পৰা, অনতিৰিত্তং নিমন্তনা;

ৱিকপ্পং ৰঞ্ঞো ৱিকালে, ৱোসাসাৰঞ্ঞকেন চ.

উস্সযাসন্নিচযঞ্চ, পুৰে পচ্ছা ৱিকালে চ;

পঞ্চাহিকা সঙ্কমনী, দ্ৱেপি আৱসথেন চ.

পসাখে আসনে চেৱ, তিংস একূনকা ইমে;

কাযৱাচা ন চ চিত্তা [ন চিত্ততো (স্যা.)], তীহি দ্ৱাৰেহি জাযৰে.

দ্ৱিসমুট্ঠানিকা সব্বে, কথিনেন সহাসমা.

কথিনসমুট্ঠানং নিট্ঠিতং.

৬. এড়কলোমসমুট্ঠানং

২৬৩. এড়কলোমা দ্ৱে সেয্যা, আহচ্চ পিণ্ডভোজনং;

গণৱিকালসন্নিধি, দন্তপোনেন চেলকা.

উয্যুত্তং সেনং [উয্যুত্তং ৱসে (স্যা.)] উয্যোধি, সুৰা ওৰেন ন্হাযনা;

দুব্বণ্ণে দ্ৱে দেসনিকা, লসুণুপতিট্ঠে নচ্চনা.

ন্হানমত্থৰণং সেয্যা, অন্তোৰট্ঠে তথা বহি;

অন্তোৱস্সং চিত্তাগাৰং, আসন্দি সুত্তকন্তনা.

ৱেয্যাৱচ্চং সহত্থা চ, অভিক্খুকাৱাসেন চ;

ছত্তং যানঞ্চ সঙ্ঘাণিং, অলঙ্কাৰং গন্ধৱাসিতং.

ভিক্খুনী সিক্খমানা চ, সামণেৰী গিহিনিযা;

অসংকচ্চিকা আপত্তি, চত্তাৰীসা চতুত্তৰি.

কাযেন ন ৱাচাচিত্তেন, কাযচিত্তেন ন ৱাচতো;

দ্ৱিসমুট্ঠানিকা সব্বে, সমা এড়কলোমিকাতি.

এড়কলোমসমুট্ঠানং নিট্ঠিতং.

৭. পদসোধম্মসমুট্ঠানং

২৬৪. পদঞ্ঞত্ৰ অসম্মতা, তথা অত্থঙ্গতেন চ;

তিৰচ্ছানৱিজ্জা দ্ৱে ৱুত্তা, অনোকাসো [অনোকাসে (সী. স্যা.)] চ পুচ্ছনা.

সত্ত সিক্খাপদা এতে, ৱাচা ন কাযচিত্ততো [কাযচিত্তকা (ক.)];

ৱাচাচিত্তেন জাযন্তি, ন তু কাযেন জাযৰে.

দ্ৱিসমুট্ঠানিকা সব্বে, পদসোধম্মসদিসা.

পদসোধম্মসমুট্ঠানং নিট্ঠিতং.

৮. অদ্ধানসমুট্ঠানং

২৬৫. অদ্ধাননাৱং পণীতং, মাতুগামেন সংহৰে;

ধঞ্ঞং নিমন্তিতা চেৱ, অট্ঠ চ পাটিদেসনী.

সিক্খা পন্নৰস এতে, কাযা ন ৱাচা ন মনা;

কাযৱাচাহি জাযন্তি, ন তে চিত্তেন জাযৰে.

কাযচিত্তেন জাযন্তি, ন তে জাযন্তি ৱাচতো;

কাযৱাচাহি চিত্তেন, সমুট্ঠানা চতুব্বিধা.

পঞ্ঞত্তা বুদ্ধঞাণেন, অদ্ধানেন সহা সমা [সমানযা (স্যা.)].

অদ্ধানসমুট্ঠানং নিট্ঠিতং.

৯. থেয্যসত্থসমুট্ঠানং

২৬৬. থেয্যসত্থং উপস্সুতি, সূপৱিঞ্ঞাপনেন চ;

ৰত্তিছন্নঞ্চ ওকাসং, এতে ব্যূহেন সত্তমা.

কাযচিত্তেন জাযন্তি, ন তে জাযন্তি ৱাচতো;

তীহি দ্ৱাৰেহি জাযন্তি, দ্ৱিসমুট্ঠানিকা ইমে.

থেয্যসত্থসমুট্ঠানা, দেসিতাদিচ্চবন্ধুনা.

থেয্যসত্থসমুট্ঠানং নিট্ঠিতং.

১০. ধম্মদেসনাসমুট্ঠানং

২৬৭. ছত্তপাণিস্স সদ্ধম্মং, ন দেসেন্তি তথাগতা;

এৱমেৱ [তথেৱ (সী. স্যা.)] দণ্ডপাণিস্স, সত্থআৱুধপাণিনং.

পাদুকুপাহনা যানং, সেয্যপল্লত্থিকায চ;

ৱেঠিতোগুণ্ঠিতো চেৱ, একাদসমনূনকা.

ৱাচাচিত্তেন জাযন্তি, ন তে জাযন্তি কাযতো;

সব্বে একসমুট্ঠানা, সমকা ধম্মদেসনে.

ধম্মদেসনাসমুট্ঠানং নিট্ঠিতং.

১১. ভূতাৰোচনসমুট্ঠানং

২৬৮. ভূতং কাযেন জাযতি, ন ৱাচা ন চ চিত্ততো;

ৱাচতো চ সমুট্ঠাতি, ন কাযা ন চ চিত্ততো.

কাযৱাচায জাযতি, ন তু জাযতি চিত্ততো;

ভূতাৰোচনকা নাম, তীহি ঠানেহি জাযতি.

ভূতাৰোচনসমুট্ঠানং নিট্ঠিতং.

১২. চোৰিৱুট্ঠাপনসমুট্ঠানং

২৬৯. চোৰী ৱাচায চিত্তেন, ন তং জাযতি কাযতো;

জাযতি তীহি দ্ৱাৰেহি, চোৰিৱুট্ঠাপনং ইদং;