১. কোসিযসিক্খাপদং

৫৪২. তেন সমযেন বুদ্ধো ভগৱা আড়ৱিযং ৱিহৰতি অগ্গাড়ৱে চেতিযে. তেন খো পন সমযেন ছব্বগ্গিযা ভিক্খূ কোসিযকাৰকে উপসঙ্কমিত্ৱা এৱং ৱদন্তি – ‘‘বহূ, আৱুসো, কোসকাৰকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’ন্তি. তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা অম্হে উপসঙ্কমিত্ৱা এৱং ৱক্খন্তি – ‘বহূ, আৱুসো, কোসকাৰকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’ন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৱস্স হেতু পুত্তদাৰস্স কাৰণা বহূ খুদ্দকে পাণে সঙ্ঘাতং আপাদেমা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ কোসিযকাৰকে উপসঙ্কমিত্ৱা এৱং ৱক্খন্তি – ‘বহূ, আৱুসো, কোসকাৰকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’’ন্তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, কোসিযকাৰকে উপসঙ্কমিত্ৱা এৱং ৱদেথ – ‘বহূ, আৱুসো, কোসকাৰকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’’ন্তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, কোসিযকাৰকে উপসঙ্কমিত্ৱা এৱং ৱক্খথ – বহূ, আৱুসো, কোসকাৰকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতুন্তি. নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৪৩. ‘‘যো পন ভিক্খু কোসিযমিস্সকং সন্থতং কাৰাপেয্য, নিস্সগ্গিযং পাচিত্তিয’’ন্তি.

৫৪৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সন্থতং নাম সন্থৰিত্ৱা কতং হোতি অৱাযিমং.

কাৰাপেয্যাতি একেনপি কোসিযংসুনা মিস্সিত্ৱা কৰোতি ৱা কাৰাপেতি ৱা, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্ব…পে… ইদং মে, ভন্তে, কোসিযমিস্সকং সন্থতং কাৰাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৪৫. অত্তনা ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. অত্তনা ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং.

অঞ্ঞস্সত্থায কৰোতি ৱা কাৰাপেতি ৱা, আপত্তি দুক্কটস্স. অঞ্ঞেন কতং পটিলভিত্ৱা পৰিভুঞ্জতি, আপত্তি দুক্কটস্স.

৫৪৬. অনাপত্তি ৱিতানং ৱা ভূমত্থৰণং ৱা সাণিপাকাৰং ৱা ভিসিং ৱা বিব্বোহনং ৱা কৰোতি, উম্মত্তকস্স, আদিকম্মিকস্সাতি.

কোসিযসিক্খাপদং নিট্ঠিতং পঠমং.