৩. অনিযতকণ্ডং

১. পঠমঅনিযতসিক্খাপদং

ইমে খো পনাযস্মন্তো দ্ৱে অনিযতা ধম্মা

উদ্দেসং আগচ্ছন্তি.

৪৪৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী সাৱত্থিযং কুলূপকো হোতি, বহুকানি কুলানি উপসঙ্কমতি. তেন খো পন সমযেন আযস্মতো উদাযিস্স উপট্ঠাককুলস্স কুমাৰিকা অঞ্ঞতৰস্স কুলস্স কুমাৰকস্স দিন্না হোতি. অথ খো আযস্মা উদাযী পুব্বণ্হসমযং নিৱাসেত্ৱা পত্তচীৱৰমাদায যেন তং কুলং তেনুপসঙ্কমি; উপসঙ্কমিত্ৱা মনুস্সে পুচ্ছি – ‘‘কহং ইত্থন্নামা’’তি? তে এৱমাহংসু – ‘‘দিন্না, ভন্তে, অমুকস্স কুলস্স কুমাৰকস্সা’’তি. তম্পি খো কুলং আযস্মতো উদাযিস্স উপট্ঠাকং হোতি. অথ খো আযস্মা উদাযী যেন তং কুলং তেনুপসঙ্কমি; উপসঙ্কমিত্ৱা মনুস্সে পুচ্ছি – ‘‘কহং ইত্থন্নামা’’তি? তে এৱমাহংসু – ‘‘এসায্য, ওৱৰকে নিসিন্না’’তি. অথ খো আযস্মা উদাযী যেন সা কুমাৰিকা তেনুপসঙ্কমি; উপসঙ্কমিত্ৱা তস্সা কুমাৰিকায সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেসি কালযুত্তং সমুল্লপন্তো কালযুত্তং ধম্মং ভণন্তো.

তেন খো পন সমযেন ৱিসাখা মিগাৰমাতা বহুপুত্তা হোতি বহুনত্তা অৰোগপুত্তা অৰোগনত্তা অভিমঙ্গলসম্মতা. মনুস্সা যঞ্ঞেসু ছণেসু উস্সৱেসু ৱিসাখং মিগাৰমাতৰং পঠমং ভোজেন্তি. অথ খো ৱিসাখা মিগাৰমাতা নিমন্তিতা তং কুলং অগমাসি. অদ্দসা খো ৱিসাখা মিগাৰমাতা আযস্মন্তং উদাযিং তস্সা কুমাৰিকায সদ্ধিং একং একায ৰহো পটিচ্ছন্নে আসনে অলংকম্মনিযে নিসিন্নং. দিস্ৱান আযস্মন্তং উদাযিং এতদৱোচ – ‘‘ইদং, ভন্তে, নচ্ছন্নং নপ্পতিৰূপং যং অয্যো মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেতি. কিঞ্চাপি, ভন্তে, অয্যো অনত্থিকো তেন ধম্মেন, অপিচ দুস্সদ্ধাপযা অপ্পসন্না মনুস্সা’’তি. এৱম্পি খো আযস্মা উদাযী ৱিসাখায মিগাৰমাতুযা ৱুচ্চমানো নাদিযি. অথ খো ৱিসাখা মিগাৰমাতা নিক্খমিত্ৱা ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উদাযি, মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৪৪৪. ‘‘যো পন ভিক্খু মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেয্য, তমেনং সদ্ধেয্যৱচসা উপাসিকা দিস্ৱা তিণ্ণং ধম্মানং অঞ্ঞতৰেন ৱদেয্য – পাৰাজিকেন ৱা সঙ্ঘাদিসেসেন ৱা পাচিত্তিযেন ৱা, নিসজ্জং ভিক্খু পটিজানমানো তিণ্ণং ধম্মানং অঞ্ঞতৰেন কাৰেতব্বো – পাৰাজিকেন ৱা সঙ্ঘাদিসেসেন ৱা পাচিত্তিযেন ৱা যেন ৱা সা সদ্ধেয্যৱচসা উপাসিকা ৱদেয্য, তেন সো ভিক্খু কাৰেতব্বো. অযং ধম্মো অনিযতো’’তি.

৪৪৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী, ন যক্খী ন পেতী ন তিৰচ্ছানগতা. অন্তমসো তদহুজাতাপি দাৰিকা, পগেৱ মহত্তৰী.

সদ্ধিন্তি একতো.

একো একাযাতি ভিক্খু চেৱ হোতি মাতুগামো চ.

ৰহো নাম চক্খুস্স ৰহো, সোতস্স ৰহো. চক্খুস্স ৰহোনাম ন সক্কা হোতি অক্খিং ৱা নিখণীযমানে ভমুকং ৱা উক্খিপীযমানে সীসং ৱা উক্খিপীযমানে পস্সিতুং. সোতস্স ৰহোনাম ন সক্কা হোতি পকতিকথা সোতুং.

পটিচ্ছন্নং নাম আসনং কুট্টেন ৱা [কুড্ডেন ৱা (সী. স্যা.)] কৱাটেন ৱা কিলঞ্জেন ৱা সাণিপাকাৰেন ৱা ৰুক্খেন ৱা থম্ভেন ৱা কোত্থড়িযা ৱা যেন কেনচি পটিচ্ছন্নং হোতি.

অলংকম্মনিযেতি সক্কা হোতি মেথুনং ধম্মং পটিসেৱিতুং.

নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৱা হোতি উপনিপন্নো ৱা. ভিক্খু নিসিন্নে মাতুগামো উপনিসিন্নো ৱা হোতি উপনিপন্নো ৱা. উভো ৱা নিসিন্না হোন্তি উভো ৱা নিপন্না.

সদ্ধেয্যৱচসা নাম আগতফলা অভিসমেতাৱিনী ৱিঞ্ঞাতসাসনা.

উপাসিকা নাম বুদ্ধং সৰণং গতা, ধম্মং সৰণং গতা, সঙ্ঘং সৰণং গতা.

দিস্ৱাতি পস্সিত্ৱা.

তিণ্ণং ধম্মানং অঞ্ঞতৰেন ৱদেয্য – পাৰাজিকেন ৱা সঙ্ঘাদিসেসেন ৱা পাচিত্তিযেন ৱা. নিসজ্জং ভিক্খু পটিজানমানো তিণ্ণং ধম্মানং অঞ্ঞতৰেন কাৰেতব্বো – পাৰাজিকেন ৱা সঙ্ঘাদিসেসেন ৱা পাচিত্তিযেন ৱা. যেন ৱা সা সদ্ধেয্যৱচসা উপাসিকা ৱদেয্য তেন সো ভিক্খু কাৰেতব্বো.

৪৪৬. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৱন্তো’’তি, সো চ তং পটিজানাতি, আপত্তিযা কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘সচ্চাহং নিসিন্নো, নো চ খো মেথুনং ধম্মং পটিসেৱি’’ন্তি, নিসজ্জায কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘নাহং নিসিন্নো, অপিচ খো নিপন্নো’’তি, নিপজ্জায কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘নাহং নিসিন্নো অপিচ খো ঠিতো’’তি, ন কাৰেতব্বো.

৪৪৭. সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৱন্তো’’তি, সো চ তং পটিজানাতি, আপত্তিযা কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘সচ্চাহং নিপন্নো, নো চ খো মেথুনং ধম্মং পটিসেৱি’’ন্তি, নিপজ্জায কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘নাহং নিপন্নো, অপিচ খো নিসিন্নো’’তি, নিসজ্জায কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৱন্তো’’তি, সো চে এৱং ৱদেয্য – ‘‘নাহং নিপন্নো অপিচ খো ঠিতো’’তি, ন কাৰেতব্বো.

৪৪৮. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কাৰেতব্বো…পে… সচ্চাহং নিসিন্নো নো চ খো কাযসংসগ্গং সমাপজ্জিন্তি, নিসজ্জায কাৰেতব্বো…পে… নাহং নিসিন্নো অপিচ খো নিপন্নোতি, নিপজ্জায কাৰেতব্বো…পে… নাহং নিসিন্নো অপিচ খো ঠিতোতি, ন কাৰেতব্বো.

সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কাৰেতব্বো…পে… সচ্চাহং নিপন্নো, নো চ খো কাযসংসগ্গং সমাপজ্জিন্তি, নিপজ্জায কাৰেতব্বো…পে… নাহং নিপন্নো, অপিচ খো নিসিন্নোতি, নিসজ্জায কাৰেতব্বো…পে… নাহং নিপন্নো, অপিচ খো ঠিতোতি, ন কাৰেতব্বো.

৪৪৯. সা চে এৱং ৱদেয্য – ‘‘অয্যো মযা দিট্ঠো মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসিন্নো’’তি, সো চ তং পটিজানাতি, নিসজ্জায কাৰেতব্বো…পে… নাহং নিসিন্নো অপিচ খো নিপন্নোতি, নিপজ্জায কাৰেতব্বো…পে… নাহং নিসিন্নো, অপিচ খো ঠিতোতি, ন কাৰেতব্বো.

৪৫০. সা চে এৱং ৱদেয্য – ‘‘অয্যো মযা দিট্ঠো মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিপন্নো’’তি, সো চ তং পটিজানাতি, নিপজ্জায কাৰেতব্বো…পে… নাহং নিপন্নো, অপিচ খো নিসিন্নোতি, নিসজ্জায কাৰেতব্বো…পে… নাহং নিপন্নো, অপিচ খো ঠিতোতি, ন কাৰেতব্বো.

অনিযতোতি ন নিযতো, পাৰাজিকং ৱা সঙ্ঘাদিসেসো ৱা পাচিত্তিযং ৱা.

৪৫১. গমনং পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা কাৰেতব্বো. গমনং পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কাৰেতব্বো. গমনং পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কাৰেতব্বো. গমনং পটিজানাতি, নিসজ্জং ন পটিজানাতি, আপত্তিং ন পটিজানাতি, ন কাৰেতব্বো.

গমনং ন পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা

কাৰেতব্বো. গমনং ন পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কাৰেতব্বো. গমনং ন পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কাৰেতব্বো. গমনং ন পটিজানাতি, নিসজ্জং ন পটিজানাতি, আপত্তিং ন পটিজানাতি, ন কাৰেতব্বোতি.

পঠমো অনিযতো নিট্ঠিতো.

২. দুতিযঅনিযতসিক্খাপদং

৪৫২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী – ‘‘ভগৱতা পটিক্খিত্তং মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেতু’’ন্তি তস্সাযেৱ কুমাৰিকায সদ্ধিং একো একায ৰহো নিসজ্জং কপ্পেসি কালযুত্তং সমুল্লপন্তো কালযুত্তং ধম্মং ভণন্তো. দুতিযম্পি খো ৱিসাখা মিগাৰমাতা নিমন্তিতা তং কুলং অগমাসি. অদ্দসা খো ৱিসাখা মিগাৰমাতা আযস্মন্তং উদাযিং তস্সাযেৱ কুমাৰিকায সদ্ধিং একং একায ৰহো নিসিন্নং. দিস্ৱান আযস্মন্তং উদাযিং এতদৱোচ – ‘‘ইদং, ভন্তে, নচ্ছন্নং নপ্পতিৰূপং যং অয্যো মাতুগামেন সদ্ধিং একো একায ৰহো নিসজ্জং কপ্পেতি. কিঞ্চাপি, ভন্তে, অয্যো অনত্থিকো তেন ধম্মেন, অপিচ দুস্সদ্ধাপযা অপ্পসন্না মনুস্সা’’তি. এৱম্পি খো আযস্মা উদাযী ৱিসাখায মিগাৰমাতুযা ৱুচ্চমানো নাদিযি. অথ খো ৱিসাখা মিগাৰমাতা নিক্খমিত্ৱা ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং একো একায ৰহো নিসজ্জং কপ্পেস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং …পে… ‘‘সচ্চং কিৰ ত্ৱং, উদাযি, মাতুগামেন সদ্ধিং একো একায ৰহো নিসজ্জং কপ্পেসী’’তি? ‘‘সচ্চং ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, মাতুগামেন সদ্ধিং একো একায ৰহো নিসজ্জং কপ্পেস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৪৫৩. ‘‘ন হেৱ খো পন পটিচ্ছন্নং আসনং হোতি নালং কম্মনিযং, অলঞ্চ খো হোতি মাতুগামং দুট্ঠুল্লাহি ৱাচাহি ওভাসিতুং. যো পন ভিক্খু তথাৰূপে আসনে মাতুগামেন সদ্ধিং একো একায ৰহো নিসজ্জং কপ্পেয্য, তমেনং সদ্ধেয্যৱচসা উপাসিকা দিস্ৱা দ্ৱিন্নং ধম্মানং অঞ্ঞতৰেন ৱদেয্য – সঙ্ঘাদিসেসেন ৱা পাচিত্তিযেন ৱা. নিসজ্জং ভিক্খু পটিজানমানো দ্ৱিন্নং ধম্মানং অঞ্ঞতৰেন কাৰেতব্বো – সঙ্ঘাদিসেসেন ৱা পাচিত্তিযেন ৱা. যেন ৱা সা সদ্ধেয্যৱচসা উপাসিকা ৱদেয্য তেন সো ভিক্খু কাৰেতব্বো. অযম্পি ধম্মো অনিযতো’’তি.

৪৫৪. ন হেৱ খো পন পটিচ্ছন্নং আসনং হোতীতি অপ্পটিচ্ছন্নং হোতি কুট্টেন ৱা কৱাটেন ৱা কিলঞ্জেন ৱা সাণিপাকাৰেন ৱা ৰুক্খেন ৱা থম্ভেন ৱা কোত্থড়িযা ৱা যেন কেনচি অপ্পটিচ্ছন্নং হোতি.

নালং কম্মনিযন্তি ন সক্কা হোতি মেথুনং ধম্মং পটিসেৱিতুং.

অলঞ্চ খো হোতি মাতুগামং দুট্ঠুল্লাহি ৱাচাহি ওভাসিতুন্তি সক্কা হোতি মাতুগামং দুট্ঠুল্লাহি ৱাচাহি ওভাসিতুং.

যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

তথাৰূপে আসনেতি এৱৰূপে আসনে.

মাতুগামো নাম মনুস্সিত্থী, ন যক্খী ন পেতী ন তিৰচ্ছানগতা, ৱিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

সদ্ধিন্তি একতো.

একো একাযাতি ভিক্খু চেৱ হোতি মাতুগামো চ.

ৰহো নাম চক্খুস্স ৰহো, সোতস্স ৰহো. চক্খুস্স ৰহো নাম ন সক্কা হোতি অক্খিং ৱা নিখণীযমানে ভমুকং ৱা উক্খিপীযমানে সীসং ৱা উক্খিপীযমানে পস্সিতুং. সোতস্স ৰহো নাম ন সক্কা হোতি পকতিকথা সোতুং.

নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৱা হোতি উপনিপন্নো ৱা. ভিক্খু নিসিন্নে মাতুগামো উপনিসিন্নো ৱা হোতি উপনিপন্নো ৱা. উভো ৱা নিসিন্না হোন্তি উভো ৱা নিপন্না.

সদ্ধেয্যৱচসা নাম আগতফলা অভিসমেতাৱিনী ৱিঞ্ঞাতসাসনা.

উপাসিকা নাম বুদ্ধং সৰণং গতা, ধম্মং সৰণং গতা, সঙ্ঘং সৰণং গতা.

দিস্ৱাতি পস্সিত্ৱা.

দ্ৱিন্নং ধম্মানং অঞ্ঞতৰেন ৱদেয্য সঙ্ঘাদিসেসেন ৱা পাচিত্তিযেন ৱা. নিসজ্জং ভিক্খু পটিজানমানো দ্ৱিন্নং ধম্মানং অঞ্ঞতৰেন কাৰেতব্বো – সঙ্ঘাদিসেসেন ৱা পাচিত্তিযেন ৱা. যেন ৱা সা সদ্ধেয্যৱচসা উপাসিকা ৱদেয্য, তেন সো ভিক্খু কাৰেতব্বো.

৪৫৫. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কাৰেতব্বো. সা চে এৱং ৱদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চে এৱং ৱদেয্য – ‘‘সচ্চাহং নিসিন্নো, নো চ খো কাযসংসগ্গং সমাপজ্জি’’ন্তি, নিসজ্জায কাৰেতব্বো…পে… নাহং নিসিন্নো, অপিচ খো নিপন্নোতি, নিপজ্জায কাৰেতব্বো…পে… নাহং নিসিন্নো, অপিচ খো ঠিতোতি, ন কাৰেতব্বো.

সা চে এৱং ৱদেয্য – ‘‘অয্যো মযা দিট্ঠো নিপন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কাৰেতব্বো…পে… সচ্চাহং নিপন্নো, নো চ খো কাযসংসগ্গং সমাপজ্জিন্তি, নিপজ্জায কাৰেতব্বো…পে… নাহং নিপন্নো, অপিচ খো নিসিন্নোতি, নিসজ্জায কাৰেতব্বো …পে… নাহং নিপন্নো, অপিচ খো ঠিতোতি, ন কাৰেতব্বো.

সা চে এৱং ৱদেয্য – ‘‘অয্যস্স মযা সুতং নিসিন্নস্স মাতুগামং দুট্ঠুল্লাহি ৱাচাহি ওভাসন্তস্সা’’তি, সো চ তং পটিজানাতি, আপত্তিযা কাৰেতব্বো. সা চে এৱং ৱদেয্য – ‘‘অয্যস্স মযা সুতং নিসিন্নস্স মাতুগামং দুট্ঠুল্লাহি ৱাচাহি ওভাসন্তস্সা’’তি, সো চে এৱং ৱদেয্য – ‘‘সচ্চাহং নিসিন্নো, নো চ খো দুট্ঠুল্লাহি ৱাচাহি ওভাসি’’ন্তি, নিসজ্জায কাৰেতব্বো…পে… নাহং নিসিন্নো, অপিচ খো নিপন্নোতি, নিপজ্জায কাৰেতব্বো…পে… নাহং নিসিন্নো, অপিচ খো ঠিতোতি, ন কাৰেতব্বো.

সা চে এৱং ৱদেয্য – ‘‘অয্যস্স মযা সুতং নিপন্নস্স মাতুগামং দুট্ঠুল্লাহি ৱাচাহি ওভাসন্তস্সা’’তি, সো চ তং পটিজানাতি, আপত্তিযা কাৰেতব্বো…পে… সচ্চাহং নিপন্নো নো চ খো দুট্ঠুল্লাহি ৱাচাহি ওভাসিন্তি, নিপজ্জায কাৰেতব্বো…পে… নাহং নিপন্নো, অপিচ খো নিসিন্নোতি, নিসজ্জায কাৰেতব্বো…পে… নাহং নিপন্নো, অপিচ খো ঠিতোতি, ন কাৰেতব্বো.

৪৫৬. সা চে এৱং ৱদেয্য – ‘‘অয্যো মযা দিট্ঠো মাতুগামেন সদ্ধিং একো একায ৰহো নিসিন্নো’’তি, সো চ তং পটিজানাতি, নিসজ্জায কাৰেতব্বো…পে… নাহং নিসিন্নো, অপিচ খো নিপন্নোতি, নিপজ্জায কাৰেতব্বো…পে… নাহং নিসিন্নো, অপিচ খো ঠিতোতি, ন কাৰেতব্বো.

সা চে এৱং ৱদেয্য – ‘‘অয্যো মযা দিট্ঠো মাতুগামেন সদ্ধিং একো একায ৰহো নিপন্নো’’তি, সো চ তং পটিজানাতি, নিপজ্জায কাৰেতব্বো…পে… নাহং নিপন্নো, অপিচ খো নিসিন্নোতি, নিসজ্জায কাৰেতব্বো…পে… নাহং নিপন্নো, অপিচ খো ঠিতোতি, ন কাৰেতব্বো.

অযম্পীতি পুৰিমং উপাদায ৱুচ্চতি.

অনিযতোতি ন নিযতো, সঙ্ঘাদিসেসো ৱা পাচিত্তিযং ৱা.

৪৫৭. গমনং পটিজানাতি নিসজ্জং পটিজানাতি আপত্তিং পটিজানাতি, আপত্তিযা কাৰেতব্বো. গমনং পটিজানাতি নিসজ্জং ন পটিজানাতি আপত্তিং পটিজানাতি, আপত্তিযা কাৰেতব্বো. গমনং পটিজানাতি নিসজ্জং পটিজানাতি আপত্তিং ন পটিজানাতি, নিসজ্জায কাৰেতব্বো. গমনং পটিজানাতি নিসজ্জং ন পটিজানাতি আপত্তিং ন পটিজানাতি, ন কাৰেতব্বো.

গমনং ন পটিজানাতি নিসজ্জং পটিজানাতি আপত্তিং পটিজানাতি, আপত্তিযা কাৰেতব্বো. গমনং ন পটিজানাতি নিসজ্জং ন পটিজানাতি আপত্তিং পটিজানাতি, আপত্তিযা কাৰেতব্বো. গমনং ন পটিজানাতি নিসজ্জং পটিজানাতি আপত্তিং ন পটিজানাতি, নিসজ্জায কাৰেতব্বো. গমনং ন পটিজানাতি নিসজ্জং ন পটিজানাতি আপত্তিং ন পটিজানাতি, ন কাৰেতব্বোতি.

দুতিযো অনিযতো নিট্ঠিতো.

৪৫৮. উদ্দিট্ঠা খো আযস্মন্তো দ্ৱে অনিযতা ধম্মা. তত্থাযস্মন্তে পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থাযস্মন্তো; তস্মা তুণ্হী, এৱমেতং ধাৰযামীতি.

তস্সুদ্দানং –

অলং কম্মনিযঞ্চেৱ, তথেৱ চ নহেৱ খো;

অনিযতা সুপঞ্ঞত্তা, বুদ্ধসেট্ঠেন তাদিনাতি.

অনিযতকণ্ডং নিট্ঠিতং.